LESÖN 40
Sitih Inlahen Öi Min Köp Öi Het Imat Ngam Tēv?
Asehkūöre töp yöngnyīö yěn halēn öp kūönre nö chuh el iskul. Vōkan anga-aṅ ngaich hayutlen ò tö nup töhet inyut. Yěn het min ngam nyīö ngaich kôlò el alaha min anga-aṅ, meūkö inrē minā yöng ò nö tö chumkūöṙen töm kūönre. Ngatī ngam Yöng hī Yāvē nö tö chumkūöṙen tö hī. Lökten an nö lōnu tö hī öi hëtö mufē, hëtö ṙô, hëtö tinrīken inrē. Yöölen in yēḵ hī het, ha-öönyö min inrē ngam yöng hī Yāvē.
1. Hòṅ sitih inlahen öi yěi hòṅ het im alaha?
Ngö ṙô Yāvē nö in hī: “Töhet yin min yī-ö.” (1 Pītör 1:16) Yēḵ hī hòṅ het, ngaich hòṅ het ngam alaha hī tö ngam elkuilōn hī inrē. Lökten öi vōk ngaich ha-et ngam alaha re, ha-et chehen re, ha-et patī re, ha-et lôrī re inrē. Kētöre in ṙung öi ha-et nup Patī Pūlngö. Yēḵ hī min ngatī hanëtö ngaich ha-öönyö min ngam yöng hī Yāvē.—2 Kòrin 6:3, 4.
2. Asuh nup la-en tö mihôiṅ nö mumngöre tī töm alaha hī?
Hōtu in tö ngam Paipöl öi “halööktö nup chanôichö ngam alaha, ma-alaha inrē, hateungtö ngam hanëtö i pinhë-eṅkūö töm Tēv.” (2 Kòrin 7:1) Lökten in pītnyöre öi ṙūöhöngre tö nup la-en tö mumngöre tī töm alaha hī hēk tö ngam elkuilōn hī inrē. Sitih inlahen öi min yěn yih nup tötlöng mufē nö ellōn hī? Hòṅ ilööṙen öi kēnyen u nö ṙā-ang ellōn hī, hòṅ nup mufē hī nö tö hō-ov nö ikūö Yāvē. (Salmai 104:34) Hòṅ het inrē minë ṙô hī yěi ṙô-òv.—Vë-evkūö Kòlòsi 3:8.
Pōyen nun minë la-en tö mumngöre tī tö ngam alaha hī, tö ngam elkuilōn hī inrē. Sā ngam pinôpö, kinṙup tisā-a, nyinā-aṅ yang, tö minë tahëng inrē tö hiyōihukūö. Yēḵ hī min öt nya-avkūö tö u. Ngaich kòlô el alaha min ayī-ö, hameuktöre inrē öi milēḵṙen tö ngam nômö. Yēḵ hī inrē ṙūöhöngre tö nup töng sitih la-en nup tö chōichngöre tī tö ngam elkuilōn hī. Sā ngam, masturbation hēk nginëichkö minë tötlöng tö meūkö [Pòrnokrāfī]. (Salmai 119:37; Efisös 5:5) Öt lööṙen in öi ṙāngen u, holṙen hī pöri min Yāvē, hòṅ hī öi ṙāngen u.—Vë-evkūö Isayā 41:13.
MIKAHTÖKŪÖRE HĒK
Sitih inlahen öng ngam minënyö Yāvē nö ha-öönyö yēḵ hī hëtö uk alaha? Sitih inlahen öi ṙūöhöngre tö minë tö chōichö tī töm alaha hēk tö ngam elkuilōn hī? Ta-a töi mikahtökūöre.
3. Harōilöng Yāvē yēḵ hī min öi hëtö tinrīken
Löktö in minë chööngö in, tö kētu tö Yāvē nö in yik Israel, öi akahakūö tö ngam mufē ò nö im hanëtö. Vë-evkūö Maneutnyi 19:10 hēk 30:17-19, ngaich kakkö minë intöönö yamih:
Sitih ṙô ön minë miröökö nö vë-eny mufē Yāvē tö inlahen ngam hanëtö?
