Innëtö Chitri Yik Aṅ Kòrin
9 Ngam inlahen mineukṙen yip töhet tarik öt uroh chū-ö öich hòṅ kūichhöti öich in yīö, 2 pöich akahalōn tö yīö öi örheūheu öi hīnöre im inyööken ngaich holtö ineū-eu chū-ö öich vë-eny nang yip prötör aṅ Maketònī, tö më prötör aṅ Akāya nö hěng samyeūheu rò-òten ngaich nö hameuktö ngam kuilōnre nö hòṅ hayööken, ngaich ngam nganötö yīö nö ṙūöhöl alaha yip töpōyen. 3 Ṙën pöri chū-ö öich urěhangen tī öich tīnten më prötör öich in yīö, hòṅ ngam ṙô chu öich eū-eu yīö ngaich uh angū-ö nöng tötkô-en, meūkö pöri yī-ö öi lēntöhëichṙen öi sā ngam ṙô chu tö inlahen yīö öi lēntöhëichṙen. 4 Pön yěn yih min më prötör aṅ Maketònī nö holröön chu öich chuh muh ngaich yěn meūkö yīö min öi öt lēntöhëichṙen ngaich ngam lāinyngen ih öi ṙatö-ellōnre in yīö—rö-ö chin öich ngö ṙô tö yīö—öi aṙē-ěvö min töpòkūö ih. 5 Töt ṙanāngen angū-ö tö lōn chu, tö chu öich ṙūöhöl alaha më prötör nö söömtu nö in yīö hòṅ cha nö halēnlö minë inlōnti kahëtö yīö minë kinlēḵngô yīö öi kēten u, ngatī inlahen min minë kòntripiūsön nö lamöknyö ellōn nö inlōnti, rö-ö nö tinimlö alaha yīö öi kē-ěti.
6 Ngòh mam-iöṅhtīre nö teūichhöti, kūöṅnen hamūl min anga-aṅ, ngòh töpōyen taheūichti pöri, pōyen hamūl min anga-aṅ. 7 Asā ṙôken lōnre an yēḵ ngòh tarik nö kē-ěti hēk un höng kihngen ellōn nö sā tö timlöng alaha, pò ngam Tēv nö hangenlōn tö yip hamòltö ṙanamlōnre nö kē-ěti.
8 Mihôiṅ an ngam Tēv nö hameuktö ngam tökiröng miṙēḵlōnre nö ikui yīö, hòṅ yīö pōyen aṅ in tö nup chehen ngaich nup lōn yīö öi kēken minë tölöök la-en ngaich pōyen anū-ö nö in yīö. 9 (sā kinūichngö e nö ngö: “Öt pinyū-uvṙen tī anga-aṅ nö katöl hēk kē-ěkūö yāich, töt chanuhuvṙen an ngam lanöökö ò.” 10 Pò ngam Tēv nö pōyen tī nö kē-ěkūö ngam tameūich tö ngam kulöl ngaich kē-ěkūö yip nyamā ròtī.) 11 Hakôlöng ṙô yin öi i nup tökeuheūttöre, hòṅ yīö öi im kinë-eti in nup taṙòkhöre ngaich lökten in ngih la-en hī ngam Tēv nö kētu nööinyö. 12 Pön rö-ö ngih la-en nö chö-öinytö yip töng tarīka, chö-öinyten yip töhet tarik pöri, hòṅ cha nö öt hanaktuṙen, ṙën inrē angū-ö nö ngatī kinëken hòṅ ngam Tēv nö ha-öinyö. 13 Ngih la-en rilīf kahëken yīö, löktö in e ngam Tēv nö ha-öinyö, pò ngam tölöök inhānga ahangkö yīö inlahen Kristū, elkatòh e inrē yī-ö ngaich holtö ellōnre yī-ö öi kētö kòntripiūsön öi chö-öinyten cha hēk chö-öinytö taṙòkhöre inrē. 14 Peuinyhökūö ngam Tēv cha-a nö chö-öinyten tö yīö hēk hangenlōn inrē tö yīö, pò ngam tökiröng takô miṙēḵlōn ngam Tēv nö in yīö.
15 Kētö nööinyö ngam Tēv yin, tökūö ngam töt ṙāyu inlōnti töt insā-avö.