Mihôiṅ In Öi Örheūheu Aṅ!

1. Asuh öp min inlahen hī yēḵ hī fēkö inlahen ngam tö-örheūheu aṅ nômö?

KILĒḴNGÔRE ang Yāvē nö kē-ěkūö hī min tö ngam “tö-örheūheu aṅ nômö” yēḵ hī öi hang minë chööngö ò. (Rōm. 6:23) Kūö ò nö kirööngen hanangenlōn tö hī. Öt lōnu inrē anga-aṅ tö hī öi haköhngenre tö ò. Yēḵ hī öi fēkö ngih kinlēḵngô Yāvē, ngaich ṙūöhölre hēk min ngam hanangenlōn hī ò.

2. Asūp min inlahen hī, yěi köplōn tö ngam kinlēḵngô Yāvē nö kē-ěkūö hī tö ngam nômö tö-örheūheu aṅ?

² Yē hī min köplōn tö ngam kinlēḵngô Yāvē nö kē-ěkūö hī tö ngam nômö tö-örheūheu aṅ, ngaich mihôiṅ min ayī-ö holtö nganötöre lā-al nup kanihngen hēk nup ötlinëken hī inrē. Pòrô yip tarik nö hòṅ fëlngen hī, sön ayī-ö öt ṙāngenre i linöökölōn Yāvē. Pöi ṙatö-ellōnre tö Yāvē min nö ha-aṅlen yip tarik re tö chiplö nö löklōn ò ngaich örheūheu min cha-a nö aṅ. (Yôh. 5:28, 29; 1 Kòr. 15:55-58; Hep. 2:15) Kūö yòh pöri ayī-ö mihôiṅ ngatī ṙinatö-ellōn tö hī min öi örheūheu aṅ? Töi ngëichkö minë lāinyngen.

YĀVĒ AN TÖT RANEHLUVÖ, TÖT MANĀNGENVÖ

3. Kūö yòh öi mihôiṅ ṙātö-ellōnre tö Yāvē nö kē-ěkūö hī min tö ngam nômö tö-örheūheu aṅ? (Salmai 102:12, 24, 27)

³ Vënyu nang in tö ngam Paipöl tö Yāvē nö töt rahehluvö töt manāngenvö. Anga-aṅ inrē kamëtö nômö hī, lökten öi mihôiṅ ṙātö-ellōnre tö ò min nö kē-ěkūö hī tö ngam nômö tö-örheūheu aṅ. (Sal. 36:9) Sā kinūichngö e nö im Salmai 90:2 tö Yāvē nö “töt ranehluvö, töt manāngenvö.” Ngatī vinëny inrē angū-ö nö in ngam Salmai 102. (Vë-evkūö Salmai 102:12, 24, 27.) Ngatī ṙô tī inrē ang pròfět Hapakūk nö kūich inlahen ngam Tēv: ‘Röh öm me-eṅ ṙameū-eung im töt chanūhvṙen, Ō Mā Tēv [Yāvē]? Tēv chu, me-eṅ Töhet öm in chu, hö-ö man öm tö kinpahavö.’—Hap. 1:12.

4. Yē hī kihngen mikah elmat tö Yāvē nö töt ranehluvö hēk töt manāngenvö, tö ngö manah hòng ngaich angū-ö tö e nö öt ngatī? Mikahtö elmat hī.

⁴ Kihngen mikah elmat hòng më-eṅ tö Yāvē nö töt ranehluvö hēk töt manāngenvö pò-ò nö “Tēv tö-örheūheu-aṅ”? (Isa. 40:28) Ngatī kanihngen misī yik tarik nö akah elmat tö ṙô e. Sā Elihū nö ngöṙô nö vë-eny inlahen ngam Tēv: “Kiröng an ngam Tēv, öt akahakūö ayī-ö tö ò, öt chanöhen nup tum samyeūheu ò.” (Yōp 36:26) Köpölōn pöri yē hī öt akahakūö tö ngam ṙô e, ngaich öt tö ngö manah ngaich angū-ö tö e nö vaich. Tö sā ngih inchōḵ elmat, tö hī öt uroh öi akahakūö tö la-en ngam ngam yanāngö. Tö ngö manah hòng angū-ö tö e nö öt ōt? Hö-ö! Ngaich ngatī lohten ayī-ö öt uroh öi ṙòklöre mikahkūö, tö Yāvē nö töt ranehluvö hēk töt manāngenvö inrē pön ngaich anga-aṅ nö urěh tö ngih panam, halīöngö, tavūöi hēk chingëṅt inrē. (Rōm. 11:33-36) ‘Anga-aṅ an vamī ngam tumlat nö lökten i minhôiṅyö re hēk lökten i mikah elmat re inrē nö hanyāṅknyö minë halīöngö.’ (Yar. 51:15; Inl. 17:24) Asūp inrē mihôiṅ chö-öny hī ṙātö-ellōnre töre min öi örheūheu aṅ? Töi mikahtökūöre.

