TÖHAKÖÖPÖ ĀTIKÖL 37
TINKÖÖKÖ 114 “Hamööyöre Yin”
Sitih Inlahen Öi Yěi Meuk Minë Ötlinëken?
‘Meūkkö ngam inkaha fālen chū-ö öich in cha höng keuheūtngöre chūök pöri öich meuk ngam ötlinëken.’—Isa. 5:7.
ASUH ÖP MIN HAKÖP HĪ?
Mikahtökūöre in min tö inlahen Yēsū ik sā ò nö meuk inlahen yik tahëng nö ötlēkaṙen, ngaich asuh ök inlahen ò ngaich asuh mihôiṅ öp haköplö hī öi lökten in ò.
1-2. Sitih inlahen aich më tö pōyen tarik yěn ötlēkaṙen hēk asuh min öp mufē hī kò-òren?
PŌYEN yin më tarik töngamuh tötlēkaṙen. Miköhṙen më tahëng tö cha kūö cha nö tö tahëngö ëlô, tahëngö löktö, tahëngö mineūkö inrē. Hayë-e inrē më yāich. Rö-ö nöng anū-ö, pön höng lōntöre më mā mahayöng hēk tö më mi-inyiha, höng yal cha-a töm rupīö lökten cha nöng lūtngen më tarik. Öt rēhěn cha-a nö fëkö tīre nöng ötlöngö tī töm elkahòiṙen hēk kihngen tī tö më tarik. Pòrô nö öp tö yòh kamngö chūök hī ṙòkhöre ayī-ö öi höng la-al minë ötlinëkenre.
2 Ṙòkhöre pöri ayī-ö öi lōnu töm lanāmö hēk lōnu tö yip tahëng nö vaiyö inlahen nö in hī. Lökten yěn ötlēkaṙen ṙung yip tahëng hēk yěn meuk yip tahëng ṙung cha-a holre nö ötlēkaṙen, ngaich yīhi tanāinyö cha-a. Chuh el talöökö cha-a nö vīlö tinṙōlen nö kahòklökuire, hēk vōt ngam töhěng inrē partī mahayöng ngam kumlēngöṙôre töre min nö ahetngen minë ötlinëken. Harikngöre pöri ayī-ö Kristīön tö cha pò hī öi ‘öt aṅ ing panam’. I rītö ngam Pūlngö ngam Tēv ayī-ö, ngam kamëngö minë tö sitih min ötlinëken. (Yôh. 17:16) Yē hī pöri ṙung öi meuk inlahen yip tahëng nö ötlēkaṙen, ngaich lohten ayī-ö öi kihngen ellōn hēk hòṅ yīhi tanāinyö inrē. Pī-a ayī-ö öi ngö mufē, ‘Hòṅ asuh öp öre inlahen chu? Sitih inlahen öich mihôiṅ hayööken cha?’ Urěhkūö hī öi chöh sanapṙô në intöönö töi urěh öi ngëichkö mufē nā Yāvē nā Yēsū tö inlahen ngam ötlinëken.
KUNYAHA ELMAT NĀ YĀVĒ NĀ YĒSŪ TÖ NGAM ÖTLINËKEN
3. Kūö yòh öi kihngen ellōn yěi ötlēkaṙen hēk meuk ötlinëken yip tahëng? (Isayā 5:7)
3 Kihngen ellōn in ṙung yěi ötlēkaṙen hēk meuk ötlinëken yip tahëng. Kūö yòh? Vënyu ön ngam lāinyngen e nö imat ngam Paipöl. Ngö kinūichngö angū-ö tö Yāvē nö sā re tī nö vī-i hī, ngaich ‘tö hangenlōn anga-aṅ töm lanöölö hēk töm inkah fālen’. (Sal. 33:5; Ran. 1:26) Öthěngheuh anga-aṅ nö ötlēken tarik hēk ötrēhěn nö lōnu tö tarik nö ötlēkaṙen. (Chöö. 32:3, 4; Mai. 6:8; Sak. 7:9) Pōyen yik misī Israel töng ötlēkaṙen tö yik töng hol maneukre inuk ṙētak pròfět Isayā. Ngaich hang nuk ṙô cha ngam Tēv nö ‘peunyhökūö’ ò. (Vë-evkūö Isayā 5:7.) Rö-ö nöng anū-ö, pön kētö sācha yik tarik ang Yāvē yik fumlal minë chööngö ò hēk yik mahakihten yik tarik inrē.—Isa. 5:5, 13.
