Sitih Ṙô Öng Ngam Paipöl Nö Vë-eny Inlahen Yāvē?

Mihôiṅ öi tö lōn meh öi haröhtöre in ngam Tēv. Ngö lōn öm ṙöng tö ngam Tēv Yāvē tö ò nö maròvat, sā ròvat minë taneūsömat öi ötkô öi haröhtöre in ò? Ngö lōn öm ṙung inrē tö ò nö töt sā mufē hī öi tarik, höng sā nup tö kalēḵ chanôchö töng öt mufē-ěvö? Vënyu nang pöri ayī-ö tö ngam Paipöl tö Yāvē nö kô-en nö aṅhav in tö minë tinrīkenre, tö chumkūöṙen inrē anga-aṅ tö hī.

1. Kūö yòh öi ötkô meuk ngam Tēv?

Vënyu nang in töm Paipöl tö ngam ‘Tēv nö töt maneūken.’ (Yôhan 4:​24) Öt meūkö ngam alaha ò nö sā alaha tarik. Lökten öi ötkô meūkan, pô ò nö el halīöngö.

2. Asuh nup tinrīken Yāvē?

Kô-en in ötkô meuk ngam Tēv, sön pöri anga-aṅ nö ōt. Ōt minë tövai tinrīken ò. Yēḵ meh min öm mikahtökūöre tö ò ngaich röhta min öm in ò. Ngö ṙô ngam Paipöl “Tön hāngenlōn an ngam Mā Tēv [Yāvē] tö inkaha fālen, öt ṙāngö yip töhetre inrē.” (Salmai 37:28) Vënyu an nö “tötööḵlö tö miṙēlōn, tööḵlö inrē tö neūkölōn.” Kô-en anga-aṅ nö aṙē-ěvlōn tö yip tarikre yēḵ cha nö kihngen. (Yāköp 5:​11) “Röhta an ngam Mā Tēv [Yāvē] nö in cha yip töpaṙööyi ellōn, hayöölen cha inrē yip tökô-en nö haṙivlōn tö tököölre.” (Salmai 34:18) Lökngöre inrē Yāvē tö nup la-en hī. (Salmai 78:40, 41) Yěi kēken nup töchōich ngaich haṙivlōn anga-aṅ, yěi la-evṙen pöri tö nup tölöök ngaich ṙamlōn anga-aṅ.​—Vë-evkūö Inchōḵ-oṙô 27:11.

3. Asūp löktö mikahlōn hī tö Yāvē nö hangenlōn tö hī?

Ngam hanangenlōn an tökiröng nö tinrīken Yāvē. Lökten ngam Paipöl nö ngö ṙô “Hanangenlōn an ngam Tēv.” (1 Yôhan 4:8) Hameuknyöm hanangenlōnre anga-aṅ, rö-ö nöng löknyö mat ngam Paipöl, tön löktö in minë vahīlö ò. (Vë-evkūö Inlahen 14:17.) Kò-òren ngëichkö inlahen tī ò nö vīlen hī. Öi mihôiṅ meuk tö ṙōlkangen mirun, hang tövai tinköökö, kalah nup tökuchik nya-aṅkūö inrē. Kô-en an nö hangenlōn tö hī, lōnu inrē tö hī öi örheūheu ṙamölōn.

MIKAHTÖKŪÖRE HĒK

4. Kumlēḵ Yāvē an ngam töhet kumlēḵ

Vënyö nang hī ngam Paipöl tö ngam töhet kumlēḵ ngam Tēv nö rö-ö nö tarik, pò e nö tökiröng nö kumlēḵ ngam Tēv.a Sā hī öi aṅtī tö këlre öi la-evṙen, ngatī ang Yāvē nö aṅtī tö ngam töhet kumlēḵre nö la-evṙen tö nup taṙòkhöre la-enre. Vë-evkūö Lūkös 11:13 hēk Inlahen 2:​17, ngaich kakkö minë intöönö yamih:

• Sā ṙô ngam tö vë-evkūö, tö ngam töhet kumlēḵ ngam Tēv min “nö ṙösnyu” nö ikui taṙòkhöre tarik. Tarik öng pökeh tö lōn meh, kumlēḵ ngam Tēv ṙöng? Kūö yòh öm ngatī mufē?

