Pōyen ngach tarik ṙamāngen re nö yihtökūö nö el chūök vinë-ekūö Tēv pò cha nö öt taneūnguṙen tö tölöng inchōkūö re hēk hanöhlö re inrē. Kūöyòh öm pöri me-eṅ hòṅ yihtökūö el minë chūök minë manūlö vē Vamënyen Yāvē? Asūp min taneunglen meh?

Ṙanamlōn pò meh el ṙôngö yip töhangenlōn hēk tö chumkūöṙen tarik. Ik raneh senchurī, ngatī manūlö yik Kristīön nö el minë maṅ, kēken minë manūlö cha-a nö ha-öiny ngam Tēv, haköp mat ngam töhet Līpöre hēk haruhkö alaha höö inrē. (Heprāi 10:24, 25) Mūl cha-a nö im töpōyen hanāngenlōn, akahaiṙen cha-a tö re nö el ṙôngö më tökô-en holmaneuk re nö Kristīön. (2 Tösalònikē 1:3; 3 Yôhan 14) Tömkö röön cha in töngamuh ngach kôḵ öi akahaiṙen töm tökô-en ṙanamlōn.

Ngam yanöölen i kinëkö kaha minë töhakööpö aṅmat Paipöl. Kô-en misī hē kinūchö ngam Paipöl yik kikōnyö, kikānö hēk tö yik kun kūöṅnö inrē nö mūl nö hĕngkang chūök. Ngach yik tö huveū-en mahaköphöti nö hayööken cha nö haköp, hòṅ cha nö kēkö kaha minë haköp re nö kaheuk sakamö. (I.Chööngo 31:12; Nahimiā 8:8) Mihòiṅ taṙòkhöre yamihtökūö nö vë-eny nup haköpre hĕng höre tikökṙôre, halöngtuṙen öi vënyö ngam maheūkkö kristīön—Heprāi 10:23.

Inkôlò kūöm ṙinatö ellōn meh im tēv nö hangönlöngö. Vë-eny nang yik aṅ ök töhĕng maṅ ök töhet Pôl i nuk sakamö ò misī nö ngö ṙô: “Tön paṙūtalōn chin hòṅ meuk kūö yīö, . . . hòṅ chu hol yīö, haṙāmölōn in yīö; ṙòkhöre ayī-ö kö i mikah höö; köp ayī-ö nyöre tö chu.” (Rōma 1:11, 12) Höng el mīting in örheūheu meukkūö më hol maneukre më tö ngönlöre tī töm ṙinātö ellōn hī hamôten hī inrē köp öi kēkö kaha minë haköpre öi kristīön.

Kūö yòh öm öt kalahtenre yihtökūö el minë manūlö hòṅ meh kôta mat öm meuk? Ha-önytu yīhi man min. Ṙòkhöre nun minë mīting nöng öt ṙāyu—öthō öm havëkakūö tö kaleksön.

• Asuh nup manūlö tö asīnkaṙen tö në mīting ih töngamuh?

• Sitih inlahen öi kò-òren kē yanöölenre lökten in në mīting?

Kò-òren nö öt lēn ngam talöökö, ötlēnö kūö ngam panam, sön öi örheūheu yihtökūö el minë mīting Kristīön. Pòrô inrē larāḵ öi ṙa-ang kui la-en re, asuh öp lāinyngen vē Vamënyen Yāvē nö ngatī kanūöten nö yihtökūö nö in minë manūlö?

Yanöölen minë alaha hī ön. Halēnö in tö Pôl hē ò nö vë-ekūö yik Kristīön yamihtökuö nö el minë maṅ nö ngö ṙô “kö haruhkö alaha höö yin.” (Heprāi 10:24) Tö ngö manah an ngam hinôtö hī “chumkūöṙen tö höö,” öi hòṅ mikahtökūö re tö höö. Haruhkö alaha hī yik mahaköp öi miṙūötṙen tö höö. Yēḵ hī min mikahtökūö re tö minë mikūönö më holre Kristīön, ngach meuk inlahen cha min ayī-ö nö la-al nup kanihngen re lökten in e min ayī-ö öi yöölen la-al nup kanihngen re.

