Asuh Öp Chö-öny Ngam Tēv nö Vīlen Hī?

Hō-en ngih ṙô an ngam Paipöl, tö ngòh ‘tarik töfötnyu nö ing panam nö töng öt marò-òten, tööḵlö inrē tö kanihngen.’ (Yōp 14:1) Angū-ö öng rih lōn ngam Tēv nö in hī? Yěn öt angū-ö, ngaich kūö yòh anga-aṅ nö vīlen hī? Asuh öp chö-öny ò nö vīlen hī? Hēṙu öng min ngam kuilōn ò nö teung nö in hī? Ṙamlōn man min yĕm hang ṙô ngam Paipöl nö kētö sanapṙô në intöönö.

1. Hòṅ irò-òten lōn ang Yāvē tö ngòh tarik nö aṅ?

Vīlen hī ang Yāvē pön hòṅ meūkö hī öi kuchīken, ṙamlōn inrē öi ikūö ngih panam. Hē ò misī nö vīlen nak raneh tarik na Ātöm na Ēva ngaich ṙāḵten cha anga-aṅ nö el ök panô-òṅ Ēten, ök töhěng tövai nö peretāis. Ngaich ‘Hakôlò cha anga-aṅ nö ngö ṙô . . . Mikūönlö yēḵ, ṙūöhlöre ṙôken inrē, hatöölö ngam tumlat, hayöngö e.’ (Ranehlö 1:​28) Lōnu misī Yāvē tö na Ātöm na Ēva nö pōyen kūön, tānyö ṙôktāk ök panò-òṅ inrē ngaich vī ngih panam nö tövai nö peretāis, minā-aṅv inrē cha-a nö ikui në tö aṅ chehen ikūö ngih panam. Angū-ö chö-öny lōn ò nö vīlen hī öi töt hēngö kanihngen, örheūheu inrē öi aṅ.

Kô-en in töngamuh öi öl öi ngatī kumchikṙen öi sā ngam raneh kuilōn Yāvē misī nö in hī. Öt tö ngö manah pöri angū-ö tö ngam Tēv nö vaichngö töm chö-öny lōnre nö vīlen hī.a (Isayā 46:10, 11) Ngatī lōn an töngamuh nö in yip taṙòkhöre tarik töng hamang chööngö ò, nö kuchīken, örheūheu inrē nö aṅ nö ikūö ngih panam.​—Vë-evkūö Inmeukhömat 21:​3, 4.

2. Asuh öp chö-öny ngih nômö hī töngamuh?

Vīlöng in ayī-ö tarik tö Yāvē öi tö hòṅ hachō-ovkūö tö ò. Tö ngö manah angū-ö, tö hī hòṅ “haṙëhe nômö töm kanô-en.” (Vë-evkūö Mëtiv 5:​3-6.) Lōnu Yāvē tö hī öi hangönlö ngam innôlöre öi in ò. Ngaich ‘lök el nup talöökö ò, hāngenlōn tö ò, lök la-en ò, öi keuheūttö ellōnre, keuheūttö nômöre inrē.’ (I. Chööngö 10:12; Salmai 25:14) Yěi ngatī inlahen min ngaich teūngen min ayī-ö töm tökô-en ṙanamlōn pòrô öp tö yòh ṙôken nup kanihngen hī. Yēḵ hī min öi ha-öönyö Yāvē, öi sā nup kuilōn ò ngaich kôtökūö min ayī-ö töp chö-öny re öi aṅ öi ikūö ngih panam.

3. Tövai an ngam chö-öny Yāvē nö vīlen hī

Röngnyöm VITIŌ, ngaich kakkö ngih intöönö yamih.

VITIŌ: Kūö Yòh Ang Ngam Tēv Nö Vīlö Ngih Panam?​—Rahëichtamat (1:41)

• Kūö yòh ang ngam Tēv nö ngatī chumkūöṙen hēk vanāyö tī nö vīlö ngih panam nö chūök hī öi iyöng?

Vë-evkūö Mumkahten 3:11, ngaich kakkö ngih intöönö yamih:

• In ngam vahë-ekūö meh miröökö asuh öp kuilōn Yāvē öp töchaphötvö tö ò nö ellōn ngòh tarik?

4. Öt haṙī-ingre ngam chö-öny lōn Yāvē

Vë-evkūö Salmai 37:11, 29 hēk Isayā 55:11, ngaich kakkö ngih intöönö yamih:

• Kūö yòh öi mihôiṅ ngö ṙô tö ngam chö-öny lōn Yāvē nö vīlen hī nö öt haṙī-ingre?

5. Teūngen töm chö-önyre öi aṅ yěi löklōn Yāvē

VITIŌ: Akahakūö Chin Ngaich Töm Chö-önyre Öich Aṅ (5:03)

• Asūp yanöölen Teromī hē ò nö akahakūö tö ngam chö-öny re nö vīlöng?

Vë-evkūö Mumkahten 12:13, ngaich kakkö ngih intöönö yamih:

• Pōyen nup tī Yāvē nö in hī. Ngaich hòṅ sitih inlahen ayī-ö?

MINË HAKÖP HĪ NGAICH

Lōnu Yāvē tö hī örheūheu öi aṅ ikūö ngih panam öi öt hēngö kanihngen. Yēḵ hī min öi keuheūttö ellōnre öi ha-öönyan, teūngen min ayī-ö tö ngam tökô-en ṙanamlōn. Teūngen min inrē töp chö-önyre öi aṅ öi ikūö ngih panam.

Sitih ṙô öm më-eṅ?

• Asuh ök chö-öny Yāvē nö vīlen nak raneh tarik na Ātöm na Ēva?

• Kūö yòh öi mihôiṅ ngö ṙô tö ngam chö-öny lōn Yāvē nö öt haṙī-ingre?

• Asuh öp tökô-en chö-öny meh öm vīlöng öm ikūö ngih panam?

NGËICHKÖ NË INRĒ

Ngëichkö në tö ōt tö meūkö minkahngö nö vamënyö inlahen ök panò-òṅ Ēten misī nö ōt.

“Ngam Panò-òṅ Ēten, Töng Vīka Hēk Tökô-en Ṙöng?” (Chūökamahati-E, ātiköl)

Kūö yòh öi mihôiṅ ṙatö-ellōnre tö ngih panam min nö öt piyāyi? Töi mikahtökūöre.

“Kô-en Öng Min Ngih Panam Nö Piyāyi?” (El vepsāit töhakööpö)

Hang ṙô ngam Paipöl nö vë-eny nang hī töm chö-öny ngam Tēv nö vīlen hī.

“Kūö Yòh Ang Ngam Tēv Nö Vīlen Hī?” (El vepsāit töhakööpö)

Hěng tak ngam tarik töt hēngö hanakten tö nup töng chehen, sön nöng öt ṙamlōn pön hěngtit öp chehen tö hö-öv nö in ò. Ngëichköm vitiō hòṅ meh meuk ngam tarik nö kôtökūö tök töhěng chehen tö hö-öv nö in ò.

Möl Chin Ngaich Kôtökūö Töp Chö-önyre Öich Aṅ (3:55)