Hangenlōn Yin Më Tarik Yāvē Tö Ngam Lanöökö!

1. Asuh ök kinlaha Yôsěf? Sitih inlahen pöri anga-aṅ?

TÖ LA-EVṘEN ök Yôsěf nö i patī Pòtiföör. Hē Pòtiföör nö hö-öv nö i patī. Ngaich ngö ṙô ök pīhö ò nö in Yôsěf, “Ṙōlngöre in chu.” Akahakūö ang Yôsěf yēḵ ò nö öt hang ṙô ök pīhö Pòtiföör ngaich öt ṙāḵlöngö min anga-aṅ tö ò. Sōḵ pöri anga-aṅ nö hang ṙô ò. Sön pöri ök pīhö Pòtiföör nö öt ṙāngen re nö hòṅ in ò, Halööknyôre pöri ang Yôsěf nö in ò nö sōḵ nö ngatī inlahen. Kūö yòh anga-aṅ nö sō nö ngatī inlahen? Ngö ṙô anga-aṅ: “Sitih kanô-òṅ öich la-evṙen tö ngih tökiröng öt lanöökö, tökööl inrē nö im Tēv?”—Ran. 39:7-12.

2. Sitih löktö mikahkūö ök Yôsěf tö ngam insěha nö tötlöök nö la-en?

² Sitih löktö mikahkūö ök Yôsěf tö ngam insěha nö “tötlöök nö la-en” nö ikūö Yāvē? Yěn höng unôichrit tö nëtòng samyeūheu nö kētu ngam chööngö Môsös, ngam tö ngö: “Uh man Asěha.” (Man. 20:14) Pòrô ök nö öt aṅhavin tö ngam chööngö. Akahakūö anga-aṅ tö Yāvē nö hapīöh nak raneh tarik. Lökten anga-aṅ nö akahakūö tö minā pamīhöre nö mihôiṅ nö holtöṙah höö. Sön anga-aṅ inrē nö hang inlahen ök kalvī re ang Sëra, nö sitih inlahen ang Yāvē nö laklen ò hē ò nö yīkiyö tö nak tö nët tak tarik. Ngatī inlahen inrē ök yōm ò kikānö ang Repëka nö laklöng tö Yāvē. (Ran. 2:24; 12:14-20; 20:2-7; 26:6-11) Fēken u lohten ang Yôsěf, lökten nö akahakūö tö ngam insěha nö tökööl nö imat Yāvē. Hangenlōn inrē anga-aṅ tö Yāvē, lökten nö hòṅ kēken nup tölöng la-en nö imat ò. Lökten anga-aṅ nö öt kēken ngih tökiröng fālen.

3. Asuh öp min kahakkö hī in ngih ātiköl?

³ Lohten man më-eṅ öm hòṅ kēken nup tölöök la-en, nup tölöng nö imat Yāvē. Ṙòkhöre pöri ayī-ö tarik öi öt het, hēṙu mihôiṅ öi sā mufē ngih panam, lökten kò-òren öi öt akahakūö töp tölöök hēk tötlöök inrē. (Isa. 5:20; Rōm. 12:2) In ngih ātiköl in min öi mikahtökūöre tö manah minë la-en tölöök, ngaich asuh min öp yanöölen hī yēḵ hī öi kēken u. Ngaich kakkö minë tö lūöi inrē min ayī-ö inlahen hī hòṅ chumkūöṙen öi hang minë inchöngten re kahëtö Yāvē.

ASUH ÖNG NGAM LANÖÖKÖ?

4. Achīö yip tarik töt kô nö kaheūkö nö tölöök tö hī?

⁴ Ōt yip muh tö köp nö inup ṙô re, rīkre yip muh inrē tölöök tölōn re. Yěn rahëichyen vanaichö yip tahëng, ilööṙen cha-a nö kahòkken cha. Pòrô pöri cha-a nö tö löök tölōnre, hö-ö pöri angū-ö nö kaheūkö nö in cha nö tölöök. Öt hangenlōn ang Yāvē tö yip tarik tö ngatī inlahen, ngatī ngam kūön ò Yēsū inrē. Hē ò misī nö ing panam, ngaich hatainyken yik yōm tinlööken anga-aṅ. Pò cha nö töhet tö ṙô re. kahngenre inrē cha-a nö vī minë inchöngten minë tölöng hēk tövaich. (Mum. 7:16; Lūk. 16:15) Asuh ang rih ngam lanöökö?

