Yī-ö Rēlö Sistör—Iṙūöhöröön Yin Sölta Im Sanööḵngö Kristīön

1. Hòṅ sitih inlahen öi yěi hòṅ sööḵngö öi Kristīön?

PINGANGKŪÖ in ṙung yěi meuk vaneut sanīöpö më nyīö. Hòṅ sā më nyīö yin inrē më Kristīön nö hòṅ iṙūöhöröön nö im sanīöpö. Kamnahngenre pöri vē nyīö yěn sīöp, ngaich hö-ö ayī-ö Kristīön pöi hòṅ ma-ainyre öi la-evṙen yěi hòṅ sööḵngö öi Kristīön.b (1 Kòr. 13:11; Hep. 6:1) Öi sitih inlahen pöri? Hòṅ hangön ngam innôlöre ayī-ö in Yāvē, ngaich kē inyöökenre öi im töhet kumlēḵ ò, hòṅ hī öi asīöp nup tövai tinrīken nup töṙamölōn tī tö Yāvē hēk harūnöre inrē tö nup heuneū-en nup tö yöölen tī min tö hī ip unôich yēḵ hī kēken nup la-en kinë-ekūöre ip yamih ṙētak.—Inch. 1:5.

2. Asuh öp haköplö hī im Ranehlö 1:27, ngaich asuh min öp tö kakka tö hī in ngih ātiköl?

² Ik sā Yāvē nö vī tarik, ngaich vī kikōnyö kikānö anga-aṅ. (Vë-evkūö Ranehlö 1:27.) Kô-en ngam kikōnyö nö harīkngöre mineūkö tö ngam kikānö, harīkngöre inrē minë kinë-ekūö cha la-en tö Yāvē. Yēḵ cha pöri nö hòṅ hateungngö minë la-en kinë-ekūöre, ngaich hòṅ asīöp minë tövai cha-a tinrīkenre hēk asīöp heuneū-enre inrē nö la-evṙen. (Ran. 2:18) In ngih ātiköl in min öi ngëichkö inlahen më ṙālö sistör nö sitih inlahen cha-a yěn hòṅ sööḵngö nö Kristīön. Ngaich ip yamih ātiköl min öi ngëichkö inlahen më ṙālö prötör.

ASĪÖP MINË TINRĪKEN TÖ ṘAMLŌN TĪ TÖ NGAM TĒV

3-4. Achiö yip kô-òren chūök më rēlö sistör nö haköplu? (Ngëichkö ngam nyat.)

³ Pōyen yin më kikānö tövënyu nö imat ngam Paipöl, më tö hangenlōn tö Yāvē hēk hamòltö ellōnre inrē nö lök lōn ò. (Ngëichköm ātiköl el ngam jw.org “Asuh nup mihôiṅ haköplö hī in më kikānö tövënyu nö imat ngam Paipöl?”) Sā ṙô ngam miröökö lökngörit ngih ātiköl nö vënyö inlahen cha ‘nö töt tayāchaṙen’ hēk ‘kô-en inrē cha-a i tökeuheūttöre.’ Mihôiṅ yin yī-ö ṙālö sistör öi pōyen haköplö öi in cha. Mihôiṅ inrē öi haköplu öi in më sistör el ngam māṅ meh, më tö sööḵngö ṙēḵti nö Kristīön.

⁴ Fēkö yip tö sööḵngö man sistör, yip tö hòṅ asīnka inlahen tö meh. Chumkūöṙen më-eṅ tö nup tövai tinrīken cha. Ngaich fēkö inlahen re kò-òren öm sitih inlahen min öm asīnken cha? In minë yamih in min përakrāf öi kakkö minë tölūöi tinrīken, minë tö mihôiṅ nö asīöpö tö meh.

