Nya Minë Am Chu Piskit
MI-I YÖNG Amerika nö i Òrekön ang Nik. Ngö ṙô anga-aṅ: “Ik 2014 Örheūheu chu-ö öich havöt kö kuö minë am re. Örheuheu chu-ö meuk kuö meh vamëyen Yāvē öich in e nö söktöhëich nö in ngam kart. Nagich örheūheu chu-ö meūkkö cha nö vayö chinhenen hēk hëtö mineūkö inre, nagich hayiölkö kūö yip töng chamööḵngen re cha-a.
Hangenlōn cha-a tö minë am chu hěngheu Elēn nö söktöhëich nö in ngam kart nö hěngtak nö vamënyen Yāvē ngaich kētö nya-aṅ ngam am chu cha-a tö piskit. Unôichrit e hēk nö lök in e cha-a ngaich tukngen ò ngam am nö chuh in e pön akahalōn min nö teungen tö piskit.
Höng örheūheu öi ngatī inlahen. Pön kuchik kūö ngam am chu nö nya minë piskit ngatī inlahen chu-ö inrē öich rahëichtakūö öich vë-ekūö cha pò chu öt akahakūö tö ṙinatö-ellōn më vamënyen Yāvē. Ngaich chin öich pōyen tö tö sat anāi samyeūheu. Ngaich kunngöre ngam ṙinatö-ellōn chu öich chuh el keurcha lökten ngaich öich öt haköp mat Paipöl.
Ngatī inrē chū-ö öich meuk yip vamënyen Yāvē nö tahëngö kamngö. Söktöhëich cha-a nö kart vitnësing nö vayö ṙô nö vë-ekūö më tahëng. Nup hatöön chu ngaich löknyö Paipöl cha-a nö kētö sanapṙô chu. Lökten nö sīöplö ngam ṙinatö-ellōn chu.
Hěngheuh ang Elēn nö hatöönö chu nö ngö ṙô: ‘Chö-öny tö ṙanamlōn hī ang ngam Tēv nö vī në taṙeūla?’ Ngö ṙô chu-ö ‘heuṅ.’ Hameukhömat chu anga-aṅ tö ngam Isayā 11:6-9. Im unôich ngaich chū-ö hòṅ mikahtökūöre tö ngam Paipöl. Ṙöngmöng piyu-en pöri chū-ö öich kē minë līpöre öich in më vamënyen Yāvē.
Unôichrit e ngaich ang Elēn tö ngam pihöre Prēn nö vë-ekūö re. Haköplu chu-ö öich in minë ṙô ngam Paipöl pòrô öi hòṅ rahëichtaṙô öi vë-ekūöre. Hōtu chu-ö öich vë-ekūö minë līpöre Mëtiv söl im līpöre Inlahen, in e mikahkūö min chū-ö öich nö sitih manah ngam inlahen chū-ö mahaköp öich in Kristū. Vë-ekūö e ngaich chu-ö. Ngaich kē-ě istötī ngaich chū-ö tö Prēn nā Ilēn. Ik 2016 ngih inlahen chu.
Ṙamlōn chū-ö yěich kē istötī hēk chuh el mīting kahök afta. Hē e chū-ö öich akahakūö tö ṙô ngam Paipöl, Pōyen ṙanamlōn chū-ö. Unôichrit tö hěng samyeūheu chū-ö kē ngam vinôkö ngaich chū-ö öich kaheukkö vamënye Yāvē. Mihôiṅ chin ngaich öich ngatī ṙô öich ing ṙēḵtire 79 samyeūheu öich teungen tö ngam tö kô-en talöökö. Ha-öinyö Yāvē chin pò ò nö hanôlhöt chu nö in ngam mikūönö ò.”