“Havëken Më Minṙöinylen”

1. Asuh nup ihih inlahen löktö mikahkūö hī tö Yāvē nö pōiṙāi mat tö më sīṅp re?

PŌIṘĀI mat an Yāvē tö më sīṅp re. Havaha cha anga-aṅ nöng löktö im mahām Yēsū, ngaich halēnlö më minṙöinylen nö ngamëichken cha. (Inl. 20:28) Lōnu ang Yāvē tö më minṙöinylen nö hangenlōn tö më sīṅp ò. Ngaich kô-en cha-a nö ngatī inlahen. Elkatòh chööngö Yēsū cha-a nö hangönken më prötör sistör aṅ el minë māṅ hēk hayööken cha nö hangön ngam innôlöre nö in Yāvē.—Isa. 32:1, 2.

2. Achīö yip ihih tö mötlö nginëichka tö Yāvē? (Isikīěl 34:15, 16)

² Chumkūöṙen takô ang Yāvē tö më sīṅp re. Mötlö chumkūöṙen anga-aṅ tö më sīṅp töt kalēḵ-en. Löktö in më minṙöinylen tī anga-aṅ nö hayööken më tarik re, më tö kūönngöre innôlö nö in ò. (Vë-evkūö Isikīěl 34:15, 16.) Rö-ö nöng angū-ö pön lōnu anga-aṅ tö hī öi havëkö inyööken re in ò yěi kihngen. Tö sā hī mihôiṅ holtö ellōnre vë-ekūö ò öi vë-ekūötēv hēk havëkö inyöökenre öi in më ‘yōm sīṅp hēk mahaköphöti’ el ngam māṅ.—Efi. 4:11, 12.

3. Asūp min yanöölen hī yěi kakkö inlahen ngam inlēnlö më minṙöinylen?

³ In ngih ātiköl in min hēk öi mikahtökūöre tö më minṙöinylen nö tö halēnlöng tö Yāvē nö mahayööken hī. Teūngen min ayī-ö tö sanapṙô në tölūöi intöönö: Hòṅ ihē öi kēḵ inyöökenre in më minṙöinylen? Kūö yòh öi hòṅ kēḵ inyöökenre in cha? Hēk sitih inlahen tī min cha-a nö hayööken hī? Lohten ngam innôlö hī in Yāvē nö ngön töngamuh, ngaich öt lōnu ayī-ö tö inyöökenre tö më minṙöinylen. Yē hī pöri min öi haköp ngih ātiköl, ngaich löktö in e hēk min nö ṙūöhlöre ngam minlēḵṙen hī tö më töhalēnlöng minṙöinylen. Ngaich akahakūö inrē min ayī-ö tö inlahen re öi kēḵ inyöökenre öi in cha yē hī öi hòṅ lōnu.

HÒṄ IHĒ ÖI ‘HAVËKEN MË MINṘÖINYLEN’?

4. Tö sitih inlahen öp ihih invah tö kakka nö im Yāköp 5:14-16, 19, 20 ngaich kūö yòh mihôiṅ öi ngatī ṙô? (Ngëichkö minë nyat.)

