Yī-ö Inyööngö, Haköptö Më Kūönre Nö Hāngenlōn Tö Yāvē

1-2. Sitih inlahen öi chumkūöṙen ngëichkö minë inlēnö aṅmat ngam Paipöl yěn sāta minë tövënyu imat u nö in minë inlahen hī?

YĔN ōt ṙung töhapīhö nö el ngam māṅ, ngaich kētö minkahten ṙung öp minṙöinylen. Löknyö imat ngam Paipöl ṙung nup inlēnö i alaha ngam pinīhö. Pī-a lohten nö töng ha-eh minë inlēnö töhāngö tö cha. Chumkūöṙen pöri cha-a nö hangihtöre tö minë inlēnö, pön löktökūö ingih ngaich cha-a nö hòṅ kēkö kaha minë inlēnö re.

² Ngatī inlahen minā Kristīön pamīhöre töfömtören nö kūönu. Ha-eheten cha-a lohten nö hang minë minkahten i alaha ngam inruklö nyīö. Yēḵ cha pöri ngaich nö hòṅ kūönu, asītö elnang re min cha-a nö hang minë inlēnö, pön akahakūö cha-a tö ngam inruklö nyī-ö nö rö-ö nö tö kūöṅnö nö la-en. In e mikahlōn ayī-ö, tö hī öi chumkūöṙen hēk ngëichkö ṙô minë miröökö aṅmat ngam Paipöl yěn sāta minë tövënyu imat u nö in minë inlahen hī. Angū-ö ngih lāinyngen vē Tarik Yāvē nö hòṅ örheūheu nö vë-ekūö Paipöl. Ngaich fēken minë haköp re inrē nö sā inlahen yik rācha aṅ Israel “i ṙô-òten ò nö aṅ.”—Chöö. 17:19.

3. Asuh öp min haköp hī öi in ngih ātiköl?

³ Yī-ö Inyööngö, hěng an ngam tötṙanāngen la-en kinë-ekūö yīö, pò yīö hòṅ haköptö më kūön re tö inlahen ngam Tēv Yāvē. Rö-ö pöri angū-ö nö tö ngö manah tö meh öm höng mikahtökūö cha tö inlahen ngam Tēv Yāvē, pön hòṅ asīöpö inrē ngam hanāngenlōn cha tö ò. Lökten më-eṅ hòṅ sitih inlahen? In ngih ātiköl min öi kakkö minë tö fën inlēnö aṅmat ngam Paipöl minë mahayööken yip inyööngö. (2 Tim. 3:16) Hēk mikahtökūöre min ayī-ö tö inlahen më inyööngö hamang minë inlēnö, ngaich asuh nup yanöölen cha.

INLĒNÖ MË INYÖÖNGÖ LAMÖKNYÖ MAT PAIPÖL

4. Asuh öp kanööpölōn më inyööngö inlēnö yēḵ cha nö haköp tö inlahen Yāvē nö in më kūön re? (Yāköp 1:5)

⁴ Raneh Inlēnö: Havëkö hinòlren re in Yāvē. Vë-ekūö Yāvē hòṅ ò nö kē-ěkūö meh tö mikah, hòṅ meh öm asīöp ngam hanāngenlōn më kūön re tö Yāvē. (Vë-evkūö Yāköp 1:5.) Höng Yāvē an tö mihôiṅ nö löngö tī nö kētö inlēnö. Pōyen nup lāinyngen hī öi ngatī ṙô. Ngam raneh, pò Yāvē nö inyööngö inrē anga-aṅ, ngaich öt hěngtak tö sā heuneū-en ò. (Sal. 36:9) Ngam innëtö, tö aṅhav in inrē anga-aṅ tö mikah lökten nup inlēnö kahëtö ò nö ṙòkhöre anū-ö nö yanöölen hī min örheūheu.—Isa. 48:17.

5. (a) Asuh nup tö halēnlöng el ngam söngkötön Yāvē nö inlēnten më inyööngö? (b) Asuh öp haköplö më inyööngö nö in nā prötör Amorim tö pīhöre i inlahen ngam inruklö më nyīö?

