Yěn Mihôiṅ Yik Israel Nö Kiyung Misī Ngaich Kūöyòh Ayī-ö Ötkô Töngamuh?

ṘÒNGHÖICHṘEN hē e ngam tökiröng innëtö kinyūngö. Ngöṙô ök töhěng tak Nasī òfisöör nö in yik tö haroh tumtak Vamënyen Yāvē, “Yěn hěng tak min in yīö tö sōḵ nö kiyung nö lā-al yip aṅ Inglën hēk Frāns inrē, ṙòkngöre vah min yī-ö öi fëliyö!” Kö aṅhav eltī yik kumyung tö inreul. Sön nö öt hěng tak Vamënyen Yāvē hamang ṙô cha. Öt hěng tak tö vöö nö in cha! In e mikahkūö ayī-ö töm ṙinātö-ellōn më Vamënyen Yāvē, tö cha nö öt löktu nö kētöre nö kiyung, pòrô nö pinhëlöngkūö tö re min nö fëliyö.

1. HÖNG AṄKŪÖ ÖK TÖHĔNG PANAM MISĪ YIK AṄ ISRAEL

Tö katöllöng misī yik aṅ Israel nö tarik ngam Tēv, nö aṅkūö ngam töng hěng panam, Israel. Ngöṙô ang Yāvē nö in cha, “ngaich yī-ö min chehen Chu takô-en öi aṅ i vē taṙòkhöre tarik.” (Man. 19:5) Lēn cha-a nö kě-ěvkūö tö panam chūök re nö iyöng. Lökten yěn tölṙô cha ang Yāvē nö kiyung, ngaich kiyung cha-a nö lā-al yip tökunyaha elmat töre, rö-ö cha-a nö la-al yip tö sā ṙinātö-ellōnre.a

Kö löktöre pöri töngamuh yip tarik ngam Tēv Yāvē nö “aṅ i taṙòkhöre pūlngö, miyöngö tarik, ëlô inrē.” (Inm. 7:9) Yēḵ cha öre nö kiyung ngaich höng lā-al më holmaneuk re min cha-a më mi-iyöng nö ikūö minë tahëng panam.

2. YĀVĒ TAMÖLṘÔ YIK AṄ ISRAEL NÖ KIYUNG

Ngam Tēv Yāvē misī vamë-eny nang yik aṅ Israel tö ṙētak cha hēk töm chöö-öny cha inrē nö kiyung. Tö sā inlahen Yāvē nö tölṙô cha nö kiyung nö lā-al yik aṅ Kanā-an, ngam kinlēḵngô ngam Tēv nö panam cha. Ṙën ang Yāvē nö tölṙô cha nö kiyung nö la-al yik aṅ Kanā-an, pön vamë-ekūö sī-ö cha-a, kamëken tötlöng la-en inrē, famöngtökūö kūön re inrē, ngaich sōten yik aṅ Israel ang Yāvē nö sā inlahen cha. (Lēv. 18:24, 25) Ik sā yik aṅ Israel inrē nö iyöng kūö ngam panam, ngaich tölṙô cha ngam Tēv nö kiyung nö laklö ngam panam re tö yik tökunyaha elmat. (2 Sa. 5:17-25) Öt halöngten yik aṅ Israel pöri ang Yāvē nö kahngenre nö kiyung. Yēḵ cha pöri nö ngatī inlahen, ngaich höng ötlöngö ṙòng anū-ö.—Kin. 14:41-45; 2 Kin. 35:20-24.

Öt tölṙô tarik an töngamuh ngam Tēv Yāvē nö kiyung. Ngaich pöri töngamuh tarik nöng chö-önytö nup kuilōn re nö kiyung, rö-ö nö kūö re nö hòṅ hateung minë kuilōn ngam Tēv. Kiyung cha-a pön hòṅ tānyö ṙôkti panam re, kūö lōn re tö kanôlò hēk chöö-öny tö pòlitiks inrē. Ōt yip muh inrē tö chö-önytö tinlööken nö kiyung. Vë-enyre cha-a nö lamaklö nup tinlööken re. Öt fēkö töngatī pöri yip tarik lamöklōn ngam Tēv. Pön kilēḵngôre anga-aṅ töre min nö laklö yip tarik re. Rö-ö pöri nö ing töngamuh pön hē öp Armakētòn min anga-aṅ nö ngatī inlahen. (Inm. 16:14, 16) Yip tarik më-el halīöngö min tö tīniyö tö Yāvē nö kiyung, rö-ö nö yip tarik ò ing panam.—Inm. 19:11-15.

3. ÖT FËLNGÖ YIK ṘAMĀTÖ-ELLŌN RE YIK AṄ ISRAEL YĔN KIYUNG

Yik töng hōtu finëlngö, acha-a misī fahëlngö yik aṅ Israel yěn kiyung. Yik ṙamātö-ellōnre pöri nö in Yāvē, cha-a tö laklöng nômö. Sā ṙēngen Yāvē hē ò nö tölṙô pinyāingö Yerikō, ngaich öt ṙòkngöre vah yik tarik nö fëliyö. Laklöng nômö ang Rahap tö yik aṅpatī ò inrē, pön ṙātö-ellōnre nö in Yāvē. (Yôs. 2:9-16; 6:16, 17) Ngatī inlahen nö öt teūngen finëlngö yik aṅ Kipīön, kūö cha nö ṙòkhöre nö hameuktö ṙinātö-ellōnre nö in Yāvē.—Yôs. 9:3-9, 17-19.