⁴ Löktö in më minṙöinylen tī an Yāvē nö hayööken më tarik më tö kūönngöre innôlö nö in ò. Ngöṙô tī an Yāköp nö kūichö e: ‘Tövahav hòng in yīö? Hökngen ò nö havëkö yip minṙöinylen aṅ el ngam māṅ.’ (Vë-evkūö Yāköp 5:14-16, 19, 20.) Rö-ö ang Yāköp nö kakkö ngam tökô-en invah nö ihih. Kūö yòh öi ngatī ṙô? Pön ngöṙô tī anga-aṅ nö kūich, yěn hěngtak tövahav ngaich havëkö yip minṙöinylen anga-aṅ, un havëkö yip tòktör. Ngöṙô inrē anga-aṅ, yěn ngaich nö aṙēlöng tökööl öp tarik, ngaich lööken anga-aṅ. Yěi ngëichkö inlahen öp tarik pöri tö kūönngöre innôlö nö in Yāvē, ngaich sā ṙēngen tövahav anga-aṅ tö kūö e. Hòṅ sā inlahen öp tarik anga-aṅ tövahav nö chuh in öp tòktör, ngaich vënyö ngam invahre nö in ò, nup ṙô ngam tòktör min nö in ò, ngaich hangö u anga-aṅ. Hòṅ ngatī inlahen ngam tarik ngam tö kūönngöre innôlö nö in Yāvē nö hòṅ chuh in më minṙöinylen nö vë-eny nang cha tö ngam kanihngenre, ngaich yěn löknyö mat Paipöl ṙô min më minṙöinylen nö halēnö ò, ngaich hòṅ hangö u anga-aṅ.

5. Sitih inlahen öi mihôiṅ mikahtökūöre tö ngam innôlö hī in Yāvē nö kūönngöre?

⁵ Vë-eny nang hī ngam Yāköp tö 5 mirūlö tö ngam innôlö hī yěn kūönngöre nö in Yāvē ngaich hòṅ vë-ekūö më minṙöinylen ayī-ö. Hòṅ ilööṙen ayī-ö ngatī inlahen. Yěi öt ngatī inlahen min, ngaich mihôiṅ min nö pasū ngam innôlö hī in Yāvē. Hòṅ holtö öt michūḵṙen re pöri ayī-ö öi ngëichköre i alaha e. Kūö yòh? Pön vë-eny nang hī ngam Paipöl, tö hī mihôiṅ ayī-ö tarik öi hachīlöre tö nup ṙô re. (Yāk. 1:22) Tö sā hī mihôiṅ, öi vīhöt ṙinatö-ellōnre öi ngöṙô, tö ngam innôlö hī in Yāvē nö ngön, hö-ö pöri angū-ö nö kô-en nö ngatī. Ngatī mufē yik Kristīön aṅ el ök māṅ i Sörtīs ik raneh senchurī, lökten hē e ang Yēsū nö halēnö cha hēk vë-eny nang cha, tö cha nö hòṅ urööḵṙen nö halötit ngam innôlöre nö in Yāvē. (Inm. 3:1, 2) Sitih inlahen öi ayī-ö mihôiṅ akahakūö tö ngam innôlö hī in Yāvē nö kūönngöre? Fē-a man ik sā meh kētöre im vinôkö, ngaich kalēḵ alaha hē e më-eṅ öm löklōn Yāvē, ngaich ngatī kumlēḵ alaha hòng më-eṅ töngamuh öm löklōn ò. (Inm. 2:4, 5) Mihôiṅ inrē öm ngöṙô hatöönöre: ‘Köpsöṙen öich sā nuk urěh inlahenre öich kuchiken vë-ekūö ngam Paipöl hēk afēkö minë haköpre? Höng hēṙu öich ṙung pripër minë mīting hēk yihtökūö öich in u? Öt kūönngöre hòng ngam nganöötö chu im inhānga? Höng örheūheu hòng chū-ö öich fēkö ngam inṙamlōnre hēk innyīhi minë töng chehen? Yěm akahngen re ngatī inlahen, ngaich ilööṙen më-eṅ kēḵ inyöökenre, hòṅ meh min öm öt kihngen. Yěm öt teungten halööktit minë inlahenre hēk teungten öm kēken nup tövaich nö imat Yāvē tö kūö u, ngaich hòṅ ilööṙen më-eṅ kēḵ inyöökenre in më minṙöinylen.

