Höngöre Tö Yanīhi Ngam Sakāmö Yāvē

1. Sitih inlahen öi yěi sō kò-òngvah tö ngam sakāmö Yāvē?

NGAM sakāmö Yāvē tö vënyu imat ngam Paipöl, tö ngö manah angū-ö tö e nö ṙētak ò nö ha-etngen yip tö kunyaha elmat tö ò, ngaich laklö yip tarik re. (Isa. 13:1, 6; Isi. 13:5; Sef. 1:8) Ṙōlheuh ang Yāvē misī nö ha-etngen yik tö kunyaha elmat tö ò. Ngatī min inrē ngam sakāmö ò nö rultenre nö ikūö ngam tökiröng Pëpilön ip Armakētòn. Yěi lōnu töre öi öt kò-òngvah ip sakāmö ò, ngaich hòṅ höngöre ayī-ö. Ngatī ṙô inrē ang Yēsū nö vënyö inlahen ngam sakāmö nö in yik haköptöre. Chumkūöṙen tö ṙô ò nö öt ngö ṙô hīnöre yin tö ngam tökiröng kanihngen, pön ngö ṙô anga-aṅ lēntöhëichṙen yī-ö inrē—Mët. 24:21; Lūk. 12:40.

2. Kūö yòh öi hòṅ chumkūöṙen tö ngam raneh chitri yik Kristīön aṅ Tösalònikē kahūich Pôl?

² Ngam raneh chitri yik Kristīön aṅ Tösalònikē kahūich Pôl, nö vënyö inlahen ngam tökiröng sakāmö Yāvē. Pōyen nuk inchō elmat kahëtö ò nö mikahtö elmat cha nö sitih inlahen nö lēntöhëichṙen im sakāmö ngam Tēv. Akahakūö pöri ang Pôl tö öp sakāmö nö rö-ö nö im hē e nö yih. (2 Tös. 2:1-3) Sön pöri anga-aṅ nö vënyö nang yik holmaneukre, tö cha nö hòṅ lēntöhëichṙen ip hē ngam sakāmö nö sā inlahen yamih angū-ö ip huṙöch. Pōyen haköplö in inrē ayī-ö töngamuh in minë vahënyö ò. Ta-a töi chumkūöṙen öi ngëichken në tö lūöi in minë kahūich ò chitri: (1) Sitih inlahen yanīhi öp min sakāmö Yāvē, (2) Achīö yip min töt kò-òngvah ip hē öp sakāmö ò, hēk (3) Sitih inlahen öi mihôiṅ höngöre ip hē öp sakāmö ò.

SITIH INLAHEN YANĪHIH ÖP MIN SAKĀMÖ YĀVĒ?

3. Kūö yòh öi mihôiṅ ngöṙô tö ngam sakāmö Yāvē nö sā yanīhih öp mu-ulāya tö hatööm? (Ngëichköm nyat.)

³ “Sā yanīhih ngòh mū-ulāya tö hatööm.” (1 Tös. 5:2) Angū-ö ngih raneh in minë tö lūöi inchō elmat vahënyö Pôl tö inlahen öp sakāmö Yāvē. Hē el chūöl hatööm ngòh mu-ulāya ip hē ngam töt mufē yip tarik nö haveutṙenre nö in öp la-enre. Ngatī yanīhih öp min sakāmö Yāvē, ngaich pingangkūö min yip tarik yěn yih angū-ö. Asā vaneūta yanīhih ngam sakāmö ngaich lohten min yip tökô-en Kristīön nö pingangkūö nö meūkö e. Ṙētak yip tötlöök tarik yip tölöök tarik pöri min angū-ö nö ha-ëtiyö, ngaich laklö yip tarikre min ang Yāvē.

4. Sitih inlahen öng ngam sakāmö Yāvē nö sā inlahen ngam kikānö kamyônyö nyīö?

⁴ “Sā ngòh kikānö kamyôḵnyö nyīö.” (1 Tös. 5:3) Öt akahakūö ön ngòh tö puyoōö töp ṙētakre nö chök, akahakūö pöri anga-aṅ tö e nö öthō nö öt ngatī. Yěn yih pöri öp ṙētak ò nö chök ngaich ötkô angū-ö nö ansökngen. Ngatī ṙēngen inrē ayī-ö öi öt akahakūö tö yanīhih öp ṙētak sakāmö Yāvē, akahakūö pöri ayī-ö tö e nö öthō min nö öt yih. Ngaich yěn yih min angū-ö ngaich rötta yanīhih min angū-ö nö maha-etngen yip tötlöök.

