Ṙamlōn Ang Ngam Tēv Nö In Në Tökiröng Sakāmö Nö Ṙòkhöre?

Lōnu Yāvē tö hī kuchīken hēk haṙamlōnre inrē. Lökten ṙung tarik nö meukkūöre tö mikūönöre hēk holre nö haṙamlōnre el nup tökiröng sakāmö. Ṙamlōn ang Yāvē nö in në tökiröng sakāmö nö ṙòkhöre? Sitih inlahen öi min ayī-ö hameuktöre hangenlōn tö Yāvē, yěn kēkaṙen minë tökiröng sakāmö?

1. Kūö yòh ön në tökiröng sakāmö nö öt ṙamlōn tī tö Yāvē?

Lohten min öm pingang yěm hang inlahen Yāvē nö öt ṙamlōn nö in në tökiröng sakāmö nö ṙòkhöre. Kūö yòh? Kūö u nö lökngörit in minë tövaich tinlööken, öt lökngörit in ngam Paipöl. Mihôiṅ anū-ö nöng kahëken yip tö milūönö yěn afēkö ma-alaha yip kupah. Kēken minë tökiröng sakāmö yip muh kūö ngam töt lökngurit ṙinatö-ellōn cha, ngö ṙô yip inrē, ṙòngnyöre kūö nösīp in yěi kēken u. (Isayā 65:11) Ngö ṙô pöri Yāvē tö yip tarikre: ‘Haköhngenre yin tö cha . . . un lūölkö töchōich.’​—2 Kòrin 6:​17.a

2. Sitih mufē ang Yāvē tö minë tökiröng sakāmö tö yahlö tī nö kētö minlēken ngòh tarik?

Kēkaṙen nun minë tökiröng sakāmö nö infēkö yip mā panam tö yip kumyung inrē. Pön hē e cha-a nö kētu minlēken. Hēṙu inrē cha-a nö ha-öiny ṙinā-any panamre ngaich harōi nup minkahngö panam re inrē. (1 Yôhan 5:​21) Ōt nup tökiröng sakāmö infēkö yip mā mahayöng hēk nup söngkötön vahīlö tarik. Fēlen hī pöri Yāvē nö ngö ṙô: “Tötkôlò ap tarik mahayönglenre nö i tarik.” (Vë-evkūö Yarimiā 17:5.) Asehkūöre man tö Yāvē nö öt ṙamlōn yēḵ hī yahlö tī öi milēken yip tarik hēk nup söngkötön töng vīlöng tö tarik. Mötlö yip tarik hēk nup söngkötön nup töt mahateung nup kuilōn ò, öt ṙamlōn anga-aṅ nö in u.

3. Asuh nup tötlöng la-en hēk tinrīken tarik tö kēkaṙen el minë tökiröng sakāmö töt ööilōn Yāvē?

Vënyu tö ngam Paipöl nö vaich yěi ‘yahlö ṙôkvat òk ka-eūt, hapōhöre hēk kasal ṙôkvatre inrē öi ka-eūt.’ (1 Pītör 4:3) Ōt minë tökiröng sakāmö töng chö-önyten tö u nö kēkaṙen. Hē e më tarik nö öt ṙanāpen nö kēken minë tötlöng la-en. Yēḵ hī ayī-ö hòṅ köp öi hol Yāvē, ngaich hòṅ ṙūöhöngre ayī-ö tö u anū-ö tötlöng la-en.

MIKAHTÖKŪÖRE HĒK

4. Ṙūöhöngre tö nup sakāmö inṙamlōn hēk tökiröng sakāmö nup töt ööilōn Yāvē

Vë-evkūö Efisös 5:​10, ngaich kakkö minë intöönö yamih:

• Hòṅ asuh nup urěh tö hòṅ ngëichka tö hī yěi hòṅ chuh in minë tökiröng sakāmö?

• Asuh nup tökiröng sakāmö tö kēkaṙen ip chūök meh öm iyöng?

• Ṙamlōn ang Yāvē tö lōn meh nö in u anū-ö tökiröng sakāmö?

Tö sā në, akahakūö öm tö mufē Yāvē tö ngam infēkö finötnyi? Öt hěngkang chūök vinënyi tö ngam Paipöl, öp töhěng tak tarik Yāvē nö afēkö finötnyöre. Nët tak pöri nak tarik vahënyö ngam Paipöl ma-afēkö finötnyöre, hö-ö pöri cha-a nö lamöklōn Yāvē. Vë-evkūö Ranehlö 40:20-​22 hēk Mëtiv 14:​6-​10. Ngaich kakkö minë intöönö yamih:

• Asuh nuk tötlöng ṙòng minë tö nët infēkö finötnyi minë vahënyö ngam Paipöl?

• Minë tö vënyu infēkö finötnyi nö imat ngam Paipöl, sitih mufē ang Yāvē tölōn meh yěn meūkö u?

Pī-a pöri lohten öm ngö lōn, ‘Kô-en ang uvöh Yāvē nö lökngöre, yēḵ chu afēka finötnyi hēk kēken minë tökiröng sakāmö hēk yěich hö-ö?’ Vë-evkūö Maneutnyi 32:​1-8. Ngaich, röngnyöm VITIŌ ngaich kakkö minë intöönö yamih.

VITIŌ: Haneūheu hēk sakāmö inṙamlōn Töt Ööilōn Yāvē (5:​07)

• Kūö yòh öi hòṅ örheūheu ngëichkö nup ööilōn Yāvē?

• Sitih inlahen öi min kò-òren?