Aṅtī tö ngam töhet kumlēḵ re ang Yāvē nö hateungngö minë la-en re pinngangkūö. Vë-evkūö Salmai 33:6 hēk 2 Pītör 1:​20, 21, ngaich kakkö ngih intöönö yamih:

• Asuh nup la-en kahëken Yāvē nö aṅtī tö ngam töhet kumlēḵ re?

5. Pōyen minë tövai tinrīken Yāvē

Môsös minënyi ök ihih misī tarik tö marò-òten nö löklōn ngam Tēv, sön anga-aṅ hēk nö hòṅ mikahtökūöre tö ngam vamī-il në taṙòkhöre. Lökten Môsös nö ngö ṙô tö ò: “Hameuktö nup talöököre man yĕh, hòṅ chu akahakūö tö meh.” (Maneutnyi 33:13) Lökten ang Yāvē nö vë-eny nang Ò tö tinrīkenre. Vë-evkūö Maneutnyi 34:​4-6, ngaich kakkö minë intöönö yamih:

• Asuh nup tinrīken Yāvē vahënyö ò nö ikūö Môsös?

• Asuh öp ööilōn meh in minë tinrīken Yāvē?

6. Chumkūöṙen Yāvē tö yip tarik re

Hē yik Israel yik tarik ngam Tēv misī nö haköövö nö i Aikup. Ngaich sitih inlahen Yāvē nö lökngöre tö nuk kanihngen cha. Hang ngam ÔTIŌ ngaich kò-òren öm ngëichkö mat ngam Paipöl hēk vë-evkūö Maneutnyi 3:​1-​10. Ngaich kakkö minë intöönö yamih.

ÔTIŌ: Chūömkūöṙen Yāvē tö Cha (2:​45)

• Sitih mufē ang Yāvē yěn meuk nup kanihngen hī? Ngëichken ngam tö 7 töm tö 8 miröökö.

• Mihôiṅ ang Yāvē nö hayööken yip tarik re nö aṅtī töm kumlēḵre? Kūö yòh öm ngatī mufē?

7. Hameuknyu minë tinrīken Yāvē nö in minë vahīlö ò

Yēḵ hī ngëichkö minë vahīlö Yāvē ngaich ilöö akahakūö ayī-ö töm inlahen ò nö Tēv. Ōt inrē minë tinrīken ò. Röngnyöm VITIŌ. Ngaich Vë-evkūö Rōma 1:​20, ngaich kakkö ngih intöönö yamih.

VITIŌ: Vë-eny Hanangenlōn Yāvē në tö Vīlöng​—Ngam Alaha Hī (1:57)

• Asuh nup maheuk hī tinrīken ngam Tēv Yāvē, öi löktö in minë tömeūkö vahīlö ò?

MINË HAKÖP HĪ NGAICH

Kô-en in ötkô öi meukö Yāvē, ōt pöri minë tövai tinrīken ò. Ngaich ngam hanangenlōn tö mötlö nö in u nö ṙòkhöre.

Sitih ṙô öm më-eṅ?

• Kūö yòh öi ötkô meuk ngam Tēv Yāvē?

• Asuh öng ngam töhet kumlēḵ?

• Vënyö nup tinrīken ngam Tēv Yāvē man?

NGËICHKÖ NË INRĒ

Ṙūöhtö mikah kūöre tö Yāvē haköp inlahen minë töfën tinrīken ò.

“Asuh Nup Tinrīken Ngam Tēv?” (Chūökamahati-HI Öngk. 1 2019)

Mikahtökūöre tö Yāvē nö öt keuheūt chūökre nö inup vahīlöre nö ṙòkhöre.

“Keuheūtngöre Chūök Ang Ngam Tēv, Nö Ōt?” (El vepsāit töhakööpö)

Mikahtökūöre tö ṙô ngam Paipöl nö vë-eny inlahen ngam töhet fanöinylö nö kël ngam Tēv.

“Asuh Öng Ngam Töhet fanöinylö?” (El vepsāit töhakööpö)

Ngölōn ngam tarik tötmeuk tö ngam Tēv nö öt chumkūöṙen tö ò. Ngëichköm inlahen ò ngaich nö haṙī-ingre mufē.

“Mihôiṅ Chin Ngaich Öich Hayööken Tahëng” (Chūökamahati-HI, Öngk 1 2016)