TÖ VĪLÖNG YIN MË TARIK NÖ TÖ-ÖRHEŪHEU NÖ AṄ

5. Sitih vinī-i öich nā Ātöm nā Ēva tö Yāvē?

⁵ Öt tö vī-i yin më tarik tö Yāvē nö kapah pön tö vīlöng nö öt-örheūheu nö aṅ. Hö-ö pöri nö ngatī minë chōn hēk minë töṙeūla inrē nö sā vinī-i ngòh tarik. Ngöṙô ngam Tēv nö in Ātöm: “Ngam chōn pöri inkaha tölöök tötlöök inrē, uh më-eṅ nyā-aṅ in ò: pò meh min kô-en kapah ip sakāmö meh öm nyā aṅ in ò.” (Ran. 2:17) Yēḵ nā Ātöm nā Ēva öre nö hang ṙô Yāvē nö öt nyā ṙòng ngam chōn ngaich öthō cha-a nö kapah. Pön öthō min ang Yāvē nö öt kē-ěkūö cha tö ṙòng ngam “chōn nômö” ngaich “örheūheu” cha-a nö aṅ.b—Ran. 3:22.

6-7. (a) Tö vīlöng ngòh tarik nö örheūheu nö aṅ kūö yòh öi mihôiṅ ngatī ṙô? (b) Asuh öp lōn meh min la-en ip tufömngöre panam? (Ngëichkö ngam nyat.)

⁶ Ngöṙô yin më saëntist yēḵ ngòh tarik nö hamūl minë mikahkūöre i rò-òtö nômö re, mööḵlö ṙôken hamūl pöri ngam elkui ò nö kē minë mikahkūöre. Ik 2010 ngam līpöre më saëntist, (Scientific American Mind) nö vë-eny më saëntist tö ngam elkui ngòh tarik nö 25 lëk (lakh) GB dada nö mihôiṅ nö chaphöt nup mikahkūöre nö elkui hī, yēḵ ngam TV inrē nö 30 lëk kantra rò-òten nö meūkö mat, (tö ngö manah nö söl in ngam tö 300 samyeūheu) ngaich mihôiṅ min ngam elkui hī nö ngatī ṙôken kahë tö ngam mikahkūöre. Höng ṙô më saëntist pöri anū-ö. Lohten pöri nö pōyen tö u nup mikahkūö hī nö chaphötre nö elkui hī. In e mikahkūö in tö Yāvē nö ngatī tī nö vī ngam elkui hī öi mihôiṅ öi pōyen kahë tö nup mikahlōnre. Asā ṙôken nup kahë hī mikahkūö im tö 70-80 samyeūheu, nö mööḵlö hēk anū-ö tö u.—Sal. 90:10.

⁷ Ngö kinūichngö an nö imat ngam Paipöl tö ngam Tēv nö “chaphöt tö örheūheu inrē anga-aṅ nö ellōn tarik.” (Mum. 3:11) Angū-ö ngih lāinyngen hī öt lōnu töre öi kapah. Kūichi inrē nö imat ngam Paipöl ngam kinpaha nö kumnyah elmat hī. (1 Kòr. 15:26) Kò-òren öi fē-a asūp ṙung inlahen hī yěi vahavö. Höng öt halöinyköre hòng ngaich ayī-ö? Hö-ö, pöi chuh in öp tòktör ngaich kē lanë-enre pöi hòṅ lööken. Öp töng tölngö kanò-ò hī ngaich ngatī inlahen ayī-ö kūö hī hòṅ aṅ. Haṙivlōn in yěi kapahlöng tö holre hēk tö yip holmaneukre inrē, pòrô cha-a nö tö ayālö ṙēḵtī hēk tö köiny inrē. (Yôh. 11:32, 33) Pò Yāvē inrē nö chaphöt elkuilōn hī tö hī öi örheūheu aṅ. In e mikahkūö ayī-ö tö Yāvē nö lōnu tö hī öi örheūheu aṅ. Pōyen nup inrē lāinyngen hī öi ṙātö-ellōnre. Ta-a töi ngëicha asuh nuk inlahen tī Yāvē inuk urěh ṙētak hēk ing töngamuh inrē, in e ayī-ö akahakūö tö ò nö lōnu tö hī öi örheūheu aṅ.