4. Sitih mufē ang Yēsū yěn meuk inlahen tarik nö ötlēkaṙen? (Ngëichkö ngam nyat.)
4 Sā Yāvē ön inrē Yēsū nö hangenlōn töm inkah fālen hēk kunyaha elmat tö nup töng sitih ötlinëken. Ik sā ò misī nö ing panam, ngaich hěngheuh anga-aṅ nö meuk ök tarik tö lūmö kël. Haṙivlōn anga-aṅ nö meukan lökten ò ngaich nö halanken ò. Tainy pöri më yōm tinlööken nö meuk inlahen ò. Ngö ṙô cha-a tö Yēsū nö filal ngam haneūheu töhet sakāmö. Ngëḵ-eṅ ellōn më yōm tinlööken öt rēhěn cha-a nö ṙamlōn nö meuk ngam tarik ngaich nö lööken. Sitih mufē ang Yēsū nö meuk inlahen cha? Ngö ṙô ön ngam Paipöl, “Haṙivlōn anga-aṅ nö meuk nganë-eṅ ellōn cha.”—Māk. 3:1-6.
Öt hangenlōn misī yik Yahūti yōm kūö tinlööken tö yik tarik töt kalē-en, hö-ö pöri ang Yēsū nö sā inlahen cha (Ngëichköm perekrāf 4)
5. Asūp tö hòṅ kanöpölōn hī yěi tainy tö kūöre öi ötlēkaṙen hēk meuk ötlinëken yip tahëng?
5 Ngaich in taheūi meuk inlahen nā Yāvē nā Yēsū nö tainy yěn meuk inlahen më tarik nö ötlēkaṙen. Ngaich yē hī ayī-ö tainy tö kūöre öi ötlēkaṙen hēk tainy tö yip tahëng nö ötlēkaṙen, ngaich öt tövaich angū-ö hòṅ ṙap ngam tanāinyöre pöri ayī-ö. (Efi. 4:26) Hòṅ köplōn ayī-ö tö hī ötkanò-òv öi ha-etngen ngam ötlinëken. Ngaich yěi köptī min töm tanāinyö ngaich mihôiṅ min öi kalē-ě miṙivlōn hēk mihôiṅ öi yīhi invah. (Sal. 37:1, 8; Yāk. 1:20) Hòṅ asūp pökeh inlahen hī yěi ötlēkaṙen hēk meuk yip tahëng nö ötlēkaṙen? Mihôiṅ in pōyen haköplö in Yēsū i alaha e.
SITIH INLAHEN ÖK YĒSŪ IK SĀ Ò NÖ MEUK ÖTLINËKEN YIK TARIK?
6. Sitih inlahen ötlinëken yik misī tarik ik sā Yēsū nö ing panam? (Ngëichkö ngam nyat.)
6 Ik sā Yēsū misī nö ing panam ngaich meuk yik tarik anga-aṅ nöng ötlēkaṙen. Meuk inlahen tī yik yōm kūö tinlööken anga-aṅ nöng ötlēken yik tarik hēk hakihten unhômö cha. (Mët. 23:2-4) Akahakūö inrē misī ang Yēsū tö yik òfisör aṅ Rōm nöng ötlēken yik tarik. Lökten misī yik töpōyen Yahūti nö lōntö ṙinā-anyre nö ṙā-ang ëltī ngam mahayöng aṅ Rōm. Uroh nö vīlö krupre nö la-al cha yik rīkre Yahūti tö köp nö inuk chööngöre. Öt rēhěn pöri ang Yēsū nö kētö hinòlṙen cha. Ik sā ò nö akahalōn tö yik tarik nö hòṅ vīlen ò nö rācha, ngaich falngöre anga-aṅ tö cha.—Yôh. 6:15.
Ik sā yik tarik hē e nö hòṅ vīlen Yēsū nö rācha, ngaich kiröönngöre anga-aṅ tö cha (Ngëichköm perekrāf 6)
7-8. Kūö yòh ök misī Yēsū nö öt kalahkenre nö ha-etngö minë ötlinëken ik sā ò nö in panam? (Yôhan 18:36)
7 Öt kētöre ök misī Yēsū nö im pòlitiks nö hòṅ kēngen ngam ötlinëken. Akahakūö misī anga-aṅ tö më tarik nö öt aṅhav in tö chööngöre nö hayöng hēk öt heuneū-euvṙen inrē. (Sal. 146:3; Yar. 10:23) Akahakūö anga-aṅ inrē tö ngòh tarik nö öt kanò-òv nö kēngen minë ötlinëken. Kūö yòh? Kūö ngam töt aṙē-ělōn ngam Satān nö hayöng ngih panam, ngaich tī ò në ötlinëken töngamuh nö keuheūtngöre chūök nö ikūö ngih panam. (Yôh. 8:44; Efi. 2:2) Töthet inrē ayī-ö tarik, lökten yěn pòrô ngòh tarik nö hòṅ löökö la-en, ngaich sön anga-aṅ nöng ötkô nö kahòklökui taṙòkhöre tarik.—Mum. 7:20.