5. Kūöyòh öi hòṅ īnu tö ngam inyāchngö yěi hòṅ sööḵngö öi Kristīön?

⁵ Yēḵ hī hòṅ söökngö ṙēḵti öi Kristīön, ngaich hòṅ īnu ayī-ö tö ngam inyāchngö. Ngòh sistör tö īnu töm inyāchngö, vai min ngam innôlö ò nö in Yāvē, in yip tahëng inrē. (Yāk. 4:6) Sā inlahen öp sistör yěn mahayāichngöre hēk tö hangenlōn inrē tö Yāvē ngaich hang ngam lökngörīt chööngö min anga-aṅ im 1 Kòr. 11:3, ngaich tumṙeutöre tö öp tökētu chööngö nö el ngam mikūönö hēk nö el ngam māṅ inrē.c

6. Sitih inlahen ök Repëka nö hameuktöre nö īnu tö ngam inyāichngö asuh öp haköplö më ṙālö sistör nö in ò?

⁶ Kô-òren öi ngëichkö inlahen Repëka. Tö akaha ök Repëka nö kikānö. Akahakūö anga-aṅ tö nuk la-enre, ngaich öt pa-ekūö nö kēken u. (Ran. 24:58; 27:5-17) Tö milēḵṙen inrē anga-aṅ tö yip tahëng, tumṙeutöre inrē nö elkatòh yip tö kētu chööngö. (Ran. 24:17, 18, 65) Söö man yěm asīnkö inlahen Repëka öm aṅhavin tö ngam inyāchngö ngaich holṙen më tö kētu chööngö tö Yāvē. Yēḵ meh min ngatī inlahen ngaich tövai min më-eṅ öm inchōkūö ngam mikūönöre hēk tö më prötör sistör inrē aṅ el ngam māṅ.

7. Sitih inlahen ang Estör nö akahakūö tö tölngöre asuh öp haköp më rēlö sistör nö in ò?

⁷ Akahakūö an tö tölngöre ngòh tö sööḵngö Kristīön. Ngö ṙô an ngam Paipöl ‘tö akaha an ngòh tö akahakūö tö tölngöre.’ (Inch. 11:2) Ngatī inlahen ök Estör. Akahakūö anga-aṅ tö nup tölngöre. Lökten ik sā ò nö vīlöng nö rānī ngaich öt tāilölōn anga-aṅ. Nuk ṙô ök kanônyö ò Môrtikai nö halēnö ò, hāngö u anga-aṅ. (Est. 2:10, 20, 22) Yī-ö ṙālö sistör, yēḵ yīö min öi kēḵ inlēnöre in yip tö sööḵngö ṙēḵti Kristīön el ngam māṅ, ngaich hameuktöre min yī-ö öi ma-asīnken Estör öi akahakūö tö nup tölngöre.—Tai. 2:3-5.

8. Sitih inlahen ang kò-òren ngòh sistör nö lööngö katöllö i alaha ngam innyöötöre nö sā ṙô ngam 1 Timôtī 2:9, 10?

⁸ Hěng ök inrē inlahen Estör nö hameuktöre nö akahakūö tö tölngöre. Vënyu nang in tö ngam Paipöl tö inlahen Estör ‘nö tövai nö kikānö hēk tölöök inrē,’ Öt hěngheuh pöri anga-aṅ nö lōnu tö yip tarik nöng ngëichken ò. (Est. 2:7, 15) Asuh öp haköplö më sistör kò-òren nö in Estör? Chumkūöṙen ngëichkö ṙô ngam 1 Timôtī 2:9, 10. (Vë-evkūö.) Hōten më sistör ang Pôl nö chumhenöre tö minë chehen, minë mahameukten cha nö akahakūö tö tölngöre hēk vai inrē minë mufē cha. Ngö manah ngam ṙô Pôl yěn i ṙô krīk, tö më kikānö nö hòṅ hayūtöre tö minë chehen minë mahameukten cha nö milēḵṙen tö ngam Tēv milēḵṙen inrē tö mufē yip tahěng. Kirööngen ṙô in öi ha-öiny më sistör re më hamang ngih inlēnö!

