Ṙatö-ellōnre Tö Yāvē Ngaich Nö Aṙēlen Meh!

1-2. Sitih mufē öi yěi aṙēlöng tökööl tö Yāvē? (Ngëichkö nyat.)

RĪKRE nuk misī tökiröng tökööl kahëken ök Rācha Tāvit. Lökten ò nö akahakūö tö ngam mufē hī yěi kēken tökööl. (Sal. 40:12; 51:3, supörskripsön) Holtö ellōnre pöri anga-aṅ nö haṙivlōn tö minë tököölre, lökten ang Yāvē nö aṙēlen ò. (2 Sa. 12:13) Teūngen ang Tāvit tö hanöhlöre ik sā ò nö aṙēlöng.—Sal. 32:1.

² Yēḵ Yāvē nö hameuktö ngam miṙēlōnre nö in hī nö aṙēlen minë tökööl hī, ngaich teūngen ayī-ö tö hanöhlöre öi sā Tāvit. Reuslöre alaha in öi meuk inlahen Yāvē nö aṙēlen minë tökööl hī. Yěi pòrô öi kēken tökiröng fālen, ngaich sön ang Yāvē nö höngöre nö aṙēlen hī. Hòṅ holtö ellōnre pöri ayī-ö öi haṙivlōn tö minë tökööl kahëkenre yěi hòṅ aṙēlöng tö ò, hòṅ hō-en u ayī-ö, ngaich ui havantö inlahenre hēk öi kēken u. (Inch. 28:13; Inl. 26:20; 1 Yôh. 1:9) Keuheūtnyöre inrē ayī-ö tö ṙanamlōnre yěi akahakūö tö inlahen Yāvē nö keuheūtngöre tī nö aṙēlen minë tökööl hī, ngaich sā töng öt kamëken tökööl ayī-ö.—Isi. 33:16.

3-4. (a) Pòrô ngam sistör nö ngaich nö kē ngam vinôkö sön anga-aṅ nö sitih mufē? (b) Asuh öp min haköp hī in ngih ātiköl?

³ Rīkre yin më tarik tökihngen nö ṙatö-ellōnre tö Yāvē nö ngaich nö aṙēlen cha. Kò-òren öi chumkūöṙen töm inlahen Cheniför ngam tö haruklöng nö el ngam kanô-en. Ik sā ò ngaich nö kiröng, ngaich nëtkangen inlahen anga-aṅ hěnghöre löklōn ngam Tēv hēk hěnghöre la-evṙen tö minë tövaich la-en nö hayunkenre tö minā yöngre. Unôichrit tö ṙōl samyeuheū pöri ngaich anga-aṅ nö havantöre nö in Yāvē ngaich kētöre nö im vinôkö. Ngöṙô anga-aṅ: “Höng fachūrit minë pësa hē e chū-ö ötlöngö tinrīken inrē, pōivat öich òk ka-eūt hēk īnu inrē tö ngam tanāinyö. Akahakūö chū-ö hē e tö hī yěi havöötö ellōnre in Yāvē hēk havëkö inṙē-ělre öi in ò, ngaich löktö im tökitaknyu mahām Yēsū tī min anga-aṅ nö aṙēlen minë tökööl hī. Sön pöri chū-ö hē e öich öt ṙatö-ellōnre tö Yāvē nö ngaich nö kô-en nö aṙēlen chu.”

⁴ Hēṙu öm ṙung më-eṅ kihngen öm ṙatö-ellōnre tö Yāvē nö ngaich nö aṙēlen nuk tö ha-ehangen vanaichköre inlahen meh? Yěn heūṅ, ngaich köpölōn më-eṅ tö Yāvē nö lōnu tö meh öm sā ṙinatö-ellōn Tāvit, tö ò nö ngaich nö aṙēlen minë tökööl meh hēk lōnu tö meh öm teūngen tö hanöhlöre. Mikahtökūöre in min in ngih ātiköl nö kūö yòh nö tötṙanāngen ngam inlahen hī öi hòṅ ṙatö-ellōnre tö Yāvē nö ngaich nö aṙēlen minë tökööl hī, ngaich sitih inlahen mihôiṅ ayī-ö ṙatö-ellōnre tö e.