Yěn kiyung pöri töngamuh nup tö nët panam, ngaich öt ngëichkö yip ṙamātö-ellōnre cha-a. Ötrěhěn pön höng fëlngö yip töt fāluṙen inrē cha-a.

4. HÒṄ HANG NUK CHÖNGÖ YIK AṄ ISRAEL YĔN KIYUNG

Ōt misī nuk chööngö tö hòṅ hāngö tö yik aṅ Israel yěn kiyung. Tö sā cha nö hōtu nö “ahangkö lanāmö” urēhěkūö cha nö kē-ělkūö alaha re nö kiyung. (Chöö. 20:10) Hōtu inrē yik kumyung nö het töheichṙen, nup lā chīṙö cha inrē tö minë tinrīken cha inrē nö hòṅ het. (Chöö. 23:9-14) Öt ngatī inlahen pöri yik aṅ tahëng panam yěn kiyung, ōt yik kumlöön kikānö yěn mihôiṅ tö nuk panam lā-al re. Sōten yik aṅ Israel pöri ang Yāvē nö ngatī inlahen. Kētö chööngö inrē ang Yāvē nö in yik aṅ Israel, nö sōten cha nö ilöö hapīhö nö in yik kikānö aṅkūö nuk panam lā-al cha. Hòṅ höktöre pöri cha-a nö hěng chumngëṅtö.—Chöö. 21:10-13.

Ngatī töngamuh nö ōt nup chööngö vahī nup panam yēḵ cha nö kiyung. Pön sōtu yip aṅkūö minë panam nö pala-aiṙen. Hö-ö pöri nö kēkaṙen minë chööngö pön höng filaliyö.

5. KIYUNGLEN YIK TARIK RE MISĪ ANG YĀVĒ

In yik tarik re misī ang Yāvē yēḵ cha nö kiyung, ṙōlheuh nö anga-aṅ kumyunglen cha ngaich mihôiṅ cha-a. Kò-òren öi fēkö inlahen pinyāingö Yerikō. Tölṙô yik aṅ Israel ang Yāvē nö “hū-a nö pōitô” ngaich “fukngö ngaich ök kinlōngö nö paṙāpkötī.” (Yôs. 6:20) Ngaich sitih inlahen hē cha nö lā-al yik aṅ Amōr? “Suktö tökiröng ihong [ang Yāvē] nö ṙā-ang el halīöngö nö i kui cha . . . mötlö ṙôken yik tökapah tökūö ök tökënngöre kumṙah mötlö tö yip töfëli tö yip kūön Israel nö aṅtī tö sanët.”—Yôs. 10:6-11.

VAMĪ LANĀMÖ YIN VĒ TÖKÔ-EN KRISTĪÖN

Sā ahang hī ngaich, kö harīkngöre inlahen minë ṙētak hī tönuk ṙētak yik aṅ Israel misī. Rö-ö pöri nöng anū-ö lāinyngen hī öi sōḵ öi kiyung. Pön ōt minë tahëng inrē. Tö sā ngam kinlēḵngô Yāvē nö ngö ṙô “öt rēhĕn cha-a min nö haköptöre nö i kinyūngö nö hēk.” (Isa. 2:2-4) Vë-eny yip tanīnöṙô re inrē ang Yēsū nö “öt aṅ ngih panam” ngam tö ngö manah tö cha min nö öt kēken nup la-en ngih panam tö sā minë kinyūngö.—Yôh. 15:19.

Ötrēhěn inrē ang Yēsū, pön sōten yip tamömköröön re nö köptī töm kumnyahlōn hēk tanānyö re nö i holre ngam ranehtökūö inlahen hī hòṅ kiyung öi lā-al holre. (Mët. 5:21, 22) Hōten cha inrē anga-aṅ nö halāmtöre nö i holre, hāngenlōn inrē tö yip tökunyaha elmat töre.—Mët. 5:9, 44.

Hö-ö in lohten ayī-ö öi kiyung. Lohten pöri nö ōt nup kumnyahlōn hī öi i holre. Sitih inlahen öi min yěi ngatī? Mihôiṅ min ngam hanāngenlōn hī tö höö nö pasū, öt köp inrē ngam hinëngö nö in hī. Lökten öi ötkô halöngten ngam kumnyahlōn nö sīöp nö ellōn hī.—Yāk. 4:1, 11.

Ma-anyre pöri ayī-ö öi asīöp ngam hanāngenlōn töm lanāmö öi ihôi taòkhöre tarik. (Yôh. 13:34, 35) Hanöng saha ngam ṙētak Yāvē nö öl nö yih, hē ò min nö ha-etngö minë kinyūngö, öthō ayī-ö öi kētöre in minë kinyūngö.—Sal. 46:9.