Hangönlöm innôlö hī söl mana-a. Rö-ö nun minë mīting nöng chūök hī meuk kūö yip milālö hol, pô u nö chūök hī meuk kūö yip tökô-en holre. Lökten in kēnyö ṙētak re in minë tahëng ṙētak öi i nup tövai inṙamlōn. Asuh nup yanöölen hī in u anū-ö innôlö? Hakööpu in tö hī hōtu milēḵṙen tö höö, angū-ö min tö ngöönö tī töm hanāngenlōn hī tö höö. Ngach yĕn yih min nup kanihngen më tökô-en hol hī ngach ilööṙen öi hayööken cha pô hī öi hol re. (Inchōḵ-oṙô 17:17) Yēḵ hī hanòl yip taṙòkhöre el minë maṅ, hameuktöre ayī-ö öi “kö haṙūötken höö” pô hī tūmö alaha re.—1 Kòrin 12:25, 26.

Haruhkö alaha yīö in öi katöllö holre tö yip lamök lōn ngam Tēv. El ṙôngö yip Vamënyen Yāvē man min kôtökūö tö töngatī inlaha hol. Un halöngtuṙen nö kò-òlkui nup töng sitih insānö nö asökngen meh öm hanôlö ih.

• Kūöyòh öng nö yanöölen hī yēḵ hī hanôltöre in yip holre el minë mīting?

• Hòṅ ihē öm min me-eṅ yihtökūö el minë mīting ih?

Tinköökö, vinë-ekūötēv, vinë-ekūöm töhet līpöre ane inrē vinë-eny manah minë töhakööpö nun tö vāklö, inlahen kinëken minë mīting tö yik raneh kristīön. (1 Kòrin 14:26) Anū-ö töngamuh maheuk meh el minë mīting ih.

Lamökngörit im Paipöl nup inlēnö hēk yanöölen. I mana-angrit ngam afta ṙòkhöre më aṅ minë maṅ nö mūl nö hang öp tö 30-minit Minkahten aṅmat Paipöl nö ṙamônyö inlaha hī hēk inlaha në ṙētak hī töngamuh. Hōtu öi kö ngëchkö mat Paipöl re yĕn vë-evkūö angū-ö. I kinheūten ngam minkahten, öp töhĕng kanta Inkööpö “Vôchtavör,” ngam chūök më yamihtökūö nö mihôiṅ nö ṙòkhöre nö kētö sanap ṙô minë intöönö lamökngörit im Tö Vôchtavör. Harunö hī minë tö hakööpö öi la-al nup kanihngen re. Keuheūtngör chūök ikūöng panam el minë maṅ tö pōyen tö 1,10,000 ṙòken nö hĕngren minë töhakööpö tö hī.

Hayöökaṙen in ṙūöhtukūö huneu-en re haköphöti. Meuk kūö höö in inrē el hôi ngam töhĕng afta tö lā harap öi kēken minë tölūöi kangen prōkrām ngam tö ngö Tinrikngen ih Öi Kristīön töm Inhāṅnga, aṅmat minë tö kaheuk chingëṅt Tinrikngen ih töm Inhāṅnga pustikā nun minë töhakööpö. Ngam raneh alaha ngih mīting, Kanòlô Aṅ im Ṙô ngam Tēv, an lökten ngam maṅ nö veut ti mikahkūö tö ṙôken nup haköpre aṅmat Paipöl. Ngam tahëng, Ṙūöhlö Heuneū-enre im Inhāṅnga inlahen minë töhameuknyu inlahen ṙô hī vë-ekūö höö tö ṙô Paipöl. Ṙūöhlöre huneū-en im ṙinò-òv hēk vine-ekūö līpöre pöi vënyu nang töp yöngṙen re el ngam mīting tö nup tö öltöre elmat òn inlahen hī. (1 Timôtī 4:13) Ngam manā-aṅ alaha ngam mīting, Sā Tinrīken Yip Kristīön, haköptu öi kēkö kaha minë haköpre kanô-en aṅmat Paipöl öi kaheuk ṙētak. Sīöpö mikah elnang tö minë ṙô ngam Paipöl pöi halöng nyu ṙô vënyö sanap ṙô hēk hang ṙô yip kamëtö sanapṙô nö vë-ekūö re.

Yēḵ meh yihtökūö el nup mīting ih, sön man min ṙamölōn öm meuk kanôlòṙen minë inköphöti im Paipöl minë ahang meh.—Isayā 54:13.

• Asuh nup maheuk meh ahang meh el minë mīting vē Vamënyen Yāvē?

• Asuh nup lōn meh mīting ih el ngam töhĕng afta chūök meh hòṅ yihtökūö?