ÖT HAṘĪNGÖRE NGAM KUILŌN YĀVĒ

8. Asūp mikahlōn hī i inlahen ngam kuilōn Yāvē im Isayā 55:11?

⁸ Köölö fālen nā Ātöm nā Ēva lökten nö kapah. Ngatī töngamuh tarik nö ṙòkhöre nö kapah. Hö-ö pöri angū-ö nö tö ngö manah tö ngam kuilōn Yāvē ngaich nö haṙīngöre. (Vë-evkūö Isayā 55:11.) Söl ing töngamuh an inrē nö lōnu tö hī örheūheu aṅ. Ta-a töi ngëicha, asūp ṙô Yāvē nö in yik tarik re misī ngaich asuh öp inlahen ò, töp lökten hī min akahakūö tö ò nö öthō nö öt hateungngö ngam kuilōnre.

9. Asuh öp kinlēḵngô Yāvē? (Tanīěl 12:2, 13)

⁹ Kilēḵngôre ang Yāvē töre min nö ha-aṅlen yip tö kapah, ngaich örheūheu min cha-a nö aṅ. (Inl. 24:15; Tai. 1:1, 2) Ṙatö-ellōnre inrē ang Yōp tö ngih ṙô, tö Yāvē nö hòṅ kapahöre nö ha-aṅlen yip tö kapah. (Yōp 14:14, 15) Pròfět Tanīěl inrē tö akahakūö tö inlahen yip tö kapah min nö ha-aṅlöng tö ngam Tēv ngaich teūngen inrē cha-a min tö inlahenre nö örheūheu nö aṅ. (Sal. 37:29; vë-evkūö Tanīěl 12:2, 13.) Ngatī inlahen yik Yahūti inuk ṙētak Yēsū nö akahakūö, tö cha min yěn chiplö nö i linöökölōn Yāvē ngaich kē-ěvkūö min cha-a tö ngam “nômö tö örheūheu aṅ.” (Lūk. 10:25; 18:18) Ṙōlheuhṙô ang Yēsū nö vë-eny nang yip tarik tö Yāvē min nö ha-aṅlen yip tökapah ngaich kē-ěkūö cha min tö ngam nômö tö-örheūheu aṅ. Pön ik sā ò nö kapah ngaich ha-aṅlöng anga-aṅ tö Yāvē.—Mët. 19:29; 22:31, 32; Lūk. 18:30; Yôh. 11:25.

10. Asuh öp mikahkūö hī i inlahen Yāvē, nö ha-aṅlen yik tarik misī tö kapah? (Ngëichkö ngam nyat.)

¹⁰ Yāvē an kamë-ekūö hī tö ngam nômö. Lökten yēḵ öp töhěng tak tarik nö kapah ngaich mihôiṅ hēk ang Yāvē nö havantö ngam nômö ò. Ik sā ök tafīösi aṅ Sērefāt nö kapahlöng tö ök kūönre, ngaich kētö kumlēḵ Ēlaicha ang Yāvē nö ha-aṅlen ök kūön ò. (1 Rā. 17:21-23) Ngatī inlahen inrē anga-aṅ nö kētö kumlēḵ pròfět Ēlaisa nö ha-aṅlen ök kūön ök yöngnyīö aṅ Sunēm. (2 Rā. 4:18-20, 34-37) Pōyen nup imat ngam Paipöl tö vënyu nö löktö im inyöökenre tö Yāvē cha-a nö mihôiṅ nö ha-aṅlen yip tarik. In e mikahkūö ayī-ö tö Yāvē nö īnu tö kumlēḵ re nö ha-aṅlen yip tö kapah. Kē-ěkūö Yēsū inrē anga-aṅ tö ngam kumlēḵ. Lökten ik sā ò nö ing panam, ngaich ha-aṅlen yik tarik anga-aṅ. (Yôh. 11:23-25, 43, 44) Kilēḵngôre inrē ang Yēsū “hē yip taṙòkhöre el anūlö nö hang ṙô Ò min, ngaich kunyī-inyre.” Ngaich töngamuh Yēsū nö el halīöngö ngaich ‘ṙòkhöre minë chööngö nö kētu nö in ò, el halīöngö, ing panam inrē.’ Lökten anga-aṅ nö mihôiṅ nö hateungngö ngam kinlēḵngôre nö ha-aṅlen yip tarik min ngaich kē-ěkūö cha tö ngam nômö tö örheūheu aṅ.—Mët. 28:18; Yôh. 5:25-29.

