Öt Tö Vöö Ök Tāvit

Sitih inlahen öm me-eṅ ṙung yĕm vöö?— Lohten öm chuh in pō-o hēk pa-a inrē öm hanyatlöre. Ōt tit pöri öp muh töhĕng tak tö mihôiṅ nö hayööken meh inrē. Öp tö mötlö kumlēḵ tö töng sitih. Akahakūö öm tö ò?— Heūṅ, ngam Tēv Yāvē. Ta-a chĕi töi kakkö inlahen ök ihih ṙāl tarik tövënyun imat ngam Paipöl, ang Tāvit. Akahalōn anga-aṅ tö Yāvē min nö örheūheu nö hayööken ò, lökten ò nö öt vöö.

Löktökūö nyinī-ö re ök Tāvit nö haköptu tö nak yöng re nö hangenlōn tö Yāvē. Angu-ö tö yöölen tī tö Tāvit nö öt vöö yĕn yih nup kanihngen ò. Pön akahalōn anga-aṅ tö Yāvē nö Hol ò, örheūheu min inrē anga-aṅ nö holṙen ò. Hĕng heuh, hē Tāvit nö ṙònghöichṙen nö aṅtö nuk sīṅp ök yöngre, hĕng nòng ök tökiröng lāyön yamihtöre nö hapam höt ök sīṅp nö elvāng re! Sitih inlahen ök ngach Tāvit tö lōn meh? Lūlö rit ök lāyön anga-aṅ ngach fëlngen ò nöng öt aṅhavtī! Unôichrit e hēk ök për ngatī tö hòṅ kāngö nuk sīṅp, fëlngen ò hēk ang Tāvit! Chīap rih tö lōn meh hamòlṙen Tāvit?— Heūṅ, Yāvē ök.

Ōt ök muh hēk ṙētak Tāvit nö hameuknyö ngam tölngö töt pinhë-eṅkūö re. Hē më aṅ Israel nö kiyung nö la-al yik aṅ Filistain. Hĕng tak ök tö marô-òlòng takô, tökiröng tarik in yik kumyung aṅ Filistain! Kōliat ök minë-eny ò. Anga-aṅ an ngòh tökiröng tarik tö miyëṙô tö elnang yik kumyung aṅ Israel tö ngam Tēv cha inrē Yāvē. Havëten yik Israel ang Kōliat nö kiyung nö la-al ò. Vöö yik aṅ Israel nö la-al ò nö kiyung. Hē Tāvit pöri nö hāngö e, Ngö ṙô anga-aṅ tö Kōliat: ‘Chū-ö chin min la-al meh! Holṙen chu an min Yāvē öich mihôiṅ tö meh!’ Töngön ök rih Tāvit tö lōn meh?— Heūṅ, tö ngön takô ök. Hòṅ mikahtö kūöre öm hēk tö inlahen ò?

Kētam Tāvit tök tinföt re ngach chap nuk tö taneui tömilön ihong, ngach kunyi-inyre nö la-al ngam tökiröng tarik. Hē Kōliat nö meuk ṙôkö Tāvit nöng kunkun, hayëḵngen ò anga-aṅ. Ngö ṙô pöri Tāvit nö sapṙô ò: ‘Yih man më-eṅ in chu öm sanëtu, yih pöri chū-ö in meh öich i minë-eny Yāvē!’ Vītö ök töhĕng ihong ngach anga-aṅ nö ik tinföt re, ngach faltöre nö chuh in Kōliat ngach kulehten e nö i māl ò. Löngta ngam ihong nö ihôi minë mat Kōliat! Tafahkūö ngach anga-aṅ,ngach kapah! Vöö ngach yik aṅ Filistain lökten cha nö falngöre. Asūp tölōn meh löktö kanò-òṅ ngam kun tarik Tāvit nö la-al ngam töngatī ṙôkö?— Pön hayööken ò ang Yāvē, mötlö kumlēḵ ang Yāvē tö ngam tökiröng tarik!

Asūp öre haköp meh im istori Tāvit?— Yāvē an tökalēḵ kūö tökalēḵ. Ngach hol meh anga-aṅ. Lökten meh yĕm vöö, köpölōn me-eṅ, mihôiṅ an min Yāvē nö hayööken meh hòṅ meh öt vöö!