Pinrātngö ngam Tölöök Inhānga

UNÔICHRIT Pòl nö havöötö ellōn re, holtö nganöötöre anga-aṅ nö ahangkö ngam tölöök inhangkö ngam pūlngö ngam Tēv. Angu-ö lökten Pòl nö pōi kanihngen, ngam mahakihten yik kristīön sin inuk lā-urĕh sakāmö, ngach nö ngatī inkihten hēk anga-aṅ. Öt ṙanëiyuvö ang Pòl nö kiröönngöre nö chuh kūö minë tömarôvat panam, kūö lōn re nö hòn pirātngö ngam tölöök inhangkö ngam pūlngö ngam Tēv, ngam mahateung ngö minë kuilōn ngam Tēv nö i tarik min.

Ik raneh van ò nö ahanga nö i Listra, halanken ök tarik anga-aṅ ök lamöktö kūö finötnyöre nö lum. Kaknyôre ngach yik tömaṙôngö nö hū-a nö ha-öinyö Pòl tök hol ò Parnapas inrē pön Tēv cha-a tö ṙô yik tömaṙôngö. Höng hupītnyöre nā Pòl nö tahngö inlahen yik tarik nö kētö tökētu nö in cha. Ngach pöri yik Yahūti nö tölṙô yik tömaṙôngö tö yik maha-öinyö cha sin nö kulehe Pòl tö ihong ngach ṙāngen ò nö kapah. Öt kapah pöri Pòl lökten ò nö havan nö im panam nö kētö inngëṅkö yik mahaköp ṙinūöhöl alaha cha inrē.

Ngach rēvre yik Yahūti kristīön mu-uyëkö yik töt Yahūti kristīön nö hōtu nö haköp nup chööngö Môsös. Kumuröön pöri Pòl tö minë ṙô nö chuh i yik tanīnöṙô hēk yip maṙöinylö inrē mi-i Yērusalem. Unôichrit inlaha cha nö afītöre tö ṙô ngam töhet līpöre ngach löktö in e inchōḵo kūö töm töhet fanöinylö ngam Tēv. Kūich tö chitri chamuh i minë Māṅ ngach yik tanīnöṙô, ngach halēnö cha nö ṙāngenre nö inup tökētu i insātēv, nyina-aṅvkūö inrē tö mahām hēk tö nup töng hanlöinyhang likeun, i chinô-òṅkānö inrē. Anu-ö nun në “töt ṙanāngen” nö chööngö nö rö-ö nö linöökö nup chööngö Môsös.—Inlahen 15:28, 29.

Ngam innët van ò, nö chuh Piröya öp tö Krīs invëka töngamuh. Ngach yik Yahūti im panam nö hōḵolōn tö minë ṙô nö ngëchkö mat nup töhet līpöre yĕn tökô-en minë inköphöti. Hēk yik tökunyaha elmat nö hōten cha nö kiröönngöre. Chuh Aten ngach chā-a. Ik hē e ang Pòl nö kētö ök minkahten nö i kūö yik töpōihöl nö haköp nö holtö huneū-eu ṙô re nö öt chökhu ṙô, lökngöre tī anga-aṅ tö ellōn yik hamang ṙô ò.

Unôichrit ngam linūöi van ò nö im kinröönö tö ò nö ahānga, chuh Yērusalem ngach Pòl. Ik hē ò nö chuh el ök chūök vine-ekūötēv, rēvre ngach yik Yahūti vamīlö tinṙōlen ngach nö hòṅ fëlngen Pòl. Ngach yik kumyung aṅ Rōm nö laklen Pòl ngach hatöönö Pòl. Sā ò nö aṅ Rōm unôichngöre anga-aṅ nö ṙô linaklö re nö ikūö Filik ök mahayöng aṅ Rōm. Öt hameuktu pöri yik Yahūti töp tökô-en fālen Pòl. Unôichngöre ang Pòl nö chuh kūö Festös nö kahòkkaṙen, ngach Festös nö hòṅ kēten ò nö i yik Yahūti, laklöre pöri ang Pòl nö ngö ṙô: hòṅ “asöltöre chin in Kaisöör.” Ngach ngö ṙô Festös nö sapṙô ò: “Chuh in Kaisöör man min ngach.”—Inlahen 25:11, 12.

Kē-ĕyö ngach Pòl nö chuh Italī nö kalaha fālen. Sayöö ngach ök chōng cha, hĕng misūngö anga-aṅ nö ik kun panam Malta. Ik hē ò pöri nö sölta nö i Rōm, nët samyeūheu ang Pòl nö iyöng el ök tö haṙāyö patī. Pòrô anga-aṅ nö aṅtu tö yik kumyung, söönen nö öt ṙākenre nö ahangkö ngam pūlngö ngam Tēv nö in yip töng yamihken ò.

—Lökngörit im Inlahen 11:22–28:31.