5. (a) Asuh öp manah ngam lanöökö tö ṙô ngam Paipöl? (b) Sitih inlahen ang ngòh tölöök tarik?

⁵ Tö ngö manah an ngam lanöökö, nup tölöng nö ikūö Yāvē ngaich hòṅ kēken u ayī-ö. Ik sā kinūichö ngam Paipöl pöri misī ngaich ṙōlkangen inlahen ṙô më vamë-eny inlahen ngam lanöökö nö imat e. Höng hěng pöri ngam manah e, tö hī öi hòṅ asīnkö nup tölöng inchöngten re tö Yāvē. Tö sā inlahen ṙô ngam Paipöl nö vënyö inlahen Yāvē, nö lōnu tö yik mi-inyīhaṅ nö aṅhavin tö nuk ‘tölöng Kinlah lumngan.’ (Chöö. 25:15) Ngam ṙô ihih ‘tölöng’ i ṙô Heprāi, ṙôtö nup “tölöök” inrē angū-ö. Lökten mihôiṅ öi ngö ṙô töp tarik tölöök, nö töt michūḵṙen, tölöngö inlahen inrē yěn inyīhaṅ. Kunyah-elmat inrē anga-aṅ tö nup ötlinëken, lōnu inrē tö taṙòkhöre tarik nö kahòklöng kui. Urēhěkūö ò nö katöllö nup la-enre, ngaich fēkö mufē Yāvē min anga-aṅ, pön hòṅ ‘haṙamlōn ò i nup tökeuheūttöre.’—Kòl. 1:10.

6. Kūö yòh ön minë inchöngten kahëtö Yāvē nö tölöng? (Isayā 55:8, 9)

⁶ Hö-ö an Yāvē nöng kēken nup tölöök la-en, pön vënyu inrē nö imat ngam Paipöl tö ò nö īnu tö ngam lanöökö. (Yar. 50:7) Anga-aṅ Vamīlen hī, anga-aṅ inrē tö akahakūö tö nup tölöng hēk tövaich. Töhet inrē anga-aṅ, örheūheu inrē anga-aṅ nö akahakūö tö nup tölöng hēk tönup tövaich inrē. Töthet in ayī-ö tarik, lökten in ṙung hēṙu öt akahakūö tö öp tölöng hēk tövaich. (Inch. 14:12; vë-evkūö Isayā 55:8, 9.) Mihôiṅ pöri ayī-ö öi hang minë inchöngtenre kahëtö ò, kūö hī öi sā vinī-i ò. (Ran. 1:27) Ṙamlōn ayī-ö yěi hang minë inchöngtenre kahëtö ò, pò hī öi hangenlōn tö ò hēk hòṅ asīnken ò inrē ayī-ö.—Efi. 5:1.

7. Kūö yòh öi hòṅ īnu tö minë inchöngten tölöng hēk tövaich? Hachōḵ elmat hī.

⁷ Minë inchöngten kahëtö Yāvē tölöng hēk tövaich, yēḵ hī öi hāngö u ngaich yanöölen hī anū-ö. Kò-òren öi fēkö kanihngenre, yěn kö harīkngöre vinīti öre, minë kölöör nö in minë trefik siknel nö keuheūtngöre chūök, ngaich iṙôken pinlāḵngen mihôiṅ ayī-ö. Ngatī inrē yěn öt hěngren kinlāha minë machööḵlö hēk vītu inrē nup töt ngön nö in minë patī, ngaich mihôiṅ min anū-ö nö fukngö, ngaich pōihangen yip tökapah tö kūö e. Hēk yēḵ öp tòktör öre nöng kahanglōn re tö inlahen tī re nö lë-en yip tö vahavö, ngaich mihôiṅ min nö pōihangen yip tökapah. In e mikahkūö ayī-ö töp mahachöngten hī nö hòṅ ōt öp vamë-eny nang hī tö nup tölöng hēk tövaich inrē. Lökten yēḵ hī öi hang minë inchöngtenre kahëtö Yāvē, ngaich mihôiṅ ayī-ö öi laklöre.

