“Kö Hangönken Höö”

1. Hòṅ asuh öp inlahen hī tö ṙô ngam 1 Tösalònikē 5:11?

NGAICH öm më-eṅ ṙung kētöre i minānlö Patī Pūlngö? Ik kinheuten vīni-i ngam Patī Pūlngö hēk ik sā raneh van meh inrē öm yihtökūö el mīting, lohten më-eṅ öm kirööngen ṙanamlōn. Ngaich ik sā meh tikök minë tinköökö kingdom song, ngaich lohten më-eṅ keūheutnyöre tö ṙanamlōnre. Ngaich yěn vāyö mineūkö ngam Patī Pūlngö, ngaich lökten in e ngam nöönyö Yāvē. Ngih inrē töhěng la-en hī, tö ngam Patī Pūlngö nö hòṅ ngönö vinī-i, ngamuh inrē kò-òren inlahen hī öi hangëkö alaha höö hēk hareuskö alaha höö inrē. Ngaich lökten in e ngam nöönyö Yāvē. Tölṙô yik Kristīön aṅ Tösalònikē ang Pôl nö hareuskö alaha höö, kò-òren vë-ekūö ngam 1 Tösalònikē 5:11 angū-ö ön ngih miröökö kui ngam ātiköl.—Vë-evkūö.

2. Asuh nup min haköp hī in ngih ātiköl?

² Hangenlōn ang Pôl tö yik prötör sistör re, lökten anga-aṅ nö hareuskö alaha cha hēk hangönken cha inrē. In ngih ātiköl in min mikahtökūöre tö Pôl nö sitih inlahen nö hayööken yik prötör sistör re (1) nö la-al minë kanihngenre, (2) nö vī ngam lanāmö nö el hôi höö, hēk (3) asīöp ngam ṙinatö-ellōnre nö in Yāvē. Ngih inrē min haköp hī, öi sitih inlahen asīnken ò öi hareuskö alaha yip prötör sistör re.—1 Kòr. 11:1.

HAYÖÖKEN YIP PRÖTÖR SISTÖR ANG PÔL NÖ LA-AL MINË KANIHNGENRE

3. Sitih inlahen ök Pôl nö i linöökö lōn Yāvē?

³ Hangenlōn ang Pôl tö yik prötör sistör lökten anga-aṅ nö aṙē-ělōn tö cha. Yēḵ yik prötör sistör nö kihngen ngaich akahakūö anga-aṅ tö minë kanihngen cha pön ngatī kanihngen sin anga-aṅ. Hěngheuh ök inrē Pôl nö kihngen tö rupīö re, lökten anga-aṅ nö la-evṙen nö ha-aṅkö nômö yik holre hēk ha-aṅkö nômöre inrē. (Inl. 20:34) Tö heuveū-en ök Pôl nö vī inrūkui, lökten ik sā ò nö chuh Kòrin ngaich holṙen nā Akula nā Prisilā anga-aṅ nö vī inrūkui. Öt ṙāngö minë tökiröng sakāmö anga-aṅ nö chuh el ngam töhet chūök nö ahangkö ngam tölöök inhānga nö in yik Yahutī hēk Krīk inrē. Ik sā nā Sailös nā Timôtī nö chuh in ò, ngaich ‘ṙūöhlö alahare ang Pôl nö ahangkö ngam tölöök inhānga.’ (Inl. 18:2-5) Tö pōi la-en ök Pôl, ngaich ha-aṅkö nômöre inrē nö löktö in minë la-enre. Tökiröng pöri ngam la-en ò nö i linöklōn ngam Tēv Yāvē. Lökten anga-aṅ nö ṙūöhlö alaha më prötör sistör nö ngatī inlahen. Ngö ṙô anga-aṅ nö in cha, un yin yahlö mufē tö më mikūönöre, mööḵlö mufē pöri tö ‘nup tölöök ṙô.’—Filip. 1:10.