11. Sitih inlahen öi teūngen tö ngam nômö tö örheūheu aṅ öi löktö in ngam tö kitaknyu mahām Yēsū?

¹¹ Kilöllöng ang Yēsū nö öt lēkaṙen finëlngö. Kūö yòh ang Yāvē nö hökngen ò nö ngatī inlahen nö kapah? In ngam ṙô Yēsū in öi teūngen tö ngam sanapṙô e, “Tölngö hanāngenlōn An ngam Tēv töng panam, tön uroh nö kēngö ngam töng hĕng maneuk Kūönre; pòn sōtu vē ṙamātö ellōnre nö in Ò, nö ötkôlò; hōtu pöri ngam nômö tö-örheūheu-aṅ nö in cha.” (Yôh. 3:16) Kētö ngam töhěng maneuk kūön re ang Yāvē kūö ò nö hòṅ hateungngö ngam kuilōnre nö ing panam. Ngaich löktö in ngam tö kitaknyu mahām Yēsū öi teūngen tö inṙē-ěl minë tökööl re ngaich teūngen tö ngam inlahen re öi mihôiṅ örheūheu aṅ. (Mët. 20:28) Ngatī ṙô inrē ang Pôl nö vënyö inlahen ngam tö halēnlöng, “Sā yanihih ngam kinpaha nö lökten tarik; ngatī inrē ngam yanīhih ngam invanlö tökapah, nö lökten tarik. Sā taṙòkhöre nö kapah nö in Ātöm; ngatī inrē min taṙòkhöre nö aṅ nö in Kristū.”—1 Kòr. 15:21, 22.

12. Sitih inlahen ang Yāvē min nö hateungngö ngam kuilōn re?

¹² Hachōtô yik haköptöre ang Yēsū nö vë-ekūötēv nö ngöṙô, yih an yēḵ ngam pūlngö ngam Tēv ngaich hateungngö ngam kuilōnre nö ing panam. (Mët. 6:9, 10) Ngaich ngam kuilōn Yāvē nö ing panam tö ngòh tarik nö örheūheu nö aṅ nö ikūö e. Ngaich vīlen Yēsū anga-aṅ nö rācha nö hateungngö ngam kuilōn re. Löktökūö ik raneh senchurī ang Yāvē nö hamūl më tarik tö 1,44,000 hòṅ cha min nö holṙen Yēsū nö hateungngö ngam kuilōn ò.—Inm. 5:9, 10.

13. Asūp inlahen Yāvē töngamuh ngaich hòṅ asuh öp inlahen hī öi kahěng tak?

¹³ Ngaich ang Yāvē töngamuh nö hamūl më tö kiröng kiteum hēk haköpten cha inrē hòṅ cha nö örheūheu nö aṅ nö ing panam. (Inm. 7:9, 10; Yāk. 2:8) Yē hī öi meuk inlahen më tarik nöng vī minë tinṙōlen cha-a nö ihòi höö. Kunyaha elmat cha-a tö höö hēk keuheūtngöre chūök inrē ngam kinyūngö. Hangenlōn pöri më tö kiröng kiteum tö taṙòkhöre tarik hēk öt kunyaha elmat cha-a tö më tarik pòrô nö kö pumnāmöre hēk tum mi-ëlô inrē. Ngaich ‘röm nup fël re cha-a nö kunköh tumlat.’ (Mai. 4:3) Ngaich më tarik ing panam töngamuh nö kētöre nö in minë kinyūngö nö fëlngen tarik. Më tarik pöri tökiröng kiteum nö haköpten yip tahëng tö inlahen ngam tökô-en Tēv hēk tö ngam kuilōn ò inrē hòṅ cha nö teūngen tö ngam tökô-en kumchikṙen hēk teūngen inrē tö ngam tö örehūheu aṅ nö ikūö ngih panam. (1 Tim. 6:19) Acha-a yin më tarik hamòlṙen ngam pūlngö ngam Tēv, lökten më aṅ patī cha nö kunyaha elmat tö cha. Hēṙu ṙung cha-a nö kihngen tö pësa, sön pöri ang Yāvē nö chumkūöṙen tö cha nö hateungngö minë hanākten cha. (Mët. 6:25, 30-33; Lūk. 18:29, 30) Löktö in ngih ṙô in öi akahakūö tö ngam pūlngö ngam Tēv, nö tökô-en nö inyööngö ngaich löktö in e min ang Yāvē nö hateungngö ngam kuilōn re in nup yamih ṙētak.