KŪÖ YÒH ÖI HÒṄ ṘATÖ-ELLŌNRE TÖ YĀVĒ NGAICH NÖ AṘĒLEN HĪ?

5. Asūp inlahen ngam Satān nö vīhöt ṙinatö-ellōn hī? Kētö inchōḵ elmat.

⁵ Öthō min öi vönhöt in minë tinngöp tī ngam Satān. Köpölōn tö ngam Satān nö lōnu tö hī öi ṙāngenre löklōn Yāvē, mihôiṅ nö ṙōlkangen minë inlahen tī nö halō-ongkūö hī. Tö sā ò nö hōten hī öi ngölōn tö hī min öt aṙēlöng tö Yāvē tökūö ṙôken minë tököölre. Kò-òren öi chumkūöṙen tö inlahen ök ihih tarik tököölö fālen i Kòrin ök kamëken ngam chinò-òṅkānö, ngam lāinyngen ò ngaich nö ha-uknyu tö ngam māṅ. (1 Kòr. 5:1, 5, 13) Unôichngöre anga-aṅ nö haṙivlōn tö minë kahëkenre tökööl ngaich halööktitre. Lōnu pöri hē e ngam Satān tö më prötör sistör aṅ el ngam māṅ nö un aṙēlen ò, uh rēhěn nö ha-öinytö yīhi ò nö el ngam māṅ. Yēḵ më prötör sistör öre nö öt aṙēlen ò, ngaich lohten öre ngam tarik nö ngö mufē tö Yāvē inrē nö öt aṙēlen ò, ngaich angū-ö hēk öre lāinyngen ò nö ‘kalē-ě miṙivlōn’ ngaich ṙāngenre nö löklōn Yāvē. Söl ing töngamuh an ngam Satān nö yūs minë tö ngatī inlahen tī re nö halō-ongkūö hī. Hòṅ vīhöt ṙinatö-ellōn hī anga-aṅ tö minë tökööl kahëken hī nö töng öt inṙēḵlu. ‘Akahakūö pöri ayī-ö tö minë inchīlö tī ò.’—2 Kòr. 2:5-11.

6. Yē hī öi haṙivlōn öi fēkö nup tö ha-ehangen vanāichöre, ngaich hòṅ asūp inlahen hī yěi hòṅ teūngen tö ngam hanöhlö?

⁶ Teūngen ayī-ö tö hanöhlöre hēk öthō öi höng haṙivlōn öi fēkö nup vanāichöre. Haṙivlōn in yē hī kēken tökööl. (Sal. 51:17) Öt tövaich pöri ngam inlahen hī yěi haṙivlōn tö u, pön löktö in e min ngam elkuilōn hī nö hayööken hī öi löngö kahëken tö la-en. (2 Kòr. 7:10, 11) Yē hī pöri min öi höng fēken minë tököölre ngaich haṙivlōn, pòrô ngaich öi halööktitre, ngaich mihôiṅ min öi höng ṙāngenre löklōn Yāvē. Yē hī pöri min öi ṙatö-ellōnre tö Yāvē nö ngaich nö aṙēlen hī, ngaich öthō min ayī-ö öi höng fēken minë vanāichöre. Het min ngam elkuilōn hī hēk holtö ṙanamlōnre min ayī-ö öi löklōn Yāvē. Angū-ö ngih lōn Yāvē nö in hī. (Kòl. 1:10, 11; 2 Tim. 1:3) Hěng pöri ngam tö söklöre intöönö, sitih inlahen öi mihôiṅ öi vīhöt ngam ṙinatö-ellōnre tö Yāvē nö ngaich nö aṙēlen hī?

SITIH INLAHEN ÖI MIHÔIṄ ṘATÖ-ELLŌNRE TÖ YĀVĒ NGAICH NÖ AṘĒLEN HĪ?