6. Hòṅ asuh öp inlahen ngòh töhěng tak tarik yēḵ ò nö kēken tökiröng fālen?

⁶ Rīkre nup muh fālen tökiröng, ngaich yē ngòh tarik min nö öt halööktitre, ngaich mihôiṅ min anga-aṅ nö ṙānyu nö ṙa-ang el ngam māṅ. (1 Kòr. 5:11-13) Yēḵ meh öm kamëken tökiröng fālen ngaich hòṅ vë-eny nang öp töhěng tak më-eṅ minṙöinylen tö inlahenre. Ṙënten nö ngatī, pön ngaich nö ötlöng ngam innôlö meh nö in Yāvē, ngaich ötkô më-eṅ höng kahngenre öm halööktit e. Yēḵ meh öm lōnu tö Yāvē nö aṙēlen meh, nö lökten im ṙāi ṙinānyi, ngaich hòṅ haṙivlōn më-eṅ tö ngam tövaich kahëkenre hēk hòṅ ‘la-evṙen inrē tö nup la-en nup mahameukten meh öm ngaich öm halööktitre.’ (Inl. 26:20) Hěng ön mihôiṅ ngam la-en meh in u, mihôiṅ më-eṅ chuh in yip minṙöinylen öm vë-eny inlahen ngam tökiröng fālen kahëken re.

7. Achīö yip inrē tö mihôiṅ nö havëkö inyöökenre nö in më minṙöinylen?

⁷ Rö-ö yin nöng më kamëken minë tökiröng fālen tö mihôiṅ nö chuh in më minṙöinylen nö havëkö inyöökenre, pön mihôiṅ inrē më prötör sistör nö chuh in cha më lama-al minë tötlöng kuilōnre. (Inl. 20:35) Tö sā meh, lohten sin öm kamë tröks, mameuk pòrnōkrāfī hēk töng öt lööngö tinrīken inrē, urēhěkūö meh haköp ngam kanô-en. Mihôiṅ pöri hēk min më-eṅ hòṅ lōnu töre kēken minë tötlöng la-en, pòrô ngaich öm haköp ngam kanô-en ngaich mihôiṅ min öm ṙëingö la-al u. Köpölōn pöri më-eṅ töre öm rö-ö höng hěng tak öm la-al në tö ngatī kanihngenre. Mihôiṅ më-eṅ vë-eny nang öp töhěng tak minṙöinylen tö inlahenre. Ötlöktu min anga-aṅ nö öt hangihtöṙô meh hēk kētö tövai inrē inlēnö meh nö löknyö mat ngam Paipöl, kētö ṙinatö-ellōn meh min anga-aṅ tö meh mihôiṅ öm la-al minë tötlöng kuilōnre ngaich haṙamlōn Yāvē. (Mum. 4:12) Lohten min më-eṅ inrē öm haṙivlōn kūö meh öt heuveū ṙap minë tötlöng kuilōn re, pòrô lang ngaich öm ma-ainyre. Hē e min më minṙöinylen nö kētö ṙinatö-ellōn meh Yāvē nö ṙamölōn nö in meh, kūö meh öm kēḵ inyöökenre in cha hēk ma-ainyre öm hangön ngam innôlöre in ò.—1 Kòr. 10:12.

8. Hòṅ vënyö nup töng rahëichyen hòng ayī-ö vanaichöre in më minṙöinylen? Mikahtö elmat hī.

⁸ Mihôiṅ in kēḵ inyöökenre in më minṙöinylen, rö-ö pöri nö töngö manah tö meh ngaich min öm höng örheūheu öm vënyö nup töng rahëichyen vanaichöre öm in cha. Tö sā ṙēngen meh, yěm haṙivlōn tī töp töhěng tak prötör hēk sistör hēk yěm tainy öm in ò, ngaich öt uroh më-eṅ öm hòṅ vë-eny nang më minṙöinylen tö inlahen re. Mihôiṅ pöri më-eṅ öm hang ngam inlēnö kahëtö Yēsū öm havëkö inṙē-ělre in öp prötör hēk sistör, ngaich halāmtöre öm in ò. (Mët. 5:23, 24) Mihôiṅ inrē më-eṅ öm rīsörch inlahen minë tinrīken öm imat minë pöplikēsön hī, tö sā ngam ṙanëmen, manööyö hēk tö ngam inyöngöre. Ngaich mihôiṅ öm afēkö inlahenre öm sitih inlahen hameukten u anū-ö në tinrīken. Yěn öl pöri nö löökta ngam kanihngen meh, ngaich mihôiṅ öm kē inyöökenre ip töhěng tak minṙöinylen. Ngatī inlahen nak nā Yū-ötiā nā Sintěki ik raneh senchurī ik sā cha nö līnen höö, öt heuveū cha-a nö halāmtöre nö in höö, lökten ngaich ang Pôl nö tölṙô ök töhěng tak prötör nö hayööken cha. Ngatī inlahen yin min inrē më minṙöinylen nö hayööken meh.—Filip. 4:2, 3.