9. Sitih inlahen ök Apikēl nö holtö mikah elmatre nö la-evṙen ngaich sitih inlahen më sistör mihôiṅ nö asīnken ò?

⁹ Ngòh sistör tö sööḵngö nö Kristīön, holtö mikah elmatre anga-aṅ yěn la-evṙen. Ngòh tarik tö īnu tö mikah elmat, akahakūö min anga-aṅ tö nup la-en tölöng hēk tövāich inrē. Löng inrē min nup la-en kahëken ò. Kô-òren öi hachōḵ elmatre tö inlahen Apikēl. Keuheūtngöre vah öre ngam mikūönö cha nö fēli kūö ök tövaich fësla ök pīhö ò. Kūö mikah elmat Apikēl pöri cha-a nö öt kô-òngvah, ilööṙen inrē ang Apikēl nö kē-ělkūö alahare. (1 Sa. 25:14-23, 32-35) Akahakūö an ngòh tarik tö akaha elmat tö öp ṙētak re nö ihē nö ṙò-òv hēk ihē nö öt ṙò-òv. Lökten min anga-aṅ yěn hatöönkö inlahen yip tahěng ngaich öt hatöön nup tötkô min anga-aṅ nö mikahkūö ò. —1 Tös. 4:11.

HARŪNÖRE TÖ MINË LA-EN TÖ YÖÖLEN TĪ MIN TÖ MEH IP UNÔICH

10-11. Asuh öp min yanöölen meh hēk yanöölen yip tahëng inrē yěm heuveū-en im inkööpö hēk kinūichö? (Ngëichköm nyat.)

¹⁰ Hòṅ harūnöre inrē më sistör nö heuveū-en nö la-evṙen. Yēḵ ngòh tarik nö löktö kūö nyinī-öre nö harūnöre nö la-evṙen ngaich yöölen min anga-aṅ ip ṙôkö ò. Ta-a chěi töi mikahtökūöre tö nup tö mihôiṅ nö chūök më sistör nö harūnöre.

¹¹ Harūnöre im inkööpö hēk kinūichö. Ōt nup panam chūök më kikānö nö öt uroh nö ngëichkaṙen nö in ngam inkööpö. Töt ṙanāngen pöri angū-ö nö in ngòh tö hěngtak Kristīön.d (1 Tim. 4:13) Lökten pòrô öm kihngen, uh më-eṅ öm heūlngöre öm harūnöre in ngam inkööpö hēk kinūichö inrē. Asuh öp min yanöölen meh yěm ngatī? Teūngen min më-eṅ mihôiṅ tö kinmānö re. Heuveū-eu ṙô inrē min më-eṅ öm haköp ngam Ṙô Ngam Tēv hēk haköpten yip tahëng inrē tö ṙô e. Ngaich yěm kahngenre min öm haköp ngam ṙô ngam Tēv hēk fēken u inrē ngaich röhta min më-eṅ öm in Yāvē.—Yôs. 1:8; 1 Tim. 4:15.

