Sitih Ṙô Öng Ngam Paipöl Nö Vë-eny Inlahen Më Töpīhövö Hēk Tötpīhövö?

Pōyen tö ngö lōn, tö ngòh tarik yěn öt kēḵ ngam pinīhö ngaich öt ṙamlōn anga-aṅ, öt ṙòkhöre pöri më kamë hēk më töt kamë ngam pinīhö nö ṙamlōn, öt rēhěn nö ṙòkhöre nö haṙivlōn. Nëtre pöri anū-ö nö inlōnti nö aṅ in ngam Tēv.

1. Asuh nup yanöölen hī yěi öt pīhövö?

Ngö ṙô an ngam Paipöl: “Yöölen in yěi pīhövö mötlö yanöölen pöri yěi öt kēḵ ngam pinīhö.” (Vë-evkūö 1 Kòrin 7:​32, 33, 38.) Sitih inlahen ang ngòh tötpīhövö nö ěhten? Kūö ò nö öt piṙūtkö nup kuilōn ngam pīhöre. Lökten anga-aṅ nö ṙētakvö nö chuh in minë chūökö tö lōn tö tarik, nö im inhangkö ngam tölöök inhānga. Ṙētakvö inrē nö hangönlö ngam innôlöre nö in Yāvē.

2. Asuh nup yanöölen hī yěi tö lēnö inpīhö?

Pōyen yanöölen in inrē yěi töpīhövö. Ngö ṙô an ngam Paipöl, “ĕhten tö nët tak tö töhĕng tak”. (Mumkahten 4:9) Ṙô tö yip Kristīön an yip tö ngaich nö rechistrēsön ngam pinīhöre nö sā ṙô ngam chööngö aṅmat ngam Paipöl. Yěn öt hapīhö nap tarik nöng holtöṙahre, öt akahakūö min ayī-ö tö cha yěn köp nö söl mana-aṅ. Pön inmūlö minā tö nët tak tarik ngam pinīhö nö hēngö alaha, ṙamlōn min cha-a yěn tö hamūlö nö im inpīhö. Köp min ngam ṙanamlōn nö ihôi cha pòrô nö kūönu.

3. Sitih mat ang Yāvē tö ngam pinīhö?

Hē Yāvē misī nö hamūl nak raneh tarik nö im pinīhö, ngö ṙô anga-aṅ: “Lökten ön min ngòh tarik nö ṙāngö yöngre kikōnyö yöngre kikānö inrē ngaich haköpngöre min nö im pīhöre.” (Ranehlö 2:​24) Hōtö ngam kikōnyö hēk töm kikānö ang Yāvē nö haköpngöre nö im pīhöre, sā rò-òtö nômö cha nö aṅ. Höng ngam insěha lāinyngen cha mihôiṅ nö ṙāngen höö. Halöngtuṙen ngam töt fāluṙen tö Yāvē nö katöllölōnre yěn hòṅ ṙāngen ngam pīhöre hēk yěn hö-ö.a (Mëtiv 19:9) Öt kô pöri ngòh Kristīön tarik nö ṙōltak pīhö tö ṙô ngam chööngö Yāvē.​—1 Timôtī 3:2.

MIKAHTÖKŪÖRE HĒK

4. Um hayëngen ngam inlōnti kinë-ekūöre öm töt pīhövö

Inlōnti an nö imat Yēsū yěi öt pīhövö. (Mëtiv 19:11, 12) Vë-evkūö Mëtiv 4:​23, ngaich kakkö ngih intöönö yamih:

• Öt pīhövö ök misī Yēsū. Sitih inlahen pöri anga-aṅ nöng ṙamlōn nö löklōn ngam Yöngre hēk hayööken yik tahëng kūö ò nö öt pīhövö?

Mihôiṅ yin më töt pīhövö Kristīön nöng ṙamlōn nö asīnken Yēsū pòrô nö öt pīhövö. Röngnyöm VITIŌ, ngaich kakkö ngih intöönö yamih.

VITIŌ: Tökô-en Hol Maneuk Hī Më Töt Pīhövö (3:​11)

• Asuh nup kò-òren la-en yīö yěi tö öl öi pīhövö?

Akahakūö öm?

Öt vë-eny nang hī an ngam Paipöl töp ṙēḵti hī öi kēḵ ngam pinīhö. Ĕhten ngam tarik nöng hök, nö un afēkö ngam pinīhö “yĕn hū ap kuilōn ò.” Pön yěn hū min ap kuilōn ngam tarik ngaich öt löng min öp katöllö ò.​—1 Kòrin 7:​36.