7-8. Asuh ök ṙô Yāvē nö vë-eny nang Môsös tö inlahenre, ngaich asūp mihôiṅ ṙinatö-ellōn hī öi in e? (Maneutnyi 34:6, 7)

⁷ Fēkö ngam ṙô Yāvē nö vënyö inlahenre. Chumkūöṙen töm ṙô Yāvē ik sā ò nö vë-ekūö Môsös nö ikui ök rôngö Sināi.a (Vë-evkūö Maneutnyi 34:6, 7.) Mihôiṅ öre ang Yāvē nö keuheūtnyöre ṙô nö vënyö minë tinrīkenre nö in Môsös, höng ngö ṙô pöri anga-aṅ nö vënyö inlahenre, ‘tö tööḵlö an ngam Tēv Yāvē tö miṙēḵlōn hēk neūkölōn inrē.’ Kò-òren öi afītöre tö inlahen öp töhěngtak öre lamöklōn Yāvē yēḵ ò nö holtö ellōnre nö haṙivlōn tö minë tököölre, ngaich hö-ö hòng öre ngam Tēv ngam tö tööḵlö tö miṙēḵlōn hēk tö neūkölōn nö aṙēlen ò? Öthō an nö öt aṙēlen ò! Yēḵ Yāvē nö öt aṙēlen hī, ngaich töng öt aṙē-ělōn öre anga-aṅ nö Tēv hēk töngëḵ-eṅ ellōn inrē. Akahakūö pöri ayī-ö tö ò nö öthō min nö ngatī inlahen.

⁸ Tēv kanô-en an Yāvē, ngaich öthō anga-aṅ nö minyôny-aṅ ṙô nö vënyö inlahenre. (Sal. 31:5) Mihôiṅ ayī-ö öi ṙatö-ellōnre in nup töng ṙô ò. Yēḵ meh öm haṙivlōn öm fēken nuk tö urěhngöre kahëkenre tökööl, ngaich kò-òren më-eṅ öm afītöre tö në intöönö: ‘Ṙatö-ellōnre öich chū-ö tö Yāvē nö kô-en nö tö tööḵlö tö miṙēḵlōn hēk neūkölōn? Ṙatö-ellōnre hòng inrē chū-ö tö ò nö aṙēlen yip tarik yip mahalööktitre? Yěn heūṅ, ngaich ötkô hòng min chū-ö öich ṙatö-ellōnre tö ò nö ngaich inrē nö aṙēlen chu?’

9. Asuh öp manah ngam inlahen Yāvē nö “aṙēlen” minë tökööl hī? (Salmai 32:5)

⁹ Fēkö inlahen ṙô tī yik kamūich ngam Paipöl nö vë-eny inlahen Yāvē nö aṙēlen hī. Chumkūöṙen tö inlahen ṙô Tāvit ngam kamūich ngam Salmai. (Vë-evkūö Salmai 32:5.) Ngö ṙô anga-aṅ, ‘Ngaich man öm aṙēlen minë tökööl chu hēk minë tökiröng fālen chu.’ Ngam ṙô ‘aṙē-ěl’ ngam tö translētö nö im ṙô Heprāi, ngaich tö ngö manah angū-ö, “keunlöre” hēk “keunngen e.” Ik sā Tāvit nö kēken tökiröng fālen ngaich sā ṙēngen kameun tölāngan anga-aṅ. Aṙēlen ò pöri ang Yāvē nö sā ṙēngen kameunlöre tö ngam lumngan ngam tökööl ò, ngaich ṙūöhngen e tö ò. Angū-ö lāinyngen Tāvit nö höhlö. (Sal. 32:2-4) Ngatī inlahen in ayī-ö min yēḵ hī öi holtö ellōnre öi halööktitre tö minë tököölre, ngaich teūngen min ayī-ö töm hanöhlöre. Ngaich öthō min ayī-ö öi höng fēkö minë vanaichöre, pò Yāvē ngaich nö keunlöre töm lumngan hī tö ngam tökööl, ngaich ṙūöhngen e tö hī.