5. Sitih inlahen öng ngam tökiröng kanihngen nö sā inlahen yanāngö ngam sakāmö?

⁵ Sā yanāngö ngam sakāmö. Ngam linūöyö inchō elmat vahënyö Pôl, vënyu inlahen inrē ngam mu-ulāya nö in e. Haṙongtu pöri ngam sakāmö Yāvē nö in ngam yanāngö ngam sakāmö. (1 Tös. 5:4) Yip tarik mu-ulāya nö el chūöl hatööm ngaich ma-anyre cha-a nö hamūl minë chehen nöng öt akahngen ngam ṙētak. Öt akahaiṙen cha-a tö yanīhih ngam peūheu hönglöö ngaich cha-a nöng kē-ě. Sā ṙēngen mu-ulāya yin töngamuh më rīkre tarik nö iṙūöhen nö la-evṙen tö minë tötlöng nöng sā ṙēngen öp mi-iyöng el sinngūlö. Ngaich yěn yih pöri min ngam tökiröng kanihngen ngaich hē e min cha-a nö kôtī. Hīnöre pöri min ayī-ö ip sakāmö Yāvē. Ta-a chěi töi ṙūöhöngre tö nup la-en nup sahō-o Yāvē. Iṙūöhen pöri lök in nup taṙòkhöre tölöök hēk öt michūṙen ngaich “iṙūöhen lök el ngam kanô-en.” (Efi. 5:8-12) Nët hēk minë inchō elmat kahëtö Pôl vinënyö inlahen yip tö kò-òngvah ip sakāmö Yāvē.

ACHĪÖ YIP MIN TÖKÒ-ÒNGVAH IP SAKĀMÖ YĀVĒ?

6. Tö sitih manah öng ngam inlahen yip tarik töngamuh nö mahaṙòh? (1 Tösalònikē 5:6, 7)

⁶ “Vē mahaṙòh.” (Vë-evkūö 1 Tösalònikē 5:6, 7.) Asātu yin vē tökò-òngvah tarik ip sakāmö Yāvē nö in yip mahaṙòh. Yip tarik töng mahaṙòh, öt akahaiṙen cha-a tö chanūhu ngam ṙētak, ötrēhěn nöng akahaiṙen tö nup i taseū re. Lökten cha-a nö öt heūveuen nö kēken nup tö hòṅ kēkaṙen pön öt hēngö mikahngen. Pōyen yip tarik töngamuh töng sā ṙengen mahaṙòh. (Rōm. 11:8) Lökten cha-a nöng öt akahaiṙen tö hī öi el ngih “manā-aṅ sakāmö” ngaich veutta yanīhih min öp tökiröng kanihngen. Yěn yih min nup tö tökiröng kanihngen ngaich pi-a lohten cha-a nö akahaiṙen ngaich hòṅ lōnu töre nö hang ngam tölöök inhangkö ngam Pūlngö. Pōyen pöri yip tarik töt lökngöre, höng iṙūöhö mat cha-a nöng haṙòh. Ōt pöri yip ṙamatö-ellōnre tö ngam Tēv min nö örhō nö öt kēngen yip tötlöök tarik, ngö lōn pöri cha-a tö ngam sakāmö nö öl nö yih. (2 Pīt. 3:3, 4) Akahakūö pöri ayī-ö tö chanūhu ngam ṙētak lökten nö töt ṙanāngen ngam inlahen hī öi hang minë inlēnö tö kētu imat ngam Paipöl ngaich hīnöre.

7. Sitih inlahen yip tarik tö ha-ëti tö ngam Tēv nö asātu nö in yip töng mihiyōi?

⁷ “Vē mihiyōi.” Yip tarik min tö ha-eti tö ngam Tēv, asātu cha-a tö Pôl nö in yip tö hiyōi. Yip tarik tö hiyōi ngaich öt ilööṙen cha-a nö kētöre hēk ötlööngö kahë inrē tö fësla re. Ngatī inlahen yip tölöök tarik nö öt chumkūöṙen tö ngam Tēv nö kētö ṙētak cha. Pön in nup tinrīken cha-a nö hameuktöre nöng chamuh in ngam kinëngö cha. Vë-evkūö pöri më Kristīön tö cha nö hōtu nö höngöre. (1 Tös. 5:6) Hěngtak ök ihih tö pōihöl nö haköp nö vënyö ṙô ngam Paipöl tö manah ngam hinööngöre, ‘holtö lanāmö re hēk lööngö mufē inrē, hòṅ hī chumkūöṙen lööngö katöllö.’ Kūö yòh öi hòṅ īnu tö ngam lanāmö hēk lööngö mufē? Kūö hī öi öt hòṅ mūlta in më mahayöng hēk in minë la-en më tarik inrē. Asā ranöhta yanīhih ngam sakāmö Yāvē ngaich mihôiṅ min öi ṙūöhlöng alaha öi lā-rītö më mahayöng. Ötkô pöri min ayī-ö öi pa-ekūö ip ṙētak. Pön kētö ngam töhet kumlēḵre min ngam Tēv nö mahayööken hī ngaich teūngen min ayī-ö tö lanāmö elkuilōn re ngaich löngö mufē min ayī-ö hēk löngö kahë inrē tö fëslare.—Lūk. 12:11, 12.