Meuk minë nyat öm imat ngih kun līpöre sitih lanënö chinhënen aich vē Vamënyen Yāvē yĕn chuh el minë mīting re? Kūöyòh öi chumkūöṙen chumhënöre hēk hanyöötöre inrē?

Hameuktö minlēḵṙen re töm Tēv re. Kô-en an ngam Tēv nö öt ngëchkö nup lama-uk mineūkö hī. (1 Samuĕl 16:7) Sön pöri, yēḵ hī mūl vë-ekūö ò, öi hòṅ hameuktö minlēḵṙen re tö ò hēk tö yip hol hī inrē vamë-ekūö kūö ò. Sā ṙēngen meh öre yĕm sökhak ikūö öp kamhôka el chūök kamhôka, öthō öm höng lök inlaha chinhënö re öm ikūö ò kūö ngam kamtö ò. Ngatī ṙēngen inrē ngam mineūkö hī yēḵ hī el mīting öi hameuktö tökiröng minlēḵṙen re töm “ma-akah në taṙòkhöre panam” ngam Tēv Yāvē, hēk töm chūök hī vë-ekūö ò inrē.—Ranehlö 18:25.

Hameuktö lanënö tinrikngen re. Hōtu yin vē Kristīön tö ngam Paipöl nö ‘inup töt yineuṅhen chinhëṅnö nö holtö hanëtö elkuilōn’ sa inlahen yip tö ‘milēḵṙen töm Tēv.’ (1 Timôtī 2:9, 10, NV) Tö ngö manah ön ngam chinhënlöre töm ‘töt yineuṅhen’ tö hī hòṅ laköre tö nup chinhënö tö mihôiṅ nö vītö ötlanöökö elkuilōn öp mahatīönken hī. Ngatī inrē öi hòṅ ‘holtö hanëtö elkuilōn’ ngam tö yöölen tī tö hī min lööngö atöllö tö chinhënö re nö öt höng mumṙēngen hī. Mihôiṅ in atöllö nup tö sā lōn re yĕn höng un kētö sumrōngkūö ngam Tēv. Pò hī rö-ö höng lökten inup ṙô re öi hapōilö ngam Tēv, tön lökten im mineūkö hī pöri öi “hanyööt ngam inköphöti aṅ im mahayööken” hĕnghöre “ha-öiny ngam Tēv” inrē. (Taitös 2:10; 1 Pītör 2:12) Lökten yip tahëng nö lökngöre töm vinë-ekūö Yāvē nö lökten in minë inlaha chinhënö hī yĕi chuh el minë mīting.

Yĕm pòrò öt chehenu tö nup tövai chehen sön öm mihôiṅ yihtökūö öm mīting el öp Patī-Pulngö. Kò-òren nup chehen nö töt pōi ṙāi, yĕn höng het, hēk lööngö inlaha nö tö vāyö mineūkö.

• Kūöyòh öng nö töt ṙanāngen ngam lanënö chihënö hī yĕi vë-ekūötēv?

• Asuh öp inlēnö inchōḵten hī im chinhënö hēk innyöötöre inrē?

Yēḵ meh ṙònghöchṙen haköp Paipöl in öp töhĕng tak Vamënyen Yāvē, söö man yĕm urĕh ngëchkö nup haköp re urĕhēkūö meh haköp. Ngatī ngam inlahen hī yöölen el minë mīting yĕi urĕh halēnö u ngach möl öi yihtökūö. Teūngen in tö tövai ṙòng u yĕn ngatī inlēnlö hēk yēḵ u inrē nö tömkaṙen.

Atöllö ṙētak re hēk chūök re haköp. Öp yòh öp tölöng ṙētak meh kūötenre haköp? Hē el peuheū hòng, urēhĕkūö meh la-evṙen ṙöng, hēk lā harap, unôchrit yip nyīö nö haṙòh? Pòrô yĕm öt hòṅ marô-òten haköp, sön öm hòṅ harēvngö öp ṙētak kanò-òṅ re öm haköp, ngach um halöngngenre asānkaṙen. Lökten chöh öp tö chēv chūökö, hēk yēḵ meh sō lōngen, kò-òren öm hanyangngökūö öp rētiō, T.V, töp sel fūn inrē. Hòṅ vë-ekūötēv man inrē urēhĕkūö meh haköp hòṅ nup tö piṙūtka tö meh im sakamö nö chuhngöre hòṅ meh kūöten haköp nup Ṙô ngam Tēv.—Filipī 4:6, 7.