8 Akahakūö misī ang Yēsū tö ngam Pūlngö ngam Tēv nöng angū-ö tö mihôiṅ nö kēngen ngam ötlinëken. Lökten anga-aṅ nö keuheūttö ṙētakre hēk kumlēre nö “ahangkö ngam tölöök inhangkö ngam Pūlngö ngam Tēv.” (Lūk. 8:1) Yik tarik “tö ha-euk hēk töhaṙëhe nômö tö ngam lanöökö,” ngaich kētö ṙinatö-ellōn cha anga-aṅ tö minë tö sitih ötlanöökö hēk ötlinëken min nö ha-etiyö. (Mët. 5:6 hēk istötī nōt; Lūk. 18:7, 8) Hö-ö pöri min anū-ö nö ha-eti nö löktö in nup tö sitih söngkötön hēk tinṙōlen inlööktö kanihngen el minë panam, löktö in ngam Pūlngö ngam Tēv pöri min angū-ö, ngaich hö-ö angū-ö ngih Pūlngö nö “aṅ ngih panam”.—Vë-evkūö Yôhan 18:36.
ASŪP MIHÔIṄ INLAHEN MEH ÖM SĀ INLAHEN YĒSŪ?
9. Kūö yòh öm ṙatö-ellōnre töm Pūlngö ngam Tēv nö angū-ö tö mihôiṅ nö kēngen ngam ötlinëken?
9 Pōyen nun töngamuh në ötlinëken ing “manā-aṅ sakāmö” tö nuk ötlinëken misī inuk ṙētak Yēsū. Höng hěngren pöri minë lāinyngen u nö ṙūöhlöre ṙôken, nöng kūö tī më töthet tarik më hamang chööngö ngam Satān hēk ma-asīnkö minë la-en ò. (2 Tim. 3:1-5, 13; Inm. 12:12) Sā Yēsū in ayī-ö öi akahakūö töm Pūlngö ngam Tēv nöng angū-ö min maha-etngö ngam ötlinëken, ngaich holṙen e ayī-ö. Lökten ayī-ö öi öt kētöre öi inup tö sitih tinṙōlen chūök më tarik nö kahòklökuire tö kūö nup ötlinëkenre hēk öt rēhěn öi holṙen öp töhěng söngkötön öp kumlēngôre töre min nö ha-etngen minë ötlinëken. Töi ngëichkö ngih inlahen Istēsī.a Kamëtöre misī anga-aṅ nö inuk tinṙōlen chūök më tarik nö halööktit minë ötlanöökö el minë panam urēhěkūö ò nö haköp ngam kanô-en. Ellōn hang pöri anga-aṅ nö afēkö ngam inlahenre yěn tölöng hòng hēk hö-ö. Ngö ṙô anga-aṅ, “Yē chu misī chuh in nup tinṙōlen chūök yip tarik nö kahòklökuire tö kūö nup ötlinëkenre, ngaich afēkö ngam inlahenre chū-ö yěich löngö kahë hòng tö la-are hēk yěich hö-ö. Ngaich pöri chū-ö töngamuh öich holṙen ngam inyööngö tö ngam Tēv hēk kiröngen ṙinatö-ellōn chū-ö töm inlahenre nö tölöng. Akahakūö chin tö Yāvē min nö kahòklökui më tarik më tötlēkaṙen töngamuh. Ngaich ötrēhěn chū-ö öre öich kanò-òvö öich ngatī inlahen.—Sal. 72:1, 4.
10. Kūö yòh öng ngam inlahen hī yěi kētöre in minë tinṙōlen inlööktit minë ötlanöökö el minë panam nö lama-al minë inköphöti kahëtö Yēsū? (Mëtiv 5:43-48) (Ngëichkö ngam nyat.)