NGAM YAMIH TÖVAI ṘĒTAK

14-15. Sitih inlahen tī ang min Yāvē nö ha-etngö ngam kinpaha?

¹⁴ Ngaich Yēsū töngamuh nö hayöng nö el halīöngö hēk röhten inrē min anga-aṅ nö hateungngö minë kinlēḵngô ngam Tēv nö in hī. (2 Kòr. 1:20) Ik 1914 ang Yāvē nö mihôiṅ tö yik lā-alre. (Sal. 110:1, 2) Ngaich röhten min anga-aṅ hēk nö ha-etngen më tötlöök tarik ngaich ‘hateungngö ngam mihôiṅyö re min anga-aṅ.’—Inm. 6:2.

¹⁵ Yik tö kapah pöri nö ngaich, ha-aṅlen cha min ang Yēsū nö in ngam inyööngö töhěng köiny samyeūheu. Ngaich ip hē min yip tarik hamang chööngö Yāvē, nö hiṙeutkö inlahen re min nö ha-etlöng möl min ngam manā-aṅ kinlaha. Hē e min yip tarik töchiplö nö löklōn Yāvē, ngaich acha-a min tö ‘amīnu tö ngih panam hēk örheūheu inrē min nö aṅ nö ikūö e.’ (Sal. 37:10, 11, 29) Kô-en min nö keuheūtngöre chūök ngam ṙanamlōn nö ikūö ngih panam yēḵ ngam ‘manā-aṅ tökunyaha’ elmat tö hī, ngam kinpaha min nö ha-ëti.—1 Kòr. 15:26.

16. Asuh öp tökiröng lāinyngen hī öi chiplö i linöökö lōn ngam Yāvē?

¹⁶ In ngih ātiköl in taheui öi ngëichken minë tö lūöi inlahen hī ṙatö-ellōnre töre min öi mihôiṅ örheūheu aṅ. Hē e min ayī-ö öi hökkö ngam maheukköre nö teungtakūö. Ngaich yěi fēkö ngam maheukköre min ngaich mihôiṅ öi chiplö i linöökö lōn Yāvē pòrô nö yih minë kanihngen hī. Rö-ö pöri angū-ö nö kūö hī hòṅ teūngen tö ngam tö örheūheu aṅ nômö lökten öi chiplö lök lōn Yāvē. Pön kūö ngam tökiröng angū-ö hanangenlōn hī tö nā Yāvē nā Yēsū. (2 Kòr. 5:14, 15) Angū-ö lāinyngen hī inrē öi pītnyöre öi asīnken cha hēk holtö nganötöre inrē öi vë-eny nang yip tarik tö inlahen ngam maheukköre. (Rōm. 10:13-15) Hö-ö inrē ayī-ö öi höng fēköre pöi vë-eny nang yip tahëng inrē tö ngam kuilōn Yāvē, in e min ang Yāvē nö ṙamlōn nö in hī ngaich lōnu inrē min anga-aṅ tö örheūheu öi hanôlö ò.—Hep. 13:16.

17. Hòṅ asuh öp min tö hòṅ inlahen hī? (Mëtiv 7:13, 14)

¹⁷ Ngaich ang Yāvē töngamuh nö kētö ṙētak hī öi teūngen tö ngam tö nômö örheūheu aṅ. Lökten yē hī hòṅ teūngen tö e ngaich hòṅ lök in ngam talöökö nômö ayī-ö. (Vë-evkūö Mëtiv 7:13, 14.) Yē hī min öi örheūheu aṅ ikūö öp tufömngöre panam, ngaich sitih inlahen min ngam tinrīkngen hī? In öp yamih ātiköl min öi mikahtökūö re.