Mirūlö 10

Nup La-en Sin-òk-kūö Ngam Tēv

Nup la-en tötlöng tö ṙô ngam Tēv hòṅ sitih mufē öm tö u? (1)

Asuh nup chinò-òṅ tövaich? (2)

Hòṅ sitih mat ang ngòh kristīön tarik tö ngam minyônyaṅ? (3)Kinsālö chöö-öiny tö rupīö? (3) unlāyö? (3) Chanökhuṙen? (4) Minlūönö? (5) Hinyōyö? (6)

Sitih inlaha ang ngòh tarik nö tilöhnyöre nö ṙa-ang inup töchōch la-en? (7)

1. Töhāngenlōn yin vē tarik ngam Tēv tö tölöök. Hòṅ harūnöre pöri inrē cha-a nö surīkhö nup töchōich. (Salmai 97:10) Surīkhö tö chōich ngö ṙô in yēḵ hī ṙūöhöng re tö nup sinòkkūö ngam Tēv. Asuh nup anu-ö töngatī la-en?

2. Chinò-òṅ: Në yih chinò-òṅ tövaich nö i mat ngam Tēv, chinò-òṅ urĕhĕkūö pinīhö, insĕha, chinò-òṅ töreūla, sinöötöre i mak alaha ngam chinò-òṅ töt nehngen re inrē. (La-en Lēvī 18:6; Rōma 1:26, 27; 1 Kòrin 6:9, 10) Yēḵ minā tö nët tak nö holtöṙah re nö öt pamīhöre hòṅ harēvngöre cha-a hēk höng löö nöng halöök inlaha re nö hapīhöre.—Heprāi 13:4.

3. Minyônyaṅ, Kinsālö chöö-öiny tö rupīö, unlāyö: Tötkô an ngam Tēv Yāvē nö minyônyaṅ. (Taitös 1:2) Yip tarik tö hòṅ hō-ovö tö ò nö hòṅ tö sumrīk tö minyônyaṅ. (Inchōḵoṙô 6:16-19; Kòlòsī 3:9, 10) Ṙòkhöre nun në kinsālö tö chöö-öiny tö rupīö nö ṙĕh ngam yanālö tö rupīö. Lökten yin vē kristīön nö öt lök i tö ngatī kinsālö, tö sā në lòtri, insōlö kōra hēk pinkō inrē. (Efisös 5:3-5) Öt ulāya yin inrē vē kristīön. Öt tölngen re inrē nö havah nup tö ulāyiyö chehen hēk öt kĕtötī re nö inup töng chehen inrē yĕn öt urĕh nö havëtôre.—Maneutnyi 20:15; Efisös 4:28.

4. Inngëṅtöchōich, chanökhuṙen: Ngam töt ṙanāpen inngëṅṙö an töti-iv tö chanökhuṙen. (Ranehlö 4:5-8) Ötkô yin vē tötainy tarik nö hol ngam Tēv. (Salmai 11:5; Inchōḵoṙô 22:24, 25) Hö-ö an nö tö löng ngam inlaha hī yĕi havahalre, hēk yĕn havahlöng tö chōich tö töchōich nö i tarik yip töhòṅ ngatī tī tö hī.—Inchōḵoṙô 24:29; Rōma 12:17-21.

5. Nyinamkö milūönö hēk minlūönö: Ōt yip tarik mahavëkö kumlēḵre nö halanken tö vahavö nö lök tö i ma-alaha. Ōt yip vamīngen yip kumnyahelmat re nö vahavö hēk vīngen cha nö kapah inrē. Sātan an lökngörit u anu-ö tö ngatī la-en. Lökten yin vē kristīön nö ötkô nö kētöre nö in u anu-ö la-en. (I.Chööngö 18:9-13) Yāvē an tökiröng nö chūök innyatlö hī öi öt pala-aiṙen tö tī yip tarik tö hòṅ vīngen hī.—Inchōḵoṙô 18:10.

6. Hinyōyö: Öt töchōich an ngam inôkö ka-eūt, beer hēk nup töng hiyōyhukūö yēḵ hī höng rahëichvat. (Salmai 104:15; 1 Timòtī 5:23) Tövaich pöri angu-ö nö i mat ngam Tēv yēḵ hī pōivat ka-eūt hēk hiyōi-aṅ inrē. (1 Kòrin 5:11-13; 1 Timòti 3:8) Pōi ötlanööngö an min ngam alaha meh hēk töm mikūönö meh inrē yēḵ meh pōi kūö öm ka-eūt. Kò-òren min inrē angu-ö nö lökngen meh ilööṙen fukngö inup kinlāha meh tö hol meh.—Inchōḵoṙô 23:20, 21, 29-35.

7. Yip tarik maharūnöre nö kēken nup tö ngatī la-en nup töchōich tö ṙô ngam Tēv nö “öt amīnuvö töm pūlngö ngam Tēv.” (Kalatī 5:19-21) Yēḵ meh kò-en hòṅ haṙamlōn ngam Tēv, hòṅ ṙūöhöng re me-eṅ tö nup tö ngatī la-en. (1 Yôhan 5:3) Hòṅ harūnöre öm surīkhö nup sin-òkkūö ngam Tēv. (Rōma 12:9) Hanôl yip tarik yip mumlòhten re nö lök i nup lōn ngam Tēv. (Inchōḵoṙô 13:20) Yanöölen meh an ngam innôlö yip tö sööngö heuneū-en kristīön. (Yaköp 5:14) Samöt löng pöri tö u nö ṙòkhöre, ngam invëkö hinòlṙen re im Tēv öm lökten im vinë-ekūötēv.—Filipī 4:6, 7, 13.

[Kepsön el ngam pēch 20]

Sin òk-kūö ngam Tēv Hin-yōi-aṅ, Unlāiyö, kinsālö chöö-öiny tö rupīö tö nup chanökhuṙen inrē