SITIH INLAHEN ÖI HĪNÖRE TÖ NGAM SAKĀMÖ YĀVĒ?

8. Asūp tö vënyu inchō elmat in ngam tö 1 Tösalònikē 5:8 inlahen hī öi hòṅ höngöre? (Ngëichköm nyat.)

⁸ ‘Hayutlöre tö ngam. . . lanak elngòh töm . . . sapīöv.’ Asā tu yin më Kristīön tö Pôl nö in më kumyung, më hamöngöre nö halēnken öp kinyungö. (Vë-evkūö 1 Tösalònikē 5:8.) Örheūheu ang ngòh töhěngtak kumyung nö hīnöre töp ṙētak ngam kinyungö. Ngatī ṙēngen in ayī-ö öi hòṅ örheūheu öi höngöre töp yanīhi ngam sakāmö Yāvē öi hayutlöre tö ngam lanak elngòh ngam mikah hēk töm hanangenlōn, ngaich sapīövlöre töm mineūka. Ta-a töi ngëichkö inlahenre öi sitih inlahen öi teūngen tö inyöökenre öi löktö im ṙinatö-ellōn, hanangenlōn hēk mineūka inrē.

9. Sitih inlahen öi laklöng yěi īnu tö ngam ṙinatö-ellōn?

⁹ Laklöre an ngam ellōn ngam kumyung yěn hayutlöre anga-aṅ tö ngam lanak elngòh. Ngatī ṙēngen inrē ayī-ö öi laklö ngam ellōnre yěi aṅhav in tö ngam mikah hēk hanangenlōn, ngaich iṙūöhen min ayī-ö löklōn Yāvē hēk tömköröön Yēsū inrē. Yēḵ hī öi īnu tö ngam ṙinatö-ellōn öi holtö ellōnre chöhö Yāvē, ngaich teūngen min ayī-ö tö inkôlò re. (Hep. 11:6) Yēḵ hī min öi īnu tö ngam ṙinatö-ellōn ngaich haköpngöre min öi in ngam machōkūöre ang Yēsū, pòrô nö pōyen nup kanihngen hī. Sitih inlahen öi mihôiṅ asīöp ngam ṙinatö-ellōnre, hòṅ hī öi la-al nup kanihngenre? Mihôiṅ in öi chumkūöṙen ngëichkö inlahen yip prötör sistör töngamuh, yip tö chiplö nö i linökölōn Yāvē pòrô nö hakihtuṙen hēk urěhlö ngam Pūlngö ò inrē nö i nup tinrīkenre. Ngatī inlahen ayī-ö öi öt fachūrit nup kanôlò.b

10. Sitih inlahen öi öt ṙākenre kūö ngam hanangenlōn hī töm Tēv?

¹⁰ Hòṅ īnu in tö ngam hanangenlōn yēḵ hī hòṅ höngöre hēk aṅhaṅti inrē. (Mët. 22:37-39) Pōyen nup kanihngen hī yěi ahangkö ngam tölöök inhānga, hanangenlōn pöri ayī-ö tö ngam Tēv lökten öi öt heūlngöre öi iṙūöhen im inhangköm tölöök Inhānga. (2 Tim. 1:7, 8) Hangenlōn inrē ayī-ö tö yip tarik yip töt hangenlōn tö Yāvē, lökten ayī-ö öi chuh in nup kamngö öi ahangkö ngam tölöök inhānga, mihôiṅ inrē ayī-ö öi löktö in nup chitri hēk löktö el fūn inrē öi vë-eny nang cha. Öt ṙāngö ngam kuilōnre ayī-ö tö yip holre min nö öthō nö öt halööktitre, ngaich kētöre min cha-a nö kēken nup tölöök la-en.—Isi. 18:27, 28.