Hòṅ sitih inlahen öm yěm hòṅ köptī tö ngam hanëtö re?
Kô-en in pōyen ṙētak yěi hòṅ ha-etkö ngam tinrīken re, sön öi ṙòkhöre mihôiṅ öi ha-etkö ngam tinrīken re. Pòrô öp töng yòh chūök hī iyöng, pòrô öi tökôlò hēk yāich. Röngnyöm VITIŌ, ngaich kakkö ngih intöönö yamih.
Asuh öp min lanökngöre yip tarik maheukkūö hī öi el fīlt yěn hëtö mineūkö ngam tinrīken hī?
4. Mihôiṅ tö nup töt löng la-en
I hinòlṙenre in tö Yāvē öi mihôiṅ ṙāngen nup tötlöng kahëken re
Yēḵ meh öm pamōp hēk nyamā nup tö hiyōihukūö, höng më-eṅ tö akahakūö tö kanihngenre öm ṙa-angkūöre. Sitih inlahen öm min ṙa-angkūöre ? Afītöre man tö inlahenre yěm öt ṙa-angkūöre. Vë-evkūö Mëtiv 22:37-39, ngaich kakkö minë intöönö yamih.
Sitih inlahen öng min ngam innôlö meh in Yāvē, yēḵ meh öt ṙa-angkūöre tö minë töhiyōihukūö?
Asuh öp min lanökngöre ngam mikūönö meh hēk yip aṅ chīṙö meh, yěm ötkô ṙa-angkūöre tö minë tö hiyōihukūö?
Vī routine re man yěm hòṅ mihôiṅ tö minë tötlöng kahëken re.a Röngnyöm VITIŌ.
Vë-evkūö Filipī 4:13, ngaich kakkö ngih intöönö yamih:
Tövai nö routine ngam vinë-ekūötēv, vinë-ekūö Paipöl hēk chinuhu el mīting. Sitih inlahen ön min nö hayööken meh öm halööktitre?
5. La-al nup tötlöng mufē tö nup tövaich la-en kahëken meh
Vë-evkūö Kòlòsi 3:5, ngaich kakkö minë intöönö yamih:
Sitih mikahlōn öi tö minë la-en mineūkö minë tötlöng [Pòrnokrāfī], sexting,b hēk tö ngam masturbation nö töthet nö imat Yāvē?
Lōnu Yāvē tö hī öi hëtö tinrīken, yahlö havëka ang tö lōn meh nö in hī? Kūö yòh öm ngatī ṙô?
Sitih inlahen öi yěi hòṅ kēnyö nup tötlöng mufē nö ellōnre, yěm hòṅ mikahtökūöre. Röngnyöm VITIŌ.
Vënyu nang in tö Yēsū, yēḵ hī hòṅ köptī tö ngam hanëtö elkuilōn re, ngaich hòṅ ilööṙen öi kēnyen nup tötlöng nö ṙa-ang ellōnre. Vë-evkūö Mëtiv 5:29, 30, ngaich kakkö ngih intöönö yamih:
Öt tölṙô hī Yēsū öi kò-ò tī öi peôknyö mat re, hōten hī pöri anga-aṅ öi veūten öi kē-ěngre tö nup tötlöng la-en hēk mufē, yěn yih anū-ö nö ellōn hī. Sitih inlahen öi min ilööṙen kēnyen u nö ṙa-ang ellōnre?c
Yēḵ meh öm kihngen öm kēnyen nup tötlöng mufē nö ṙa-ang elkuilōn meh, köplōn tö Yāvē nö meuk inlahen meh öm pītnyöre hòṅ ṙāngen u. Vë-evkūö Salmai 103:13, 14, ngaich kakkö ngih intöönö yamih:
Yēḵ meh öm kihngen öm kēnyen nup tötlöng mufē nö elkuilōn meh, sitih inlahen öng ngih miröökö nö holṙen meh öm öt ṙāngen re la-al u?
