I minë-eny Taitös
3 Iṙūöhen fēḵlen cha nö tumṙeūtöre tö më mahayöng hēk tö më tö chööngu hēk örheūheu hang chööngö cha ngaich hīnöre nö la-evṙen tö minë tölöök la-en, 2 un ṙôtö nup ṙô sinūöichlö inlahen tahëng, un lama-alkūö, mahameuktö minlēḵṙenre hēk holtö ṙanëmenre nö in yip taṙòkhöre. 3 Pöi ngatī inrē sin ayī-ö misī töng kulō-ovö, öt hamang chööngö, lō-ongkūö, haköövö tö nup tö ṙōlkangen kuilōn, im intööḵönglōn, iṙūöhen in minë ötlanöökö, im ranāinyngö, in minë sin-òkkūö hēk kunyaha elmat tö höö.
4 Kūö ngam miṙēḵlōn ngam Tēv pöri, ngam Mahayööken hī hēk hameuktö ngam hanangenlōnre anga-aṅ nö i taṙòkhöre tarik 5 (rö-ö nö kūö hī öi löökö la-en, kūö ngam neūkölōn ò pöri), ngaich löktö in ngam mak* anga-aṅ nö kē-ěkūö hī tö ngam nômö hēk löktö in ngam töhet kumlēḵ anga-aṅ nö hayööken hī nö tumfömlen hī. 6 Löktö im Mahayööken hī ang Yēsū Kristū tī anga-aṅ nö pōyen* tī nö ṙöstö kui hī tö ngam töhet kumlēḵ, 7 hòṅ hī öi kaheūkö öi löök öi löktö in ngam tökiröng miṙēḵlōn ò ngaich unôichrit e öi vītu amin öi im tö örheūheu-aṅ nômö.
8 Mihôiṅ in öi ṙatö-ellōnre öi in në ṙô ngaich lōnu Chū-ö tö meh öm iṙūöhen öm kumlēḵlö ṙôre tö u, hòṅ yip ṙamatö-ellōnre nö in ngam Tēv, nö iṙūöhen nö chumkūöṙen nö in nup tölöök la-en. Tövai hēk tö yöölen tī nun në ṙô tö yip tarik.
9 Ṙūöhöngre pöri tö minë ṙô tö tööḵlö tö kumlō-ovö, michaplö hēk kamil ṙôre nö chö-öinytö ngam Chööngö hēk lama-alkūöre, pöi öt yöölen öi löktö in u hēk höng yanëḵngen inrē anū-ö. 10 Yěn ōt tarik ṙamūöhlö alaha nup krup ngaich hěng nët heuh ṙô öm mikahtö elnang* ò, ngaich unôichrit e öm ṙāngenre öm hanôlken ò, 11 öm akahalōn tö ngam tarik nö ṙāngen ngam tölöng talöökö ngaich iṙūöhen nö im tökööl ngaich höng kahngenre anga-aṅ nö vītöre nö tö fāluṙen.
12 Yēḵ Chu min öich tīnten nā Artēmas nā Tikikös nö chuh in meh ngaich pītnyöre më-eṅ öm chuh in Chu öm i Nikōpòlis, pò Chu ngaich öich kēḵ fëslare öich hòṅ iyöng in e hē ṙētak öp laneūichö. 13 Ngaich kēten minë taṙòkhöre chehen nö in Sēnas ngam tö akahakūö tö ngam chööngö hēk Apòlös inrē minë tötṙanāngen lōn cha chehen nö im kinröönngö cha hòṅ cha nö öt hanaktuṙen. 14 Hòṅ yip tarik hī nö harunöre nö la-evṙen tö minë tölöök la-en ngaich hayööken yip tarik hē el ṙētak kanihngen hēk un vī-ire nö ṙahata.*
15 Sinlāmu ṙô yin nö yīö vē tarik mi-in chu. Sinlāmu ṙô Chin inrē öich in yip tarik yip tö hangenlōn takô tö hī öi im ṙinatö-ellōn.
Örheūheu an yēḵ nö köp ngam tökiröng miṙēḵlōn ngam Tēv nö ikui yīö öi ṙòkhöre.