LESÖN 27
Sitih Inlahen Öng Ngam Kinpaha Yēsū Nö Hayööken Hī?
Kūö tī nak raneh tarik na Ātöm na Ēva an ngam tökööl, tö në kanihngen töm kinpaha inrē nö yih nö ing panam, kūö cha nö öt hang chööngö Yāvē.a Ngaich öi pökeh öt maheūkku? Öt ngatī, pön ṙòngnyö kūö talöökö hī ang Yāvē, nö tīntö ngam kūönre Yēsū nö ing panam. Hòṅ ò nö ṙānyen hī öi ṙā-ang im tökööl töm kinpaha inrē. Kēngö nômöre anga-aṅ tö pòkūö taṙòkhöre tarik. Angū-ö an ṙāi ṙinānyi tö ṙô hī. Kētö ngam töhet alahare ang Yēsū nö ṙāi ṙinānyö tö maṙôngö. (Vë-evkūö Mëtiv 20:28.) Tö-örheūheu ang Yēsū nö aṅ kūö ò nö töhet. Kūö ngam hanangenlōnre pöri anga-aṅ tö hī nö kēngö nômöre, hòṅ hī teūngen töm nômö tö örheūheu-aṅ. Ngam tö löhlö tö tī na Ātöm na Ēva. Kēngö nômöre ang Yēsū nö inmeuktö ò tö ngam yöng ò inrē Yāvē nö hangenlōn tö hī. Sīöpö minlēḵṙen in min töm tökitaknyu mahām ò, yěi haköp ngih lesön.
1. Sitih inlahen öi töngamuh yöölen lökten in ngam kinpaha Yēsū?
Töthet in öi tarik, ṙōlheuh inrē öi miṙivngölōn Yāvē öi inup inlahen re. Mihôiṅ öi rih hēk havailö ngam innôlöre in Yāvē? Mihôiṅ in. (1 Yôhan 2:1) Pön ngatī ṙô ngam Paipöl. “Pò Kristū nö hĕngheuh misī nö kihngen kūö tötlöök, ngam tölöök, pòn hòṅ kēten hī Anga-aṅ im Tēv.”—1 Pītör 3:18.
2. Sitih inlahen öi min yöölen löktö im kinpaha Yēsū in nup yamih ṙētak?
Tīntu Yēsū tö Yāvē nö ing panam nö kētö ngam nômöre ngam töt īnu tö tökööl. ‘Hòṅ yip ṙamatö-ellōnre nö in ò [Yēsū] nö öt kapah, teūngen pöri cha-a tö ngam nômö tö-örheūheu-aṅ.’ (Yôhan 3:16) Löktö in ngam kinpaha Yēsū tī min ang Yāvē nö kēngen në taṙòkhöre ötlanöökö nö ikūö ngih panam. Në maheuk hī töngamuh ṙòng la-en na Ātöm, pön öt hang chööngö. Möl min öi teūngen tö ngam nômö tö-örheūheu-aṅ öi el öp peretāis, yěi ṙātö-ellōnre im kinpaha Yēsū.—Isayā 65:21-23.
MIKAHTÖKŪÖRE HĒK
Ta-a töi ṙūöhtö mikahkūöre tö ngam tökiröng lāinyngen Yēsū, nö kūö yòh nö kēngö nômöre tö pòkūö hī, ngaich asuh min öp yanöölen hī öi lökten in e.
3. Ṙānyen hī ang Yēsū öi ṙā-ang im tökööl töm kinpaha
Röngnyöm VITIŌ, ngaich kakkö ngih intöönö yamih.
Asuh öp tö löhlö tö tī Ātöm kūö ò nö öt hang chööngö Yāvē?
Vë-evkūö Rōma 5:12, ngaich kakkö ngih intöönö yamih:
Asuh öp ṙòng ngam tökööl kahëken na Ātöm?
Vë-evkūö Yôhan 3:16, ngaich kakkö ngih intöönö yamih:
Kūö yòh ang Yāvē nö tīntö ngam kūönre nö ing panam?
Töhet ök misī Ātöm nö tarik, kūö ò pöri nö öt hang chööngö, lökten ngaich ngam tökööl tö ngam kinpaha nö söl i taṙòkhöre tarik
Töhet ök Yēsū misī nö tarik, hamang chööngö ngam Tēv inrē. Lökten yip taṙòkhöre tarik nö mihôiṅ nö hetlöre hēk mihôiṅ nö örheūheu nö aṅ yěn hang chööngö Yāvē
4. Mihôiṅ taṙòkhöre tarik nö yöölen nö lökten im kinpaha Yēsū
Röngnyöm VITIŌ, ngaich kakkö ngih intöönö yamih.
