Yanīhi ngam Mesayā

KAHËTU ang ngam Tēv Yāvē tö inkahkö öp tö kilē-ĕyö Mesayā? Hòṅ. Afītöre in ngëichkö minë la-en ngam Tēv. Hē kinheūten kinūchö ngam līpöre Heprāi misī i tö 400 samyeūheu rô-angen, ik panam Nāsaret, hĕng tak ök rēlö Mariā ök minë-eny ò, ök tö yihka tök ma-ahānga aṅ im Tēv ang Kēprīl. Ngöṙô ök ma-ahānga tö ò, me-eṅ tö inlōntivö tö aṅ im Tēv, yĕh meuk kikōnyö öp fahötnyö meh min, öp pirūkö meh ellōn meh. Ngöṙô inrē ök ma-ahānga Kēprīl nö ve-eny nang Mariā tö ngam minā-aṅ ò nö töt chanūhuvṙen sā ngam ineūkö ò tö yik pròfĕt. Ngam nyīö töpirūka tö Mariā, anga-aṅ ön ngòh Yēsū Kristū ngam kūön ngam Tēv. Ṙā-ang el halīöngö anga-aṅ nö chuh ellōn Mariā nö löktö i kumlēḵ ngam töhet fanöinylö ngam Tēv.

Holtö yanāichö ellōn re Mariā nö hōḵo ngam tökiröng kinë-eṅkūö re la-en. Mikahayö anga-aṅ tö Yôsef ök töng Kārpentör. Unôichrit vinë-eny nang Yôsĕf tök ma-ahānga tö löktö inlaha Mariā nö pirūkö nyīö, möl anga-aṅ nö kē-ĕ Mariā nö pīhöre. Sitih inlaha taneungtö kūö pöri ngam ineūkö Petlihem nö chūök finötnyö ngam Mesayā? (Maika 5:2) Pò ngam elpanam Petlihem nö tö kūönhökūö minë elpanam hēk 140 km. rôvat inrē tö Nāsaret.

Hĕng tak ök mahayöng aṅ Rōma, kamëtö chööngö kinṙeūkö ṙôken taṙòkhöre tarik. Hōtu taṙòkhöre tarik nö kūichö minënyi nö i nuk panam chūök finötnyö cha. Nët re nā Yôsĕf nā Mariā nö lamökngörit Petlihem, lökten Yôsĕf nö kēḵ ök pīhöre Mariā nö chuh Petlihem. (Lūkös 2:3) Fötnyö ök nyīö ngach Mariā nö el patī hameūheure ngach haṙōlngö ök nyīö nö el ök chūökkūö nuā. Tīntö yik ma-ahānga re ngam Tēv nö vamë-eny nang yik yōm sīṅp yik më-el kahôyö, tö öp nyīö tö fötnyuvö nö ngam tö kilē-ĕyö Mesayā ang Kristū.

Ōtre inrē yik tahëng vamënyen Yēsū nö tö kilē-ĕyö Mesayā. Urĕhngöre ṙô ngach Isayā nö vë-eny tök tö hĕng tak tarik chamòhòlre min nö halēnkö talöökö minë tökiröng la-en Mesayā. (Isayā 40:3) Anga-aṅ ök mu-urēhĕkūö Yēsū ang Yôhan ök vamôk. Ik hē Yôhan nö meūkö Yēsū ngö ṙô anga-aṅ: “Yĕh meuk, ngam Pöököre ngam Tēv, ngam kamëḵngö tökööl ngih panam.” Haroh tum tak ngach yik haköptö Yôhan tö ilööṙen nö tömrit Yēsū. Hĕng tak ök umuh in cha tö ngö ṙô: “Kôtökūö an tö Mesayā.”—Yôhan 1:29, 36, 41.

Hakôtenre inrē ngam Tēv nö vënyen Yēsū nö tö kilē-ĕyö Mesayā. Ik hē Yôhan nö vōkö Yēsū, löktö im töhet fanöinylö re tī anga-aṅ nö vīlen Yēsū nö Mesayā. Löktö el halīöngö ṙô anga-aṅ nö ṙô-òvö nö ngö ṙô: “Hanāngenlōn Chu ön ngòh, nö Kūön Chu. In Ò chin ṙamölōn takô.” (Mëtiv 3:16, 17) Teungtakūö ngach ngam tö ha-ehangen ineūkö Mesayā!

Ihē taneungtökūö ön anū-ö? Ik samyeūheu tö 29 S.M. ik kinheūten ngam tö 483 samyeūheu ngam tö ha-ehangen ineūka tö Tanīĕl. Töhĕng ön angu-ö nö alaha ngam tö urĕhnyi vinënyi inlahen Yēsū nö anga-aṅ Kristū. Asuh nup pökeh aheūkö ò min irôten ò nö ing panam?

—Lökngörit im līpöre Mëtiv 1 mirūlö söl im tö 3; Mākös 1 mirūlö; Lūkös 2 mirūlö; Yôhan 1 mirūlö.