Inlahen La-en Yik Tanīnöṙô
11 Ngaich yik tanīnöṙô tö yik prötör aṅ Yūta nö hang inlahen yik tahëng mihëṅṙö nö hō-en ngam ṙô ngam Tēv. 2 Lökten, hē Pītör nö yih nö i Yērūsalem ngaich yik kamëtö hinòlṙen ngam tunnyinyngö nö ötlēḵköṙôre* tö ò, 3 nö ngö ṙô: “Chuh patī më tarik më-eṅ, më töt tunyinyi ngaich holkūö cha më-eṅ inrē öm nyā.” 4 Vë-eny nang cha ngaich ang Pītör tö minë inlahngen ò nö löktökūö raneh ṙô nö mikahtö elnang cha nö ngö ṙô:
5 “Hē chu im panam Yāfā öich vë-ekūötēv, chaṙīvi ngaich chū-ö ngaich meuk ök tö hěng heūvö. Meuk ök tö sā* inlahen tökiröng kinṙum chū-ö nö löktö el halīöngö nö yônti nö chuh lātaṙeū, fën lā-a kinṙapka nang angū-ö ngaich hayôntu nö ing panam, höng röhta takô angū-ö nö in chu. 6 Ngaich hē chu chumkūöṙen öich ngëichken e, keuheūttöre mihëṅṙö nuk töṙeūla* aṅ ing panam nö ël e, töṙeūla aṅ el inchōnngö hēk minë ṙameul nö el tumlat hēk minë chehechōn kumteū nö lātulöng. 7 Ngaich hang ök ṙô chū-ö inrē, ök tö ngö ṙô: ‘Pītör, choholre man, ngaich fël nyā-aṅkūöre!’ 8 Ngö ṙô pöri Chū-ö: ‘Hö-ö Mā, hö-ö, öt tö hěngheuh chin öich nyā-avkūö tö minë töhuich hēk töthet.’ 9 Ngö ṙô hēk ök ṙô ik innëtö nö löktö el halīöngö nö in chu: ‘Uh man huich ngö ṙô tö minë chehen, minë tö ahetlöng tö ngam Tēv.’ 10 Ngatī inlahen hēk angū-ö im linūöi heuh e, havanlöng ngaich anū-ö nö ṙòkhöre nö chuh el halīöngö. 11 Im hē e ngaich yik tö lūöi tak tarik nö söktöhëich nö ikūö ngam patī chūök ih öi iyöng, tö tīntu cha-a nö chuh in chu nö lamöktö Kaisarī. 12 Ngaich vë-eny nang chu ngam töhet kumlēḵ tö chu mihôiṅ öich öt piyu-en öich holröön cha nö kiröönngöre. Holröön chu inrē vē tö tafūöl tak prötör ngaich chuh patī ök tarik īhö.
13 Ngaich vë-eny nang ih anga-aṅ töre nö meuk ök tö hěngtak ma-ahānga tö söktöhëich nö i patī ò ngaich ngö ṙô nö in ò: ‘Tīnngö tarik man chuh Yāfā nö lukken Sīmōn öp tö Pītör invëka inrē, 14 anga-aṅ öp min vamë-eny nang meh tö në ṙô, tö meh hēk tö yip aṅ patī meh min nö ṙòkhöre nö teūngen tö ngam inyööken.’ 15 Ngaich hē Chu pöri öich kaknyö ṙôre öich ṙò-òvö, teungtöre ngaich ngam töhet kumlēḵ nö ikui cha nö sā inlahen e nö in hī ik raneh. 16 Fē-ělre ngaich chū-ö tö ṙô ngam Mā ök ṙô ò misī tö ngö: ‘Höng aṅhtī tö mak ök Yôhan nö kētö ngam vinôkö, ngaich vōkö pöri min yī-ö tö ngam töhet kumlēḵ.’ 17 Lökten, yēḵ ngam Tēv nö kē-ěkūö cha tö ngam töt ṙāyu inlōnti, ngam kahëtö ò nö in hī öi ṙamatö-ellōnre in ngam Mā Yēsū Kristū, ngaich achīö Chū-ö tökô öich asökngen* ngam Tēv?”