Sitih inlahen yip taṙòkhöre tarik nö mihôiṅ nö yöölen nö löktö im kinpaha ngam töhěngtak tarik?
Vë-evkūö 1 Timôtī 2:5, 6, ngaich kakkö ngih intöönö yamih:
Töhet ök Ātöm misī nö tarik kūö ò pöri nö öt hang chööngö Yāvē. Lökten ngaich ngam tökööl tö ngam kinpaha nö söl i taṙòkhöre tarik. Töhet ök inrē Yēsū nö tarik nö hamang chööngö, kēngö ngam nômöre anga-aṅ, ngaich keuheūtnyöre tī tö ngam ṙāi ṙinānyö hī. Asuh öp min yanöölen hī öi lökten in e?
5. Inmeuktö ngam hanangenlōn Yāvē an ngam ṙāi ṙinānyi
Ṙatö-ellōnre yip töhangenlōn tö Yāvē, tö ngam ṙāi ṙinānyi nö tökiröng nö inlōnti. Kò-òren öi hang ṙô Pôl ök tanīnöṙô, vë-evkūö Kalatī 2:20, ngaich kakkö ngih intöönö yamih:
Sitih löktö mikahkūö öi tö Pôl, tö ò nö ṙatö-ellōnre tö ngam ṙāi ṙinānyi nö kētu töpòkūö ò?
Kūö re Ātöm nö köölö fālen ngaich kapah, ngaich kūön ò ayī-ö lökten öi kapah. Hökngen ngam kūönre pöri Yāvē nö kapah töpôkūö hī, hòṅ hī öi teūngen tö ngam nômö tö-örheūheu-aṅ.
Asehkūöre man yěm vë-ekūö në miröökö, öm ngëichkö miṙivlōn Yāvē nö meukngövah ngam kūönre nö chöökö kinpaha. Vë-evkūö Yôhan 19:1-7, 16-18, ngaich kakkö ngih intöönö yamih:
Sitih mufē öm yěm meuk inlahen tī Yāvē nö kēngö nômö ngam kūönre Yēsū töpòkūö meh?
ṘÔ YIP TAHËNG NÖ HATÖN: “Sitih inlahen yip min taṙòkhöre tarik nö yöölen tö kūö kinpaha ngam töhěng tak tarik?”
Sitih ṙô öm më-eṅ?
MINË HAKÖP HĪ NGAICH
Löktö im kinpaha Yēsū tī ang Yāvē nö aṙēlö nup tökööl hī. Ṙòngnyu kūö inrē ngam talöökö hī öi iyöng kūö ngih panam min öi höng örheūheu-aṅ.
Sitih ṙô öm më-eṅ?
Kūö yòh ang Yēsū nö kēngö nômöre?
Kūö yòh öi mihôiṅ ngö ṙô tö ngam ṙāi ṙinānyi kahëtö Yēsū nö tö kò-òre, ngaich asuh öp taneūngen hī öi lökten in e?
Asuh öp yanöölen meh öm löktö im kinpaha Yēsū?
NGËICHKÖ NË INRĒ
Kūö yòh öng nö kaheūkö ngam nômö Yēsū ngam töt īnu tö tökööl nö ṙāi ṙinānyi tö ṙô hī.
“Sitih Inlahen Öng Ngam Kinpaha Yēsū Nö ‘Ṙāi Tömaṙôngö’?” (El vepsāit töhakööpö)
Mikahtökūöre tö inlahen hī yěi hòṅ ṙānyu ṙa-ang im tökööl töm kinpaha.
“Sitih Inlahen Ang Yēsū Nö Hayööken Hī?” (El vepsāit töhakööpö)
Mihôiṅ ang min Yāvē nö aṙē-ěl nup tökööl pòrô anū-ö nö kiröng?
“Sanapṙô Minë Intöönö Aṅmat Ngam Töhet Līpöre” (Chūökamahati-E, ātiköl)
Chöknyi nômö ngam tarik yěn fēkö nuk tö ngaichngen miṙivlōnre, haṙīngö tinrīkenre pöri anga-aṅ pön akahakūö tö inlahen Kristū nö kēngö nômöre töpòkūö ò.
“Hö-ö Chin Ngaich Köptī Töm Inngëṙöre” (El vepsāit töhakööpö)
a Öt höng nup fālen hēk nup tötlöök la-en tarik, tökööl tö ṙô hī. Tön nup taṙòkhöre töng ötlöng chanöh ellōn hī, nup më-el alaha hī pöi kūön na Ātöm na Ēva.