Ṙanūöhlö Ṙôken Ṙāi Chehen Ikūö Në Panam—Sitih Ṙô Öng ngam Paipöl?

Ngö ṙô an ngam prësiten ngam Vöölt Bëng Krup nö vënyö ngam ripōt ik Chūn 2022. “Pingangkūö ngih panam nö meuk ṙôken ṙāi në chehen. Kihngen tarik töngamuh tö pësa hēk pōilöre ṙāi në chehen.”

Ngö ṙô an ngam Intörnēsnöl Mònitörī Fönt (Internatinal Monetary Fund): “Sīöplöre ṙôken ṙāi nun minë petrol, nyā-aṅkūö hēk minë tahëng inrē chehen. Kinhngen tö kūö u yip tarik mī-iyöngkūö nup panam töyāich.”

Kūö yòh ön ngatī sanīöpö ṙôken ṙāi minë chehen hēk kūö yòh öi ngatī ṙôken kanihngen tö rupīö? Asuh öp mihôiṅ inlahen hī? Hēk hēṙu ön min në tö ngatī ṙôken kanihngen hī nö ahëtiyö? Teūngen in tö sanapṙô në intöönö öi löknyö mat ngam Paipöl.

Sanīöpö ṙôken ṙāi minë chehen ing “manā-aṅ sakāmö”

• Vë-eny nang hī an ngam Paipöl tö ngih ṙētak hī nö “manā-aṅ sakāmö.”—2 Timôtī 3:1.

• Ngö ṙô ang Yēsū tö hī min öi meuk nup pinhë-ekūö min ing manā-aṅ sakāmö, tö ngö manah angū-ö tö hī min öi meuk minë pinngangkūö tö pa-ekūö tī min tö hī. (Lūkös 21:11) Kô-en angū-ö nö ngatī. Ṙūöhlöre pinhë-ekūö yin më tarik nö meuk ṙôken sanīöpö ṙāi minë chehen. Höng fēkö inlahen mineukṙen ngam mikūönöre inrē cha-a.

• Vënyu nang in im līpöre Inmeukhömat tö në nyā-aṅkūö min nö sīöplöre ṙôken ṙāi. Ngö ṙô ön. “Ngaich chū-ö hang ök tö sā ṙënṙô . . . tö ngö ṙô, Hĕng nyanum vīt, fën höt tāk tö pësa; lūöi nyanum parli, fën höt tāk tö pësa.’” Ngam manah ngam töhěng tak, raneushö ngam töhěng sumkam nö la-evṙen.—Inmeukhömat 6:6.

Yěm hòṅ ṙūöhtö mikahkūöre tö inlahen ngam “manā-aṅ sakāmö” hēk tö minë tö-eūka kinlēḵngô imat ngam līpöre Inmeukhömat, ngaich kò-òren öm meuk ngam vitiō Harīkngöre Ngaich Ngih Panam Löktö Kūö Ik 1914 hēk vë-ekūö ngam ātiköl “Më tö Fën Tak Aṅ Uk Kōra—Achīö Aich Cha-a?”

Ngam tönghěng tökô kamëngö në kanihngen hī i alaha ngam pësa

• “Mānlö patī re min cha-a iyöng ël u inrē, teūich vāin min cha-a nyā ṙòng u inrē. Hö-ö cha-a min nö mānö ngaich iyöngö ël angū-ö tö tahëng; öt teūich min cha-a ngaich nyā-aṅ anū-ö tö tahëng.”—Isayā 65:21, 22.

• “Tëḵ min nup sāiny nö ing panam, i kui minë rôngö.”—Salmai 72:16.

• “‘Pò ngam nāichngen yāich, pò ngam inlöinyö chanökö töhāṅten: Ngaich chin öich choholre, ngö ṙô ngam Mā Tēv; lā im chūök öt pinlā-ngen tī chin min tö ò ngam hayëḵngen cha.”—Salmai 12:5.a

Veūten an min ngam Tēv ngaich nö kēngen në tö ngatī kanihngen, hö-ö pöri nöng in öp töng hěng panam, pön keuheūtngöre chūök. Sitih inlahen tī ang min, yěm hòṅ ṙūöhtö mikahkūöre, kò-òren vë-ekūö ngam ātiköl “Yih Öp Min Ṙētak Hī Öi Öt Hanātuṙen Tö Ngam Pësa?”

Mihôiṅ an ngam Paipöl nö hayööken hī öi la-al në tö ngatī kanihngen. Nö sitih inlahen? Ōt nun minë inlēnö hī öi sitih inlahen mihôiṅ holtö mikah elmatre öi yūs minë pësa. (Inchōḵ-oṙô 23:4, 5; Mumkahten 7:12) Mihôiṅ man öm yöölen yěm hāngö u. Yěm hòṅ ṙūöhtö mikahkūöre hēk tö inlahen u, ngaich mihôiṅ öm vë-ekūö ngam ātiköl “Chumkūöṙen I Alaha Ngam Pësa” hēk “Sitih Inlahen Öi Ha-aṅhare Pòrô Öi Öt Pōi Aṅ In Tö Pësa.”