8. Asuh nup min inkôlò taneūngen hī yēḵ hī öi hang minë inchöngtenre kahëtö Yāvē?

⁸ Yēḵ hī öi hang minë inchöngtenre tö Yāvē, ngaich teūngen ayī-ö tö inkôlò re. Kilēḵngôre an inrē: ‘Tö ngòh tölöök tarik nö örheūheu nö aṅ nö ikūö ngih panam.’ (Sal. 37:29) Kò-òren man fēkö kumchikṙen hī, yěi ṙòkhöre öre öi hang minë inchöngten re tö Yāvē. Pöi ṙamlōn, hěng inrē ayī-ö, in hī inrē ngam lanāmö. Lōnu Yāvē tö hī öi ngatī inlahen. Lökten öi hòṅ löngö la-en, hang minë inchöngtenre inrē tö ò. Sitih inlahen pöri ayī-ö öi haköpkö inlahenre öi hang minë inchöngtenre tö Yāvē? Ta-a töi mikahtökūöre tö minë tö lūöi kangen inlahen hī.

HANGÖN NGAM KUILŌNRE ÖM HANG MINË INCHÖNGTENRE TÖ YĀVĒ

9. Sitih inlahen öi mihôiṅ hangön ngam kuilōn re öi hang minë inchöngtenre tö Yāvē?

⁹ Ngam raneh: Hangenlōn man tö Yāvē. Höng Yāvē an tö akahakūö tö minë tölöng hēk tövaich. Yēḵ hī min öi iṙūöhen öi hangenlōn tö Yāvē, ngaich ngönlöre min ngam kuilōn hī öi hang minë inchöngtenre tö ò, örheūheu inrē min ayī-ö öi la-evṙen tö nup tölöng. Kò-òren öi fēkö inlahen nā Ātöm nö Ēva. Yēḵ cha öre nö tö hangenlōn tö Yāvē, ngaich öthō cha-a nö halôngen chööngö ò.—Ran. 3:1-6, 16-19.

10. Sitih inlahen ang Aprahām nö ṙūöhtö mikahkūö re tö Yāvē?

¹⁰ Yēḵ hī öi sōḵ öi asīnken nā Ātöm nā Ēva, ngaich hòṅ asīöp ngam hanangenlōnre ayī-ö tö Yāvē. Yēḵ hī pöri hòṅ asīöp ngam hanāngenlōn re tö Yāvē, ngaich hòṅ mikahtökūö re ayī-ö tö ò, tö minë tinrīken ò, mikahtökūöre inrē tö minë mufē ò. Ngatī inlahen ök misī Aprahām. Tö hangenlōn anga-aṅ tö Yāvē. Hěngheuh ik sā ò nö öt akah elmat tö minë fësla kahë Yāvē, sön anga-aṅ nö hang minë chööngö Yāvē. Kūö ò nö akahakūö tö mufē Yāvē töp lāinyngen ò inrē nö ngatī inlahen. Tö sā ngih, hē ò nö vënyu nang tö Yāvē nö hòṅ piyāingö ngam panam Sôtöm, Kômòra, ngaich pa-ekūö anga-aṅ. Lökten ò nö ngö lōn, mihôiṅ ang min ngam kamhòkken ngih panam nö ahetngen yip tötlöök nö anòngngövah yip tölöök. Lökten anga-aṅ nö hatön kūö Yāvē ngaich sapṙô ò ang Yāvē. Löktö in e ngaich anga-aṅ nö akahakūö takô tö Yāvē, tö ò nö mameuk ellōn tarik. Öthō inrē min anga-aṅ nö kētö sācha yip töt fāluṙen.—Ran. 18:20-32.

11. Asuh öp inlahen Aprahām töp löktö mikahkūö hī tö ò hangenlōn tö Yāvē hēk ṙatö-ellōnre inrē anga-aṅ nö in ò?

¹¹ Sīöp takô lohten ngam hanāngenlōn Aprahām tö Yāvē, unôichrit inlahen ṙô cha nö vë-ekūöre tö inlahen inhëtngö Sôtöm, Kômòra, milēḵṙen inrē ngaich anga-aṅ tö ò. Lökten ik sā Yāvē nö tölṙô ò nö kēngö ök kūön re Isak nö tökētu, ngaich höng ilöö hang chööngö ò anga-aṅ nöng öt ṙahônyu, kūö ò ngaich nö akahakūö takô tö Yāvē. Kò-òren pöri öm asehkūöre tö miṙivlōn ò, hē ò nö halēn inlahenre nö kētö ngam kūön re nö tö kētu. Fēkö nuk inlahen Yāvē pöri ang Aprahām. Akahakūö takô anga-aṅ tö Yāvē nö öthō nö vaichö la-en, öthō inrē nö ötlēḵkö tī re tö tarik re. Köplōn inrē anga-aṅ tö ngam kinlēḵngô Yāvē nö in ök kūön ò Isak, tö ò min nö tökiröng nö mumā-aṅ tarik. Öl pöri hē e ang Isak nö kūönu, lökten ang Aprahām nö ṙinātu-ellōn tö Yāvē nö mihôiṅ min nö hachohlen ò yēḵ ò nö kapah. (Hep. 11:17-19) Hangenlōn takô ang Aprahām tö Yāvē, lökten nö ṙatö-ellōnre tö Yāvē nö öthō min nö vaichö la-en. Angū-ö ngih lāinyngen ò nö hang ngam chööngö kahëtö Yāvē, pòrô angū-ö nö tö kihngen.—Ran. 22:1-12.

