Minā Pamīhöre Tököp nö Söl Manā-aṅ

Yěn köp minā pamīhöre nö holṙen re nö löklōn ngam Tēv, ṙamlōn min cha-a, ha-öinyö inrē ngam Tēv Yāvē. (Māk 10:9) Lökten ngòh Kristīön yěn hòṅ ṙamlōn nö im pinīhö, ngaich hòṅ chumkūöṙen angā-aṅ nö hang minë inlēnö aṅmat ngam Paipöl.

Ĕhten öm höng hök, um afēkö ngam pinīhö yěn ṙömöng “hū ap kuilōn” meh. (1Kò 7:36) Pòn yěn hū min ap kuilōn meh ngaich öt löng min öp katöllö meh. Ngam ṙētak meh pöri hök, angū-ö ṙētak meh öm hangönlö ngam innôlöre in Yāvē, asīöp minë tölöök tinrīken re inrē. Yēḵ meh min ngatī inlahen, ngaich tö akaha min më-eṅ öm inpīhö kikōnyö kikānö inrē.

Urēhěkūö meh pīhövö ngaich hòṅ kēnyö ṙētak re öm ngëichkö öp ‘lamā tuhět tarik.’ (1Pī 3:4) Yēḵ meh akahngen re tö nup tö rahëichtöre nup tö mihôiṅ min nö vītö kanihngen meh, lökten nān hòṅ vë-ekūö re. Kööpölōn pöri më-eṅ öm hòṅ sā inlahen innôlö meh in yip tahëng, ngatī inlahen ngam pinīhö, öm hòṅ mööḵlö elmat öm ngëichken më holre. (Filip 2:3, 4) Yēḵ meh urēhěkūö re pīhövö öm asīnken minë chööngö lamökngörit ngam Paipöl, ngaich ṙamölōn min më-eṅ yēḵ meh ngaich öm pīhövö.

NGËICHKÖ NGAM VITIŌ HALĒN INLAHENRE YĚM HÒṄ PĪHÖVÖ—PART 3: “LĒNNGEN TĪ TÖ NUP KÖRCHA,” NGAICH SAPṘÔ MINË INTÖÖNÖ:

• Sitih inlahen ök sin innôlö Sën töp sistör ik raneh?

• Asuh ngaich maheuk ök sistör nö in Sën ik sā ò nö akahakūö tö ò?

• Sitih inlahen nāp yöng ngam sistör nö hayööken ò? Sitih inlahen anga-aṅ nö löngö katöllö?