LESÖN 38
Milēḵṙen Tö Ngam Nômö, Inlōnti An Nö Aṅ Im Tēv
Inlōnti ön ngih nômö nö tövai. Pòrô nup kanihngen nö yih sön mihôiṅ öi höng ṙamlōn. Sitih inlahen öi hameuktö minlēḵṙenre tö ngam nômö? Kūö yòh öi hòṅ milēḵṙen tö e? Töi mikahtökūöre.
1. Kūö yòh öi hòṅ milēḵṙen tö ngam nômö?
Hòṅ milēḵṙen in tö ngih nômö kūö e nö inlōnti nö aṅ im Yöng hī Yāvē ngam tö hangenlōn tö hī. Anga-aṅ “löklö nômö hī.” (Salmai 36:9) “Anga-aṅ kamëtö nômö taṙòkhöre, unhôṅmö, taṙòkhöre chehen inrē.” (Inlahen 17:25, 28) Kē-ěkūö hī anga-aṅ tö në taṙòkhöre chehen aṅkūö ngih panam hòṅ hī aṅ, rö-ö pöri nöng angū-ö kuilōn ò tö hī öi aṅ, pön lōnu anga-aṅ tö hī öi ṙamlōn öi lökten in u.—Vë-evkūö Inlahen 14:17.
2. Sitih inlahen öm min hameuktö minlēḵṙenre tö ngam nômö töpōiṙāi?
Hē meh ṙòngmö ellōn yöng re, hēten tö e Yāvē nö akahakūö tö meh, haṙūötken meh inrē. Vë-eny ngam ṙô Yāvē ang Yarimiā nö ngötī nö kūich: “Akahakūö chin tö meh urēhĕkūö tī chu vī-i meh el chūök kanūönö.” (Yarimiā 1:5) Pōiṙāi ngam nômö meh nö imat Yāvē. (Vë-evkūö Mëtiv 10:29-31.) Asehkūöre man yěn tölngen re öp töhěng tak tarik nö fëlngö öp hol re, hēk fëlngöre inrē ngaich haṙivlōn ang Yāvē.a (Maneutnyi 20:13) Haṙivlōn inrē anga-aṅ yēḵ hī tölngenre vītö pinlāngenre hēk vītö pinlāngen holre inrē. Yēḵ hī laklö ngam nômö re, nômö yip tahëng inrē ngaich tömilēḵṙen ayī-ö tö ngam nômö.
MIKAHTÖKŪÖRE HĒK
Ta-a hēk töi mikahtökūöre tö minë tumkangen inlahen hī mihôiṅ öi milēḵṙen tö ngam nômö.
3. Haṙūötken Ngam alahare
Hòṅ haṙamlōn Yāvē in ayī-ö Kristīön i tö keuheūttöre. Lökten öi keuheūttöre, öi kētöre in Yāvē. Sā kamëtö ngam nômöre ayī-ö nö eltī Yāvē nö tökētu, lökten öi haṙūötken ngam alahare. Vë-evkūö Rōma 12:1, 2, ngaich kakkö minë intöönö yamih:
Hòṅ sitih inlahen öm yěm hòṅ haṙūötken ngam alaha re?
Asuh nup tumkangen inlahen meh haṙūötken ngam alaha re?
4. Lāköre tö nup pinlāngen
Vë-eny nang hī an ngam Paipöl tö hī hòṅ ṙūöhöngre tö nup la-en, tö mihôiṅ nö kapaha tī tö hī, hēk tö yip hol hī inrē. Sitih inlahen öi min lāköre tö nup tö ngatī pinlāngen, ta-a töi mikahtökūöre. Röngnyöm VITIŌ.
Vë-evkūö Inchōḵ-oṙô 22:3, ngaich kakkö në kamtö chūök meh öm laklöre hēk laklö nômö yip tahëng inrē hol re . . .
i patī meh.
ip chūök meh la-evṙen.
hēk yěm nyamtô.
hēk yěm hachin lôrī öm el talöökö.
5. Pōiṙāi ngam nômö ngam nyīö tö öl nö fötnyu
Vë-eny nang hī ang Tavit nö im kahūich re tinköökö tö Yāvē nö keuheūtlöre mikahkūö tö ngam nyīö, tö ṙòngmö pirūka nö ellōn ngam yöng re. Vë-evkūö Salmai 139:13-17, ngaich kakkö ngih intöönö yamih:
Ihēten ang ngam nyīö nö aṅ nö imat Yāvē, hē ò hòng nö el chūök kanūönö ngam yöngre, im finötnyö ò ṙöng?