4. Sitih inlahen nā Pôl nā Timôtī nö hayööken yik Kristīön nö la-al minë kanihngenre?

⁴ Unôichrit vinīlö ngam tö tufömngöre māṅ i Tösalònikē, hakihtuṙen ngaich yik mahaköp aṅ in e. Ik hē yik tömaṙôngö nö öt teūngen nö kē-ě nā Pôl nā Sailös, ‘ngaich kē yik tahëng ngaich cha-a nö chuh in yik makūö panam, ngaich ngö ṙô nö hūḵa: “yih yip tarik nö ihih, yip tumṙōllen ngih . . . chöngö Kaisöör.”’ (Inl. 17:6, 7) Pī-a lohten nö pa-ekūö yik rīkre Kristīön nö meūkö u. Öt lōnu pöri ang Pôl tö ngam ṙinatö-ellōn cha nö kūṅnöre hēk öt ṙāngenre nö i linökölōn ngam Tēv Yāvē. Ötkô pöri nā Pôl nā Sailös nö sökngöre nö hayööken më holmaneukre Kristīön, hěng pöri ngam halēnlö cha nö tīnngen Timôtī nö hangëṅkö alaha yik Kristīön. Ngö ṙô tī ang Pôl nö in yik aṅ Tösalònikē, ‘Tīnten Timôtī chin in yīö, nö mahangëken yīö i ngam ṙīnatö-ellōn, hòṅ yīö öt kannyichken tö kūö nup kanihngen.’ (1 Tös. 3:2, 3) Lohten nö ngatī inkihten ang Timôtī nö ip panamre i Listra. Kôtömat inrē anga-aṅ nö meuk inlahen Pôl nö hayööken yik Kristīön aṅ in e. Lökten anga-aṅ nö kētö ṙinatö-ellōn yik aṅ Tösalònikē, tö Yāvē min nö öthō nö öt hayööken cha nö halööktit minë töng sitih kanihngen cha.—Inl. 14:8, 19-22; Hep. 12:2.

5. Sitih inlahen ök Tōni nö hayööken Prāin? Asuh ngaich ök yanöölen Prāin?

⁵ Hěng hēk ngam inlahen Pôl nö hayööken më holmaneukre. Ik hē cha nā Parnapas nö havan nö chuh Listra, Ikôniöm hēk Antiòk inrē, ngaich vīlö yik minṙöinylen cha-a nö i nuk māṅ. (Inl. 14:21-23) Kô-en yik minṙôinylen nö hayööken yik holmaneukre nö el ṙētak minë kanihngen. Ngatī inlahen yip minṙöinylen inrē töngamuh. Hěngtak ök i prötör tö Prāin minë-eny, vë-eny inlahen ök minṙöinylen anga-aṅ nö sitih inlahen nö hayööken ò. Ngö ṙô anga-aṅ: “Ik hē chu taneūi sīön höiny samyeūheu, ngaich ṙā-ayö chū-ö tö ök yöngre kikōnyö hēk ha-uknyu ök yöng chu kikānö nö el ngam māṅ. Sā töng hěngtak chū-ö tölōnre, örheūheu inrē öich höng haṙivlōn.” Sitih inlahen ang Prāin nö la-al minë kanihngenre? Ngö ṙô anga-aṅ: “Hěngtak ök minṙöinylen tö Tōni minë-eny, örheūheu anga-aṅ nö vë-ekūö chu yěich chuh el mīting hēk i nup tahëng ṙētak inrē. Vë-eny inlahen yik tarik anga-aṅ tö kihngen sön pöri nöng ṙamölōn. Holṙô chu anga-aṅ nö vë-ekūö öp Salmai 27:10. Hēṙu inrē anga-aṅ nö kakkö inlahen Hēsikiā nö in chu. Öt lamöklōn Yāvē ök yöng Hēsikiā kikōnyö, sön pöri anga-aṅ nöng haköpngöre nö in Yāvē.” In e ang Prāin nö teūngen tö inyöökenre tö minë ṙô ò. Ngö ṙô anga-aṅ: “kētö inreuskö alaha chu ang prötör Tōni, angū-ö lāinyngen chu kūö urěh öich kētöre in ngam la-en Painīör.” Yī-ö minṙöinylen, chumkūöṙen yin tö më prötör sistör el ngam māṅ. Lökten öi hòṅ fēkö nup ṙô re tö reuslöre alaha tī tö cha.—Inch. 12:25.

