Töngön Ök Kūön Kanānö Pôl

Ta-a töi haköp inlahen ök ihih ṙāl tarik ök lamaklö nômö ök kanôinyö ök yöng re kikānö. Ngam tanīnöṙô ang Pôl an kanôinyö ök yöng ngam ṙāl tarik. Hö-ö in akahakūö tö minë-eny ngam ṙāl tarik, akahakūö pöri ayi-ö tö ò nö tö ngön. Hòṅ hang inlahen ò öm rih?—

Ṙòmöng el chēl hē e ang Pôl nö i Yerusalem. Haköövö anga-aṅ pön ahangkö inlahen Yēsū. Haroh tumtak yik tötlöök tarik tö kunyaha elmat tö Pôl, chöh inlahen tī re cha-a nö hòṅ fëlngen ò. Ngö ṙô cha-a nö vë-ekūöre: ‘Ta-a töi tölṙô öp makūö kumyung min nö kumten Pôl nö chuh el chūök kamhôṅka. Hayunngöre min ayi-ö el talöökö cha, ngach yĕn yih min Pôl, fëlngen ò min ayi-ö!’

Höng hangtöre ök kūön kanānö Pôl tö ṙô cha nö vë-ekūöre. Sitih inlahen ngach anga-aṅ? Chuh el chēl anga-aṅ, ngach vë-eny nang Pôl tö nuk ahang re. Ilööṙen ngach Pôl nö tölṙô ò nö chuh in ök makūö kumyung nö vënyö ngam ṙô më tarik. Lööṙen ök ṙāl tarik tölōn meh nö chuh ik makūö kumyung?— Hö-ö, pön tö kiröngö mina-aṅ ök makūö kumyung. Sön pöri anga-aṅ nö öt vöö nö chuh kūö ök makūö kumyung nö vë-ekūö ò.

Halēnlöng ngach yik kumyung tö 500 ṙòken, tök makūö kumyung nö amahten Pôl! Ngach töölöṙô cha-a nö söömten Pôl nö tölngö Kaisarī im hatööm. Öt fehngenvö hòng Pôl?— Heūṅ, öt kôta tī yik tötlöök tarik nö fëlngen Pôl! Öt teung ngach ngam kuilōn cha nö hòṅ fëlngen ò.

Asūp haköp meh kò-òren ing istori?— Mihôiṅ man me-eṅ inrē ngön öm sā ök ṙāl tarik. Hòṅ ngön in yēḵ hī vë-eny nang yip holre tö inlahen Yāvē. Ngön öm min me-eṅ öm iṙūöhen vë-eny inlahen Yāvē?— Yēḵ meh min ngatī, mihôiṅ min me-eṅ laklöre tī tö nômö holre.