KŪÖ YÒH ÖI HÒṄ HAVËKEN MË MINṘÖINYLEN?

9. Kūö yòh öi ötkô heūlngöre vë-eny nang më minṙöinylen töp fālen re? (Inchōḵ-oṙô 28:13)

⁹ Yěi kēken tökiröng fālen hēk öt heuveū öi ṙap minë tötlöng kuilōnre, ngaich lohten min öi siṙōngkūö öi vë-eny nang më minṙöinylen tö inlahen re. Lohten min ayī-ö hòṅ īnu töm öt pinhë-ekūö hēk töm ṙinatö-ellōn yěi hòṅ ngatī inlahen. Ötkô pöri ayī-ö öi heūlngöre. Kūö yòh? Pön halēnlö më minṙöinylen ang Yāvē nö mahayööken hī, hòṅ hī öi hangön ngam innôlöre in ò. Yē hī min öi kēḵ inyöökenre in më minṙöinylen, ngaich hameuktöre min ayī-ö öi hayönglenre in ò, hòṅ hang ṙô ò hēk hòṅ hangönöre inrē im ṙinatö-ellōn. Rö-ö nöng anū-ö, pöi lōnu inrē tö Yāvē nö hayööken hī köp öi lök el ngam tölöng talöökö. (Sal. 94:18) Ngaich yē hī öi fāluṙen, ngaich vë-eny nang më minṙöinylen ayī-ö, ngaich öt havantenre öi kēken e. Ngaich mihôiṅ ayī-ö ṙatö-ellōnre tö Yāvē min nö ötlöktu nö öt aṙēlen hī.—Vë-evkūö Inchōḵ-oṙô 28:13.

10. Asūp min mihôiṅ inlahen meh yěm höng hayunken öp fālenre?

¹⁰ Yē hī min öi vë-eny nang më minṙöinylen tö öp kahëken re fālen, ngaich pōyen min nup inkòlô hī. Yē hī pöri min höng hayunngen u, ngaich mihôiṅ min öi haṙivlōn tö tī re. Fēkö inlahen Rācha Tāvit man ik sā ò nö hayunngen ök tökiröng fālenre, ngaich sitih mufē ngaich anga-aṅ. Halööinyöre anga-aṅ tökūö e nö kaheuk sakāmö hēk kihngen ellōn, pò ò hē e nö akahakūö töre nö haṙivlōn tī tö Yāvē. (Sal. 32:3-5) Fē-a man yē hī öre öi palā-aiṙen hēk vahav, öt chuh in öp tòktör pöri ayī-ö, ngaich asuh mihôiṅ min öp ṙòng ngam inlahen hī. Öthō min nö lööken ngam vah hī hēk höng ṙūöhtöre kūö min ngam invah hī. Ngatī ṙēngen, yěi öt kēḵ inyöökenre min in më minṙöinylen yěi kēken tökiröng fālen, ngaich mihôiṅ min nö pasū ngam innôlö hī in Yāvē. Öt lōnu an Yāvē tö hī öi ngatī inlahen, lökten ò nö tölṙô hī öi vë-ekūö ò tö ngam inlahen re. Öi sitih inlahen? Vë-eny nang më minṙöinylen.—Isa. 1:5, 6, 18.