12. Sitih inlahen öi mihôiṅ asīnken Aprahām? (Salmai 73:28)

¹² Sitih inlahen öi ayī-ö mihôiṅ asīnken Aprahām? Hòṅ örheūheu ayī-ö haköp inlahen Yāvē. Löktö in e min inrē ayī-ö mihôiṅ röhta öi in ò hēk hangenlōn inrē tö ò. (Vë-ekūö Salmai 73:28.) Yēḵ hī min öi ṙūöhtö mikahkūöre tö ò nö sitih inlahen mufē anga-aṅ tö minë tölöng hēk tövaich, ngaich ngatī inlahen min ayī-ö öi asīnkö mufē ò. (Hep. 5:14) Ngaich surīkhö nup tötlöng min ayī-ö sahō-o Yāvē. Ngaich yěi töölô min öi kēkö nup tötlöng la-en, ngaich sō-en e min ayī-ö. Pò hī öi sō miṙivngölōn Yāvē hēk sōḵtö ngam innôlöre inrē nö pasū. Hòṅ asuh öp inrē inlahen hī hòṅ hī köp öi irūöhen lök in minë inchöngtenre kahëtö Yāvē?

13. Sitih inlahen öi mihôiṅ “fachūrit ngam lanöökö”? (Inchōḵ-oṙô 15:9)

¹³ Ngam innëtö: Örheūheu hang minë inchöngtenre kahëtö Yāvē. Sā hī ṙung öi örheūheu exercise öi havai ngam alahare. Ngatī inlahen öi örheūheu hang minë chööngö Yāvē, ngaich iṙūöhen min ayī-ö öi kēken u hēk hāngö u inrē. Öthō ang Yāvē nö tölṙô hī öi kēken nup tötkanò-òṅ hī, pön akahakūö anga-aṅ tö hī öi mihôiṅ hang minë chööngö ò. (Sal. 103:14) Yēḵ hī min öi ngatī inlahen hēk kēken minë tölöök la-en inrē, ngaich ṙamlōn anga-aṅ nö in hī. Ngö kinūichngö an nö imat ngam Paipöl: “hāngenlōn . . . anga-aṅ tö famchū lanöökö.” (Vë-evkūö Inchōḵ-oṙô 15:9.) Yēḵ hī min öi ṙūöhöl inlahenre öi i linökölōn Yāvē, ngaich kēkö minë la-en tö hòṅ kēkaṙen, ngaich öthō min ayī-ö öi öt ma-anyre öi in u. Ngaich ngatī inlahen min ayī-ö öi kēken minë tölöök la-en öi ma-anyre, ngaich sā famchūrit ngam lanöökö min ayī-ö. Yēḵ hī öi iṙūöhen öi i linökölōn ngam Tēv Yāvē, ngaich öthō min anga-aṅ nö öt hayööken hī. Ngaich mihôiṅ min öi hang minë chööngö ò kahëtö ò nö in hī.—Sal. 84:5, 7.

14. Asuh öng ngam “lanöökö lanak elngòh,” ngaich hòṅ kūö yòh öi köpsöröṙen öi hòṅ hayutöre tö e?

¹⁴ Ötkô in öi ngö mufē tö minë inchöngten hī kahëtö Yāvē nö lumngan anū-ö hēk kihngen inrē öi hāngö u. (1 Yôh. 5:3) Pöi hòṅ chumkūöṙen ayī-ö tö hī yēḵ hī öi örheūheu hang minë chööngö ò, ngaich lanaklö hī anū-ö. Köplōn öm tö minë kahëtö ngam Tēv aṅtī hī öi kiyung, minë vahënyö Pôl? (Efi. 6:14-18) In e ngam töhěng chehen hī ngam “lanak elngòh tö ngam lanöökö,” tö ngö manah tö hī öi akahakūö tö minë tölöng tötlöng nö inchöngten hī tö Yāvē. Inuk mā misī ṙētak yik kumyung, yēḵ ngòh kumyung nö īnu tö ngam lanak elngòh. Ngaich mihôiṅ anga-aṅ nö laklöre tö tī yip lama-alre. Ngatī inlahen min ayī-ö yēḵ hī öi chumhenlöre tö ngam lanaklöre. Tö ngö manah tö minë inchöngten hī kahëtö Yāvē yēḵ hī öi hāngö u, ngaich mihôiṅ min ayī-ö laklöre tö minë tī ngam Sī-ö. Lökten ayī-ö hòṅ örheūheu hayutlöre tö minë lanaklöre.—Inch. 4:23.