Kaṙötngö nup tö hakööpö, hööngöre sapṙô nup intöönö. Urĕh kēḵ mikah elnang re tö nup ṙô tö hakööpö. Afītöre tö nup ineūkö ngam töhĕng töhakööpö, fēken minë kui tökūöṅnö nö lökngörit im alaha ngam tö hakööpö, ngach hēk kūötenre ngëchkö minë nyat tökētu, tö nup intöönö vamënyö nup tö katöllöng töhakööpö. Vë-ekūö minë miröökö, ngach chöh minë sanapṙô minë tö kētu intöönö. Chöh hēk haköp minë tö kētu miröökö aṅmat ngam töhet Līpöre, ngach ngëchken e yĕn sāta ṙô nö im tö hakööpö. (Inlahen 17:11) Yēḵ meh kòtökūö töp sanapṙô öp intöönö, ngach hakālngörit e hòṅ meh min lööṙen kanòtökūö tö e el mīting yĕn ṙònghöichṙen angū-ö nö hakööpö. Ngach mihôiṅ min öm hachônglö kël re öm kētö öp tö cheūḵta sanap ṙô.

Ṙūöhölre min nup kanôlò meh i inkaha nup ṙô ngam Paipöl yēḵ meh afītöre tö tumkangen nup tö hakööpö el nup mīting, in ngam töhĕng afta.—Mëtiv 13:51, 52.

• Asuh öp halēnlö meh ṙētak meh halēnken öp mīting?

• Sitih inlahen öm kò-òren halēn sanapṙô re el mīting?

Löktökūö misī ön nö lōn Yāvē tö në mikūönö nö kēnyö ṙētak re nö mūl, nö kalonglö ngam ṙinātö ellōn re nö vë-ekūötēv, hangönkö më aṅ patī re inrē. (I.Chööngö 6:6, 7) Lökten yin vē Vamënyen Yāvē töngamuh nö kēnyö öp töhĕng ṙētak i töhĕng afta nö mūl nö holṙô re nö vë-ekūötēv nö el ngam vinë-ekuötēv mikūönö. Vë-ekūöre cha-a nö chēvhakṙen nö ṙôtö minë ṙô ngam Tēv nö chöönyö tö nup kuilōn ngam mikūönö. Pòrô inrē yĕm höng hĕng tak, sön angū-ö nö tövai nö ṙētak meh hanôl ngam Tēv öm haköp nup tö katöllöng tö meh töhakööpö.

Ṙētak hī ön ṙūötöre in Yāvē. “Ṙūötöre im Tēv, ngaich ṙūötöre min anga-aṅ nö in yīö.” (Yāköp 4:8) Sö-ö mikahkūö in tö Yāvē yēḵ hī chumkūöṙen pōyen haköp tö nup tinrikngen ò hēk nup la-en ò nup tö kūichö nö im Paipöl. Ngih ön tö lööṙen inlaha ranultenre kinëken ngam vinë-ekūötēv mikūönö öi ṙòkhöre vë-ekūö ngam Paipöl mūlöṙô, asā ngam tölēnngen tökaheuk afta sëtūl mīting ngam Tinrikngen ih Öi Kristīön töm Inhāṅnga. Kökĕ-ĕvkūö më aṅ ngam mikūönö tö nup tö vë-evkūö, hòṅ cha nö kö vë-ekūöre tö nup tö möl haköp re nö hatöönö höö.

Ṙētak hī ön ṙūötöre in yip aṅ ngam mikūönö. Ngön yin më pamīhöre kikōnyö kikānö, inyööngö hēk tö më kūön, hēk röhta nö in höö yēḵ cha nö holṙô re nö vë-ekūö ngam Paipöl. Hòṅ vī-i e cha nö ṙētak ṙanamölōn hēk lanāmö ngam mikūönö. Mihôiṅ më inyööngö nö halēnlö nup tö hakööpö nö asā ṙēḵti më nyīö, kò-òren nö kēḵ inyööken re nö lökngörit in minë Tö Vôchtavör hēk Avēk! hēk el ngam vepsāit ih, jw.org. Mihôiṅ inrē nö ṙôtö nup kanihngen më nyīö yĕn el iskul hòṅ cha nö huveū nö la-al u. Öt kô hòng öi holmat re meuk ngam prōkrām JW Broadcasting (tv.jw.org) ngaich unôichrit e öi vë-ekūöre tö u? Mihôiṅ inrē öi harun ṙô re tikök nup tinköökö nup tö hòṅ tiköökö min ip yamih mīting hēk unôchrit u kò-òren öi holkūöre kapkö milëpö i kinheūten ngam vinë-ekūötēv mikūönö.