Asuh nup tökiröng sakāmö hēk haneūheu töt ṙamölōn tī tö Yāvē

• Lökngörit im Paipöl öng ngih tökiröng sakāmö nö kēkaṙen? Mikahtökūöre man tö lökngörit kinëken minë tökiröng sakāmö.

• Yahlö inlahen tī aich nö kētö minlēken më tarik, söngkötön, tö minë minkahngö panam yěn kēken minë tökiröng sakāmö? Höng Yāvē an tö hòṅ kētu minlēḵken tö hī, pön anga-aṅ tö mihôiṅ nö kēngen në kanihngen hī nö ikūö ngih panam.

• Minë tinrīken më tarik yěn kēken minë la-en kui panam, sāḵta ön minë inlahen cha nö sā ṙô ngam Paipöl? Hòṅ köptī ayī-ö tö hanëtö minë tinrīken re.

5. Milēḵ Tö Yip Tahëng Hòṅ Cha Nö Milēḵ Tö Ngam Ṙinatö-ellōn Meh

VITIŌ: Vë-eny Ngam Ṙinatö-ellōnre Holtö Mikahre (2:​01)

Vë-evkūö Mëtiv 7:​12, ngaich kakkö minë intöönö yamih:

• Sā ṙô ngih miröökö, löng öng min yěi ngö ṙô tö yip aṅ patī re, ötkô yin kēken ngih tökiröng sakāmö?

• Sitih inlahen öm min hòṅ yip aṅ patī meh nö ṙatö-ellōnre nö in meh pòrô öm öt holṙen cha nö kēken minë tökiröng sakāmö sön nöng köp ngam hanangenlōn hēk chumkūöṙen meh tö cha?

6. Lōnu Yāvē tö hī Öi ṙamlōn

Lōnu Yāvē tö hī öi hanôltö ṙanamlōn re öi in yip aṅ patī re hēk holre inrē. Vë-evkūö Mumkahten 8:​15, ngaich kakkö ngih intöönö yamih:

• Sā ṙô ngih miröökö, asuh öp lōn Yāvē nö in hī?

Lōnu Yāvē tö yip tarik re nö teūngen tö ṙanamlōn yěn hamūlöre nö hěngkang chūök, meūkö angū-ö tö hī yěn kēkaṙen minë könvensön. Röngnyöm VITIŌ.

VITIŌ: Ha-öinytu Yanīhi Im Intönēsönöl Könvensön (5:​40)

Vë-evkūö Kalatī 6:​10, ngaich kakkö minë intöönö yamih:

• Hòṅ hökken nup tökiröng sakāmö öi, yěi hòṅ hayööken yip tahëng?

• Ihē öm më-eṅ ṙamlōn öm kē-ěkūö holre, yěm höng töölô hòng hēk yěm höng kahanglōnre ṙöng?

• Öt hökkö ṙētakre yin vē Vamënyen Yāvē yěn kē-ěkūö më kūönre tö nup inlōnti, pön hōten cha nö ṙamlōn. Hēṙu yin nöng öt vë-eny nang më kūön re, yēḵ cha nö kētö minë inlōnti nö in cha. Lökten nö ṙamlōn më kūön cha yěn teūngen tö u. Yēḵ meh öm tö kūönu, sitih inlahen öm min, hòṅ më kūön meh nö ṙamlōn?

MINË HAKÖP HĪ NGAICH

Lōnu Yāvē tö hī öi ṙamlōn öi holtö yip mikūönöre, tö yip holre inrē. Lōnu pöri inrē anga-aṅ tö hī öi ui kēken nup tökiröng sakāmö nup tö haṙivlōn tī tö ò.

Sitih ṙô öm më-eṅ?

• Hòṅ asuh nup intöönö ṙô hī öi hatöönöre, hòṅ hī öi akahakūö tö Yāvē yěn ṙamlōn tö nup tökiröng sakāmö, yěn hö-ö?

• Hòṅ sitih inlahen öi, hòṅ yip aṅ patī hī hēk hol hī nö akaha elmat töp lāinyngen hī öt kēken minë tökiröng sakāmö?

• Asuh öp löktö mikahlōn hī tö Yāvē nö lōnu tö hī öi ṙamlōn hēk haṙamlōn re inrē?

NGËICHKÖ NË INRĒ

Kūö yòh aich vē tökô-en Kristīön nö öt kēken minë tökiröng sakāmö? Töi mikahtökūöre.

“Kūö Yòh Aich Vē Vamënyen Yāvē Nö Öt Kēken Minë Tökiröng Sakāmö?” (El vepsāit töhakööpö)

Kūö yòh öi ṙatö-ellōnre tö ngam infēkö finötnyi nö öt ṙamlōn tī tö ngam Tēv? Töi ngëichkö në töfën lāinyngen.

“Kūö Yòh Aich Vē Vamënyen Yāvē Nö Öt Afēkö Finötnyöre?” (El vepsāit töhakööpö)

Yip nyīö tö hangenlōn tö Yāvē, haṙamlōn ò ò inrē cha-a hē el ṙētak minë tökiröng sakāmö. Töi ngëichkö inlahen cha.

Töpōiṙāi Man Öm Imat Yāvē (11:35)

Lāku ṙôken yip Kristīön kamtöllö lōnre nö öt kēken ngam Krismis. Sitih inlahen ṙô aich tö ngam katöllöre?

“Kôtökūö Cha-a Tö e Nö Ĕhten” (Chūökamahti, Tisömpör 1, 2012)