15. Sitih inlahen öm hayutlöre tö ngam lanöökö?

¹⁵ Hòṅ asuh öre öp inlahen meh öm hòṅ chumhenlöre tö ngam lanöökö? Yēḵ meh öm hòṅ kēḵ fësla re hēk kēkö nup la-enre inrē, ngaich hòṅ urěh më-eṅ öm fēken minë inchöngtenre kahëtö Yāvē. Ngaich yēḵ meh inrē öm vë-ekūö yip holre, hang ṙô tinköökö, yěm haṙamngölōnre hēk vë-ekūö nup tahëng līpöre inrē, ngaich hatöönöre më-eṅ: ‘Asuh öp min lanökngöre ngih ellōn chu? Ṙamlōn ang min Yāvē yěich ngatī inlahen? Hēk ōt hòng inrē nup tahëng inlahen tö vaich nö imat Yāvē, tö sā minë, ötlanangö, lina-alkūöre, yinikhang hēk höng ngamëichköre inrē?’ (Filip. 4:8) Yēḵ meh min öm kēḵ në tö ngatī fësla minë tö sā elkuilōn Yāvē, ngaich laklö ngam elkuilōnre min më-eṅ.

16-17. Sā ṙô ngam Isayā 48:18 kūö yòh öi mihôiṅ ṙatö-ellōnre tö hī öi örheūheu öi hang minë inchöngtenre tö Yāvē?

¹⁶ Hēṙu öm ṙung ngö mufē tore öm öt teungten öm i linökölōn Yāvē? Yēḵ meh öm ngatī mufē, ngaich köplōn më-eṅ tö ngam kinlēḵngô Yāvē im Isayā 48:18. (Vë-evkūö.) Nö sā ṙēngen “mahūvö ngam mai” nyin ngam lanöökö hī tö ṙô ò. Asehkūöre man töre öm sökhak ikūö kuyayö, ngaich meuk minë mahūvö ngam mai më-eṅ nö öt kinheūtu yanihīröön. Ngö mufē hòng min më-eṅ öm meūkö u tö u min ngaich nö öt mahūvö min nö hēk? Hö-ö! Pöm akahalōn më-eṅ tö u nö samyeūheuv ṙò-òten nö ngatī inlahen ngam mahūvö nö in ngam mai.

¹⁷ Ngatī inlahen inrē ngam lanöökö nö sā inlahen ngam mahūvö. Sā inlahen yanīhi ngam mahūvö ngam mai nö örheūheu röön, ngatī inlahen ayī-ö örheūheu hang minë inchöngten re tö Yāvē. Urēhěkūö meh öm kēḵ fësla re, ngaich fē-a më-eṅ tö nup ṙanamlōn Yāvē, ngaich ngatī inlahen më-eṅ öm kētöre, pòrô öm kihngen öm kēḵ nup fësla re. Köplōn më-eṅ tö Yāvē ngam yöng meh nö hangenlōn tö meh. Öthō anga-aṅ nö öt holṙen meh hēk kētö nganöönö meh inrē hòṅ meh iṙūöhen öm hang minë inchöngtenre kahëtö ò.—Isa. 40:29-31.

18. Kūö yòh öi ötkô öi höng kahngenre öi inup inlahenre öi kahôka?

¹⁸ Ngam linūöyö: Um sūöchkö inlahen holre, tön Yāvē an töla-evṙen tö la-en kinhòkka. Hòṅ örheūheu in öi ma-anyre öi hang minë inchöngtenre tö Yāvē Ötkô öi sūöchkö inlahen yip holre. Ötkô inrē öi ngö mufē tö cha nö öt hang minë inchöngtenre kahëtö Yāvē. Ötkô ayī-ö öi höng löktö in re öi kahòkken cha. Pöi hòṅ köplōn ayī-ö tö yāvē nöng anga-aṅ kamhòkka. (Ran. 18:25) Öt kētö chööngö hī ang Yāvē öi kahòklökui yip holre. Ngö ṙô inrē ang Yēsū nö kētö ngam chööngö: “Ui kahôka; hòṅ yīö min öt kahòkkaṙen.”—Mët. 7:1.b