Në töngatī tölöök ṙētak manūlö im vinë-ekūötēv el töhĕng afta nun löktö ṙanamlōn ngam mikūönö nö haköp nup Ṙô ngam Tēv, ngam tö pōyen tī nö kētö inkôlô nup la-en cha.—Salmai 1:1-3.

• Kuöyòh öi hòṅ kēnyö ṙētak re im vinë-ekūötēv mikūönö?

• Sitih inlaha aich kò-òren minā inyööngö nö vī ngam ṙētak nö ṙētak ṙanamlōn ngam mikūönö?

Kūöyòh öng ngam ṙanamölōn nö meūkö nö i arëkūö vē tarik? Yamihtökūö yin nö in ngih töhĕng manūlö ih. Sā tinrikngen yik tarik ngam Tēv misī, yik tö vë-evkūö nö hōtu nö hamūlö re nö lūöi heuh i töhĕng samyeūheu, ngatī maheukkö in inrē īhö öi meuk kūö höö maṙôngö. (I.Chööngö 16:16) Kaheuk samyeūheu, Lūöi nun minë sakāmö ih tö kēkaṙen: nët minë tö hĕng-hĕng sumkam manūlö töhĕng chuvī ngaich ngam tölūöi-sumkam manūlö pumnāmö. Sitih inlahen öi yöölen in u anū-ö manūlö?

Hangönkö ngam kisānö ih öi Kristīön. Sā inlahen yik Israel misī nö ṙamölōn nö ha-öinyö Yāvē nö “el ṙôngö yip tömaṙôngö,” ngatī inrē īhö ṙamölōn holṙô re haöönyan in u anū-ö tökiröng sakāmö. (Salmai 26:12; 111:1) Kamëtö ṙētak hī nun minë manūlö öi hanôl yip vamë-eny aṅ minë tahëng maṅ hēk më hol hī inrē aṅ tahëng panam. I ṙat ngam sakamö, öi nyā hol kūö re im chūök manūlö, ma-asīöp ngam innôlö hī nun anū-ö ṙētak. (Inlahen 2:42) El minë töngatī manūlö öi akahaiṙen töm hanāngenlōn im ‘manūltö taṙòkhöre kisānö’ ing panam.—1 Pītör 2:17.

Holṙen hī nun sīöp in minë ṙô ngam Tēv. Yöölen yik inrē misī Israel pò cha nö “akaha elnang tö ṙô” ngam Līpöre tö vënyu manah nö ikūö cha. (Nahimiā 8:8, 12) Pōyen ṙô in inrē īhö hachōḵ nup inchōḵten re töm Paipöl nup taneūngen ih inup tökiröng manūlö ih. Ṙôkhöre nup prōkrām nö lökngörit im töhet Līpöre. Löktö in minë tövai minkahten, simposiöms, hēk lökten in minë töhameuknyu, öi haköptu tö inlaha re lök lōn ngam Tēv. Reuslö alaha in yĕi hang inlahen yip tö mihôiṅ nö la-al nup kanihngen re tö pôkūö re nö Kristīön. Sā mameuk nuk inlaha yik tarik imat ngam Paipöl öi löktö inup trāma tö hameuknyu hē el manūlö pumnāmö, nö sā mahaköpten hī anū-ö. Inup töng hē minë manūlö, kēkaṙen inrē ngam vinôkö tö yip tö hòṅ kētöre nö im linöökö lōn ngam Tēv.

• Kūöyòh ön në tökiröng manūlö nö rētak ṙanamlōn?

• Sitih löktö yanöölen öm kò-òren yēḵ meh yihtökūö in minë tökiröng manūlö?

Urēhĕkūö ò nö kapah, ngöṙô ang Yēsū: “Ahangka min ngih tölöök inhangkö ngam pūlngö, i në taṙòkhöre panam, inmeukhömat taṙòkhöre tarik; ngaich möl min öp manāngen nö yih.” (Mëtiv 24:14) Sitih inlaha taneungtakūö öng min ngih la-en tö vintakūö inhangka? Löktö i tinömkö nup inchōḵten hameuktö Yēsū ik hē ò nö ing panam.—Lūkös 8:1.