10-11. Asuh öp mikahkūö hī tö inlahen Yāvē öi löktö im inlahen ò nö “hamööngöre nö aṙē-ěl?” (Salmai 86:5)

¹⁰ Vë-evkūö Salmai 86:5. Ngö ṙô tī ang Tāvit nö kūich inlahen Yāvē nö in ngih miröökö tö Yāvē nö ‘hamööngöre nö aṙē-ěl.’ Ngö ṙô öp ihih töhěng līpöre kamëtö mikah elnang hī tö ṙô ngam Paipöl, “‘Ma-aṙē-ěl’ an Yāvē, angū-ö ön ngih ‘tinrīken’ ò.” Kūö yòh ayī-ö öi mihôiṅ ngö ṙô tö e nö angū-ö tinrīken ò? Teūngen in tö ngam sanapṙô e öi in ngam innëtö alaha ngam miröökö, ngö ṙô angū-ö, ‘Hameuktö ngam töt chanuhuvṙen hanangenlōnre më-eṅ öm in yip mahavëken meh.’ Sā maheuk hī vahë in ök urěh ātiköl tö Yāvē nö hameuktö ngam töt chanuhuvṙen hanangenlōnre nö in yip tö chiplö tarikre. Ngam tö ngö manah, hangenlōn anga-aṅ tö cha hēk öthō inrē nö ṙāngen cha, lökten ò nö holtö ellōnre nö aṙēlen cha yip tökô-en ellōn nö halööktitre. (Isa. 55:7) Yēḵ meh öm kihngen ṙatö-ellōnre tö Yāvē nö ngaich nö aṙēlen meh, ngaich mihôiṅ më-eṅ öm hatöönöre öm ngö ṙô: ‘Ṙatö-ellōnre öich chū-ö tö Yāvē nö ma-aṙē-ěl nö Tēv hēk aṙēlen yip töng mahalööktitre nö peuinyhökūö ò? Yěn heūṅ, ngaich ötkô hòng chū-ö öich ṙatö-ellōnre tö ò nö aṙēlen chu ik sā chu öich halööktitre hēk peuinyhökūö ò öich havëkö inṙē-ělre?’

¹¹ Reuslöre alaha in öi hang inlahen Yāvē nö keuheūtlöre mikahkūö tö hī. Akahakūö anga-aṅ tö hī öi töng öthet öi tarik hēk pòrô öi öt lōnu sön öi vaichköreṙen. (Sal. 139:1, 2) In ngam tahëng Salmai in öi akahakūö tö e ngam kahūich Tāvit. Ta-a töi chumkūöṙen, löktö in e in min öi ṙatö-ellōnre tö Yāvē nö ma-aṙēlen hī.

ASUH NUP KANÖPLŌN YĀVĒ INLAHEN HĪ

12-13. Asūp kanöpölōn Yāvē tö inlahen hī sā ṙô ngam Salmai 103:14? Hēk asūp inlahen ò tö kūö e?

¹² Vë-evkūö Salmai 103:14. Hěng ön hēk ngam vahënyö Tāvit lāinyngen Yāvē nö kūö yòh nö hamöngöre nö aṙēlen më tarik yēḵ cha nö kô-en ellōn nö halööktit minë tököölre. Ngöṙô ang Tāvit, tö Yāvē nö ‘köplōn tö hī öi höng pitung.’ Tö ngö manah, tö ò nö köplōn tö hī öi töthet hēk öt lōnu töre öi kēken minë tövaich la-en. Ta-a chěi hēk töi ṙūöhtö mikah elnang re tö ngam ṙô Tāvit.

¹³ Vënyen Yāvē ang Tāvit ‘nö keuheūtlöre mikahkūö tö ngam vinīlö hī.’ Vīlen Ātöm misī ang Yāvē nö löktö i pinrōngö ngam tumlat hēk vī-i ò inrē nö töhet. Akahakūö misī anga-aṅ tö nuk tötṙanāngen inlahen ò yěn hòṅ aṅ, tö sā ò nö hòṅ nyā-avkūö, hòṅ haròh hēk hòṅ uhôm inrē. (Ran. 2:7) Vënyen Yāvē pöri inrē ang Tāvit nö ‘köpölōn tö hī öi höng pitung.’ Tö sitih manah angū-ö? Ik sā nā Ātöm nā Ēva nö kēken ngam tökööl, īnu ngaich cha-a tö ngam öt hanëtö. Hēk unôichngöre inrē cha-a nö kē-ěkūö më kūönre tö ngam tökööl. Angū-ö lāinyngen hī ayī-ö töng tumlata öi tarik öi lōnu töre kū-ötö im ötlanöökö. Rö-ö ang Yāvē nöng akahakūö tö e, pön sā ngam ṙô Tāvit inrē nö “köplōn” anga-aṅ tö e. Ngam ṙô “kanöplōn” tö translētö nö im ṙô Heprāi nö tö ngö manah angū-ö “kē-ělkūö alahare la-evṙen.” Ngaich rö-ö ang Yāvē nöng akahakūö tö hī öi tö vaichköreṙen, pön kē-ělkūö alahare nö aṙēlen hī hēk hameuktö ngam miṙēlōnre nö in hī yěi kô-en ellōn halööktitre.—Sal. 78:38, 39.

