Vahënyö Yēsū nup tö Hòṅ Lökngö re Tī Töng Panam

IK HĒ Yēsū nö ikui ök Rôngö Òliv, söö-ö mat anga-aṅ nö meūkö Yērusalem tö nup patī vine-eṅkūötēv inrē. Hēḵ e yik tö fën tak mahaköp nö yihtöre nö in Yēsū ngach ulāikò re nö hatöönö ò tö manah minë vahënyö ò, pò Yēsū nö vënyö ngam patī ngam Tēv Yāvē i Yērusalem nö piyāyi min. Ik tahëng ṙētak inrē anga-aṅ nö vë-eny inlahen öp “manāngen ngih panam.” (Mëtiv 13:40, 49) Lökten hēk yik mahaköp nö hatöönö ò nö ngö ṙô: “Asuh öp min inrē minkahngö yanīhih meh, öp manāngen ngih panam inrē?”—Mëtiv 24:3.

Kētö sanap ṙô cha ang Yēsū nö vë-eny nup tö hòṅ teung min urēhĕkūö pinyāingö Yērusalem. Rö-ö pöri nöng tölngu taneungta kūö minë tö vënyu tö ò, pön unôichngöre min minë aheūkö ò inrē nö keuheūtngö re chūök taneungta kūö i në taṙòkhöre pa-nam. Eūkö inlaha minë taṙòkhöre ṙētak hēk tö inlaha në panam ang Yēsū nö töhĕng nö minkahngö. Anu-ö në minkahngö min nö inmeukhömat vē tarik aṅ kūö në panam tö Yēsū ngach nö rulten re nö rācha nö el ha-līöngö. Tö ngö manah ön inrē tö ngam Tēv Yāvē nö vīlen Yēsū nö rācha öp tö ha-ehangen kinlēḵngö Pūlngö ngam Mesayā. Ve-eny inrē ngam minkahngö tö ngam pūlngö nö ngach nö hòṅ rulten re nö kēngö në ötlanöökö, ngach ṙātö lanāmö nö i taṙòkhöre tarik. Minë tö eūka ngach tö Yēsū nö minkahngö, manāngen në taṙòkhöre-minë tinlööken, inyööngö tö minë tinrikngen tarik.

Vënyö minë tö hòṅ teungta kūö ang Yēsū im sā ngam ṙētak ò min nö hayöng nö el halīöngö, nö ṙētak tö keuheūtngöre chūök kinyūngö, inyāichö tö nya-aṅkūö, kumyeūnö, invah, öt hinang chööngö inrē nö ṙūölöre ṙôken. Keuheūtngör chūök ineūkö inrē ngam tölöök inhangkö ngam pūlngö ngam Tēv. Ngam “yöng ötkanôlò” ön min manāngörit u nö ṙòkhöre, öt töngati-ivö hēten tö ranehlö ngih panam.—Mëtiv 24:21.

Sitih mikahkūö yip min tamömrit Yēsū tö ranöhta yanihih öp yöng ötinkôlò? Ngö ṙô ök Yēsū “haköp ngam inchōḵoṙô yin im anychīr chōn.” (Mëtiv 24:32) Yē ngam pak öp anychīr nö ayal ngach sīöpnyöre rōi anga-aṅ, akahalōn ayī-ö ngach tö ranöhta ngam sikehngö. Ngatī inrē ayī-ö töngamuh yĕi meuk minë minkahngö tö urĕhngöre vinënyi tö Yēsū, ngach akahalōn ayī-ö tö ngam manāngen nö röhta. Öt hĕng tak pöri tö akahalōn töp sakāmö hēk ṙētak yanihih ngam yöng ötkanôlò höng ngam yöng. Lökten Yēsū nö ngö ṙô tö yik haköptöre: “Hīnöre yī-ö, aṅhati, vë-ekūötēv inrē, tön öt akahalōn yin tö hē öp ṙētak.”—Mākös 13:33.

—Lökngörit im līpöre Mëtiv tö 24 mirūlö hēk 25; Mākös 13 mirūlö; Lūkös 21 mirūlö.