19. Akahakūö ang Yôsěf tö Yāvē nöng anga-aṅ kamhôka, lökten anga-aṅ nö sitih inlahen?

¹⁹ Kò-òren in öi fēkö inlahen Yôsěf tölöök ök nö tarik, ötlēkaṙen pöri anga-aṅ tö yik mëm re, fëlö ò hēk havahngen ò inrē nö chuh tahëng panam. Ngaich vë-eny nang ök yöng ò cha-a tö Yôsěf ngaich nö kapah. Samyeūheuv ṙò-angen ang Yôsěf nö havantö matre nö meukkūö yik mëm re. Ngaich anga-aṅ nö mā nö Aikup, mihôiṅ öre anga-aṅ nö lōnu nö havalvahre nö in yik mëm re. Hö-ö pöri anga-aṅ nö ngatī inlahen, halööktitre ngaich yik mëm ò. Ngö lōn pöri cha-a tö Yôsěf min nö havalvahre, hö-ö pöri anga-aṅ nö ngatī inlahen. Ngö ṙô anga-aṅ: “Uh yin pa-ekūö: nö yòh ṙöng, i chūök ngam Tēv öich chū-ö?” (Ran. 37:18-20, 27, 28, 31-35; 50:15-21) Hö-ö ang Yôsěf nö kahòkken yip mëm re, pön akahakūö anga-aṅ tö Yāvē nöng anga-aṅ tö chööngu nö im kinhôka.

20-21. Hòṅ sitih inlahen öi in yip prötör sistör hēk in yip tahëng?

²⁰ Hòṅ köplōn inrē ayī-ö öi sā inlahen Yôsěf tö ngam la-en kamhôka nö la-en Yāvē. Öt la-en hī ön angū-ö, pò hī öt akahakūö tö la-en yip prötör sistör nö kūö yòh anga-aṅ nö kēken e. Öt akahakūö inrē ayī-ö tö elkuilōn öp holre, pön höng Yāvē tö mihôiṅ nö meuk ellōn ngòh tarik. (Inch. 16:2) Hangenlōn an Yāvē tö taṙòkhöre, pòrô öp tarik nö aṅ tahëng panam hēk tahëngö tinrīken inrē. Lōnu anga-aṅ tö hī öi ‘kumröngnyö ellōnre,’ öi hangenlōn inrē in yip taṙòkhöre prötör sistör. Ötkô öi höng inup chööngö re öi kahòkken cha.—2 Kòr. 6:13.

²¹ Ötkô in höng vīlö inlahen yip holre aṅ el kahôiṙen. (1 Tim. 2:3, 4) Tö sā yip mak alaha hī öiötkô öi ngö mufē min tö cha nö sō nö haköp ngam kanô-en. Hòṅ köplōn ayī-ö tö Yāvē nö kētö ṙētak hī öi ‘halööktitre.’ (Inl. 17:30) Lökten ui vīlö fālen yip holre, uh rēhēn öi ngö mufē tö cha min nö öthō nö hang. Hòṅ köplōn ayī-ö, tö ngòh tarik tölöök tö lōn re, hö-ö pöri anga-aṅ nö löök nö imat Yāvē.

22. Kūö yòh öm më-eṅ hòṅ hang minë inchöngtenre tö Yāvē?

²² Ta-a chěi töi asīöp ngam kuilōn re hang minë inchönten re tö Yāvē, tö hī hòṅ asīöp ngam neūköre öi im lanöökö. (Mët. 5:6) Yēḵ hī min ngatī inlahen teūngen min ayī-ö tö ṙanamlōnre. Ngaich haköp min yip tahëng nö in hī hēk hangenlōn inrē tö Yāvē hēk hangenlōn tö hī inrē. Yēḵ hī min iṙūöhen öi i linöökö lōn Yāvē öi asā minë inchöngtenre tö ò, ngaich chumkūöṙen min anga-aṅ tö minë la-en hī hēk ṙamlōn min inrē anga-aṅ. Chuhngöre nun minë inchöngten ngih panam, lökten ta-a töi iṙūöhen hang minë inchöngtenre tö Yāvē pò ò nö “tö hāngenlōn tö lanöökö.”—Sal. 146:8.