11. Asūp min lanökngöre yip tahëng yěi höng hayunngö nup tökiröng fālenre?

¹¹ Yē hī min öi hayunken nup tökiröng fālenre, ngaich mihôiṅ min öi kihngen tī tö yip tahëng. Ma-asökngö röön ngam töhet kumlēḵ ngam Tēv min ayī-ö nö la-evṙen nö el ngam māṅ hēk mihôiṅ inrē min nö chuhngöre ngam lanāmö nö el ngam māṅ. (Efi. 4:30) Sitih inlahen pöri ayī-ö yěi akahalōn töp töhěng tak holre nö kēken tökiröng fālen? Hòṅ tölṙô ò ayī-ö nö chuh in më minṙöinylen nö vë-eny nang cha töm fālenre.a Yē hī min höng hayunngö minë tökiröng fālen ò, ngaich töng fāluṙen min ayī-ö ikūö Yāvē. (Lev. 5:1) Hangenlōn in tö Yāvē lökten min öi keuheūttnyö ṙôre öi vë-eny nang më minṙöinylen tö inlahen öp holre. Mahaköpkö hanëtö ngam māṅ min ayī-ö yěi ngatī inlahen hēk teungten min öi hayööken öp prötör hēk töp sistör nö havantö ngam innôlöre nö in Yāvē öp kamëken tökiröng fālen.

SITIH INLAHEN AICH MË MINṘÖINYLEN YĔN HAYÖÖKEN HI?

12. Sitih inlahen aich më minṙöinylen nö hayööken öp prötör hēk sistör öp tö kūönngöre innôlö nö in Yāvē?

¹² La-en më minṙöinylen ön ngam inyööken më prötör sistör më tö kūönngöre innôlö nö in Yāvē. (1 Tös. 5:14) Yēḵ cha nö vë-ekūö öp kamëken tökiröng fālen prötör hēk sistör, ngaich holtö mikah elmatre cha-a nö hatöönö ò, hòṅ cha nö akahakūö töp ṙô ellōn ò. (Inch. 20:5) Lohten man öm tö aṙē-ěv hēk töng öt miṙôlu hēk siṙōngkūö inrē tö kūö ngam kahëken re fālen, sön pöri më-eṅ um piyū-uṙô öm vë-eny nang më minṙöinylen tö ngam inlahenre, um ngöṙô lōn min töre öm höng ilökṙô re öm ṙô-òv. (Yōp 6:3) Köpölōn man tö më minṙöinylen min nö öthō nöng vī mufē re tö inlahen meh, chumkūöṙen pöri nö hangihtöṙô meh hēk mikahtö elmat meh inrē tö ngam inlahen, ngaich unôichrit e min cha-a nö hayööken meh nö löknyö mat ngam Paipöl. (Inch. 18:13) Akahakūö yin më minṙöinylen tö ngam inlahen nö öt ilööṙen min nö löökta yēḵ cha nöng hěng van nö chuh in meh. Lökten min cha-a nö halēnlö inlahen re nö ṙōl van nö meuk kūö meh.

13. Yēḵ më minṙöinylen nö vë-elkui hī hēk vë-eny nang hī inrē tö nup miröökö aṅ mat ngam Paipöl, ngaich sitih inlahen ayī-ö mihôiṅ teūngen tö inyöökenre öi lökten in u? (Ngëichkö minë nyat.)

