Mirūlö 7
Haröhtöre Im Tēv Löktö Im Vinë-ekūötēv
Kūö yòh öng ngam tö-örheūheu vinë-ekūötēv nö töt ṙanāngen? (1)
Hòṅ achīö öp tö hòṅ vë-evkūö tö hī, öi hòṅ sitih inlaha? (2, 3)
Asuh nup tölöng tö havëka tö hī yĕi vë-ekūötēv? (4)
Hòṅ ihē öm vë-ekūötēv? (5, 6)
Hāṅngö ön në vinë-ekūötēv nö ṙòkhöre töm Tēv? (7)
1. Inmeuktö inyāichtò hī an ngam vinë-ekūötēv öi vë-ekūö ngam Tēv. Hòṅ örheūheu man vë-ekūötēv. Angu-ö min lökten meh akahaiṙen tö meh röhta in ò nö sā hol meh. Pòrò Yāvē nö kirööngö mina-aṅ kumlēḵ inrē, sön nö hangihtöre tö nup ṙô hī vë-ekūö Ò! Örheūheu öm me-eṅ ṙung vë-ekūötēv?—Salmai 65:2; 1 Tösalònikē 5:17.
2. Inlahen hī an ngam vinë-ekūötēv öi ha-ööinyan. Lökten, nöng ngam Tēv Yāvē tö hòṅ vë-evkuö. Hē Yēsū misī nö ing panam, örheūheu anga-aṅ nö vë-ekūö ngam yöng re, rö-ö nö vë-ekūö tahëng. Hòṅ ngatī in inrē ayī-ö. (Mëtiv 4:10; 6:9) Hòṅ halöökirit pöri nup ṙô hī vë-ekūötēv nö i minë-eny Yēsū. Inmeuktö minlēḵṙen töm kamtö Yēsū tö hī inrē ṙātö-ellōnre tö ngam inlahen ò nö kēngö nômö re tö pòkūö hī.—Yôhan 14:6; 1 Yôhan 2:1, 2.
3. Yēḵ hī vë-ekūötēv ngaich hòṅ löknyö ellōn hī nup ṙô hī vë-ekūötēv. Öt kô in höng hĕng re ṙô vë-ekūötēv hēk öt kô nup ṙô hī nöng löknyö mat nup līpöre vine-ekūötēv. (Mëtiv 6:7, 8) Mihôiṅ in öi vë-ekūötēv öp töng yòh ṙētak öp töng yòh kamtö yĕi höng lēnö inlahen. Mihôiṅ an nö hang nup töt hāngö ṙô ellōn hī vë-ekūötēv. (1 Samuĕl 1:12, 13) Tölöök an yēḵ hī kanôtukūö töp tö chēvhakṙen chūök re öi ṙônyö nup kanahngenre havëköre im Tēv.—Mākös 1:35.
4. Asuh nup ri tölöng havëkö meh yēḵ meh vë-ekūötēv? I nup tökeuheūttöre nup tökô nö lökngöre tī töm innôlö meh in Ò. (Filipī 4:6, 7) Hachōtu ṙô in vë-ekūötēv öi hòṅ ṙô tö minë-eny Yāvē tö nup kuilōn ò inrē. Mihôiṅ in inrē havëkö nup tö-örheuheu nya-aṅkūö re inṙĕ-ĕl tökööl re hēk havëkö hinòlṙen re inrē öi ui kētu inup kinlaha. (Mëtiv 6:9-13) Öt kô nup ṙô hī vë-ekūötēv nöng tö sā nup lōn hī. Hòṅ tö sā nup lōn ngam Tēv nup havëkö hī yēḵ hī vë-ekūötēv.—1 Yôhan 5:14.
5. Mihôiṅ man höng örheūheu vë-ekūötēv yēḵ ngam el kuilōn meh nö hòṅ ṙôtö nöönyö ngam Tēv. (1 Kinṙötngö 29:10-13) Hòṅ vë-ekūötēv man yēḵ meh īnu tö kanihngen hēk yēḵ ngam ṙinātö ellōn meh nö kalaha tö nup kanihngen. (Salmai 55:22; 120:1) Tölöng an ngam Vine-ekūötēv urĕhĕkūö meh rultenre nya-avkūö. (Mëtiv 14:19) Havëtu in tö Yāvē im vinë-ekūötēv “öi höng örheūheu.”—Efisös 6:18.
6. Hòṅ urööḵlōn in hòṅ vë-ekūötēv yēḵ hī pōihangen köölö fālen. Hē u anu-ö ṙētak öi hòṅ kalĕ-ĕṙô öi havëkö ngam miṙēlōn Yāvē töm inṙēlö nup tökööl hī inrē. Yēḵ hī halöök nyôre tö nup tökööl re öi ikūö ò hēk ma-anyre öi ui hēk öi kēken u, ngaich ngam Tēv nö “hīnöre nö aṙēlen hī.”—Salmai 86:5; Inchōḵoṙô 28:13.
7. Höng yip tölöök tarik yip töhāngöṙô tö Yāvē yĕn vë-ekūötēv. Yēḵ meh lōnu töm Tēv nö hang ṙô hī vë-ekūötēv, ngaich ötkô öi hapungtö uk re tö minë chööngö Ò. (Inchōḵoṙô 15:29; 28:9) Hòṅ hayāichngöre man yēḵ meh vë-ekūötēv. (Lūkös 18:9-14) Hòṅ sāta nup la-en meh nö sā nup ṙô meh vë-ekūötēv. Ngaich hameuktöre min me-eṅ öm tö aṅhav in tö ṙinātö-ellōn öm mahateung nup ṙô re inrē. Ngaich möl min Yāvē nö hang ṙô meh vë-ekūötēv.—Heprāi 11:6.