Yik Tarik Töt Kô-òngvah Tök Ṙanööingö

ASĀ sanīöpö ṙôngö tarik, ngatī sanīöpö në ötlanöökö nö ikūö ngih panam. Enòk ök misī Pròfĕt hē u anū-ö sakāmö. Anga-aṅ vamë-eny ṙô ngam Tēv tö ò min nö piyāingö yip tötlöök tarik, söönen minë ötlanöökö nö iṙūöhöröön sanīöpö, hēk hanṙūöhangen ngam ötlanöökö nö ing panam. Ma-ahānga yik umuh inrē mahalôngen ngam Tēv yik ṙamāngö nuk tö nëhngen re chūök re nö el halīöngö ngach yih nö ing panam nö alaha tö alaha tarik ngach kēḵ pīhöre tö kikānö aṅ ngih panam nöng mahaṙamlōn re. Hakūöntö nyīö ngach cha-a tö yik tökalēḵ hēk tökiröng inrē tarik yik Nefĕlim tö ṙô. Chā-a yik löklö ṙanūölen tinṙōlen misī nö ing panam hĕngöre kumtaknyö mahām yik inrē. Haṙivlōn ngam Tēv nö meuk pinsūngen minë tölöök vahīṙen re.

Unôichrit kinpāha Enòk pöri ök tölöök tarik ök töt nôlhöt nö i minë ötlanöökö, Nō-a ök minë-eny ò. Lamöklōn ngam Tēv ök Nō-a tö yik mikūönö ò inrē. Lökten ngam Tēv nö vī talöökö tī re nö laklö nômö ò tö yik kūön ò hēk tö nuk töṙeūla inrē hòṅ cha nö öt kapah tökūö ök ṙanööingö. Lökten ngam Tēv nö tölṙô Nō-a nö vī ök tökiröng chōng tö fēn mirëṙö. Ël e min chā-a tö nuk tö ṙōlkangen töṙeūla nö öthō nö kô-òngvah tö kūö ök yamih ṙanööingö ngam panam. Hang chööngö ngam Tēv ngach ang Nō-a nö vī ök chōng. Ik rô-òtötī ò nö vī-an eūka anga-aṅ nö “ma-ahangkö lanöökö.” (2 Pītör 2:5) Vë-eny nang yik tarik anga-aṅ tö yanīhih ngam ṙanööingö, öt chumkūöṙen pöri yik tarik tö ṙô ò nö eū-a. Yih ngach ngam ṙētak Nō-a tö yik mikūönö ò hēk tö nuk töṙeūla inrē nö yôklö nö el ök chōng. Ngach unôichrit yanôklö cha nö el ök chōng lööpikūö ngach ök inkūp ök chōng tö ngam Tēv.

Chalôḵ ngach ök tö kalēḵ kumṙah. Ngach ngam ṙanööingö nö fën anāi sakāmö fën anāi hatööm inrē, hanöng saha ngam tumlat nö kahultukui tö ngam mak. Kapah ngach yik tötlöök tarik. Chumngëṅtu rô-angen ngach ik sā ngam mak nö nyôngö, töönglöre ngach ök chōng nö ikui nup rôngö. Unôichrit yanôknyö cha nö ṙa-ang el ök chōng ang Nō-a nö vī tahāklö ngach kētö tö fööngö tökētu nö i kūö ngam Tēv Yāvē. Ngach ngam Tēv nö tong tö tahūsa ngach kilēngôre nö in Nō-a tö yik mikūönö ò inrē tö Ò min nö öt hēk nö rūttö ötinkôlò nö i kui ngam tumlat nö aṅtī tö ṙanööingö. Ṙātö ngam tasēkö ngach Yāvē nö tö meūkö nö minkahngö ngam kinlēḵngô Ò.

Unôichrit ök ṙanööingö hēk ngam Tēv nö kētö tufömngöre chööngö, nö halöngten tarik nö kāḵ alaha nup töṙeūla öt halöngten cha pöri nö kāḵ mahām. Hēk anga-aṅ nö tölṙô yik kūön Nō-a nö pirātngö re nö ikūö ngih panam. In cha pöri yip rēvre töt hamang chööngö ngam Tēv, hamūlöre pöri nö elkatòh inyööngö tö Nimròt, ngach rulten re cha-a nö vī tö marô-òlkui patī ik panam Pëpöl ök tö unôichngöre kinṙeūkö nö Pēpilön, chö-öny tö inlahen cha nö sōḵ nö pirātngö re nö ikūö ngam tumlat nö ṙòkhöre. Kilūöchngö ëlô cha pöri ngam Tēv pön sōten cha nö akaha elnang tö ṙô höö, lökten ngach chā-a nö ṙāngenre nö vīlö ök el panam ngach pirātngöre nö i kūö ngam tumlat.

—Lökngörit im Ranehlö tö 6 mirūlö söl im tö 11; Yūt 14, 15.