Aṅhaṅv-in Öm Tö Ngam Ṙinātö-ellōn?

Tötṙanāngen an ngam inlahen hī aṅhaṅv-in tö ngam ṙinatö-ellōn yěi hòṅ haṙamlōn Yāvē. Ngö ṙô pöri misī angPôl ‘öt ṙòkhöre in aṅhaṅv-in tö ngam ṙinatö-ellōn.’ (2 Tös. 3:2) Ik sā ò nö ṙòten e, ngaich kakkö yik “tötlöök” anga-aṅ yik ötlamëken ò. Pōiyen inrē pöri yip töt aṅhaṅv-in tö ngam ṙinatö-ellōn. Tö sā ṙēngen yip töt ṙamātö-ellōnre nö in ngam Tēv tö ò nö ōt, pòrô cha-a nö meuk minë vahīlö ò ikūö ngi. (Rōm. 1:20) Rīkre inrē yip töng ṙamātö-ellōnre nö in öp tö hěng kumlēḵ hēk Tēv. Öt hō min ayī-ö haṙamngölōn Yāvē yěi höng ngatī tölngö ṙinatö-ellōn.

Hòṅ kiröngen ṙinatö-ellōn ayī-ö tö Yāvē nö ōt, ‘pò ò nö kētö ṙaneushö’ yip tökô-en ṙinatö-ellōn nö in ò. (Hep. 11:6) Höng löktö im töhët kumlēḵ ngam Tēv in mihôiṅ öi ṙūöhlö ngam ṙinatö-ellōnre, pön tö hěng ngam ṙinatö-ellōn nö ṙòng ngam töhet fanöinylö. Lökten öi hòṅ vë-ekūötēv hēk havëkö kūö ò tö ngam töhet kumlēḵ. (Lūk. 11:9, 10, 13) Höng löktö im vinë-ekūö ngam Paipöl in mihôiṅ teūngen tö ngam töhet kumlēḵ, pön höng löktö in ngam töhet kumlēḵre tī hē-e ngam Tēv nö kūichlen e. Lökten yē hī öi vë-ekūö ngam Paipöl, aṙū-uti mufē öi fēkö nup haköpre aṅ mat e hēk kalahkenre inrē öi lök in u, ngaich la-evṙen min ngam töhet kumlēḵ Yāvē nö ikui hī hēk hameuktöre inrē min ayī-ö öi aṅhaṅv-in tö ngam ṙinatö-ellōn. Angū-ö min inrē inlahen hī ṙamölōn tī tö Yāvē.