18 Hē cha ngaich nö hang në ṙô, öt heuveū-eu ṙô* ngaich cha-a nö kakkö inlahen u, ngaich ngö ṙô cha-a nö ha-öiny ngam Tēv: “Kētö ṙētak më tahëng mihëṅṙö an ngaich ngam Tēv nö havöötö ellōnre, hòṅ cha cha-a inrē nö teūngen tö ngam nômö.”
19 Unôichrit finëlngö Istěfen, hakihtuṙen hēk më tahëng prötör ngaich parātiyö cha-a nö söl Finikē, Saiprös hēk Anti-òk inrē, höng ahangkö ngam ṙô ngam Tēv pöri cha-a nö in yik Yahūti, öt in yik tahëng. 20 Rīkre pöri yik in cha mahaköp aṅ Saiprös hēk Kurēnī yamih nö chuh Anti-òk ngaich vënyö ngam tölöök inhānga inlahen ngam Mā Yēsū nö in yik tarik ṙamô Krīk. 21 In cha inrē ngam kël Yāvē* hēk pōyen inrē yik tarik ṙamatö-ellōnre ngaich tömrit ngam Mā.
22 Hāngö ngam inlahen cha nö söl in ngam māṅ i Yērūsalem ngaich tīnngen Parnapas ngaich cha-a nö chuh Anti-òk. 23 Meuk ngam tökiröng miṙēḵlōn ngam Tēv anga-aṅ hē ò nö teung nö umuh ngaich kirööngen ṙanamlōn anga-aṅ ngaich hareuskö alaha cha nö ṙòkhöre, hòṅ cha nö iṙūöhen nö kô-en ellōn nö köp nö in ngam Mā, 24 pò Parnapas nö tö hěngtak nö tö akaha nö tarik hēk tööḵlö inrē anga-aṅ tö ngam töhet kumlēḵ hēk tö ngam ṙinatö-ellōn inrē. Maṙôngö ngaich yik tarik ṙamatö-ellōnre nö in ngam Mā. 25 Lökten ang Parnapas nö chuh Tārsös, hòṅ ò nö kiröönngöre nö chöhö Sôl. 26 Hē ò ngaich nö kôtökūö tö Sôl, kumten ò ngaich anga-aṅ nö chuh Anti-òk. Unôichrit e anga-aṅ nö hěng samyeūheu rò-òten nö hamūltöre nö el ngam māṅ, ngaich haköpten yik tömaṙôngö tarik nö umuh. Ranehten më mahaköp aṅ Anti-òk angū-ö hē e nö Kristīön invëka nö löktö im inchō-okūöre tö ngam Tēv.
27 Hē u anū-ö sakāmö yik rīkre pròfět aṅ Yērūsalem nö yih nö i Anti-òk. 28 Hěngtak ngaich ök in cha tö Akapös minënyi. Choholre ngaich anga-aṅ nö vënyen ngam tökiröng inyāichö min nö yih nö ikūö minë panam nö ṙòkhöre, nö löktö i inyöökenre tö ngam töhet kumlēḵ. Hē ṙētak sakāmö Klòtīös ön ngih inyāichö. 29 Lökten ngaich yik aṅ Anti-òk mahaköp nö halēn ellōnre nö asā tölngö öptöng kanô-òṅ cha nö hòṅ söömtö minë chehen mineukṙen* nö in yip prötör aṅ Yūta nö inyööken cha, 30 ngaich ngatī inlahen cha-a nö kēten minë chehen nö eltī nā Parnapas nā Sôl ngaich söömngen u cha-a nö lökngö eltī yik minṙöinylen.