I minë-eny Heprāi
8 Ngih ön ṙô tö mötlö nö in ngih kahakkö hī, tö hòṅ ngatī inlahen ön ngòh mākūö kūönṙô hī ngaich el halīöngö anga-aṅ nö ūichhak nö lahāmö ngam kantēra ngam Tökiröng Rācha. 2 Tövīlöng anga-aṅ nö mameukṙen* ngam töhet chūök hēk ngam tökô-en inrūkui ngam töt asöklöng tö tarik, asöklöng pöri tö Yāvē.* 3 Tövīlöng yin vē mākūö kūönṙô nö kētö nup inlōnti hēk nup tökētu inrē lökten ngòh kūönṙô nö tö hòṅ urööṙen nö aṅhavin tö nup kahëtöre. 4 Yēḵ ò öre nö ing panam ngaich öt kūönṙô öre anga-aṅ, pön höng ōt ngaich më mākūö kūönṙô nö ihih nö kamëtö nup tökētu inlōnti nö sā ngam Chööngö. 5 Nup töhet la-en tö kēkaṙen tö cha, höng insā hēk nyat nup chehen anū-ö el halīöngö, sā inlahen vinë-eny nang Môsös ik ṙētak hē ò nö hòṅ rultenre nö vīlö ngam inrūkui. Kētö ngih chööngö ngam Tēv nö in ò nö ngö ṙô: “Chumkūöṙen tö në taṙòkhöre chehen, nö hòṅ ngatī vinī-i nö sā ngam inchōten meh ngam tö hameuktu nö ikui ngih rôngö nö in meh.” 6 Ngaich pöri töngamuh ang Yēsū nö vīlöng nö tö mötlö inlahen nö mameukṙen* pön anga-aṅ inrē hamòlṙen ngam kinlēḵngô ngam tö mööḵlö tö ngam raneh kinlēḵngô hēk lamökngörit in minë tö ěhten kinlēḵngô nö asā ngam Chööngö.
7 Yěn öt tövaichu öre nö in ngam raneh kinlēḵngô ngaich öthō öre öi lōnu tö ngam innëtö kinlēḵngô. 8 Pò ngam Tēv nö löktö in nup ṙôre nö chöh vanāichö yip tarik nö ngö ṙô: “Ngö ṙô ang Yāvē,* ‘Yěh meuk! Yih an ngam sakāmö, hē chu min öich vītö ngam tufömngöre kinlēḵngô öich in më aṅ patī Israel hēk in më aṅ patī Yūta inrē. 9 Öt sā ngam kinlēḵngô Chu angū-ö öich in yik muvöhngö cha ik sakāmö hē Chu öich sarōk kël cha öich kēnyen cha nö ṙā-ang im panam Aikup.’ Ngö ṙô ang Yāvē,* ‘Öt köp cha-a nö in ngam kinlēḵngô Chu, lökten chin ṙāngenre öich chumkūöken cha.’”
10 “Ngö ṙô ang Yāvē,* ‘unôichrit u anū-ö sakāmö angū-ö ön ngih kinlēḵngô vahītö Chu in yip aṅ patī Israel. Chaphöt ngih chööngöre chū-ö min nö elkui cha hēk kūichhöt e nö ellōn cha, Tēv Cha min chū-ö ngaich tarik chu min cha-a.
11 Ngaich öt hěngtak min mu-unôichrit e nö haköpten yip tarik aṅ panamre hēk holmaneukre nö ngö ṙô: “Mihaktökūöre tö Yāvē!”* Pön löktökūö i tökūöṅnö söl i tökiröng min nö ṙòkhöre nö akahakūö tö chu. 12 Hameuktö neūkölōnre min Chū-ö öich in cha ngaich öthō hēk min Chū-ö öich afēken nup tötlöök la-en cha hēk tökööl cha.’”
13 Ngatī inlahen anga-aṅ nö kakken ngam “tufömngöre kinlēḵngô” nö rökngen ngam mu-urěh kinlēḵngô. Ngaich ngam törökiṙen, hötṙehngöre angū-ö ngaich nöng hòṅ chuhngöre inrē.