10 Pōyen yin më tarik töngamuh kamëtöre nö in minë tinṙōlen chūök më tarik nö halööktit minë ötlanöökö el minë panam. Meukö cha pöri ṙung ayī-ö nö īnu töm tanāinyöre yěn kēken u anū-ö në la-en. Kē minë chööngö cha-a nö eltīre, ngaich hakihten më tarik. (Efi. 4:31) Ngö ṙô ön ngòh töhěng tak prötör ang Chefrī, “Yē meh tarik nö hamūlöre nö kahòklökuire tö nup ötlinëkenre, ngaich mihôiṅ ayī-ö öi ngölōn tö cha nö īnu töm lanām nö kēken ngam la-en re, öt akahakūö pöri ayī-ö töp hē cha min nö yīhi tanāinyö nö tiṙōl nup tö tiṙōlö hēk lūtngen më tarik.” Haköpten hī misī ang Yēsū tö hī öi hòṅ hangenlōn tö taṙòkhöre tarik. Hangenlōn inrē tö yip tarik töt hamô-en minë ṙô hī hēk yip lama-al hī. (Vë-evkūö Mëtiv 5:43-48.) Pītnyöre in ayī-ö Kristīön öi öt kētöre inup la-en nup lama-al minë inköphöti kahëtö Yēsū.
Hòṅ īnu in töm öt pinhë-eṅkūö yěi sō öi hěngö kahë tö la-are öi in ngam pòlitiks hēk in nup la-en inlööktö minë ötlanöökö ikui ngih panam (Ngëichköm perekrāf 10)
11. Ihē öi mihôiṅ kihngen öi asīnken Yēsū öi öt hěngö kahë tö la-are?
11 Akahakūö in töm Pūlngö ngam Tēv nöng angū-ö min tö mihôiṅ nö kēngen minë ötlinëken. Yē hī pöri öi ötlēkaṙen, ngaich mihôiṅ min ayī-ö öi kihngen asīnken Yēsū öi öt hěngö kahë tö la-are hēk kihngen öi ṙatö-ellōnre im inyööngö töm Tēv. Töi ngëichkö ngih inlahen sistör Chāniyā. Ngatī mufē anga-aṅ ik sā yik tahëng nö miköhṙen tö ò kūö ò nö tö tahëngö mineūkö. Ngö ṙô anga-aṅ, “Yīhi tanāinyö chū-ö hěnghöre haṙivlōn inrē. Lōnu chū-ö hē e tö yik tötlamëken chu nö kētu sācha. Lökten ngaich chū-ö öich hanôltöre öich in yik tö sā re yik kamhòklökuire tö kūö yik tahëng nö miköhṙen tö cha. Ngölōn chū-ö lāmta ön min ngam tanāinyö chu yěich ngatī inlahen.” Unôichngöre pöri ngaich ang Chāniyā nö akahaiṙen töre nö hòṅ halööktö ngam tö ngatī mufēre. Ngö ṙô anga-aṅ, “Höng hō-en nuk töng ṙô yik tahëng chū-ö hē e. Höng hayönglenre chū-ö öich i tarik öt in Yāvē. Lökten ngaich chū-ö öich vë-engkūö ellōnre öich sōḵ öich hanôltöre öich in yip tarik kamëtöre nö in minë tinṙōlen kinhòklökui.” Lohten in inrē ayī-ö öi yīhi tanāinyö yěi meuköre öi ötlēkaṙen hēk meuk ötlinëken yip tahëng. Yěn ngatī angū-ö ngaich hòṅ ṙap ngam tanāinyöre ayī-ö hēk ötkô öi holṙen öp töhěng söngkötön öp kumlēngôre töre min nö ha-etngen minë ötlinëken.—Yôh. 15:19.
12. Kūö yòh öi hòṅ chumkūöṙen tö nup haköpre, ahangre hēk maheukre?
12 Yěi yīhi tanāinyö öi meuk ötlinëkenre hēk meuk ötlinëken yip tahëng, ngaich sitih inlahen mihôiṅ ayī-ö īnu töm lanāmö? Mihôiṅ ayī-ö chumkūöṙen tö nup haköpre, ahangre hēk maheukre inrē. Höng hayahlöng vinënyi nup ṙung töng rahëichyen ṙô tö ngam sōsöl mitīa. In u ṙung nö ṙūöhlöng alaha më tarik nö kahòklökuire yěn ötlēkaṙen. Rö-ö nöng anū-ö pön chöngṙen ṙung yip vamënyö nīūs nöng vënyö nup tö minyôiny ṙô. Lohten min nö tölöng öp töhěng inlahngen vahënyö cha, yöölen hòng pöri min ayī-ö yěi höng fēkö inlahen e? Yē hī min öi höng fēkö inlahen në tö ngatī nīūs, ngaich mihôiṅ min ayī-ö öi kihngen ellōn hēk kalē-ě miṙivlōn. (Inch. 24:10) Ngam tökiröng min inlahen hī mihôiṅ öi vaichngö tö ngam Pūlngö ngam Tēv nöng angū-ö tö mihôiṅ nö kēngen minë tö sitih ötlinëken.