14. (a) Söl yih tī ang Yāvē nö aṙēlen hī, sitih ṙô ang Tāvit nö vënyö inlahen e? (Salmai 103:12) (b) Sitih mikahkūö öi löktö in ngam inlahen Tāvit, tö Yāvē ngaich nö keuheūtngöre tī nö aṙēlen minë tökööl hī? (Ngëichkö ngam pòks “Aṙēlen Minë Tökööl Hī An Yāvē Hēk Vaichngö Inrē Tö U.”)

¹⁴ Söl yih tī ang Yāvē nö aṙēlen hī? (Vë-evkūö Salmai 103:12.) Ngöṙô ang Tāvit: “Sā rôvat ngam chuhöt tö ngam sūng” ngatī rôvat tī anga-aṅ nö ṙūöngen minë tökööl hī. Öt kanò-òv in öi haröhten ngam chuhöt nö in ngam sūng. Pön töng örheuheū anū-ö nö marôvat tö höö. Mikahtö elnang hī ön ngih töhěng līpöre tö inlahen ṙô ngih miröökö im Salmai, tö Yāvē nö marôvat tī nö kavalngen minë tökööl hī, ngaich ötrēhen nö rahëichtit min öp tinôngö u. Lökten öi mihôiṅ ṙatö-ellōnre tö Yāvē nö vaichngö takô tö minë tökööl hī. Sön man ṙung öm fē-ělre tö nup tö urěhngöre tövai inlahenre yěm tong öp tö töhūsa tötōngö. Yēḵ Yāvē pöri nö aṙēlen hī, ngaich ötrēhěn min anū-ö nö rahëichtit tinòngö tö ò. Öt hēk anga-aṅ nö fē-ělre tö minë tökööl hī, ötrēhěn nö hōten hī haṙivlōn öi fēken u hēk ötrēhěn nö kētö sācha hī.—Isi. 18:21, 22; Inl. 3:19.

15. Asūp mihôiṅ inlahen hī yěi haṙivlōn öi höng fēkö nuk tö ha-ehangen vanaichöre?

¹⁵ Yēḵ meh öm kihngen ṙatö-ellōnre tö Yāvē nö ngaich nö aṙēlen meh, ngaich sitih inlahen mihôiṅ öm teūngen tö inyööken re öm lökten in minë ṙô Tāvit im Salmai 103? Yēḵ meh öm haṙivlōn afēkö nup tö ha-ehangen vanaichköre inlahenre, ngaich mihôiṅ më-eṅ öm hatöönöre öm ngöṙô: ‘Vaichngö öich chū-ö tö Yāvē nö köpölōn tö chu öich höng tumlat, pòrô öich öt lōnu töre öich kēken tövaich la-en ngaich söntenre öich kēken u, ngaich vaichngö hòng chū-ö tö ò nö aṙēlen chu yēḵ chu öich halööktitre? Fēkö minë ṙô hòng ṙöng chū-ö minë tövaichi ngaich tö Yāvē? Ṙömöng fēkö minë tö ha-ehangen hòng chū-ö tövaich kahëken re la-en minë tö ngaich nö aṙēlöng tö Yāvē hēk minë töthō min nö kētu sācha tö ò?’ Köpölōn tö Yāvē nö öt chumkūöṙen tö nup tö ha-ehangen vanaichö hī, ngaich hòṅ ngatī inrē ayī-ö ötkô öi chumkūöṙen tö u. (Sal. 130:3) Yē hī min öi ṙatö-ellōnre tö Yāvē nö ngaich nö aṙēlen hī, ngaich öthō min ayī-ö öi höng haṙivlōn öi fēken minë vanaichöre, ṙamölōn pöri min ayī-ö öi löklōn ò.

