Linūöyö chitri Yôhan
1 Lamöktö in ngòh tököiny* ön ngih chitri, lamöö in Kaiyös ngam hanangenlōn chu takô.
2 Më-eṅ töhanghuṙen Kaiyös, vë-ekūötēv chin hòṅ meh örheūheu ṙamlōn in nup töng inlahenre hēk kôlò el alaha inrē nö sā meh töngamuh. 3 Hē më prötör nö chuh in chu nö eūkö inlahen meh tö meh öm köptī tö ngam kanô-en ngaich kirööngen ṙanamlōn chū-ö, kô-en më-eṅ öm lök el talöökö ngam kanô-en. 4 Asuh öp öre hēk tö mööḵngöre tö ngih ṙanamölōn chu, tö chu öich hang inlahen më kūönre nö lök el ngam talöökö kanô-en.
5 Kahōlö, inmeuktö ngam chaniplö meh ön ngih tö meh öm pōyen tī öm in më prötör, pòrô më-eṅ öm töng öt akahakūö sin tö cha. 6 Eūken ngam hanangenlōn meh yin më prötör el ngam māṅ. Hòṅ aṙētu ṙô chū-ö tö meh öm ngatī inlahen öm söömngörit cha yēḵ cha nö kiröönngöre, hòṅ ngam Tēv nö ṙamölōn. 7 Pò cha nö i minë-eny ò nö kiröönngöre hēk öt havëkuvö cha-a nö in yip tarik aṅkūö ngih panam. 8 Lökten ön nö la-en hī tö hī öi hòṅ mötlö minlēḵṙen tö më prötör tö ngatī inlahen, hòṅ hī öi holṙen cha öi tānyö ngam kanô-en.
9 Ōt öp kahūichtö chu el ngam māṅ, öt milēḵṙen pöri ang Tiòtrifēs tö nup töng ṙô ih, ngam tö hòṅ kiröng nö el ngam māṅ. 10 Lökten yēḵ chu min öich yih ngaich chumkūöṙen min chū-ö tö nup inlahen ò, pò ò nö tūölngö minë tötlöng ṙô nö sūöichkö inlahen ih.* Sön pöri anga-aṅ nöng öltöre lōn tö në inlahenre. Öt hěngheuh anga-aṅ nö hameuktö minlēḵṙenre tö më prötör ngaich yip tö hòṅ ngatī inlahen, kalēḵ alaha anga-aṅ nö asökngen cha hēk hòṅ kēnyen cha nö ṙā-ang el ngam māṅ.
11 Kahōlö, uh yin lök in minë tötlöök inchōkūö, lök in minë tölöök pöri inchōkūö, ngòh tölöökö la-en lamöktö in ngam Tēv anga-aṅ, ngòh tötlöökö la-en pöri töt mameuk ngam Tēv anga-aṅ. 12 Ṙòkhöre yin më prötör nö eū inlahen Tēmetriös ngaich meūkö minë tinrīken ò nö asā inlahen ngam kanô-en, rö-ö pön angū-ö ngih tö-eūka tö ih inlahen ò ngaich akahakūö më-eṅ tö ngih aheūkö ih nö tökô-en.
13 Pōyen nup lang kahūichtö chu öich in yīö, hö-ö pöri chū-ö öich lōnu töre öich keuheūtlöre tī öich kūichten u öich aṅhtī tö kinsumkūö kanūich. 14 Maheūṅkku chin töre öich veutta yanīhi öich meukkūö yīö ngaich möl min ayī-ö öi kôtaṙô öi vë-ekūöre.
Ngih ön havëkö chu tö yīö öi teūngen tö ngam lanāmö.
Ṙòkhöre yin vē hol hī aṅhih nö sinlāmu ṙô nö in meh. Sinlāmu ṙô chin öich in yip holre aṅmuh.