Kalahtenre in chuh in yip tarik yĕn i patī re. Harunten yik mahaköp ök misī Yēsū nö ahangkö ngam tölöök inhānga nö chuh i kūö minë tuhēt. (Mëtiv 10:11-13; Inlahen 5:42; 20:20) Kē-ĕvkūö cha-a tö nup kamtö chūök re nö ahānga. (Mëtiv 10:5, 6; 2 Kòrin 10:13) Ngatī töngamuh, ngam la-en ih inhānga nö vāyö kinëken, ngach ṙòkhöre minë maṅ nö kē-ĕvkūö tö chūök re nö ahānga. Angū-ö an lökten taneungten ih hateungngö ngam chööngö Yēsū öi ‘ahānga hēk keuheūt chahuhö re.’—Inlahen 10:42, NV.

I mana-anyre öi chuh i yip töng tarika inup töng chūök cha nö meūkö. Ṙa-akūö hī ök Yēsū tö inchōḵten nö ahānga inup töng chūök tarik nö pōyen, tö sā nup lamākūö mai hēk ikui mak chūök töpōyen. (Mākös 4:1; Yôhan 4:5-15) Ngatī in töngamuh öi vë-ekūö tarik tö ṙô Paipöl inup töng chūök kanò-òṅ ih—el talöökö, i chūök mi-inyiha, el park, hēk lökngö el fūn inrē. Vë-eny nang yip aṅ chīṙö re, i chūök re öi la-envö, aṅ el klās re, tö yip mak alaha re inrē yĕi teūngen tö ṙētak re. Ṙòkhöre në la-en ih öi holṙen re nö teūngen tī tö töpōyen tarik nö hang ngam tölöök inhānga “inyööken aṅ in ò.”—Salmai 96:2.

Ōt hòng mikahkūö meh öp tö kò-òren nö chūök ṙô meh vënyö ngam tölöök inhangkö ngam pūlngöm Tēv, ngam inhānga tö yöölen tī tö ò la-unôich? Ngach yĕn ōt, ilööṙen öm vë-eny nang cha!

• Asuh öng ngam “tölöök inhānga” tö hòṅ vënyu?

• Sitih inlahen aich vë Vamënyen Yāvē nö asīnken minë inchōḵten re tö Yēsū nö im inhānga?

Yamônyö tufömngöre chūök tö la-evṙen hēk ṙamòngnyö kūö talöökö hòṅ cha nö tömkarit, an ngam manah ngam ṙô “painīör.” Sā ṙēngen painīör ök misī Yēsū nö tīniyö nö ing panam hòṅ ò nö ṙòngnyö kūö ngam la-en kamëtö nômö taṙòkhöre tarik. (Mëtiv 20:28) Ngatī töngamuh, më tamömköröön ò nö pōyen kahënyi tö ṙētak re asā öp tölngö kanò-òṅ cha nö ‘vīten tarik nö mahaköp.’ (Mëtiv 28:19, 20) Ōt yip in cha tö teunghöt nö la-en tö la-en painīör.

Painīör ön ngòh kumheūttöre nö im la-en ma-ahaṅnga. Ṙòkhöre yin vē Vamënyen Yāvē nö ma-ahangköm tölöök inhāṅnga. Ōt in cha mahalēnlö tinrīken re pô cha nö hòṅ kētöre nö rekulör painīör, 70 kanta kahëti cha-a tö ṙētakre nö ahāṅnga kaheuk chingeṅt. Kūö lōn cha tö e, ṙōl tak mahakūönngö ṙētak re nö kamān. Ōt tö katöllöngö nö la-en tö la-en spesöl painīör nö tö tīniyö nö i nup chūök ngam tölöök inhāṅnga nö hòṅ ahangka, pōyen tö tö 130 kanta kahëti cha-a tö ṙētakre nö ahānga kaheuk chingëṅt. Öt saṙākilōn yin vē painīör tö minë hanakten re, ṙātö ellōnre pöri tö Yāvē min nö meukṙen cha tö nup hanakten cha. (Mëtiv 6:31-33; 1 Timòtī 6:6-8) Yip töt kô nö örheūheu nö painīör mihôiṅ cha-a nö hamòlṙen painīör hēṙu cha-a nö 30 hēk 50 kanta kahëti tö ṙētak re nö ahānga el töhĕng chingëṅt.

