LESÖN 13
Sitih Inlahen Ön Minë Tövaich Tinlööken Nö Ṙūöhngen Më Tarik Töm Tēv?
Yēḵ ngam Tēv nö Tēv hanangenlōn, ngaich kūö yòh minë tinlööken nö kēken tötlöng la-en? Eūköre inrē nö haköptö ngam kanô-en inlahen ngam Tēv, nöng hö-ö pön ṙūöhngen më tarik töm Tēv. Sitih inlahen cha-a nö ngatī? Sitih mufē ngam Tēv yěn meūkö u? Hēk sitih tī min anga-aṅ tö u? Töi mikahtökūöre.
1. Sitih inlahen ön minë tinlööken nö ṙūöhngen më tarik töm Tēv nö löktö in minë ṙô cha inköphöti?
Pōyen minë tinlööken mahaköphöti nö “haṙīngö ngam kanô-en ngam Tēv nö minyôiny-aṅ.” (Rōma 1:25) Sā inlahen ngam minë-eny ngam Tēv, ōtre minë tinlööken töt vamënyen e. Öi hōtu havëkö minë-eny ngam Tēv töm Paipöl. (Rōma 10:13, 14) Yěn fukkui inrē tarik tö nup pinlāngen ngaich ngö ṙô më mahaköptö tinlööken, tö u nö kuilōn ngam lamātulöng. Nöng hö-ö anga-aṅ nö miṙivngölōn vē kūön tarik. (Vë-evkūö Inrāmöre 3:33.) Kūö ṙô më mahaköptö tinlööken pöri ngaich më tarik nö marôvat töm Tēv.
2. Sitih inlahen minë tinlööken nö ṙūöhngen më tarik töm Tēv tökūö minë la-en cha?
Öt sā lōn Yāvē minë tinlööken nö chumkūöken më tarik. Lökten nö vënyu töm Paipöl ‘nup tökööl cha nö uroh nö söllö nö el halīöngö.’ (Inmeukhömat 18:5) Löktö kūö misī nun nö holṙen më mahayöng ing panam ngam tötkô öre nö la-en cha. Uroh nö hakôlò më kumyung urēhěkūö cha nö kiyung, lökten nun nö pōihangen tī tö tarik nö kapah. Kē rupīö cha-a nö in yip tarik pön hòṅ kumchikngenre tö u. Vënyu cha-a tö minë la-enre nö öt akahakūö töm Tēv. Sitih inlahen aich rih min nö eūköre nö haköptö ngam kanô-en inlahen ngam Tēv yěn höng ngatī inlahen la-en?—Vë-evkūö 1 Yôhan 4:8.
3. Sitih mufē ang ngam Tēv tö në tövaich tinlööken?
Yěm haṙivlōn më-eṅ öm meuk minë tötlöng la-en kahëken në tövaich tinlööken, ngaich öt haṙivlōn hòng ang Yāvē tö lōn meh? Töhangenlōn anga-aṅ tö taṙòkhöre tarik, lökten an nö öt ṙamlōn nö in minë tövaich tinlööken, minë töt lööngö ṙô nö vë-eny inlahen ò, töt chumkūöṙen inrē tö më tarikre. Lökten an nö kilēḵngôre tö ò min nö ahetngö në tövaich tinlööken nö ṙòkhöre ‘ngaich ötkôti min anū-ö nö hēk.’ (Inmeukhömat 18:21) Ngaich an min ngam Tēv nö veūten nö ngatī inlahen.—Inmeukhömat 18:8.
MIKAHTÖKŪÖRE HĒK
Töi mikahtökūöre tö inlahen mufē ngam Tēv tö minë tövaich tinlööken, minë töng ameūköre nö ha-öinyan. Hēk in min mikahtökūöre tö nup la-en u. Kūö yòh pöri më-eṅ höng hòṅ iṙūöhen öm haköp inlahen Yāvē.
4. Ṙamlōn ang ngam Tēv tö në tinlööken nö ṙòkhöre
Pōyen yip ṙamatö-ellōnre tö në tinlööken nö ṙòkhöre nö chuh im Tēv. Ngö ṙô cha-a, höng hěng an ngam chahūhu hī ṙōl pöri minë talöökö. Kô-en hòng angū-ö nö ngatī? Vë-evkūö Mëtiv 7:13, 14, ngaich kakkö ngih intöönö yamih:
Sitih ṙô öng ngam Paipöl nö vë-eny inlahen ngam talöökö chamuh im nômö?
Röngnyöm VITIŌ, ngaich kakkö ngih intöönö yamih.
Ṙamlōn ang ngam Tēv nö in në tinlööken nö ṙòkhöre? Sitih ṙô öng ngam Paipöl?