¹³ Akahakūö yin më minṙöinylen tö meh öm haṙivlōn tö kūö ngam fālenre, ngaich yěm havëken cha min ngaich öthō min cha-a nö ṙūöhlö ngam miṙivlōn meh. Vë-elkui meh pöri min cha-a, ngaich ilööṙen min më-eṅ ‘lökngöre’ tö minë ṙô cha nö vë-ekūötēv. Rö-ö nöng anū-ö, pön löktö i ‘minë-eny Yāvē tī min cha-a nö fòhtö alaha meh tö ngam tavī-i.’ (Yāk. 5:14-16) Tö ngö manah ön ngam “tavī-i” tö kakka nö ihih, minë kanô-en im ṙô ngam Tēv. Vë-eny ṙô nup miröökö min më minṙöinylen nö in meh, nup chūök meh mihôiṅ teūngen tö raneuslö alahare hēk mahayööken meh havantö ngam innôlöre in Yāvē. (Isa. 57:18) Vë-eny nup ṙô min cha-a aṅmat ngam Paipöl nö in meh nup mahayööken meh min hangön ngam kuilōnre öm löngö la-en. Sā hamang ṙô Yāvē min më-eṅ nö löktö in më minṙöinylen nö ngöṙô: “Ngih ön talöökö lök in e yin.”—Isa. 30:21.

14. Sitih inlahen aich më minṙöinylen nö hayööken yip tarik yip tö vaichö kahëken tö la-en? (Kalatī 6:1) (Ngëichkö minë nyat.)

¹⁴ Vë-evkūö Kalatī 6:1. Yēḵ ngòh tö hěngtak Kristīön nö ‘vaichö kahëken’ tö la-en, ngaich töhěng kangen anga-aṅ nö lama-al minë töhet chööngö Yāvē. Lohten anga-aṅ nöng öt fē-a, urēhěkūöre nö kē ngam fësla hēk urēhěkūöre inrē nö kētöre nö im tökiröng fālen. ‘Holtö ṙanëmen re pöri më minṙöinylen nö pītnyöre nö halööktit öp tö ngatī inlahen tarik,’ pò cha nö hangenlōn tö ò. Ngam ṙô ‘inlööktit’ tö translētö nö im ṙô Krīk. Tö ngö manah angū-ö, halöktökūö öp tö vaichngökūö tangëḵ. Holtö chumkūöṙen re ṙung ngòh tö akaha tòktör yěn halöktökūö öp tangëḵ öp tarik tölaköl. Lōnu anga-aṅ töp tarik nö lööken hēk un chök. Ngatī inlahen yin më minṙöinylen nö holtö hanangenlōnre nö vë-ekūö öp tarik yěn halēnö ò hēk öt ṙūöhlö ngam kanihngen ò cha-a. Tölöṙô yin më minṙöinylen nö chumkūöṙen inrē nö ngëichköre, köpölōn yin më minṙöinylen töre nö töthet yēḵ cha nö hayööken yip tahëng, ngaich mihôiṅ inrē cha-a nö vaichö kahëken tö la-en. Lökten ṙung cha-a nö öt mööḵlö elmat töre tö yip tahëng. Holtö ngam inyāichngö hēk ngam hanangenlōnre pöri cha-a nö chumkūöṙen tö më prötör sistör hēk hameuktöre nö akahakūö tö minë kanihngen cha.—1 Pīt. 3:8.