6. Sitih inlahen ök Pôl nö kētö inreuskö alaha më raneh senchuri Kristīön?

⁶ Vë-eny inlahen yik tarik ngam Tēv Yāvē ang Pôl, nö in yik raneh senchurī Kristīön tö inlahen cha nö la-al nuk kanihngenre nö löktö im hinôlṙen re tö ngam Tēv. Kaheūkö cha-a tö Pôl nö “tökiröngen taṙul, yip ameū-a.” (Hep. 12:1) Akahakūö anga-aṅ tö më holmaneukre yěn fēkö inlahen yip tö chiplen tarik ngam Tēv, tö inlahen cha nö la-al nup kanihngenre. Ngaich teūngen cha-a tö inreuskö alahare hēk chumkūöṙen min cha-a tö ngam “elpanam ngam tö aṅ Tēv.” Tö ngö manah, haköpmatre cha-a nö in ngam Pūlngö ngam Tēv. (Hep. 12:22) Ngatī inrē töngamuh yěi haköp inlahen Yāvē nö sitih inlahen nö hayööken hē Kitīön, Pārök, Tāvit, Samuěl hēk yik tahëng inrē, ngaich reuslöre alaha ayī-ö. (Hep. 11:32-35) Pōyen hayööken ang Yāvē töngamuh tö yip prötör sistör. Yēḵ hī öi haköp inlahen cha, ngaich teūngen ayī-ö tö inreuskö alahare. Ōt ṙung minë chitri yamih lömöktö in më Vamënyen Yāvē lömöktö el ngam vöörlt hëtkôtör (world headquarters) vahënyö yip prötör sistör, yēḵ cha nö haköp inlahen tinrīken yip tahëng prötör sistör, ngaich sīöplöre ngam ṙinatö-ellōn cha.

HALĒN MË PRÖTÖR SISTÖR ANG PÔL NÖ SITIH INLAHEN NÖ VĪ NGAM LANĀMÖ

7. Asuh öp haköp hī in ngam inlēnö kahëtö Pôl im Rōma 14:19-21?

⁷ Yēḵ nup ṙô hī hēk la-en hī nup kamëtö lanāmö nö el ngam māṅ ngaich reuslöre alaha hēk ngönlöre yip prötör sistör. Yěn öt filal ngam chööngö aṅmat ngam Paipöl öp mufē öp hol hī. Ngaich mihôiṅ ayī-ö öi höng Hökngen e, ötkô öi köp in öp kuilōn re. Ngatī inlahen yik misī el ök māṅ i Rōm nö ngatī sanöklöre kanihngen cha. Pön ōt yik töt Yahūti Kristīön, ngaich ngam chööngö Môsös nö öt kēkaṙen nö ik hē e. Lökten nuk nyā-aṅkūö cha nö tölöök. (Māk. 7:19) Lökten yik Yahūti Kristīön nö ṙòkhöre kāha, ngaich ōt yik Yahūti Kristīön töt hòṅ hang ngam chööngö. Lökten ngaich nö pasū ngam lanāmö nö ihôi më holmaneuk cha. Akahakūö pöri ang Pôl tö në ngatī lāinyngen nö mihôiṅ nö fukngö tī tö cha. Ngaich mihôiṅ nö yih ngam tinṙōlen nö ihôi më holmaneuk cha nö el ngam māṅ. Lökten anga-aṅ nö kētö inlēnö më holmaneukre, ‘Tölöök an ngam töt kinā-aṅ alaha tö hī, un rēhĕn ngam kin-eūtö vāin, ngaich um kēken nup tö mihôiṅ nö fukngö tī töp hol meh.’ (Vë-evkūö Rōma 14:19-21.) Lōnu ang Pôl tö ngam lanāmö nö el ngam māṅ, lökten anga-aṅ nö halöktö tinrīkenre, hòṅ yik hol ò nö öt fukngö. (1 Kòr. 9:19-22) Mihôiṅ inrē ayī-ö ngatī inlahen, yěn tahëngö mufē öp hol hī tö öp mufē hī. Yēḵ e pöri nö öt filal chööngö aṅmat ngam Paipöl, ngaich ötkô ayī-ö öi höng köp öi in minë ṙô re. In e min ayī-ö öi vī ngam lanāmö.

