Ām tak mikahkūö öm ngach tö yip Vamënyen Yāvē? Ōt lohten yip aṅ chīṙö meh, hol meh la-evṙen, hol meh inrē el iskul. Hēk lohten ṙung nö kakkö ṙô ngam Paipöl nö in meh. Achīö takô öi rih, kūöyòh öi inrē hangālkô re vë-eny ngam ṙinātö ellōn re?

Öt harīkngöre in tö töng tarik. Kö i mihëṅṙö re in. Ōt in ih sin tölēn tö tinlööken re, ōt töt ṙinātu ellōn nö im Tēv. Urēhĕkūö ih pöri rultenre öi Vamënyen Yāvē, ṙòkhöre öi kēnyö ṙētak re chumkūöṙen ngëchkö minë inköphöti aṅ mat ngam Paipöl. (Inlahen 17:11) Hō-en minë haköp re īhö, ngach möl öi kö kahang lōn re öi i vinë-ekūö ngam Tēv Yāvē.

Yöölen in i inkööpö mat ngam Paipöl. Ṙòkhöre in kö īnu tö minë kanihngenre öt kumlĕ-en re inrē. I inlahen ih pöri holtö panītnyöre kēkö kaha minë haköp re aṅmat ngam Paipöl möl öi akahaiṙen töre ĕhten ṙanamölōn. (Salmai 128:1, 2) Angū-ö ön töhĕng nö löktö inlaha ih vë-eny nang hol re tö nup tölöök haköp re aṅmat ngam Paipöl.

Haköp nup hanëtö ngam Tēv in. Hayöökaṙen in tö minë haköp re hanëtö ngam Tēv öi akahakūö tö minë tö hòṅ tinrikngen hī öi hòṅ milēḵṙen tö hol re, holre töm lanöökö töm miṙēlōn inrē. Anū-ö nun ma-asīöp lanöökö elkuilōn më tarik ing panam, ngach ngöönö tī tö manūlö ngam mikūönö. Sā hī akahalōn töm “Tēv nö töt atöltuṙen,” fēken re īhö öi sā töng hĕng öi mikūönö öi lökten im hinëngö ngam ṙinātö ellōn re töt īnu tö miköhṙen im tinrikngen hēk inyööngö inrē. Pòrô in töng tarīka, sön öi tönga-al tinrikngen.—Inlahen 4:13; 10:34, 35.

• Asuh öp tö ṙongta inlaha vë Vamënyen Yāvē tö yip tahëng tarik?

• Asuh nup tölöök töhakööpö taneungen yip Vamënyen Yāvē aṅmat ngam Paipöl?

Pōyen tarik tö ngö lōn tö ngam tinlöökö vē Vamënyen Yāvē nö tö tufömngöre nö tinlöökö. Lān rö-ö pön 2,700 samyeūheu rô-angen misī ngam ineūka më tarik “Vamënyen” ngam tökô-en Tēv. (Isayā 43:10-12) Hanöng saha ngam samyeūheu 1931 nö öl nö sölta Mahaköp Paipöl sin ngam invëkö ih. Kūöyòh pöri ngach öi kaheūkö töngamuh öi Vamënyen Yāvē?

In e Inkahkö ngam Tēv ih. Satköny tumköti kinūichö an ngam minënyö ngam Tēv Yāvē nö imat minë töha-ehangen kinūchö līpöre. Haṙītu chūök pöri ngam minënyö ò tö më mahavīöltit kinūchö ngam Paipöl tö sā në, Tēv hēk Mā Tēv inrē. Sön pöri ngam tökô-en Tēv Yāvē nö hameuknyö ngam minë-eny re nö ikūö Môsös nö ngö ṙô: “Angū-ö an minë-eny chu nö örheūheu.” (Maneutnyi 3:15) Ngatī inlaha anga-aṅ nö hameuktö inrīkngöre re tö nup tötkô-en tēv. Kirööngö ṙanamölōn in kaheuktu im töhet minënyöm Tēv.

