Hatön Meh

Ihē öng min ngam inhangkö ngam tölöök inhānga nö asökiröön?

Ngö ṙô misī ang Yēsū, “Ahangka min ngih tölöök inhangkö ngam Pūlngö nö i në taṙòkhöre panam nö inmeukhömat taṙòkhöre tarik, ngaich möl min öp manāngen nö yih.” (Mët. 24:14) Ngam ṙô “manāngen” tö traslētö nö i ëlô Krīk nö in ngih miröökö hēk tö ngam tö 6 hēk 13 miröökö nö vënyu angū-ö nö, tilōs. Ngam tö ngö manah keuheūtiyö takô nö ahetiyö. In e ayī-ö akahakūö tö në miröökö nö kakkö inlahen ngam Armakētòn, ngam chūök ngih panam ngam Satān min keuheūtiyö nö ahetiyö. (Inm. 16:14, 16) Tö ngö manah, tö hī min höng iṙūöhen ahangkö ngam tölöök inhānga urēhěkūö öp Armakētòn. Angū-ö ön ngih tö tumfömlöng nö mikah elmat hī tö inlahen e.

Ngam urěh sin mikahkūö hī, tö inlahen ngam tölöök inhānga min nö asökiröön, ip ranulten ngam tökiröng ötinkòlô, hē ngam tökiröng Pēpilön min nö ahetiyö. (Inm. 17:3, 5, 15, 16) Lökten in e sin ayī-ö öi ngö ṙô lōn töm ‘töhō-ov samyeūheu Yāvē min nö ngaich nö keuheūt.’ (Isa. 61:2) Ngö ṙô lōn inrē sin ayī-ö tö yip tarik tötkò-òngvah min töp tökiröng ötinkòlô, ngaich urēhěkūö e min cha-a nö hameuktöre nö köp nö löklōn Yāvē. Ngö ṙô lōn sin ayī-ö tö e nö sā inlahen yik tarik, yik tötkò-òngvah nö ik ṙētak pinyāyngö Yērūsalem ik 607 B.C.E. Urěhngöreṙen misī cha-a nö mikahayö, hòṅ cha nö laklöre, kūö cha nö maha-öinyö Yāvē hēk tö sa-òkkūö inrē tö minë tötlöök la-en. (Isi. 5:11; 9:4) Öt sāḵta pöri angū-ö nö im ṙô ngam Mëtiv 24:14, pò hī löktö in ngih miröökö öi akahakūö töm ṙô Yēsū, nö lohten min nö ṙētakvö yip tarik nö hō-en ngam tölöök inhānga urēhěkūö öp manāngen ngih panam.

Tötṙanāngen ngam inlahen hī inrē öi hòṅ tumfömlö ngam mikah elmatre tö ṙô ngam Inmeukhömat 16:21, kūö hī ngaich öi tumfömlöng mikah elmat tö ṙô ngam Mëtiv 24:14. Vënyu nang in in e tö inlahen ngam tö ahangka ngam tö sā ṙēngen nup töchilöl kumṙah lamöktö el halīöngö. Asā inlahen ih öi risörch hēk haköp inlahen e ngaich möl īhö öi akahakūö tö në tönët miröökö nö sāḵta ṙô nö in höö. Nö sitih inlahen? Höng löktö in ngam tinrīken yip tarik in yěn hang ngam inhangköm Pūlngö ṙô hī hēk yěn hö-ö öi akahakūö töp sanapṙô e. Ngö ṙô tī ang tanīnöṙô Pôl nö kūich inlahen e ‘ngam tö ahangka nö sā tö tahūsa angū-ö nö in më tö hòṅ hayöökaṙen, yip kamū-ötö in ngam nômö.’ Ngaich sā ‘töng öt tahūsa pöri angū-ö nö in më tö ahetiyö.’ (2 Kòr. 2:15, 16) Kunyaha elmat cha-a töm tölöök inhangkö ngam Pūlngö, pöi löktö in ngih inhānga öi akahakūö tö ngih chūök cha panam nöng ötlöök, hayöngken cha inrē ngam Satān ngaich veutten inhetngö min cha-a nö ṙòkhöre.—Yôh. 7:7; 1 Yôh. 2:17; 5:19.

Chumkūöṙen inrē tö ṙô ngam Inmeukhömat 16:21 tö inlahen minë töchilöl kumṙah lamöktö el halīöngö nö ‘pōyen sanuktöre’ min. Lökten in e mikahkūö ayī-ö tö ngam la-en inhānga nö lohten min hēk nö ṙūöhlöre inlahen kinëken hēk lohten min nö lökngöre takô yip tarik tö kūö e. Ip hē e min ngam minënyö Yāvē nö hameuknyu nö ikūö ngih panam, ngam töt ngatī inmeuknyi nö inuk urěh ṙētak. (Isi. 39:7) Ngam tö rahëichtit min ṙētak, unôichrit inhetngö ngam Tökiröng Pēpilön, ngaich hē e hòng min yip rīkre tarik nö hang ngam vahënyö hī tölöök inhānga ngaich yihtöre nö in Yāvē? Lohten yip min nö ngatī inlahen. Lohten min cha-a nö fē-ělre hēk hang nö in yip tahëng, tö inlahen më Vamënyen Yāvē nö samyeūheuv ngaich nö ahangkö inlahen minë tö minyôiny tinlööken min nö ahetiyö.

Sā ök inlahen min angū-ö, ök unôichrit nuk tö 10 kanihngen i Āikup. Ik sā Yāvē nö ‘kētö sachā nuk insātēv yik aṅ Āikup,’ ngaich unôichrit e yik tö ‘maṙôngö tarik töt aṅ Israel’ nö kunyi-inyre nö in yik tarik Yāvē. (Man. 12:12, 37, 38) Lohten vë tarik aṅ tahëng panam nö meuk inlahen ngam ṙô Môsös inlahen minë tö söm kanihngen nö kô-en nö teungtökūö, ngaich hēten tö e lohten cha-a nö ṙatö-ellōnre nö in Yāvē.

Yip tarik min ramultenre nö ha-öinyö Yāvē unôichrit ngam manāngen ngam Tökiröng Pēpilön, ngaich ṙētakvö min cha-a nö holṙen më kahëm Yēsū më tö ṙömöng ōt min nö ing panam ip hē e. (Mët. 25:34-36, 40) Kaheūkö min cha-a nö sīṅp. Töng rahëichtakūö pöri min ngam kinëtö ṙētak cha nö ngatī inlahen urěhēkūö öp Armakētòn, hanöng saha yip töhachamö elkui Kristīön nö öl nö teūngen töp raneushöre nö el halīöngö.

Minë kahakkö hī taheūi miröökö in ngih ātiköl, ngaich hēk ayī-ö öi ṙūöhlöre mikah elnang tö ṙô u. Lökten in u hēk ayī-ö öi akahakūö tö Yāvē nö kirööngen hanangenlōn tö hī öi tarik hēk tö tööḵlö inrē anga-aṅ töm neūkölōn. Kô-en takô anga-aṅ, ‘nö öt lōnu tö töhěng hang tak nö ahetiyö, lōnu pöri tö taṙòkhöre nö im invöötö ellōn.’—2 Pīt. 3:9.