8. Asuh ök inlahen Pôl nö vī ngam lanāmö nö el ngam māṅ ik sā ök tökiröng kanihngen?

⁸ Yěn ōt nup tö söklöre kanihngen el ngam māṅ, sön ang pôl nö vī ngam lanāmö. Tö sā inlahen yik holmaneuk cha nö ngölōn tö yik tahëng mihërö vamītöre nö Kristīön, nö hòṅ tunyīnyi cha-a. Ngaich hòṅ haköp ngam elkuilōn re cha-a. Pön vöö cha-a tö ṙô yip el kahôiṙen nö ötlēken cha. (Kal. 6:12) Akahakūö ang Pôl tö inlahen cha nöng vīlö kanihngen. Pön öt uroh öre ngam inlahen yik töt Yahūti Kristīön nö tunyīnyi. Aṅhavin pöri ang Pôl tö inyāichngö. Pön öt ṙô tö minë elkuilōn re anga-aṅ nö in cha. Pön höng kēḵ inlēnö nö in më “mahaköp hēk in yik minṙöinylen” inrē, yik mi-iyöng Yarūsalēm ik hē e. (Inl. 15:1, 2) Lökten in e ngaich yik holmaneuk cha nö köp nö im lanāmö hēk ṙamlōn inrē ngam māṅ.—Inl. 15:30, 31.

9. Sitih inlahen öi mihôiṅ asīnken Pôl öi vī ngam lanāmö nö el ngam māṅ?

⁹ Pī-a lohten inrē nö ngatī nup tö söklöre kanihngen el minë māṅ hī. Ngaich hòṅ sitih inlahen ayī-ö? Ötkô ayī-ö öi höng vë-eny nup mufē elkuilōnre öi in yip tahëng. Pöi hòṅ kēḵ nup inlēnö re öi in më prötör, yip tö ṙātu nö el ngam māṅ më mahayōmken hī. Mihôiṅ inrē öi ngëichkö mat ngam Paipöl hēk in minë līpöre inrē, nup inlēnö kahëtö ngam söngkötön ngaich vë-ekūö u ayī-ö. Ngaich mihôiṅ min ayī-ö hang minë inlēnö ngaich köp min ngam lanāmö nö el ngam māṅ.

10. Sitih inlahen ök Pôl nö haköpkö ngam hanangenlōn tö ngam lanāmö nö el ngam māṅ?

¹⁰ Ōt nup inrē inlahen Pôl nö vī ngam hanangenlōn hēk töngam lanāmö nö el ngam māṅ. Öt ngëichkö vanāchö yik holmaneukre anga-aṅ, pön ngëichkö nuk tövai inrē tinrīken cha. Tö sā ò nö kūich chitri yik Kristīön aṅ Rōm, ngaich ik manā-aṅ ṙô ök kahūich ò in ngam chitri nö kö kē minë-eny yik holmaneukre anga-aṅ, ngaich kakkö nuk tövai inrē la-en cha. Ngatī inlahen inrē ayī-ö asīnken Pôl öi chumkūöṙen tö minë tövai tinrīken yip prötör sistör re, ngaich ṙòngnyökūö ellōnre öi eū nup la-en cha. Yēḵ hī min öi ngatī inlahen ngaich ngön min ngam innôlö hī, röhta inrē min ayī-ö öi in höö. Ngaich sīöp inrē min ngam hanangenlōn hī tö höö.