12. Asuh öp ṙô ngam Inchōḵ-oṙô 31:26 nö hayööken hī harūnöre im ṙinô-òvö?

¹² Harūnöre im ṙinô-òv. Tö hòṅ heuveū-eu ṙô yin vē Kristīön yěn ṙô-òvö. Vai ngam inlēnö hī tö Yāköp nö ngöṙô: “Hökngen taṙòkhöre tarik nö ka-eūyö elnang; ṙēmöṙô nö ṙô-òv.” (Yāk. 1:19) Yēḵ hī hangihtöre tö ṙô yip tahëng ngaich akahakūö min ayī-ö tö nup “mufē cha hēk tö nup miṙivlōn cha” inrē. (1 Pīt. 3:8) Sitih inlahen pöri yěm öt akaha elnang tö ṙô öp lamā kūöre hēk öt akahakūö inrē më-eṅ tö öp mufē ò? Mihôiṅ më-eṅ öm hatön nyö ṙô ellōn ò, ngaich afītöre urēhěkūö meh sapṙô ò. (Inch. 15:28, ftn.) Mihôiṅ inrē öm hatönöre öm ngö ṙô, ‘Tökô-en hòng ngam ṙô vahënyö chu? Reuslöre alaha hòng min öp hamāngö e? Tölöng hòng min ngam inlahen chu ngatī ṙô? Meukö hòng min ngam minlēḵṙen chu öich löktö in e? Mihôiṅ in haköplu in më tahëng sistör më mahangihtöre tö ṙô holre hēk hamôltö hanangenlōnre nö vë-ekūö holre. (Vë-evkūö Inchōḵ-oṙô 31:26.) Chumkūöṙen më-eṅ tö inlahen ṙô cha nö ṙò-òv. Yēḵ meh min harūnöre öm heuveū-eu ṙô öm ṙô-òvö ngaich vai min ngam innôlö meh nö in yip tahëng.

13. Sitih inlahen öm harunöre chumkūöken el patī re? (Ngëichköm nyat.)

¹³ Harūnöre chumkūöken el patīre. Më kikānö yin ṙung tömööḵlö inlahen nö la-evṙen nö el patī. Mihôiṅ më rēlö sistör nö harūnöre nö la-evṙen nö in më yöngre kikānö, in më sistör inrē tö heuveū-en nö la-evṙen. Ngö ṙô ang sistör Sintī: “Hěng ngam tövai inköptö chu tö ngam yöng chu kikānö, tö hī öi ṙamlōn yěi la-evṙen. Harūnö chu ngam yöng chu öich vī nyā-akūö, ahet patī, chōk hīla hēk holtö mikah elmatre inrē yěich havah nup töhavāha. Yöölen takô chū-ö öich löktö in u. Ngaich chin töngamuh öich heuveū-en takô öich la-evṙen öich i patīre, teungen chū-ö inrē tö ṙētakre öich im linökölōn ngam Tēv. Harūnö chū-ö inrē tö ngam yöngre öich meukṙen holre. Löktö in e ngaich chū-ö öich meuk kūö më prötör sistör më chūök chu ngaich öich pōyen haköplö.” (Inch. 31:15, 21, 22) Ngòh sistör tövai inlahen nö ngëichkö el patīre, mameukṙen holre inrē, chūök ṙanamlōn min ngam patī ò, inkôlò inrē anga-aṅ nö el ngam māṅ.—Inch. 31:13, 17, 27; Inl. 16:15.

14. Asuh öp haköplö më in sistör Kristöl, asuh inrē öp töhòṅ chumkūöṙen meh?

¹⁴ Harūnöre hayöngkenre. Töt ṙanāngen ön ngih nö la-en më Kristīön nö ṙòkhöre, yēḵ cha nö hòṅ sööḵngö nö Kristīön. (Filip. 4:11) Ngö ṙô ang sistör Kristöl: “Ik sā chu katöllö lōn re tö nup söpchek haköp re el iskul ngaich hatöntöre chū-ö in nap yöngre. Hòṅ chu löngö katöllö tö nup söpchek nup mahaköpten chu min heuveū-en la-evṙen. Tölṙô chu öp yöng chu kikōnyö öich haköp ngam accounting ngaich kô-en chū-ö öich yöölen.” Öt höng angū-ö pöri chö-öny öi hòṅ kē heuneū-enre pöi hòṅ pōyen hamūl tö ṙūpīö pöi akaha elmat tö tīre öi lökngö tī öi yūs ngam pësa inrē. (Inch. 31:16, 18) Yěm harūnöre min ṙamlōn i törahëichnyen hēk öt höng lök inlahenre öm kē hötṙeh i holre ngaich teungten min më-eṅ öm in ngam chö-önyre tö ngö manah tö meh min öm keuheūt tö ṙētakre min öm i linöklōn Yāvē.—1 Tim. 6:8.