⁵ Pōyen minë līpöre lamökngörit im Paipöl, tö halēnlöng tö Yāvē nö inyööken më inyööngö nö haruklö më kūön re. (Mët. 24:45) Löktö in e më inyööngö nö mihôiṅ nö hayööken më kūön re nö asīöp ngam hanāngenlōn re tö Yāvē. Tö sā inlahen minë inlēnö imat minë ātiköl tö ngö kui, “Inyööken Minë Mikūönö,” minë tö tirepnyu misī nö imat ngam līpöre Hinöre! ngaich pöri anū-ö töngamuh nö el ngam vepsāit hī jw.org. Pōyen inrē nup vitiō el ngam vepsāit nö intöönö më inyööngö nö tö hameuktu, nö sitih inlahen më inyööngö nö hang minë inlēnö re aṅ in Yāvē, ngaich heuveū-en nö haruk më kūön re.b—Inch. 2:4-6.

6. Sitih ṙô öp ihih inyööngö tö inlahen minë inyööken hī tö tī Yāvē i inruklö më kūön hī?

⁶ Pōyen yanöölen yip inyööngö nö löktö in minë līpöre hēk vitiō tö halēnlöng tö ngam Tēv Yāvē. Sā inlahen nā Chōsef tö ngam pīhö ò. Yöölen nyin yip kūön cha nö haröhtöre nö in Yāvē tö tī minë töhalēnlöng. Ngö ṙô cha-a, “Öt lööṙen an ngam inlahen ai haköptö më tö lūöi tak kūön re tö inlahen Yāvē, ngaich chū-ö tö ngam pīhö chu kikānö öi örheūheu vë-ekūötēv öi havëkö hinòlrenre in Yāvē. Hēṙu öi öt akaha elmat tö ngam inlahen re, hē e pöri ngam Tēv Yāvē nö heuveū-eu tī nö kētö sanapṙô ai öi vë-ekūö ò. Löngö ṙētak tī anga-aṅ nö kētö minë līpöre hēk vitiō inrē. Yěn öt ngatī inlahen öre anga-aṅ ngaich öt heuveū-en lohten āi öi im la-en re.

7. Kūöyòh öich më inyööngö nö tö hòṅ vai nö inchōḵ elmat më kūön re? (Rōma 2:21)

⁷ Innëtö Inlēnö: Tövai öm inchō-elmat. Pōyen yip nyīö töng ngamëchkö inlahen yöng re ngaich haköp nö in cha. (Rōm. 3:23) Pòrô më inyööngö nö töt het sön pöri cha-a nö mihôiṅ nö tövai nö inchō-elmat më kūön re. (Vë-evkūö Rōma 2:21.) Hěng tak öp ihih inyööngö tö ngö ṙô, “Sā ṙēngen ispöny yin kòl vē kūön hī nö ilöö nyôklöre tī tö nup töng sitih, ilööṙen cha-a nö meuk inlahen hī yěn tahëng nup ṙô hī tö nup la-en hī.” Lökten yēḵ hī hòṅ haköpten cha nö hāngenlōn tö Yāvē, ngaich hòṅ urěh ayī-ö ngëichköre yěi hāngenlōn tö Yāvē, pön meukö min angū-ö nö in minë ṙô hēk la-en hī inrē.

8-9. Asuh öp haköp hī in minë vahënyö nā Enrū nā Emā?

⁸ Pōyen nun minë talöökö tī më inyööngö kô-òren nö asīöp hanāngenlōn më kūön re tö Yāvē. Vë-eny nang hī ang prötör Enrū ngam tö 17 höiny samyeūheu nö ngö ṙô, “Löktökūö nyinī-ö chu mina yöng chu nö harunö chu öich vë-ekūötēv. Örheūheu ang pa-a nö holṙô chu öich vë-ekūötēv, urěhěkūö chu haṙòh. Pòrô min chū-ö ngaich öich kahngenre vë-ekūötēv sön min anga-aṅ nöng holṙô chu. Örheūheu ṙô minā yöng chu nö ngö ṙô, ‘mihôiṅ öp töng yòh ṙētak meh vë-ekūö Yāvē’ köpngö ngih ṙô cha nö elkuilōn chu. Yöngrevö lōn chin töngamuh tö Yāvē lökten öich öt hēngö hayunngö öich in ò tö nup ṙô ellōn re.” Köpölōn yī-ö inyööngö, yēḵ yīö min hāngenlōn tö Yāvē ngatī min yip kūön yīö nö hāngenlōn tö Yāvē inrē.