11. Yēḵ hī öi lin in höö ngaich hòṅ sitih inlahen ayī-ö?

¹¹ Hēṙu ṙung nö ihôi më tö ekspirīön Kristīön nö sō-en höö ṙung nup ṙô cha. Holre nak misī nā Pôl nā Parnapas, hěngheuh cha-a nö la-al kūöre ik sā cha nö misnöri nö in ngam la-en re. Ngaich hòṅ ngò-ò Mākös ang Parnapas nö holröön ò, sō pöri ang Pôl tö ngam kuilōn ò. Lökten cha-a nö la-alkūöre, ngaich tahëngö talöökö ngaich Parnapas, ngatī inrē ang Pôl. (Inl. 15:37-39) Akahakūö cha-a tö ngam lanāmö hēk tö ngam hīnëngö nö hòṅ ōt nö el ngam māṅ, lökten cha-a nö köö aṙēlen höö. Unôich ngaich ang Pôl nö kūich minë tövai inlahen Parnapas hēk Mākös nö imat nup chitri re. (1 Kòr. 9:6; Kòl. 4:10) Haköplu in ayī-ö inrē in Pôl tö hī yěi lin öi in höö, ngaich hòṅ aṙēlen höö ayī-ö hēk hòṅ ngëichkö nup tövai ayī-ö tinrīken höö. Ngaich köp min ngam lanāmö hēk ngam hinëngö nö el ngam māṅ.—Efi. 4:3.

HANGÖNKÖ ṘINATÖ-ELLŌN MË HOLMANEUKRE ANG PÔL

12. Tö sitih inlahen nup kanihngen yamih nö in më prötör sistör?

¹² Hěng ang ngam inlahen hī öi hangönkö më prötör sistör, tö hī asīöp ngam ṙinatö-ellōn cha nö in Yāvē. Ōt re yip prötör sistör hī tötlēkaṙen hēk hayë-e nö i chūök re nö la-evṙen, el iskul hēk yip holmaneuk cha inrē. Ōt re yip tahëng tö īnu tö invah re hēk lohten inrē cha-a nö haṙivlōn tö kūö ṙô yip tahëng. Ōtre yip prötör sistör tö marò-òten nö i linökölōn Yāvē, ngaich samyeūheuv rò-òten cha-a nö hökkö yanīhi ngam manāngen. Angū-ö lāinyngen cha inrē nö kuṅngöre ngam ṙinatö-ellōn cha. Ngatī inlahen yik raneh senchurī Kristīön nö la-al në tö ngatī kanihngen. Sitih inlahen pöri ang Pôl nö hangönkö ngam ṙinatö-ellōn cha?