5. Öt hameuknyu hanangenlōn ngam Tēv tö minë tövaich tinlööken
Ṙōlkangen tī nun minë tinlööken nö hachōchngöm minë-eny ngam Tēv. Lökten anū-ö nö kaheūkö nö tövaich tinlööken. Kētöre anū-ö inrē nö in minë kinyūngö, röngnyöm VITIŌ. Ngaich kakkö minë intöönö yamih:
Sitih inlahen yip aṅ minë keurcha nö kētöre ik innëtö kinyūngö tö në panam nö ṙòkhöre?
Sitih mufē öm töm inlahen cha nö kētöre nö im kinyūngö?
Vë-evkūö Yôhan 13:34, 35 hēk 17:16. Ngaich kakkö minë intöönö yamih:
Sitih inlahen mufē ang Yāvē, yěn kētöre minë tinlööken nö in minë kinyūngö?
Pōyen nup la-en minë tövaich tinlööken töt mahameuknyö ngam hanangenlōn ngam Tēv. Asūp töhěng maheuk meh më-eṅ?
In minë la-en minë tinlööken nö meūkö ngam töthanangenlōn cha tö ngam Tēv
6. Lōn ngam Tēv an tö tarik nö kunyī-inyre tö minë tövaich tinlööken
Vë-evkūö Inmeukhömat 18:4,a ngaich kakkö ngih intöönö yamih:
Lōnu ngam Tēv tö yip tarik nö kunyī-inyre nö ṙā-ang el minë tövaich tinlööken. Sitih lōn öm më-eṅ öm hāngö e?
7. Iṙūöhen haköp inlahen ngam tökô-en Tēv
Kô-en nun minë tinlööken nö pōyen kahëken tö tövaich la-en. Angū-ö öng min lāinyngen meh öt ṙatö-ellōnre im Tēv? Asehkūöre man töp nyīö tö sō nö hang ṙô öp yöngre. Falngöre anga-aṅ tö patī re, ngaich la-evṙen tö nup töchōich. Öt ṙamlōn pöri ngam inyööngö tö minë la-en ò. Löng öng min yěi vënyö ngam inyööngö nö anga-aṅ tövaich tö kūö minë kahëken ngam kūön ò?
Löng öng min yěi vënyen Yāvē nö anga-aṅ tövaich, tö kūö minë la-en kahëken minë tövaich tinlööken? Ṙāngenre öm min më-eṅ haköp inlahen ngam Tēv, tö kūö minë tövaich la-en kahëken u?
ṘÔ YIP TAHËNG: “Vai nun minë ṙô haköptö minë tinlööken nö ṙòkhöre.”
Ngatī mufē öm më-eṅ inrē?
Yěn ṙòkhöre minë tinlööken nö vāyö haköpti, ngaich kūö yòh ang Yāvē nö öt ṙamlōn nö in u?
MINË HAKÖP HĪ NGAICH
Marôvat ngaich tarik tö Yāvē tö kūö minë tövaich inköphöti hēk minë tötlöng la-en kahëken minë tövaich tinlööken. Ahëtiyö nun min minë tövaich tinlööken nö ṙòkhöre tö ngam Tēv.
Sitih ṙô öm më-eṅ?
Sitih mufē öm më-eṅ yěm meuk minë tövaich inköphöti hēk minë tötlöng la-en kahëken minë tövaich tinlööken?
Sitih mufē ang Yāvē nö ngëichkö minë tövaich tinlööken?
Sitih inlahen tī ang min ngam Tēv tö minë tövaich tinlööken?
NGËICHKÖ NË INRĒ
Asuh nup tö nët lāinyngen ngam Tēv nö öt hō-en në tinlööken nö ṙòkhöre.
“Ṙòkhöre Ön Në Tinlööken Nö Hěngren? Ṙòkhöre Ön Inrē Nö Chuh Im Tēv?” (El vepsāit töhakööpö)
Kūö yòh ang ngam Tēv Yāvē nö hōten hī hamūltöre öi in yip tarik ò yěi hòṅ ha-öinyan?
“Hòṅ Hanôlhötre Öi In Minë Söngkötön Hēk Tinlööken Inrē?” (El vepsāit töhakööpö)
Kihngen ngam pöötrī tö kūö minë tövaich maheukre el ngam tinlööken ò. Sön anga-aṅ nö öt ṙāngenre nö haköp ngam kanô-en inlahen ngam Tēv.
“Kūö Yòh Ngam Pöötrī Nö Ṙāngen Ngam Tinlöökenre” (Hinörē!-E, ātiköl)
Löktökūö misī minë tinlööken nö haköptö minë tövaich inköphöti. Lökten më tarik nö ngölōn tö ngam Tēv nö töt chumkūöṙen tö cha hēk töthangenlōn. Töi ngëichkö në tö lūöi tövaich inköphöti öi ngëichkö kanô-en u.
“Tövaich Inköphöti Samôten Hī Hangenlōn töm Tēv” (Chūökamahati-E, ātiköl)