⁹ Ngëichkö inlahen Emā inrē. Ik sā ök yöng ò kikōnyö nö ṙāngen ngam mikūönö cha, ngaich ök yöng ò kikānö lamöhnyö nuk hötṙeh kahë ök yöng cha kikōnyö. Ngö ṙô ang Emā nö vë-eny, “Ṙōl heuh yēḵ ih öi öt pësavö ngaich fēlen ih ang pō-o tö ngam Tēv Yāvē nö tö chumkūöṙen tö yip tarik re. Hö-ö pöri anga-aṅ nöng elvāng re ṙô nö ṙô-òv pön inup la-en re anga-aṅ nö hameuktö ngam ṙinātö-ellōn re nö in Yāvē. Kô-en anga-aṅ nö tövai nö inchō-elmat ih.” In e mikahkūö ayī-ö, pòrô nö ötlöng minë ṙētak sön mihôiṅ më inyööngö nö tövai nö inchō-elmat më kūön re.—Kal. 6:9.

10. Ihē kò-òren yik inyööngö aṅ Israel nö haköptö më kūön re? (I.Chööngö 6:6, 7)

¹⁰ Linūöyö Inlēnö: Kēnyö ṙētak re öm vë-ekūö më kūön re. Tölṙô yik aṅ Israel misī ang Yāvē nö örheūheu nö kēnyö ṙētak re nö vë-ekūö më kūön re hēk haköpten cha inrē. (Vë-evkūö I.Chööngö 6:6, 7.) Mihôiṅ më inyööngö yěn ṙònghöichṙen nö la-evṙen, ngaich hē e kô-òren cha-a nö vë-ekūö më kūön re ngaich haköpten cha inrē nö hāngenlōn tö Yāvē. Tö sā cha yěn el panô-òṅ nö teūch hēk uvòh inrē ngaich holṙen cha më kūön cha ngaich yěn la-evṙen ngam inyööngö kikānö hēk chōk hilā inrē ngaich kēkö nup tahëng inrē la-en ngaich holuṙen anga-aṅ tö ngam kūön re kikanö. Hē e kò-òren cha-a nö kakkö inlahen Yāvē, tö sā cha kò-òren nö kakkö minë tövai la-en Yāvē hēk sitih tī anga-aṅ nö hayööken ngam mikūönö cha.

11. Ihē ang kò-òren ngòh inyööngö nö teūngen tö ṙētak re nö vë-ekūö më kūön re?

¹¹ Harīkngöre pöri në ṙētak hī töngamuh. Ōt më inyööngö töngamuh töt ṙētakvö nö in më kūön re. Pön lohten nö hòṅ kamān ngam inyööngö ngaich chuh el iskul më nyīö. Lökten më inyööngö nö hòṅ kēnyö ṙētak re nö vë-ekūö më kūön re. (Efi. 5:15, 16; Filip. 1:10) Hěng ön mihôiṅ ngam ṙētak cha nö mūl nö meukkūöre, ngam manūlö mikūönö. Eleksentör minë-eny ök ihih ṙālö prötör, ngöṙô anga-aṅ, “Chumkūöṙen ngam yöng chu kikōnyö nö un sānlen el ṙētak ih mūl tö mikūönö re. Ngaich yēḵ ih keuheūten öi kēken ngam manūlö mikūönö, ngaich kö vë-eny inlahen re ngaich ihö öi in höö.”