16. Kūö yòh öi ötkô öi höng fēkö nuk tö ha-ehangen vanaichöre? Hachōḵ elmat hī. (Ngëichkö ngam nyat.)

¹⁶ Töi chumkūöṙen tö inlahen ngih töhěng inchōḵ elmat. Yēḵ ngòh töhěng tak tarik chumvē lôrī nöng örheūheu nö ngëichkö mat ngam tinmël nö ngëichkö lök lā-uk re, ngaich sitih inlahen min anga-aṅ? Mihôiṅ min anga-aṅ nö pala-aiṙen. Öt tövaich ön ngam inlahen ò nö ngëichkö lā-uk re, mihôiṅ pöri min anga-aṅ nö pala-aiṙen yěn höng örheūheu nö ngatī inlahen. Ngatī ṙēngen, nö öt vaich ngam inlahen hī yěi hēṙu fēkö nuk tö ha-ehangen vanaichöre. Pöi haköplu mihôiṅ öi in u, ngaich laklöre öi öt hēk öi havantenre kēken u. Yēḵ hī pöri höng örheūheu fēken nuk töha-ehangen vanaichöre, ngaich mihôiṅ min ayī-ö höng öt teungten öi löklōn Yāvē. Hòṅ haköpmatre ayī-ö öi ngëichkö lā-urěh öi chumkūöṙen tö inlahen öp tufömngöre panam ngam chūök hī min öi öt haṙivlōn fēkö nuk tö ha-ehangen inlahenre.—Isa. 65:17; Inch. 4:25.

IṘŪÖHEN MAN KĒHÖT ṘINATÖ-ELLŌNRE

17. Kūö yòh öi hòṅ vīhöt ṙinatö-ellōnre tö Yāvē nö hangenlōn tö hī hēk aṙēlen hī?

¹⁷ Iṙūöhen vīhöt ṙinatö-ellōnre tö Yāvē nö hangenlōn tö meh hēk hööngöre inrē nö aṙēlen meh. (1 Yôh. 3:19) Kūö yòh ayī-ö hòṅ ngatī inlahen? Pön ma-ainyre takô ngam Satān nö vīhöt ṙinatö-ellōn hī tö Yāvē nö öt hangenlōn tö hī hēk sōḵ inrē nö aṙēlen minë tökööl hī. Lōnu ngam Satān tö hī ṙāngen re löklōn Yāvē. Ngaich akahakūö ayī-ö tö ò nö öt ṙāngenre nö ngatī inlahen, pön hēk min nö ṙūöhlö alahare kūö ngam ṙētak ò nöng rahëichtit. (Inm. 12:12) Ta-a chěi töi ui halöngten ò nö mihôiṅ!

18. Sitih inlahen öi mihôiṅ vīhöt ṙinatö-ellōnre tö Yāvē nö hangenlōn tö hī hēk ngaich inrē nö aṙēlen hī?

¹⁸ Hangenlōn an Yāvē tö meh, mihôiṅ man öm kēhöt ṙinatö-ellōnre öm hang minë inchōḵten hī vahë in nuk urěh ātiköl. Mihôiṅ inrē öm vīhöt ṙinatö-ellōnre tö Yāvē nö ngaich nö aṙēlen meh öm lökten in ngam ṙô ò nö vë-eny inlahen re. Rö-ö nöng angū-ö, pöm mihôiṅ öm fēken minë haköptö ò nö in hī imat ngam Paipöl. Um vaichngö tö Yāvē nö keuheūtlöre mikahkūö tö hī öi töt het öi tarik, akahakūö inrē anga-aṅ tö hī yěi pòrô öt lōnu töre öi kēken minë tövaich la-en ngaich sön öi kēken u. Lökten ò nö hameuktö ngam miṙēlōnre nö in hī. Köpölōn inrē më-eṅ tö Yāvē nö keuheūtngöre tī nö aṙēlen minë tökööl hī. Yēḵ meh min ngatī inlahen, ngaich sā ṙô Tāvit min më-eṅ öm ngöṙô; ‘Ha-öinyö meh chin Yāvē, pò meh ngaich öm aṙēlen minë tökööl chu hēk minë tökiröng fālen chu!’—Sal. 32:5.