HĪNÖRE TÖ NUP TÖMIHÔIṄ MIN NÖ LA-EN MEH IP YAMIH ṘĒTAK

15-16. Kūöyòh aich nö pōiṙāi më kanānö hī tö öl nö pihövö? (Mākös 10:29, 30)

¹⁵ Yēḵ meh min asīöp nup tinrīken nup tö ṙamlōn tī tö Yāvē, hēk harūnöre inrē öm la-evṙen, ngaich heuveū-en min më-eṅ öm kēken nup la-en kinë-ekūöre ip yamih ṙētak. Ta-a töi ngëichkö nup tö mihôiṅ nö la-en meh min.

¹⁶ Lohten öm sōḵ sin öm pihövö. Ōt yip sistör hamang ngam inlēnöre kahëtö Yēsū ngaich katöllö inlahen re nö öt pīhövö, pòrô angu-ö nö töchōichngen nö imat më tarik im panam chūök cha. (Mët. 19:10-12) Ōt yip muh tö tahëngö lāinyngen nö öt pīhövö. Mihôiṅ pöri më-eṅ öm ṙātö-ellōnre tö nā Yāvē nā Yēsū nö öt kūöṅn elmat tö më sistör tö öl nö pihövö pön pōiṙāi acha-a nö imat cha. Tövai yin inrē më sistör tö öl nö pihövö nö inchōkūö nö el ngam māṅ. Hangenlōn cha-a tö më prötör sistör chumkūöṙen inrē tö cha. Sā ṙēngen yöng hēk kanānö hī cha-a nö el ngam māṅ.—Vë-evkūö Mākös 10:29, 30; 1 Tim. 5:2.

17. Asuh nup kô-òren la-en ngam rēlö sistör ing töngamuh yěn hòṅ keuheūttö ṙētak re min anga-aṅ nö löklōn Yāvē?

¹⁷ Mihôiṅ öm keuheūttö ṙētakre öm löklōn ngam Tēv. Pōihöl tī yin më sistör nö tānyö ngam la-en inhānga nö ikūö në panam. (Sal. 68:11) Mihôiṅ öm rih më-eṅ fēkö inlahenre öm keheūttö ṙētakre löklōn Yāvē? Öm kētöre öm panīör, mānö hēk la-evṙen inrē öm el Pětel. Mihôiṅ öm vë-eny kuilōn re öm in Yāvē öm hòṅ kētöre in në la-en. Hēk mihôiṅ inrē öm hatöntöre in yip kumheūttö ṙētakre nö löklōn Yāvē, tö inlahenre öm sitih inlahen mihôiṅ öm teungten öm kēken u anū-ö la-en. Ngaich fēkö nup tö mihôiṅ inlahenre öm hateungngö minë la-en afēköre. Ngaich yēḵ meh min ngaich teungten in u, ngaich vī-inyre kūö talöökö hēk min më-eṅ öm i linökölōn ngam Tēv Yāvē.

18. Kūöyòh ang ngam sistör nö hòṅ chumkūöṙen yěn katöllö pīhöre? (Ngëichköm nyat.)

¹⁸ Yēḵ meh hòṅ pihövö. Tö-akaha man min öm inpīhö kikānö yěm asīöp minë tinrīken hēk heuneū-en inrē minë tövënyu nö in ngih ātiköl. Tökiröng an nö fësla ngam pinīhö, lökten öm hòṅ chumkūöṙen yěm hòṅ katöllö pihöre. Pön öp pīhö meh min kui ngam mikūönö nā ngaich hòṅ elkatòh ò min më-eṅ. (Rōm. 7:2; Efi. 5:23, 33) Lökten urěhkūö meh “hòṅ” ṙô öp kikōnyö ngaich hòṅ hatöönöre më-eṅ öm ngö ṙô: ‘Tö sööḵngö ang nö Kristīön? Urěhlö minë kuilōn Yāvē hòng anga-aṅ? Löng nup ṙung katöllö ò? Hō-en nup vanāichöre öp? Milēḵṙen öp tö kikānö? Hayööken chu öp min hangön ngam innôlöre in Yāvē hēk hateungö nup kuilōn chu hòng min anga-aṅ? Tövai hòng inrē nö hol chu? Sitih inlahen anga-aṅ yěn kē-evkūö tö la-en? Asuh nup la-en ò nö el ngam māṅ?’ (Lūk. 16:10; 1 Tim. 5:8) Sā meh lōnu tö öp tö akaha nö pīhöre ngaich hòṅ ngatī më-eṅ inrē öm harūnöre öm tö akaha öm inpīhö kikānö.

