TÖHAKÖÖPÖ 13
Hòṅ Hayööken Tarik Ök Timòtī
Ṙāl tarik ök Timòtī nö tö ṙāmölōn nö hayööken tarik. Ṙōlkang chūök anga-aṅ nö havötköre nö hayööken yik tahëng tarik. Lökten öi kuchik elnang yĕi hang ngam tinrīken ò. Hòṅ hang inlahen ò ömeh?—
Haköpten Timòtī ngam yöng ò töm yōm ò nö inlahen Yāvē
Haruklöngö ök Timòtī nö i Listra. Löktökūö nyinī-ö ò ök yōm ò Lois tök yöng ò inrē kikānö Yunisī, nö haköpten ò tö inlahen Yāvē. Sā sanīöpö ṙēḵti Timòtī ngatī inlahen ngam lōn ò nö hayööken yik tahëng nö haköp inlahen Yāvē.
Hē Timòtī nö ṙòngmö ṙālö, ngò-òṅ anga-aṅ tö Pôl nö holröön ò nö ahānga nö chuh inuk tahëng panam. Ngach ‘Hòṅ!’ ṙu ṙô ang Timòtī. Hōḵ anga-aṅ nö kiröönngöre nö hayööken yik tahëng.
Holröön Pôl ngach Timòtī nö chuh in ök töhĕng elpanam i Maketònī ngam tö Tösalònikē invëka. Yēḵ cha nö hòṅ sölta nö in e, urĕh cha-a nö hòṅ marò-òlkūö nö kiröön, ngach möl nö yôk el kupòk. Hē cha ngach nö sölta nö umuh, pōyen vahë-eny nang ngach cha-a tö tarik tö inlahen Yāvē. Pōyen pöri in yik tarik tö tainy nö in cha chamöh talöökö tī re inrē nö chökṙen cha. Lökten nā Pôl nā Timòtī nö ṙa-ang muh ngach ahānga nö chuh i tahëng chūökö.
Ṙamölōn ök Timòtī kuchiken inrē inuk la-en re
Haroh tumhang chumngëṅtö Pôl nö tölṙô Timòtī, nö havanröön re nö chôngkö inlahen yik hanöng kisānö cha aṅ Tösalònikē. Hòṅ ngön ang Timòtī yēḵ ò min nö havan nö chuh im panam më tarik tö tainy! Ṙën pöri Timòtī nö chuh in e pön paṙūtalōn tö inlahen yik holmaneuk re aṅ in e. Havan ngach anga-aṅ nö chuh in Pôl nö kumuröön tö nuk tölöök inlahen cha. Pön höng lēn yik holmaneuk cha aṅ Tösalònikē!
Ṙōl samyeūheu ang Timòtī nö holṙen Pôl nö la-evṙen. Hĕng heuh tī Pôl nö kūichhöti tö Timòtī nö tölöng nö tarik nö sahöömtö ò nö mahayööken minë māṅ. Hangenlōn Timòtī tö Yāvē tö yik tarik inrē.
Hangenlōn öm me-eṅ inrē öm hayööken tarik nö haköp inlahen Yāvē?— Yēḵ meh öm ngatī, ngach mihôiṅ min me-eṅ ṙamölōn öm sā Timòtī!