Raneh Chitri Timôtī
2 Lökten Chin urěh öich hòṅ aṙētu ṙô tö yīö öi im vinë-ekūötēv, vinë-elkui, peuinyhökūö hēk kinëtö nööinyö öi im vinë-ekūötēv öi chö-öinyten yip tökeuheūttöre mihëṅṙö tarik, 2 vë-elkui yip rācha hēk tö yip taṙòkhöre inrē tömarò-òl chūök kamngö,* hòṅ hī holtö lanāmöre hēk holtö kumchikṙenre öi im inhööinyö ngam Tēv. 3 Tölöök angū-ö nö imat ngam Tēv Mahayööken hī hēk töhō-ov inrē tö ò, 4 angū-ö ön ngih kuilōn ò tö yip taṙòkhöre tarik nö teūngen tö inyöökenre hēk teūngen inrē tö ngam tölöng mikah elmatre tö inlahen ngam kanô-en. 5 Töng hěngtak an ngam Tēv ngaich töng hěngtak inrē ngam mahayööken, nö elhôi ngam Tēv hēk elhôi tarik inrē, tö ngö manah ngam tö hěngtak tarik, Kristū Yēsū, 6 ngam kamëngö nômöre töpòkūö taṙòkhöre* tarik, tökò-òre tī nö kētö ṙāi ngam ṙinānyö ngaich lööngö ṙētak min öp ameūken ngih ṙô. 7 Angū-ö ngih tö hòṅ vënyu tö chu, lökten öich vīlöng öich tö hěngtak öich ma-ahangkö ngih ṙô hēk tanīnöṙô. Kò-òṙô Chin, vīlöng Chin öich mahaköpten më tahëng mihëṅṙö tö inlahen ngam ṙinatö-ellōn hēk inlahen ngam kanô-en.
8 Lökten Chin öich lōnu tö yip tö chiplö tarik nö keuheūtngöre chūök ngaich iṙūöhen nö hachônglö këlre nö im vinë-ekūötēv hēk un holtö lanīnöre, un rēhěn nö holtö linā-alkūöre. 9 Ngatī inlahen vē kikānö nö hòṅ akahakūö töp tölngöre hēk lööngö mufē* nö hòṅ hanyöötöre tö minë tövāi* chinhënen, un rēhěn nö nup töṙōlkangen inlahen vīni-i keūyö, sunna hēk töpōiṙāi tasëhe hēk nup chehen inrē töpōiṙāi, 10 hòṅ hanyöötöre cha-a nö löktö in minë tölöök la-en, pön tö hòṅ ngatī inlahen vē kikānö vamë-enyre nö ha-öiny ngam Tēv.
11 Hökngen ngòh tö hěngtak kikānö nö harūnöre nö lām* nö hameuktöre nö tumṙeūtöre. 12 Öt halöngten ngòh kikānö chin nö haköphöti hēk chööngu nö ikui ngam kikōnyö, höng hòṅ īnu pöri tö ngam lanāmö.* 13 Pò Ātöm nö urěh nö vīlöng ngaich unôichrit ò ang Ēva nö vīlöng. 14 Ngaich öt Ātöm tö fukta nö im inchīlö, ngam kikānö pöri tö fukta nö im inchīlö ngaich vīngöre nö tö fāluṙen. 15 Öt fehnguṙen pöri min ngòh tö hěngtak yöngnyīö yěn kayônyö nyīö, höng hòṅ köptī pöri anga-aṅ* tö ngam ṙinatö-ellōnre, hanangenlōn, hanëtö, hěnghöre ngam tölöng mufēre.*