Haruhkö alaha më painīör ngam hanangenlōn cha töm Tēv tö tarik inrē. Sā miṙēḵlōn Yēsū in ayī-ö töngamuh öi meuk yanāichngen vē tarik tö minë ṙô ngam Tēv. (Mākös 6:34) Aṅhavin pöri ayī-ö töngamuh tö minë mikah tömihôiṅ nö yöölen tī tö cha, öi kē-ĕkūö cha töm maheūṅkkö cha inup yamih ṙētak. Ngam hanāngenlōn cha tö holre ön maharuhlö alaha më painīör nö holtö ellōn re nö kētö ṙētak hēk kumlēḵ re nö i vinë-eny minë kuilōn ngam Tēv. (Mëtiv 22:39; 1 Tösalònikē 2:8) Löklö in e ngam ṙinātö ellōn ngòh painīör nö ngön, akahaiṙen anga-aṅ inrē tö renö röhta nö im Tēv, ṙamlōn inrē.—Inlahen 20:35.

• Painīör ngö öi tö yòh?

• Asuh öp maharuhlö alaha më painīör nö keuheūttöre?

Hō-olōn öm hēk mihôiṅ öm ṙāngö yip mikūönö re hēk panam re öm chöönyö tö ngam tölöök inhānga öm chuh i tömarôvat panam? Köönyu ṙòken yip Vamëyen Yāvē tö ngach nö ngatī inlaha yip tö ngö ṙô, “Ihih chin chu-ö; tīnngen chu.” (Isayā 6:8) Ngatī inlahen cha-a nö asīnken ngam tökiröng Missönörī, ngam töla-evṙen misī nö ing panam, ang Yēsū Kristū.—Yôhan 7:29.

Angū-ö ön inlahen tinömköröön Yēsū. Tīntu ök Yēsū nö ṙa-ang el halīöngö töm Tēv nö ing panam nö el ṙôngö tököölö fālen. Pòrò anga-aṅ nö meuk ötlanöökö nö ing panam, hö-ö pöri ang Yēsū nö kalahtenre nö halööktit u. Hakūötökūö re pöri anga-aṅ töm tinīnngö re la-en nö i vinë-eny ngam “tölöök inhangkö ngam pūlngö ngam Tēv” ngam töng hĕng talöökö tarik nö luhnyu inup kanihngen re. (Lūkös 4:43) Ngach yip tökô-en Kristīön missönörī nö tömkö inlahen ò.

Maharööngen tinrīken re an. Tö hòṅ kôḵ yin vē missönörī nö kēḵ nup tinrīken tarik, kui panam, kūö panam, hēk tö nup nya-aṅkūö im panam nup tö mihôiṅ nö harīkngöre tö nup chūök cha sin nö iyöng. Chöngṙen min cha-a nö hòṅ haköp nup tufömngöre ëlô hòṅ cha huveū-eu ṙô nö vë-ekūö yip aṅ kūö panam. Lohten min cha-a nö öt teūngen tö chūök re nö havötköre sā re nö i panam re yĕn hòṅ chuh inup tö kösngen chūökö. In e cha-a nö harööngenre tökūö ngam tökô-en hanāngenlōn cha tö tarik më maheuṅkṙen cha.

Hòṅ löökö inrūnö yin. Pōyen yip Vamënyen Yāvē tö hòṅ im la-en missönörī nö taneui-chumngëṅtö nö haköp nö el ngam Vôchtāvör Paipöl Iskul ngam Kilīöt. Löktö in minë töhakööpö nö ngönlöre ngam ṙinātö ellōn cha nö in Yāvē, in ngam Ṙô ò, in ngam töhalēnlöng manūlö ò inrē. (Inchōḵ-oṙô 3:5, 6) Yöölen cha-a inrē nö asīöp minë tinrīken Kristīön minë tö yöölen tī min tö cha nö in ngam la-en missönörī hēk vamīten cha inrē nö tö huveū-en nö haköptö ṙô Paipöl. Ṙūölöre huneū-en cha-a nö ahānga “söl ip mana-ang kūö ngih panam.”—Inlahen 1:8.

• Asuh nup töt ṙanāngen in më missönörī?

• Asūp tösamaötlöng Iskul inlööten më missönörī?