Achīö Aich Më “Tökô-en, Tö-akaha Inrē Mahalanṙen” Asuh Öp La-en Cha?

Yēsū an Kui ngih māṅ vē tökô-en Kristīön. (Efisös 5:​23) El halīöngö an töngamuh nö hachōkūö më haköptöre ing panam. Nö sitih inlahen? Nö löktö in më “tökô-en, tö-akaha inrē mahalanṙen” tī. (Vë-evkūö Mëtiv 24:45.) Katöllö Yēsū yin më “mahalanṙen,” rahëichyen kinë-ekūö yin tö kumlēḵ re nö katöllö la-enre. Akahakūö yin töre nö hòṅ tumṙeūtöre tö Yēsū, ngaich meukṙen më holmaneuk Kristū. Achīö aich cha-a mahalanṙen? Sitih inlahen aich töngamuh nö chumkūöṙen tö hī? Töi mikahtökūöre.

1. Achīö aich më “tökô-en, tö-akaha inrē mahalanṙen”?

Löktökūö misī Yāvē nö katöllö tarik hēk pròfět nö mahachōkūö yik tarik ò. (Malakī 2:7; Heprāi 1:1) Katöllöng më tanīnöṙô tö më minṙöinylen nö mahachōkūö yik tarik ò nö i Yerusālem unôichrit kinpaha Yēsū. (Inlahen 15:2) Ngatī la-en yin töngamuh më tö katöllöng minṙöinylen nö ha-aṅlen hī tö minë ṙô ngam Tēv, kētö inchōkūö hī inrē öi im inhānga. Yōm La-en më Vamënyen Yāvē ngö ṙô in tö cha. Cha-a yin “tökô-en, tö-akaha inrē mahalanṙen, mahayōm nup [la-en] aṅ patī öp yöngṙenre” (Mëtiv 24:45) Ṙòkhöre yin më Yōm La-en nö tö hachāmö elkui nö Kristīön. Chuh el halīöngö yin min unôichrit cha nö kapah, pön hol Kristū min cha-a nö hayöng.

2. Asuh ön minë nyā-aṅkūö tö halēnö tö më tö akaha mahalanṙen?

Ngö ṙô ang Yēsū, tö yip mahayōm nup chehen aṅ patī ò ‘ha-aṅlen cha an min ip ṙētak.’ (Mëtiv 24:45b) Asuh ön anū-ö nyā-aṅkūö? Minë inchōkūö hī aṅ im ṙô ngam Tēv. Sā hī yěi nyā, ngaich ngönlöre ayī-ö, kòlô el alaha inrē. Ngatī ayī-ö öi teūngen tö kumlēḵ re öi löktö in minë nyā-aṅkūö aṅ im ṙô ngam Tēv. Ngönlöre ngam ṙinatö-ellōn hī, lökten öi höng iṙūöhen öi la-evṙen tö ngam la-en kinë-ekūöre tö Yēsū. (1 Timôtī 4:6) Löktö in minë mīting, ësemplī, könvensön, minë tö katānö līpöre hēk minë vitiō, öi teūngen tö minë inlēnö aṅ im ṙô ngam Tēv. Ngaich akahakūö tö minë kuilōn ngam Tēv, ngönlöre inrē ngam innôlö hī öi in ò.

MIKAHTÖKŪÖRE HĒK

3. Kūö yòh aich më tarik Yāvē nö hòṅ lēnö la-en

Yēsū an mahachōkūö më Yōm La-en më Vamënyen Yāvē nö ngëichken minë la-en. Ngatī inlahen kinëken nuk misī la-en tö yik mu-urēhěkūö hī Kristīön. Röngnyöm VITIŌ.

VITIŌ: Lēnötī Yāvē Nö Hamūl Më Tarikre (6:18)

Vë-evkūö 1 Kòrin 14:33, 39b, ngaich kakkö ngih intöönö yamih:

• Sā ṙô minë miröökö, kūö yòh Yāvē nö lōnu tö yip tarik re nö lēnö inlahen nö la-evṙen?

4. Halēnlö kinëken ngam tölöök inhānga më tö-akaha mahalanṙen

Tötṙanāngen an ngam la-en inhangkö ngam tölöök inhānga nö in yik mu-urěh Kristīön. Vë-evkūö Inlahen 8:​14, 25, ngaich kakkö minë intöönö yamih:

• Achīö yik kamëtö inlēnö yik mu-urěh Kristīön nö ahangkö ngam tölöök inhānga?