Vënyö ngam tinīnngö ih. Yĕi ngëchkö töökö meh hötṙeh tarik tö tīniyö nö löktökūö ik tölöök tarik Āpĕl nö vënyö ngam ṙinātö ellōn re nö in Yāvē. Irôta minë tö köönyu samyeuheu hatöök töre hē Nō-a, Aprahām, Sërah, Môsös, Tāvit inrē nö tö kaheukhötvö nö hol më “taṙul yip ameū-a.” (Heprāi 11:4–12:1) Sā inlahen öp töhĕng tak öre tarik el chūök kamhòka nö ṙënngö ṙô öp töt fāluṙen tarik nö vë-eny kanô-en ò, ngatī īhö öt hòṅ heūlrit im vinë-eny ngam kanô-en ngam Tēv.

Tamömköröön Yēsū in. Kaheūkö an töm Paipöl nö “tökô-en, ameū-aṅ tökô-òṙô.” (Inmeukhömat 3:14) Eūkö re ök inrē Yēsū nö ‘mikahtölōn cha tö minë-eny ngam Tēv’ ane inrē ‘vamënyö ngam kanô-en’ inlaha ngam Tēv. (Yôhan 17:26; 18:37) Lökten yip tö hòṅ kô-en tamömrit Kristu nö hòṅ vënyö minë-eny Yāvē hòṅ ò nö akahka. Angū-ö ön lökten vē Vamënyen Yāvē nö holtö panītnyi re nö ngatī inlahen.

• Kūöyòh aich më Mahaköp Paipöl invëkö nö kaheūkö ngach töngamuh nö Vamënyen Yāvē?

• Irô-òten ang Yāvē nö ameūkuvö nö ikūö ngih panam?

• Achīö öp tökiröng tökô-en Vamënyen ngam Tēv Yāvē?

Urĕhngöre vinënyi ön tö ngam Paipöl tö Kristu nöng chuh hë, ngach ilöö yôkhöt min yip tötkô-en mahaköphöti nö el ṙôngö më mu-urĕh Kristīön nö hachōchngö ngam tökô-en inköphöti aṅmat ngam Paipöl. (Inlahen 20:29, 30) Ngach kô-en angū-ö nö sā ineūkö e. Tö cha nö katĕh minë inköphöti ṙô Yēsū tö tövaich inköphöti, ngach hamūllö mahaköptöre tö tö sā nup lōn cha. (2 Timòtī 4:3, 4) Sitih mikahlōn pöri ayī-ö töngamuh töre aṅhav in töm tökô-en inköphöti aṅmat ngam Paipöl?

Yih ngach ngam ṙētak Yāvē nö hameuknyö ngam kanô-en. Urĕhngöre ṙô anga-aṅ tö ‘ngam tökô-en mikah min nö ṙūöhlöre ṙôken hanöng saha öp ṙētak manāngen.’ (Tanīěl 12:4) Ik samyeūheu tö 1870 yik töng haroh tumtak chamöh ngam kanô-en tö kôtökūö tö minë inköphöti aṅ el minë keurcha nö öt sā minë ṙô ngam töhet Līpöre. Lökten cha nö rultenre nö chöh minë tökô-en inkaha aṅmat ngam Paipöl minë tö nehangrit inköphöti, ngach kē-ĕkūö cha ngam Tēv Yāvē tö tö-aṙū-uti mikah elnang cha tö ṙô ngam töhet līpöre.

Töyachö ellōn tarik töchumkūöṙen nö haköp Paipöl. Höng yik mu-urĕhĕkūö hī tökalē-ĕlōn Mahaköp Paipöl, yik mahachōḵtö inlahen ngam tölöng inkööpö, ngam tö tömkaṙen tö hī töngamuh. Hĕng hĕngö kahë cha-a tö minë ṙô ngach vë-ekūöre tö u. Ngach yēḵ cha nö öt akah elnang töp töhĕng ṙô aṅmat ngam Paipöl, ngach ngëchkö minë tahëng miröökö cha-a nö vamë-eny manah e. Ngach yĕn kôtökūö cha-a tö u nö hĕngren ṙô ngach kūichngen u. Angū-ö inlahen cha nö hameuktö inlaha ngam Paipöl nöng vë-eny manah ṙô re, lökten in e cha-a nö hēk nö kôtökūö töm kanô-en inlaha ngam minë-eny ngam Tēv töm pūlngö, töm chöönyö ò nö vīlö tarik nö ikūöng panam, ngam inlahen yip tökapah, tö ngam mineūkkö ngam invanlö inrē. Lökten im chinööhö cha-a nö ṙānyu nö ṙa-ang in minë tö ṙōlkangen tövaich inköphöti.—Yôhan 8:31, 32.