5. Akahaṙa man yěm katöllö pīhöre

Tökiröng an ngam kintöllölōnre tö pīhöre nö inup töng sitih katöllö meh. Vë-evkūö Mëtiv 19:​4-6, 9, ngaich kakkö ngih intöönö yamih:

• Kūö yòh ang ngòh Kristīön nö ötkô nö veut lōn nö kēḵ ngam pinīhö?

Mihôiṅ ngam Paipöl nö hayööken meh öm ngëichkö pīhöre tö yip tö akahaṙa, yip tö hangenlōn inrē tö Yāvē.b Vë-evkūö 1 Kòrin 7:​39 hēk 2 Kòrin 6:​14. Ngaich kakkö minë intöönö yamih:

• Kūö yòh öi höng hòṅ pīhö tö yip lamöklōn Yāvē?

• Sitih mufē ang min Yāvē nö in meh yěm pīhö tö öp tarik töt hangenlōn tö ò?

6. Sā mat Yāvē tö ngam pinīhö

Ōt yik Israel misī ṙamāngö pīhöre, kūö nup töng kuilōnre. Vë-evkūö Malakī 2:​13, 14, 16, ngaich kakkö ngih intöönö yamih:

• Kūö yòh ang Yāvē nö kunyahalōn nö in yip ṙamāngö pīhöre nöng öt pòkūö ngam insěha?

Röngnyöm VITIŌ, ngaich kakkö ngih intöönö yamih.

VITIŌ: Ngam Pinīhö Tö Söl Mana-aṅ (4:​30)

• Yēḵ öp pīhö meh kikōnyö hēk kikānö nö öt lamöklōn Yāvē, hòṅ sitih inlahen öm öre hòṅ ngam ṙanamlōn nā nö köp?

7. Kēkö kaha minë inchöngten ngam pinīhö tö Yāvē

VITIŌ: Hang Minë Inlēnö Ṙô Yāvē i Alaha Ngam Pinīhö (4:​14)

Vë-evkūö Heprāi 13:4, ngaich kakkö minë intöönö yamih:

• Sitih lōn öm më-eṅ, mihôiṅ öi hang minë inlēnö kahëtö Yāvē i alaha ngam pinīhö? Kūö yòh öm ngatī mufē?

Pòrô öi hòṅ pīhövö hēk hòṅ ṙāngen höö, lōnu Yāvē nö in hī öi Kristīön tö hī hòṅ hang minë chööngö i alaha ngam pinīhö, pön angū-ö lōn më mā mahayöng ikūö në panam. Vë-evkūö Taitös 3:1, ngaich kakkö ngih intöönö yamih:

• Yēḵ meh öm töpīhövö, rechistrēsön öng nö ngaich ngam pinīhö tö nā nö el òfis më mahayöng?

MINË HAKÖP HĪ NGAICH

Nëtre nun nö inlōnti nö aṅ in Yāvē ngam inlahen hī öi pīhövö hēk öt pīhövö. Yēḵ ngam tinrīken ngam tö pīhövö hēk ngam töt pihīvö nö sā ngam kuilōn Yāvē, ngaich nëtre tak min cha-a nö ṙamlōn.

Sitih ṙô öm më-eṅ?

• Hòṅ sitih inlahen tī ang ngòh tarik tö öl nö pīhövö tö ngam tinrīken re?

• Kūö yòh öng ngam Paipöl nö hōten hī höng pīhö tö yip lamök lōn Yāvē?

• Asuh öp töng hěng lāinyngen hī kò-òren ṙāngen höö tö ṙô ngam Paipöl?

NGËICHKÖ NË INRĒ

Tö sitih manah öng ngam inlahen ngòh tarik nö hapīhö ‘nöng im mā?’

“Hatön Meh” (Chūökamahati, Chulāi 1, 2004)

Sitih inlahen öm min lööngö katöllö tö pīhöre? Ngëichkö në tö lūöi vitiō.

Halēn Inlahenre Yěm Hòṅ Pīhövö (11:53)

Hang ṙô ngam prötör nö vë-eny minë inkôlòre tö tī Yāvē, nö mötlö tö minë inlahen ò nö harööngenre. Kūö yòh anga-aṅ ngatī mufē, töi mikahtökūöre.

Ngatī Maheūkka Chū-ö Tö Ò Nö Haköp Ngam Kanô-en (1:​56)

Hòṅ asuh öp ngahëichkö ngòh tarik urēhěkūö ò nö ṙāngen ngam pīhöre?

“Milēḵṙen Tö ‘Vē Töhamūlö Tö Ngam Tēv’” (Chūökamahati-HI, Tisempör 2018)