19. Kūöyòh öng nö töt kūöṅnö ngam inlahen hī yěi hamòlṙen?

¹⁹ Vënyu an ngam inpīhö kikānö tö ngam Paipöl nö “hamòlṙen” ngam pīhöre kikōnyö nö “tösā ò.” (Ran. 2:18) Hanāchiṙen hòng ngam kikānö lökten nö vënyu nö hamòlṙen? Hö-ö öt ngatī! Öt tökūöṅnö an ngam inlahen hī yěi “hamòlṙen”. Vënyu an inrē Yāvē nö “hamòlṙen” nö imat ngam Paipöl. (Sal. 54:4; Hep. 13:6) Sitih inlahen öng rī min ngam inpīhö kikānö nö hameuktöre nö hamòlṙen? Holṙen ngam pīhöre min anga-aṅ, hō-en nup katöllö ò inrē. Ngaich kūö ò nö hangenlōn tö Yāvē, öt vë-eng nang ngam pīhöre min anga-aṅ havai minë-eny ò pöri min nö ikūö yip tahëng. (Inch. 31:11, 12; 1 Tim. 3:11) Lökten më kikānö yěn hòṅ harunöre nö tö-akaha min nö inpīhö kikānö ngaich hòṅ asīöp ngam hanangenlōn re cha-a tö Yāvē, hayööken yip tahëng inrē el ngam māṅ hēk i patī re inrē.

20. Yēḵ ngòh sistör nö vī-ire nö tövai nö inpīhö kikānö, ngaich asuh min öp yanöölen ngam mikūönö ò?

²⁰ Yēḵ meh öm hòṅ kūönu. Lohten min nā-a töp pīhö meh an hòṅ kūönu. (Sal. 127:3) Lökten nö tövai ngam inlahen meh yěm löktökūö ingih öm fēkö nup inlahenre yěm tö hòṅ akaha öm inyööngö. Yöölen man min yěm asīöp minë tövënyu tinrīken hēk heuneū-en in ngih ātiköl, öm tö-akaha öm inyööngö hēk inpīhö inrē. Yēḵ meh min hangenlōn hēk chumkūöṙen inrē tö yip tahëng, möi inrē öm in cha, ngaich ṙamölōn min ngam mikūönö meh öt hēngö vanöörö inrē min më kūön meh.—Inch. 24:3.

21. Sitih mufē öi tö më sistör hī, ngaich kūöyòh? (Ngëichköm lama uk nyat.)

²¹ Yī-ö rēlö sistör, hangenlōn takô in tö yīö kūö yīö öi holṙen Yāvē hēk tö yip tarik ò inrē, ma-anyre inrē öi asīöp minë tinrīken minë tö ṙamölōn tī tö Yāvē. (Hep. 6:10) Hēk harūnöre inrē tö minë heuneū-en minë tö ṙamlōn tö meh, tö yip mikūönö meh hēk yip hol meh inrē yip mahareuskö alaha meh hòṅ löktö kūö töngamuh më-eṅ öm harūnöre öm kēken minë la-en ngaich heuveū-en min më-eṅ ip yamih ṙētak tö pōiṙāi yin öi inkôlò el ngam söngkötön Yāvē!