12. Asuh öp tö hòṅ chumkūöṙen ngam inyööngö yěn kēken ngam manūlö mikūönö?

¹² Yēḵ meh öm inyööngö kikōnyö, asuh öp öre tī meh öm vī ngam manūlö mikūönö, nö chūök më kūön meh nö ṙamlōn hēk kuchiken inrē. Mihôiṅ man holṙô cha öm haköp ngam tufömngöre līpöre Mihôiṅ Man Örheūheu Ṙamlōn! Hē e min më kūön meh nö mihôiṅ nö ṙòngnyökūö ellōn re nö vë-eny minë kuilōn re. Lōnu inrē më-eṅ lohten tö cha nö un hayunngö minë ṙô ellōnre minë piṙūtkö cha inrē. Lökten yěm kēken ngam manūlö mikūönö, ötkô min më-eṅ höng kamëtö inlēnö hēk ötkö inrē öm hatainyken cha. Yěn ōt öp ṙô öp kūön meh töt sā ta nö i ṙô ngam Paipöl, ngaich uh më-eṅ ilöö hatainyö ò. Hòṅ chumkūöṙen pöri më-eṅ tö minë ṙô ò. Ngëichkö inlahen ò më-eṅ nö öt hěngö hayunngö nö in meh. Ngaich ṙūölö inlahen ò nö ngatī inlahen nö vë-eny nang meh. Yēḵ meh min akahakūö tö nup afēkö öp kūön meh möl min më-eṅ mihôiṅ hayööken ò.

13. Asuh nup kô-òren inrē hē më inyööngö nö haköptö më kūön re tö inlahen Yāvē?

¹³ Yī-ö inyööngö, rö-ö nöng ip hē yīö öi haköpmat ngam Paipöl, pöi mihôiṅ inup tahëng ṙētak inrē vë-ekūö më kūön re. Fě-ělre man kô-òren tö nup ṙētak re mihòiṅ haköptö më kūön re tö inlahen Yāvē ngaich hayööken cha nö haröhtöre nö in ò. Ngöṙô ang sistör Lisā, “Holṙô re ihö tökūön re öi kakkö inlahen në tövīlöng lā chīṙö hī. Tö sā më nyī-ö yěn ngëichkö inlahen ök tö harukö am ih ngaich hayīölkūö, hē e min īhö öi ngëichkö haköplö re tö inlahen Yāvē öi löktö in e.”

14. Kūöyòh yip inyööngö nö hòṅ chumkūöṙen tö yip hanôl më kūön re? (Inchōḵ-oṙô 13:20)

¹⁴ Finënö Inlēnö: Hayööken më kūön re nö vī holre tö yip tö akaha. Vënyu nang in tö ngam Paipöl, yěn tö akaha yip hol hī ngaich vayö inlahen min ayī-ö, yēḵ cha pöri nö tötlöng ngaich ötlöng min ngam tinrīken hī. (Vë-evkūö Inchōḵ-oṙô 13:20.) Yī-ö inyööngö, akahakūö öi yī-ö tö më hol më kūön re? Ngaich hòng më-eṅ meuk kūö cha? Kēnyö ṙētak re öm ṙung in cha? Yēḵ meh öm lōnu tö më kūön re nö hanôl yip tö hāngenlōn tö Yāvē ngaich hòṅ sitih inlahen öm öre? (1 Kòr. 15:33) Mihôiṅ öm havëtö yip prötör-sistör nö chuh patī re hòṅ yip kūön meh min nö teūngen tö hanôl re.—Sal. 119:63.

15. Asuh nup kô-òren inlahen më inyööngö hòṅ më kūön cha nö löngö atöllö tö hol re?

¹⁵ Töi ngëichkö ngam inchō-elmat re ngam inlahen nā Tōnī tö ngam pīhö ò. Hayööken më kūön re cha-a nö löngö atöllö tö holre. Ngöṙô ang Tōnī, “Havëtö më prötör sistör īhö nö nyā nö i patī ih holṙen ih inrē el ngam manūlö mikūönö, kö ṙēḵti re cha-a, kö tinrīken re inrē. Ngatī inlahen īhö öi mikahtökūöre tö yip holmaneuk re yip tö hāngenlōn tö Yāvē, tö ṙamölōn inrē nö löklōn ò. Iyöng patī ih inrē yip sörkit ovörsīör yěn yih, holre tö më misnöri hēk më tahëng inrē prötör sistör. Ngönlöre īhö yěi hang minë ekspirön cha, pōyen haköp inrē më kūön ih ngaich yöölen nö haröhtöre nö in Yāvē.” Lökten yī-ö inyööngö, hayööken më kūön re yin hòṅ cha nö löngö atöllö tö holre.

