Ṙatö-ellōnre Man Tö Meh Min Öt Kò-òngvah Ip Manāngen Ngih Panam

Röhten kinëngö min minë tövaich tinlööken, ngaich yēḵ minë inyööngö min nö la-al më tarik ngam Tēv. Hē e min ngam manööyö Yāvē nö hö-övö. Pò-ò min nö ha-etngen yip tötlöök im Armakētòn ngam. Meūka in ayī-ö Kristīön tö öp ṙētak yěn hameuktö ngam kumlēḵ min ang Yāvē.

Hö-ö in töngamuh keūheutlöre mikahkūö tö inlahen ngam tökiröng kanihngen. Tö sā hī öi öt akahakūö töp ranulten e hēk asūp lāinyngen minë tinlööken min nö kiyungö tö minë mahayöng. Öt akahakūö inrē ayī-ö töp rò-òten cha nö lökṙen më tarik ngam Tēv hēk sitih inlahen inrē nö la-al cha. Öt akahakūö inrē ayī-ö tö inlahen Yāvē ip ṙētak öp Armakētòn nö sitih inlahen nö ha-etngen yip tötlöök.

Ngam Paipöl pöri kamëtö mikahkūö hī öi holtö nganötöre öi la-al minë yamih kanihgen re. Löktö in ngam Paipöl öi akahakūö töre öi in ngih “manā-aṅ sakāmö.” (2Ti 3:1) Akahakūö inrē ayī-ö tö minë tövaich tinlööken yěn lökṙen höö, ngaich hacheu-eunyö min ngam ṙētak ip hē e, hòṅ ngam tö kô-en tinlööken nö ötkô-òngvah. (Mët 24:22) Akahakūö ayī-ö tö Yāvē min nö laklen yip tarik re. (2Pī 2:9) Akahakūö inrē ayī-ö tö Yāvē nö katöllö öp töhěngtak tökalēḵ nö ma-akah fālen min ip hē ṙētak ngam Armakētòn. In ngih kinyungö tö ngam Tēv min nö ha-etiyö më tötlöök, ngaich laklöng min më tarik tökiröng kiteūm.—Inm 19:11, 15, 16.

Nup tö eūka min ip yamih ṙētak nö ‘öt heuveu-eu ṙô min tarik pön keuheūtnyöre tö pinheṅ-eṅkūöre.’ Ötkô pöri ayī-ö pa-ekūö. Pön in nuk urěh ṙētak ang Yāvē nö laklen yik tarik re ngaich mikahtökūö hī tö inlahen ngam yamih ṙētak, yē hī öi haköp inlahen u hēk fēken u. Yē hī min ngatī inlahen ip ṙētak, ngaich hē e min öi ‘môklökūöre söktöhëichṙen’ hēk ṙinatū-ellōnre inrē min ayī-ö nö röhten ngam ṙinānyö hī ip hē e.—Lū 21:26, 28.