13. Sitih inlahen ök Pôl nö hangönlö ṙinatö-ellōn yik tö hayë-e?

¹³ Löktö in ngam Paipöl ṙô ang Pôl nö hangönkö ṙinatö-ellōn yik holmaneukre. Yik Yahūti vamītöre nö Kristīön, pī-a yik aṅ patī cha nö ötlēken cha hēk ngö ṙô inrē tö cha, “Tö ha-ehten ön ngih tinlööken hī Yahūti, ngaich hòng yī-ö öi vīngöre öi Kristīön!” Ngaich pī-a lohten yik Kristīön nö öt akahakūö tö ṙô re nö sapṙô cha. Ik sā cha pöri ngaich nö haköp ngam kahūich Pôl chitri nö chamuh in yik aṅ Heprāi, ngaich vë-ekūö e cha-a ngaich ngönlöre ngam ṙinatö-ellōn cha. (Hep. 1:5, 6; 2:2, 3; 9:24, 25) Pōyen nuk kahūich Pôl imat ngam chitri nö lökngöre yik tarik, ngaich ngatī inlahen më Kristīön nö sapṙô më aṅ patī re nö löktö in e. Ngatī inlahen yip prötör sistör hī töngamuh nö ötlēkaṙen hēk hayë-e inrē. Ngatī inlahen in ayī-ö mihôiṅ öi asīnken Pôl öi hayööken më prötör sistör re öi löktö in minë līpöre öi kētö inyööken cha. Ōt lohten yip ṙālö aṅ el minë māṅ tö hayë-e nö el iskul, kūö cha nö öt fēkö finötnyö hēk öt kēken nup tökiröng sakāmö. Yěn ngatī ngaich mihôiṅ öm vë-eny nang ò hēk mikahtökūö ò tö ṙô öp līpöre Mihôiṅ Man Örheūheu Ṙamlōn! in ngam lesön 44.

14. Asuh ök kahëken Pôl la-en, pòrô anga-aṅ nö sanngen nö im la-en inhānga hēk inköphöti inrē?

¹⁴ Hayööken yik holmaneukre ang Pôl ngaich hōten cha inrē nö ngatī inlahen. (Hep. 10:24) Hö-ö ang Pôl nöng löktö in minë ṙô ngam töhet līpöre nö hangön ngam ṙinatö-ellōn yik holmaneukre, pön löktö in nuk la-enre inrē. Tö sā ò nö hěngheuh nö hayööken yik aṅ Yahūti ik ṙētak inyāichngö, ngaich söömtö nyā-aṅkūö cha anga-aṅ. (Inl. 11:27-30) Örheūheu anga-aṅ nö ahangkö ngam tölöök inhānga hēk haköptö yik tahëng, sön pöri nö öt heulngöre nö i inyööken yik holmaneukre. (Kal. 2:10) Ngatī inlahen anga-aṅ nö kētö ṙinatö-ellōn yik holmaneukre tö Yāvē nö örheūheu nö chumkūöken cha. Ngatī inrē ayī-ö töngamuh yěi kētöre in minë la-en inyööken yip holmaneukre öi keuheūttö ṙētakre hēk kumlēḵ re, ngaich sā mahangönlö ṙinatö-ellōn yip holmaneukre ayī-ö. Yēḵ hī inrē öi kētö minë kòntripiusön i ṙinuhnyö ṙòktak ngam la-en hēk nup tahëng inrē inlahen hī öi hayööken më prötör sistör, ngaich in e ngam ṙinatö-ellōn hī nö ngön nö in Yāvē tö ò nö öthō nö ṙāngen hī.

15-16. Sitih inlahen öi hareuskö alaha yip holre yip tö kuṅnö ṙinatö-ellōn?

¹⁵ Kētö inreuskö alaha yik holmaneukre ang Pôl yik tö kuṅnen ṙinatö-ellōn, öt kun elmat anga-aṅ tö cha. Pön hameuktö ngam hangenlōnre nö in cha hēk vë-ekūö cha inrē. (Hep. 6:9; 10:39) Ik sā ò nö kūich chitri yik aṅ Heprāi, ngaich “ayī-ö” ngö ṙô anga-aṅ nö halēnö cha. In e anga-aṅ nö hameuktöre nö öt kuṅnö elmat tö cha. Pön fēḵlen cha anga-aṅ töre inrē nö hang minë inlēnö. (Hep. 2:1, 3) Ta-a chěi töi asīnken Pôl öi hareuskö alaha më prötör sistör re yip tö kuṅngöre ṙinatö-ellōn. Hěng ngam inlahen hī öi hòṅ kēnyö ṙētakre öi vë-ekūö cha inrē. In e min ayī-ö öi hameuktö ngam hanangenlōnre öi in cha. Hòṅ chumkūöṙen inrē öi ṙônyö nup ṙô re, pön löktö in e inrē cha-a nö teūngen tö inreuskö alahare.