13. Asūp mihôiṅ mahayööken hī öi havai ngam mufēre yěi ötlēkaṙen hēk meuk ötlinëken yip tahëng?
13 Yē hī örheūheu haköpmat ngam Paipöl hēk afēkö nup ṙô e, havai ngam mufēre min ayī-ö pòrô öi ötlēkaṙen hēk meuk ötlinëken yip tahëng. Töi chumkūöṙen tö inlahen sistör Alīya. Haṙivlōn ang sistör Alīya ik sā ò nö meuk inlanken yik tarik lāchīrö re nöng ötlēkaṙen. Hönlöre pöri hēk ngam tanāinyö ò ik sā ò nö meuk yik tötlamëken cha nöng öt kētu sācha. Ngö ṙô anga-aṅ, “Kēnyö ṙētakre chū-ö öich afě-a öich ngö ṙô, ‘Ṙatö-ellōnre öich chū-ö tö Yāvē min nöng anga-aṅ maha-etngö në töng sitih kanihngen?’ Vë-ekūö ngam Yōp 34:22-29 chū-ö. In në miröökö chū-ö öich fē-ělre tö nup töng sitih la-en ngòh tarik nö öt hanyunngen nö imat Yāvē. Höng Yāvē an tö mihôiṅ nö löngö tī nö akah fālen hēk halööktit minë tö sitih inrē inlahen.” Ngatī in ayī-ö öi hökkö ngam Pūlngö ngam Tēv ngam chūök hī min ṙòkhöre teūngen tö kinṙòklökuire. Sitih inlahen pöri ayī-ö töngamuh yěi ötlēkaṙen hēk meuk ötlinëken yip tahëng?
ASŪP MIHÔIṄ INLAHEN HĪ TÖNGAMUH YĔI MEUK MINË ÖTLINËKEN?
14. Asūp mihôiṅ inlahen hī yěi meuk minë ötlinëken? (Kòlòsi 3:10, 11)
14 Öt kanò-òv in ayī-ö asökngö inlahen yip tarik yěn ötlēken hī hēk ötlēken yip tahëng, mihôiṅ pöri ayī-ö öi chumkūṙen tö nup inlahenre öi in yip tahëng. Sa maheuk hī taheui ik urěh tö hī hòṅ asīnken Yēsū öi hangenlōn tö taṙòkhöre tarik. Yē hī min öi hangenlōn tö cha, ngaich tö milēṙen min ayī-ö tö cha, pòrô yip mahakihten hī. (Mët. 7:12; Rōm. 12:17) Yē Yāvē nö meukö hī öi hangenlōn tö yip taṙòkhöre tarik hēk vaiyö inlahen öi in cha, ngaich kiröngen ṙanamölōn anga-aṅ.—Vë-evkūö Kòlòsi 3:10, 11.