UM ṘĀNGENRE MEŪKA!

16. Sitih inlahen öm min yěn sōḵ ngam kūön meh nö löklōn Yāvē?

¹⁶ Sitih inlahen pöri min më-eṅ, yěm pòrô ngaich öm ma-any re öm haköptö ngam kūön re tö inlahen Yāvē sön pöri ngam kūön meh nö ngö ṙô, hö-ö chin hòṅ löklōn Yāvē? Um haṙivlōn, um rěhěn afukkui re tö e nö vanaichö re. Uh inrē öm ngö lōn, sön chin lohten ötlöngö tī halēn ngam kūön re. Pöi ṙòkhöre öi tö halöngtuṙen tö Yāvē öi kahngenre atöllö lōn re tö inlahen re yěi hòṅ löklōn ò hēk yěi hö-ö. Yěn sōḵ ngam kūön meh nö löklōn Yāvē ngaich uh më-eṅ haṙivlōn. Meūkkö inlahen ò pöri nö havantöre nö in Yāvē. Mihôiṅ öm fēkö inlahen ngam kūön töchatngen. (Lūk. 15:11-19, 22-24) Marôvat ök sin ngaich anga-aṅ ngaich kēken nuk tötlöng la-en, havantöre pöri ngaich anga-aṅ im unôich. Ngöṙô pöri min yip rīkre, “Nö ōt hòng min töngatī inlahen nö sā ṙô ngam istori?” Heūṅ ōt yip töngatī inlahen. Ngatī inlahen ök Elī inrē.

17. Asuh öp haköp hī im inlahen Elī?

¹⁷ Vë-eny inlahen nak yöng re ang Elī nö ngöṙô, “Ma-anyre nak yöng chu nö asīöp ngam hanāngenlōn chu tö Yāvē tö ngam ṙô ò inrē Paipöl. Ik sā chu pöri ngaich öich ṙālö, milôṙen chū-ö tö mina yöng re.” Ma-anyre lang mina yöng Elī nö hayööken ò, hö-ö pöri anga-aṅ nö hang ṙô cha. Ṙāngö patī re ngaich anga-aṅ ngaich kēken tövaich la-en. Köpsören pöri anga-aṅ nöng vë-eny nang öp töhěng tak holre tö ṙô ngam Paipöl. Ngöṙô ang Elī, “Yēḵ chu öich vë-eny nang ngam holre tö inlahen Yāvē, ngatī kumlēḵ ngam mufē chu tö Yāvē. Köp ngam kulöl ngam kanô-en tö teūchtu tö nak yöng chu nö ellōn chu, hiṙeūtkenre ngaich angū-ö nö pöpnyöre kūö.” Marô-angen ngaich, möl ang Elī nö havantöre nö in Yāvē.c Asehkūöre man tö ṙanamlōn nak yöng Elī hē cha nö meukö ò nö öt vaichngö tö nuk haköp re hē ò nö kunkun!—2 Tim. 3:14, 15.

18. Sitih mufē öi tö inlahen yip inyööngö tö larāḵ nö haköptö më kūön re nö hāngenlōn tö Yāvē?

¹⁸ Yī-ö inyööngö, tökiröng ön ngam la-en tö hakeunlöng nö el ranôṙö yīö, ngam inköptö inlahen Yāvē in më yamih tumkölchap tarik. (Sal. 78:4-6) Hö-ö ön nö kūöṅnö ngam la-en yī-ö. Pöi hòṅ ma-anyre in e, eūḵ minë lumrāḵ yīö in! Yēḵ yīö min iṙūöhen haköptö më kūönre nö hāngenlōn tö Yāvē hang minë chööngö ò inrē, ngaich mihôiṅ më-eṅ ṙinātu-ellōn tö Yāvē nö ṙamlōn tö minë la-en meh.—Efi. 6:4.