Kē-ěkūö yik Israel ang Yāvē tö minë chööngö nö linaklö ngam puyōsö tö ngam kūön ò inrē tö pirūka, hòṅ cha nö öt pala-aiṙen. Vë-evkūö Maneutnyi 21:22, 23, ngaich kakkö minë intöönö yamih:
Yěn hěng tak öp tarik tö amahaiṙen nö kapaha tī tö ngam nyīö tö öl nö kayônyu, ngaich sitih mufē ang Yāvē?
Yěn tölngenre pöri öp tarik nö ngatī inlahen ngaich sitih mufē ang Yāvē?b
Sitih mufē öm më-eṅ yěm fēken ngam mufē Yāvē?
Akahakūö öp yöngnyīö tö ngam nômö nö tö pōiṙāi, pī-a min anga-aṅ nö timlöng alaha nö tiṙōlngö öp kūönre pön öt talööku töp tahëng. Vë-evkūö Isayā 41:10, ngaich kakkö ngih intöönö yamih:
Yēḵ öp yöngnyīö nö timlöng alaha nö tiṙōlngö öp kūönre. Ngaich hòṅ in chīö anga-aṅ nö havëkö inyööken re? Ngaich kūö yòh?
ṘÔ YIP TAHËNG: “Mihôiṅ man kòl tiṙōlngö öp kūön re yěm sō öm kūönu.”
Asuh öp löktö mikahkūö meh tö Yāvē nö pōiṙāi mat tö nômö ngam puyōsö, hēk tö ngam kūön ò ngam tö öl nö kayônyu?
MINË HAKÖP HĪ NGAICH
Vënyu ngam nômö tö ngam Paipöl nö töpōiṙāi nö inlōnti nö aṅ in Yāvē, lökten öi hòṅ hangenlōn tö e, hòṅ milēḵṙen hēk hòṅ laklen e inrē tö nup pinlāngen. Hòṅ ngatī mufē inrē ayī-ö tö nômö yip tahëng hol re.
Sitih ṙô öm më-eṅ?
Kūö yòh öng ngam nômö nö töpōiṙāi nö imat Yāvē?
Sitih mufē ang Yāvē yěn ōt yip tamölngenre nö fëlngö holre hēk fëlngöre inrē?
Akahakūö öm tö ngam nômö nö töpōiṙāi nö inlōnti nö aṅ in Yāvē? Ngaich kūö yòh?
NGËICHKÖ NË INRĒ
Sitih inlahen öi min kētö nöönyö Yāvē ngam kamëtö ngam nômö hī?
Aṙēlöng öp min yöngnyīö tö ngam Tēv öp tumṙōlngö kūön? Yěm hòṅ ṙūöhtö mikahkūöre ngaich vë-ekūö ngih ātiköl.
“Sitih Ṙô Öng Ngam Töhet Līpöre Tö Inlahen Ngam Tinṙōlngö?” (El vepsāit töhakööpö)
Yěi sā mufē Yāvē min tö ngam nômö ngaich ṙūöhöngre min ayī-ö tö nup minnyāmö nup tö mihôiṅ nö pala-aiṙen tī tö ngam nômö.
“Löng Öng Min Yěi Nyamkö Nup Minnyāmö Tö Pala-aiṙen Tī Tö Ngam Nômö?” (Hīnöre!-E, Òktopör 8, 2000)
Sitih inlahen öng ngam Paipöl nö hayööken öp tarik tö hòṅ fëlngöre? Töi mikahtökūöre.
a Röhta Yāvē nö in yip töpaṙööyi ellōn. (Salmai 34:18) Akaha elmat anga-aṅ tö ngòh tarik yěn haṙivlōn ngaich pi-a nö ngö mufē, ‘hòṅ fëlngöre chin chū-ö pöich sō öich aṅ.’ Mihôiṅ Yāvē nö hayööken meh yěm ngatī mufē. Yěm hòṅ ṙūöhtö mikahkūöre ngaich vë-ekūö ngih ātiköl “Hö-ö Chin Chu-ö Ngaich Hòṅ Aṅ—Mihôiṅ Öng Ngam Paipöl nö Hayööken Chu Yěn Yih Ngam Kuilōn Chu Öich Hòṅ Fëlngöre?” In ngam seksön Ngëichkö Në Inrē an nö kētu nö in ngih lesön.
b Yip tumṙōlngö kūön re sin tö lā-urěh, lohten min cha-a nö kirööngö miṙivlōn nö fēken ngam inlahen re, mihôiṅ pöri min Yāvē nö aṙēlen cha. Yěm hòṅ mikahtökūöre ngaich vë-ekūö ngih ātiköl “Sitih Ṙô Öng Ngam Töhet Līpöre Tö Inlahen Ngam Tinṙōlngö” in ngam seksön Ngëichkö Në Inrē an nö kētu nö in ngih lesön.