¹⁶ Kētö ṙinatö-ellōn më holmaneukre ang Pôl tö Yāvē nö köplōn tö nup taṙôkhöre kahëken cha tölöök la-en. (Hep. 10:32-34) Yēḵ hī öi meuk yip prötör sistör re tö kuṅngöre ṙinatö-ellōn, ngaich mihôiṅ ayī-ö öi ngatī inlahen. Mihôiṅ ayī-ö hatöönö cha, nö sitih inlahen nö teūngen tö ngam kanô-en hēk asuh öp lanökngöre elkuilōn cha töp lökten cha nö vītöre nö Vamënyen Yāvē. Mihôiṅ öi tölṙô cha nö vë-eny inlahen Yāvē nö hayööken cha ik sā cha nö la-al minë kanihngenre. Mihôiṅ ayī-ö inrē öi kētö ṙinatö-ellōn cha tö nup inlahen cha nö i linökölōn Yāvē, tö ò nö öthō nö vaichngen nup la-en cha. Öthō inrē nö ṙāngen cha. (Hep. 6:10; 13:5, 6) Löktö in u min cha-a nösīöpö ṙinatö-ellōn, ngaich angū-ö min löktö kuilōn cha nö havantenre nö holtö nganötöre nö i linökölōn Yāvē.

“KÖÖ HAREUSKÖ ALAHA HÖÖ”

17. Asuh öp haköp meh tö hòṅ asīöpö?

¹⁷ Yēḵ öp mamānlö patī, ngaich hòṅ asīöp ngam heuneū-enre nö vī ngam tö ngön patī, ngaich ngatī inlahen inrē ayī- harunöre öi köö hareuskö alaha më prötör sistör re öi sitih inlahen öi hangönken cha. Yip tö kihngen prötör sistör hī mihôiṅ ayī-ö öi fēlen cha tö inlahen yip tahëng nö sitih inlahen cha-a nö chiplen nö la-al minë kanihngenre. Mihôiṅ inrē ayī-ö öi ṙòngnyökūö ellōnre öi eu nup la-en yip holre, ötkô öi höng köp öi in nup ṙô re. Pöi hòṅ hangihtöre tö ṙô yip tahëng. Ngaich yēḵ hī öi lin öi in höö, ngaich hòṅ aṙēlen höö ayī-ö. Yēḵ hī min öi ngatī inlahen köp min ngam hanangenlōn hēk tö ngam lanāmö el ngam māṅ. Ngaich hangön ngam ṙinatö-ellōn më hol maneukre inrē min ayī-ö öi vë-eny minë kanô-eṅ aṅmat ngam Paipöl. Ngaich el ṙētak minë kanihngen öi mihôiṅ öi hayööken cha yip tö kuṅnö ṙinatö-ellōn hěnghöre hareuskö alaha cha inrē.

18. Asuh öp öre ngaich tö hòṅ inlahen meh?

¹⁸ Yip prötör sistör kamëtöre nö in ngam la-en minānö, teūngen cha-a tö ṙanamlōn re. Ngatī inlahen yēḵ hī öi hareuskö alaha më prötör sistör, ngaich teūngen cha-a tö nganöönöre, ngatī inrē ayī-ö öi ṙamlōn. Pòrô öp machööḵlö nö tö ngön, sön pöri min angū-ö ip yamih ṙētak nö öt ngönngöre, ngaich mihôiṅ nö taṙōliyö. Ngaich yēḵ hī öi kētö inngönkö më prötör sistör re, ngaich örheūheu cha-a nö teūngen tö yanöölenre. Ta-a chěi töi köö hareuskö alaha höö öi kö hangëken höö inrē.—1 Tös. 5:11.