15. Asūp min lanökngöre yip tahëng yěi vë-eny nang cha tö minë kanô-en aṅmat ngam Paipöl?
15 Pōyen yin më tarik töngamuh tö kihngen tö kūö minë ötlinëkenre. Hěng mihôiṅ ngam inlahen hī öi hayööken cha, haköpten cha ayī-ö tö inlahen Yāvē. Kūö yòh öi mihôiṅ ngatī ṙô? Pön mihôiṅ ngòh töhěng tak tarik nö halööktitre nö löktö löktö in ngam ‘mikah Yāvē’. Lohten ngòh töhěng tak tarik nö urěh sin nö tö angëḵ hēk lama-al kūö holre inrē, unôichrit inlahen ò pöri nö haköp minë kanô-en aṅmat ngam Paipöl ngaich vītöre anga-aṅ nö tö hangenlōn hēk tö lāmö tinrīken nö tarik. (Isa. 11:6, 7, 9) Töi chumkūöṙen tö inlahen prötör Chamāl. Urěhkūö ò nö haköp ngam kanô-en ngaich nôlhöt anga-aṅ nö in ök töhěng krup ök lama-al ngam mahayöng. Ngö lōn misī anga-aṅ töm mahayöng nöng hakihten më tarik nö ṙòkhöre. Yöölen pöri ngaich anga-aṅ tö kūö minë haköpre aṅmat ngam Paipöl, lökten ò ngaich nö ṙāngenre nö la-alkūö holre. Ngö ṙô anga-aṅ, “Ötkô man öm la-al më tarik öm timlö alaha cha nö halööktitre. Höng löktö in minë kanô-en aṅmat ngam Paipöl pöri mihôiṅ cha-a nö halööktitre. Pöich ngatī chū-ö inrē höng lökten in u öich halööktit minë tinrīkenre.” Asā ṙôken yip tarik tö sā Chamāl nö halööktitre nö löktö in minë kanô-en aṅmat ngam Paipöl, ngaich ngatī kanūönngöre min minë ötlinëken nö ing panam.
16. Kūö yòh öm hòṅ vë-eny nang më tarik tö inlahen ngam inyööngö töm Tēv?
16 Lōnu in ayī-ö töre öi sā inlahen Yēsū öi vë-eny nang më tarik töm Pūlngö ngam Tēv min nöng angū-ö kamëngen minë ötlinëken. Teūngen min më tarik tötlēkaṙen tö nganöönöre yěi vë-eny nang cha töm maheūkkö hī. (Yar. 29:11) Ngö ṙô ang sistör Istēsī ngam tö kakka taheui ik urěh, “Meuk inlahen ötlinëken më tahëng chū-ö hēk la-al minë ötlinëkenre chū-ö inrē. Heuveū pöri chū-ö öich la-al u kūö chu öich akahakūö tö minë kanô-en aṅmat ngam Paipöl. Löktö in ngam Paipöl ang Yāvē nö hareuskö alaha chu.” Yěm lōnu töre öm hareuskö alaha yip tahëng hēk vë-eny nang cha tö inlahen inhetngö minë ötlinëken min ngaich hòṅ halēnkö öp ṙô re më-eṅ öm vë-eny nang cha. Sā ṙôken inlahen meh min öm haköpmat ngam Paipöl, ngaich ngatī ṙôken sanīöplö min ngam ṙinatö-ellōn meh tö inlahen në tö keuheūtngöre chūök ötlinëken min nö öthō nö öt kē-ěyö. Ngaich heuveū ṙô min më-eṅ öm mikahtö elnang yip holre el iskul hēk ichūök meh öm kaman yē cha min nö kakkö inlahen öp lāinyngen në kanihngen hēk sitih tī min Yāvē nö ha-etngen u.b
17. Sitih inlahen ang Yāvē töngamuh nö hayööken hī öi la-al minë ötlinëkenre?
17 Akahakūö in töm Satān nö “rācha ngih panam” hēk hanöng sā ò nö öl nö “ha-uknyu” tö e, ngaich hòṅ iṙūöhen min ayī-ö öi la-al minë ötlinëkenre. (Yôh. 12:31) Öt tö ngö manah pöri ngaich angū-ö tö hī öi töt maheūkkuvö hēk töt kalē-en inrē. Rö-ö ang Yāvē nöng vë-eny nang hī tö lāinyngen hī kūö yòh ötlēkaṙen ing panam, pön vënyö nang hī inrē anga-aṅ töp mufēre yē hī el kanihngen. (Sal. 34:17-19) Rö-ö nöng angū-ö pön löktö in Yēsū Kristu tī inrē anga-aṅ nö haköpten hī tö öp tö hòṅ inlahen hī yěi ötlēkaṙen hēk löktö in ngam Pūlngöre tī inrē min anga-aṅ nö ha-etngen minë töng sitih ötlinëken. (2 Pīt. 3:13) Töi iṙūöhen öi holtö nganöötöre öi ahangkö ngam tölöök inhāngköm Pūlngö ngam Tēv hēk hökkö öp ṙētak yěn keuheūtngöre chūök min ngam ‘lanöökö hēk töm inkaha fālen’ nö ing panam.—Isa. 9:7.
TINKÖÖKÖ 158 “Yěn Teung Min Nö Hēk!”
a Harīki nun minë rīkre minë-eny më tarik in ngih ātiköl.
b Ngëichken ngam tahëng ātiköl A point 24-27 in ngam līpöre Hāngenlōn Tö Tarik—Haköpten Cha Inrē.