Ngam Pròfĕt tö Haköövö tö Hameukhumat tö nup Mu-unôich

IK HĒ Tanīĕl nö ṙòngmöng ayal, kē-ĕ anga-aṅ nö chuh el inköövö nö i Pēpilön urēhĕkūö pinyāingö Yērusalem, hōlu inrē anga-aṅ tö yik tahëng Yahūti. Öt uroho inkihten chā-a tö yik mahaköövö re aṅ Pēpilön. Pōyen inkôlò ang Tanīĕl tö tī ngam Tēv irô-òtö nuk sakāmö ò nö i Pēpilön, ṙāḵlöngö anga-aṅ nö öt kapah nö ṙā-ang elvāng nuk lāyön, hameukhumat inrē anga-aṅ nö löktö el heūvö tö nup yamih ṙētak. Mööḵlö ngam vahënyö ò nö i inlahen ngam Mesayā tö ngam inyööngö inrē tö ò.

Akahalōn ang Tanīĕl tö ṙetak yanihi ngam Mesayā. Unôichrit kinëtö ngam chööngö invanlö minānlö ngam kinlonglö Yērusalem, angu-ö ön ranehtökūö minë tö 69 afta, ṙētak yanihih ngam “töhachāmö elkui” ang Kristū. Sat nun minë sakāmö i tö hĕng afta. Hö-ö pöri angu-ö nö ngatī kinṙeūkö nö in ngih kinlēḵngô, pô ngam töhĕng afta nö kaheūkö nö sā ṙēngen tö sat samyeūheu. Lökten yĕn 7 van kinṙeūkö ngam tö 69 ngach teūngen ayī-ö töm tö 483 samyeūheu. Ihē öng ngam chööngö invanlö minānlö Yērusalem nö kētu? Lohten nö ik 455 U.S.M. Tö lökten yĕi löktökūö in e öi kaheuk ngam samyeūheu tö 483 ngach teungta ayī-ö im tö 29 S.M. Asuh ök falngen maheuk hī hē e angu-ö samyeūheu? Unôich in min meuk sanap ṙô ngih intöönö. Vënyu nang pöri ang Tanīĕl tö Mesayā min “nö röökiṙen” hēk fëli nö chöö-öny tö inṙē-ĕl tökööl.—Tanīĕl 9:24-26.

Vīlöng ngach nö rācha ngam Mesayā nö el halīöngö. Hameukhumat ang Tanīĕl tök hĕng tökiröng pinngangkūö el halīöngö. Meuk ngam Mesayā anga-aṅ nö “sā kūön tarik.” Yihtöre anga-aṅ nö ikūö ngam kantēra ngam Tēv Yāvē, ngach kē-ĕvkūö anga-aṅ töm “pūlngö . . . kanôlò pūlngö inrē” ngam töt chanuhuvṙen. Hĕng ök ihih tökiröng minkahtölōn Tanīĕl inlahen ngam pūlngö, tö Kristū min nö rö-ö nöng hĕng tak nö hayöng, pön hōluṙen min tö yip tahëng rācha. “Tarik aṅ in yip töhet ngam Lamātulöng” ngö ṙô in tö cha.—Tanīĕl 7:13, 14, 27.

Piyāingö minë inyööngö ing panam min ngam pūlngö ngam Tēv. Hĕng heuh ang Tanīĕl nö i hinòlṙen re tö ngam Tēv nö vë-eny manah heūvö ök rācha Nēpukatnēsar aṅ Pēpilön. Meuk ök tö marô-òl kui insā ök rācha, humlum ök kui ò, rupīö (chāntī) ök elngòh ò tö nuk takeun kël ò, mās ök aich ò tök takeun ò inrē, vët nuk kalröön ò, nuk kunröön ò ròngti nö vët ròngti nö tilin inrē. Löktökui rôngö ök hĕng ihong tö afòklöng ngach löö kalröön ngam insā angu-ö nö fohtöre, ngach panyëny ngam insā. Pa-ekūö ngach ök rācha töm heūvö re. Vënyö manah minë alaha ngam insā ngach ang Tanīĕl tö u nö inlahen nup yamih min panam mahayöng. Ngam humlum kui ngam insā, hameukten Pēpilön angu-ö ngam raneh misī nöpanam mahayöng. Ngach yĕn hayöng min ngam manā-aṅ panam mahayöng nö ikūö ngih tötlöök panam, hē e min ngam pūlngö ngam Tēv nö piyāingö minë pūlngö, ngach hayöng min angū-ö nö örheū-heu.—Tanīĕl, 2 mirūlö.

Kôta mat takô ang Tanīĕl nö meuk fanukngö Pēpilön. Ngach takô anga-aṅ hē e nö köiny. Sā ngam kinlēḵngô vinënyö inlahen ök rācha Sairös, tö ò nö anga-aṅ min tö fukngö tī tö ngam elpanam Pēpilön, ngach möl min më Yahuti unôichrit tö 70 samyeūheu nö havan nö chuh Yērusalem, ngach möl chā-a nö havanlö minānlö ngam kinlōngö, tö ngam chūök vinë-ekūötēv inrē i Yērusalem, nö yöönguṙen tö yik tö akaha mahayöng, mākūökūönṙô, pròfĕt inrē. Asuh pöri öp falngen maheuk hī unôichrit ngam tö 483 samyeūheu? Vënyu ön nö im yamih mirūlö.

—Lökngörit im līpöre Tanīĕl.