15. Hòṅ asuh öp inlahen hī yěi īnu töp töhěng kanihngenre?

¹⁵ Mihôiṅ in ṙatö-ellōnre in më minṙöinylen. Pön tö haruntu cha-a nöng tölngö in re tī tö nup inlahen më prötör sistör, ötkô cha-a nö vë-eny nang yip tahëng tö u. Haruntu inrē cha-a nöng hòṅ löknyö mat ngam Paipöl ṙô yěn kētö inlēnö yip tahëng, rö-ö nöng ṙônyö nup mufēre. Öthöng anū-ö, pön harūnö cha-a nöng örheūheu nö hayööken cha. (Inch. 11:13; Kal. 6:2) Rö-ö yin më minṙöinylen pön köharīkngöre tö höö. Rīkre yip tö pōyen heuneū-en, ngaich rīkre yip tö kūönen ekspirīön. Pòrô pöri nö öp tö yòh inlahen cha, sön ayī-ö hòṅ vënyö minë kanihngenre in öp töhěng tak minṙöinylen. Öt tö ngö manah pöri angū-ö tö hī öi keuheūt chūökre öi in më minṙöinylen öi kēḵ inlēnöre, hanöng sā hī öl teūngen töp lōnre inlēnö. Yē hī min ngatī inlahen, ngaich töng sā inlahen yip tarik min ayī-ö yip tö hòṅ ‘kēngen ngam kinteūnyö elnang re,’ rö-ö nö tö hòṅ mikahtökūöre tö minë ‘tölöök inköphöti.’ (2 Tim. 4:3) Yē hī öi vë-eny nang öp minṙöinylen tö minë kanihngenre, ngaich lohten min anga-aṅ nö hatöönö hī, tö hī hòng yěi ngaich öi vë-eny nang öp tahëng minṙöinylen töm inlahenre. Yěi heūṅ, ngaich lohten min anga-aṅ nö hatön öp inlēnö kahëtö ò nö in hī. Lohten inrē min anga-aṅ nö ngöṙô nö in hī, tö ò min sin nö urěh nö vë-ekūö öp tahëng holre minṙöinylen, ngaich möl min nö hayööken hī.—Inch. 13:10.

HÖNG HÒṄ AYĪ-Ö IN KAMË FËSLARE

16. Asuh öp ihih la-en hī öi kö hěngtak?

¹⁶ Holtö hanangenlōnre yin më minṙöinylen nö kētö inlēnö hī hēk hayööken hī yěi kihngen. Öt hěngheuh pöri cha-a nö kē fësla hī, pöi höng ayī-ö tö mihôiṅ kē fëslare. Hòṅ kahngenre ayī-ö ngëichkö öp inlahen re yěi hòṅ haṙamlōn Yāvē. (Rōm. 14:12) Mihôiṅ pöri ang Yāvē nö hayööken hī kē öp tölöng fëslare hēk hayööken hī inrē köp löklōn ò. Lökten yěn halēnö hī më minṙöinylen, ngaich rö-ö cha-a nö vë-eny nang hī tö nup tö hòṅ inlahen hī, löknyö mat ngam Paipöl pöri cha-a nö vë-eny nang hī töm mufē Yāvē nö i alaha öp töhěng inlahngen. Ngaich yē hī öi hang ngam kahëtö cha inlēnö aṅmat Paipöl, ngaich maharun ngam ‘kumlēḵ ngam mikah elmatre’ min ayī-ö hēk löngö kahë tö fësla.—Hep. 5:14.

17. Kūö yòh öi ötkô piyū-en havëken më minṙöinylen hēk kūö yòh?

¹⁷ Ṙamölōn takô in kūö Yāvē nö chumkūöṙen nö ngëichken më hanangenlōnre sīṅp re! Tīnten Yēsū anga-aṅ nö ing panam ngam ‘tö akaha nö yōm sīṅp.’ Kēngö nômöre ang Yēsū tö pôkūö hī, hòṅ hī öi teūngen tö ngam tö örheūheu aṅ nômö. (Yôh. 10:11) Rö-ö nöng angū-ö, pön halēnlen më minṙöinylen ang Yāvē nö el ngam māṅ nö ngamëichken hī. Ngatī inlahen anga-aṅ nö hateungngen ngam kinlēḵngôre ngam tö ngö: ‘Kē-ĕkūö yīö chin min inrē tö yip yōm sīṅp sā öp ellōn chu, yip maha-āṅlen yīö min tö mikah, mikah elmat inrē.’ (Yar. 3:15) Lökten yěn kūönngöre ngam innôlö hī in Yāvē hēk yěi kēken tökiröng fālen, ngaich ötkô ayī-ö piyū-uṙô havëken më minṙöinylen. Yěi ngatī inlahen min, ngaich meuk ngam hanangenlōn Yāvē min ayī-ö öi höng löktö in cha.