• Sitih inlahen nak nā Pītör nā Yôhan hē cha nö hang ngam inlēnö ṙamā-ang in yik hol cha tanīnöṙô?

Ngam inhangkö ngam tölöök inhānga an tökiröng nö la-en nö imat më Yōm La-en töngamuh. Röngnyöm VITIŌ.

VITIŌ: Örheūheu La-evṙen Töm La-en Inhānga (1:​24)

Vënyu nang in tö Yēsū tö ngam la-en inhangkö ngam tölöök inhānga nö tötṙanāngen. Vë-evkūö Mākös 13:10, ngaich kakkö minë intöönö yamih:

• Kūö yòh öng ngam la-en inhangkö ngam tölöök inhānga nö pōiṙāi nö imat më Yōm La-en?

• Kūö yòh aich më “tökô-en, tö-akaha inrē mahalanṙen” nö ötkô nö öt hachōkūö hī öi ahangkö ngam tölöök inhānga öi ikūö në panam?

5. Kētö inlēnö minë māṅ më Yōm La-en

Më Yōm La-en yin kamëtö minë inchōkūö minë māṅ tö keuheūtngöre chūök ikūö ngih panam. Sitih inlahen kinëti ön minë inchōkūö tö cha? Töi ngëichkö inlahen yik Yōm La-en nö hachōkūö yik mu-urěh Kristīön. Vë-evkūö Inlahen 15:​1, 2, ngaich kakkö minë intöönö yamih:

• Asuh nuk ṙô yik rīkre mu-urěh Kristīön nö kilṙô höö?

• Chuh in chīö yik hē Pôl, hē Parnöpas hēk yik tahëng inrē nö havëkö inchōkūöre?

Vë-evkūö Inlahen 15:12-​18, 23-​29, ngaich kakkö ngih intöönö yamih:

• Yěn hòṅ akahakūö yik Yōm La-en tö minë kuilōn ngam Tēv urēhěkūö cha nö hòṅ kētöre ngaich hòṅ sitih inlahen cha-a?​—Ngëichkö minë miröökö 12, 15, hēk 28.

Vë-evkūö Inlahen 15:30, 31 hēk 16:​4, 5, ngaich kakkö minë intöönö yamih:

• Sitih inlahen yik mu-urěh Kristīön hē cha nö hang ṙô nuk chitri ṙamā-ang in yik Yōm La-en?

• Asuh nuk inkôlò cha tö tī Yāvē kūö cha nö hang ṙô yik Yōm La-en?

Vë-evkūö 2 Timôtī 3:​16 hēk Yāköp 1:5, ngaich kakkö ngih intöönö yamih:

• Urēhěkūö më Yōm La-en nö kētöre nö in minë la-enre töngamuh ngaich sitih inlahen cha-a?

MINË HAKÖP HĪ NGAICH

Më “tökô-en, tö-akaha inrē mahalanṙen” më Yōm La-en tö ṙô hī, cha-a yin ṙahātö Yēsū nö kamëtö minë inlēnö taṙòkhöre tökô-en Kristīön ikūö ngih panam, kamëtö minë ṙô ngam Tēv inrē nyā-aṅkūö nö inngönlö ngam ṙinatö-ellōn hī.

Sitih ṙô öm më-eṅ?

• Ṙahātö chīö aich më “tökô-en, tö-akaha inrē mahalanṙen”?

• Sitih inlahen aich më Yōm La-en nö haṙūötken hī tö minë ṙô ngam Tēv?

• Ṙatö-ellōnre öm më-eṅ tö më Yōm La-en nö acha-a “tökô-en, tö-akaha inrē mahalanṙen”?

NGËICHKÖ NË INRĒ

Sitih inlahen aich më Yōm La-en nö lēnö inlahen nö kēken minë la-en. Töi mikahtökūöre.

“Achīö Aich Më Yōm La-en Më Vamënyen Yāvē?” (El vepsāit töhakööpö)

Sitih inlahen aich më Yōm La-en nö mikūöṙen tö minë kahëtö cha nyā-akūö hī minë inngönlö ngam ṙinatö-ellōn hī nö tökô-en? Töi mikahtökūöre.

Minë Tökô-en Hēk Tölööngö Ṙô Līpöre (17:18)

Sitih mufē aich më mempör më Yōm La-en, tö minë la-en kinë-ekūöre tö Yēsū?

Tökiröng Nö Milēḵken (7:​04)

Sitih inlahen ön minë mīting, tö minë könvensön nö hameukten Yāvē nö hachōkūö më Yōm La-en?

Haköptö Më Tarikre Yāvē (9:​39)