Ngam La-en Painīör

Röhta pinyāingö ön ngih panam. Lökten nö tölöng ngam inlahen hī yēḵ hī öi kētö ṙētak re, hēk kētö kumlēḵ re inrē öi in minë la-en ngam Tēv. (1Kò 9:26; Efi 5:15, 16) Mihôiṅ öi hē ngam manūlö mikūönö öi vë-ekūöre, tö inlahen nup tö hòṅ kēkaṙen la-en hī im yamih samyeūheu. Imat ngih pustika mumting nö vënyu inlahen minë tö mihôiṅ nö la-en hī. Kô-òren öm fēken u ngaich havëkö kūö Yāvē tö hinòlṙen re.—Yāk 1:5.

Mihôiṅ hòng nö hěng tak el ngam mikūönö meh, kamëtöre nö im la-en painīör, ngaich hayööken ò më tahëng aṅ ngam mikūönö? Ngaich sitih inlahen yěm kihngen elmat töre öm keuheūtngö minë kanta tökētu? Mihôiṅ öm hatöntöre in yip painīör tö sā kanihngen meh. (Inch 15:22) Mihôiṅ öm havëten cha im manūlö mikūönö re, ngaich hatönkūö cha tö inlahen cha. Ngaich afēkö nup ṙētakre më-eṅ kô-òren öm vë-ekūö tarik ngaich kūichngen u. Hēk yēḵ meh inrē sin öm painīör ik urěh, ngaich mihôiṅ hēk öm afēkö inlahen re öm havanten re.

Mihôiṅ hòng nö hěng tak öp aṅ ngam mikūönö meh kamëtö re nö òksölörī painīör nö hěng chingëṅt hēk pōyen inrē tö e? Yēḵ meh töt kalē-en, ngaich mihôiṅ öm rahëich rahëichyen kahëti tö ṙētak re i tö hěng sakamö öm ahangköm tölöök inhānga. Ngaich sitih inlahen yěm ötkô chuh el fīlt, el hôi ngam afta tö kūö meh öm kammān hēk chamuh el iskul inrē? Mihôiṅ öm ngëichkö nup chingëṅt tö pōyen sanīchar hēk söntē inrē. Ngaich mikahngen e imat öp kelentör, hòṅ yīö öi kö katöllö öp hē lōn re öi òksölörī painīör.—Inch 21:5.

NGËICHKÖ NGAM VITIŌ TÖT PA-EKŪÖ NÖ PAINĪÖR, NGAICH KĒTÖ SANAPṘÔ NË INTÖÖNÖ:

• Sitih inlahen ang Yāvē nö chumkūöṙen tö sistör Ōmön? Asuh öp haköp hī in e?