Öthō yip kamlahten re nö öt mihôiṅ!
Yěm öt teung min öm kalahten re, ṙāngen nup tötlöng, ngaich mihôiṅ min öm ngölōn, ‘asuh öp min yanöölen chu yēḵ chu kalahten re?’ Afītöre man tö inlahen öp famal, ngaich fukngö anga-aṅ. Tö ngö manah hòng angū-ö, tö ò ngaich nö öt mihôiṅ? Hòṅ hēk hòng min anga-aṅnö rěhlöröönre? Hö-ö. Ngatī ṙēngen më-eṅ yěm hěng nët heuh min öm fukngö, öt tö ngö manah pöri angū-ö tö meh öm ötkô choholre. Öt yanënguṙen man yěm kalahten re. Pò ngòh kamlahten re nö öthō nö öt mihôiṅ, lökten man um haṙivlōn, tön holṙen meh an min Yāvē öm la-al nup öt kumlē-en re ngaich öthō min öm öt mihôiṅ.
ṘÔ YIP TAHËNG: “Ngaich chin lang öich ma-anyre, sön öich höng öt kanò-òvö.”
Asuh öp min miröökö hameuktö meh öm mikahtö elnang öp tarik öp tötkô nö ṙāngen nup tötlöng kahëken re?
MINË HAKÖP HĪ NGAICH
Yēḵ hī min hëtö inlahen, hëtö elkuilōn, hëtö tinrīken inrē ngaich ṙamölōn min Yāvē tö tī hī.
Sitih ṙô öm më-eṅ?
Kūö yòh öi hòṅ hëtö el alaha, elkuilōn hēk tinrīken inrē?
Hòṅ sitih inlahen öm yěm hòṅ hëten?
Hòṅ sitih inlahen öm ha-et ngam elkuilōn re hēk ngam tinrīken meh inrē?
NGËICHKÖ NË INRĒ
Sitih inlahen öm kò-òren min höng hëten, pòrô nö öt urōho ṙôken nup lanënen meh öm ha-etköre? Në nun tö lööṙen inlahen hī.
In ngih ātiköl an nö vënyu ngam inlahen öp tarik tö mihôiṅ nö ṙa-angkūöre nö pōp.
“Sitih Inlahen Öich Min Ṙa-angkūöre Öich Pōp” (Hīnöre!-E, Mē 2010)
Töi mikahtökūöre tö inlahen minë tötlöng ṙòng mineūkö ngam pòrnokrāfī.
“Asuh öp Vanāichö Hī Yěi Meuk Pòrnokrāfī Hēk Nup Tötlöng Nyat?” (Chūökamahati-E, Òköst 1, 2013)
Mikahtökūöre tö inlahen ngam tarik nö sitih inlahen nö ṙāngen re nö meuk minë tötlöng pòrnokrāfī.
“Ṙōlheuh Öich Ötkô Mihôiṅ Pöri Öich Ngaich” (Chūökamahati-HI, Öngk. 4 2016)
a In ngih lesön el ngam seksön Nëichkö Në Inrē ngam ātiköl nö kētu “Sitih Inlahen Öich Min Ṙa-angkūöre Öich Pōp,” in e nö vënyu inlahen ngòh tarik nö mihôiṅ nö ṙāngen nup tö ngatī tötlöng kahëken re.
b Ngam sinöömkö minë tötlöng mesēch, nyat hēk vitiō nö lökngö el minë fūn hēk computer, angū-ö an sexting tö ṙô hī.
c Isuh öi min teūngen tö inyööken re öi ṙāngen ngam tötlöng la-en masturbation? Yěm hòṅ ṙūöhtö mikahkūöre ngaich vë-ekūö ngam ātiköl el online “Sitih Inlahen Öich Yěich Hòṅ Ṙāngenre Töm Masturbation?”