Ik samyeūheu pöri tö 1879 më Mahaköp Paipöl nö akahalōn töm ṙētak ngach nö yih vinënyöm kanô-en nö keuheūtngör chūök. Lökten cha nö löktö kūö in e angū-ö samyeūheu nö katān ngam līpöre Tö Vôchtavör Önaūnsing Chĕhōvās Kingtöm. Ngach in töngamuh sölngö tī töm kanô-en aṅmat Paipöl öi ikūö minë tö pōyen tö tö 240 panam nö i tö 750 ëlô. Öt tö ngatī ṙôken pinrātngö ön sin ngam kanô-en!

• Sitih falngen öng ngam kanô-en aṅmat ngam Paipöl unôchrit kinpaha kristu?

• Sitih löktö kanò-òṅ öi hēk kôtökūö töm kanô-en aṅ im ṙô ngam Tēv?

Ha-ëheten yin ngach vē Vamënyen Yāvē nö vī, katān hēk katölngö minë tö ṙōlkangen līpöre vamë-eny ṙô Paipöl. Sönngenre pöri cha-a nö kôtökūö tö ngam töt ṙanāngen vinī-i ngam tufömngöre Paipöl nö inyööken cha nö akahakūö töm ‘inkaha aṅ im kanô-en,’ ngam lōn ngam Tēv nö i taṙòkhöre tarik. (1 Timòtī 2:3, 4) Lökten in öi löktökūö ik samyeūheu tö 1950 öi kēnyö nuk tö haroh tūmö ngam Niū Vöörlt Translēsön. Holtö kanô-en hēk lanööngö vinënyi manah re angū-ö nö katānö i tö 130 ëlô.a

Tö hòṅ ōt ök Paipöl ök tö lööṙen tī tö hī akaha elnang. Sā sanīöpö inrīkngöre minë ëlô hēk ṙôken vinī-i vinënyö manah ṙô ngam Paipöl nö nyatngö minë tökô-en ṙô ngam Paipöl lökten öi kihngen akaha elnang tö ṙô ngam Paipöl. Hĕnghöre kôti inrē ngam hötṙeh kinūchö ngam töng hòṅ öhten nö sā ngam tö nehngenre lökngörit kinūchö, töp lökten nö ṙūöhlöre ngam mikah elnang tö ṙô ngam Paipöl i ṙô Heprāi, Armēk, Krīk inrē.

Tö hòṅ ōt nuk kinūchö nup tö sāta nö i ngam ṙô ngam Tēv. Ötkô öre yik vamë-eny manah kinūchö nö harīkngötīre nö kūich pön hòṅ asīnkö ngam tö nehangrit kinūchö. Sönngenre ngam töhet minë-eny ngam Tēv Yāvē nö öt kētu nö i mat ngam Töhet Līpöre.

Tö hòṅ ōt ök Paipöl kamëtö inrōilö ngam Kamūch. (2 Samuĕl 23:2) Sā inmeuktö e nö im inchōḵ elmat lataṙeū tö ngam Niū Vöörlt Translēsön, nö havantu ngam minënyö Yāvē im chūök e nö kūichtu sin nö 7,000 tumkö ti heuh nö imat ngam höteh Paipöl. (Salmai 83:18) Ṙòng ngam tö samyeūheuvö chumkūöṙen cha nö chöh, lökten in kuchik ṙô vë-ekūö ngam Paipöl pön lööngö ṙô nö vënyö mufē ngam Tēv. Lökten yēḵ meh pòrò aṅhav in hēk öt aṅhavin töm Niū Vöörlt Translēsön nö i ëlô meh hareuslö alaha meh in öm kēnyö ṙētak re vë-ekūö ngam ṙô ngam Tēv kaheuk sakamö.—Yôsuā 1:8; Salmai 1:2, 3.

• Kūöyòh öi rih sin hòṅ lōnu töm tö tufömngöre vinënyi manah ngam Paipöl?

• Hòṅ asuh öp öre la-en öp tarik yēḵ ò nö hòṅ mikahtökūö re tö nup lōn ngam Tēv?