11. Asuh öp min inlahen hī yěi hangenlōn tö më prötör sistör re? (1 Tösalònikē 5:11)

¹¹ Hòṅ hangenlōn in tö më prötör sistör re, pön sā ṙēngen holmaneuk hī cha-a. Mihôiṅ in öi hameuktö ngam hangenlōnre öi ‘hareuskö alaha höö hēk hangönken höö inrē.’ (Vë-evkūö 1 Tösalònikē 5:11.) Sā yip kumyung nö holṙen höö yěn kiyung, ngatī ṙēngen ayī-ö öi holṙen yip prötör sistör re öi kö hangönken höö öi im linöklōn ngam Tēv. Hēṙu pöri ṙung yip kumyung nöng chökhutī tö höö, hö-ö pöri cha-a nö tölngenre. Ngatī in inrē ayī-ö ṙung öi öt tölngenre öi haṙivlōn tī tö yip prötör sistör re, öt rēhěn öi havahalvah re. (1 Tös. 5:13, 15) Hěng hēk ngam inlahen hī öi hameuktö hanangenlōnre öi milēḵṙen tö më prötör mahayōmken hī el minë māṅ. (1 Tös. 5:12) Ik sā Pôl nö kūich ngam raneh chitri yik aṅ Tösalònikē, öl rēhěn ngam māṅ nö samyeūheuv ngaich lohten nö öt yaha ṙôken ekspirīön yip prötör mahayōmken ngam māṅ. Lohten inrē nö ōt nup vanāchö cha, sön pöri cha-a nö ma-ainyre nö la-evṙen. Lökten öre nö hòṅ milēḵṙen yip prötör sistör tö cha. Asuh öp haköplö hī? Asā ranöhta ngam tökiröng kanihngen, ngaich lohten ayī-ö öi hayönglenre in minë inlēnö kahëtö më minṙöinylen. Pöi pi-a lohten öi öt teūngen vë-ekūö yip prötör el ngam vöörlt hëtkôtör hēk mupakö òfis. Lökten in öi hòṅ löktö kūö ing töngamuh öi hameuktö hangenlōnre hēk minlēḵṙen re tö cha. Tā-a chěi töi höngöre öi ui ngëichkö vanāichö më prötör, kööpölōn pöri tö Yāvē nö mahachōkūö hī.

12. Sitih inlahen öng ngam mufē hī nö laklöng yěi īnu tö maheūkköre?

¹² Sā ngam kumyung nö laklöre ngam kui ò yěn sapīövu, ngatī ngam mufē hī nö laklöng yěi chumkūöṙen mat ngëichken ngam maheūkköre. Kô-en an ngam maheūkkö hī, lökten öi akahalōn tö nup kinlēḵngô ṙô ngih panam nö töng yanëngen. (Filip. 3:8) Kūö ngam maheūkköre ayī-ö öi īnu tö ngam lanāmö elkuilōn hēk lööngö mufē inrē. Ngatī inlahen nan nā Vôles nā Lôrintā minā lamöklōn ngam Tēv nö i Afrikā. El hôi ngam tö lūöi afta ngam yöng prötör Vôles kikōnyö hēk töm yöng sistör Lôrintā kikānö nö Kapah. Ik hē ngam tökiröng invah COVID-19 nö keuheūtngöre chūök. Angū-ö lāinyngen cha nö öt chuh in yik mikūönöre ik sā ngam kanihngen. Ngö ṙô tī ang prötör Vôles nö kūich: “Maheūkkūö in tö cha min nö hachohlöng, lökten chū-ö öich öt höng fēkö ngam inlahen cha i ngih manā-aṅ sakāmö. Pöich fēkö öp tufömngöre panam min ip hē cha min nö hachohlöng ngaich iṙôken kumchikṙen min cha-a. Yēḵ chu öich haṙivlōn öich fēken cha, ngaich mihôiṅ öich ṙāpöre kūö ngam maheūkköre.”

13. Asuh öp inlahen hī mihôiṅ yěi hòṅ teūngen tö ngam töhet fanöinylö?

¹³ “Un hanyāngi ngam Töhet Fanöinylö.” (1 Tös. 5:19) Asāten ngam töhet fanöinylö ang Pôl nö in ngam tameūyö ngam tö hū nö la tuhēt. Yěn kē-ěkūö hī ngam Tēv tö ngam töhet fanöinylöre, ngaich ṙūöhlöre alaha ayī-ö öi kēken nup tölöng la-en hēk holtö ellōnre inrē öi löklōn Yāvē. (Rōm. 12:11) Hòṅ sitih inlahen öi yěi hòṅ teūngen tö ngam töhet fanöinylö? Hòṅ vë-ekūötēv ayī-ö, hòṅ haköp ngam ṙô ngam Tēv, hēk lök in minë inchōkūöre inrē tö ngam töhet fanöinylö, öi mihôiṅ köp im söngkötön ò. Yěi ngatī inlahen min ngaich asīöp nup ṙòng ngam töhet fanöinylö min ayī-ö nup tinrīken ngam Tēv.—Kal. 5:22, 23.

14. Asūp tö hòṅ chumkūöṙen hī yěi hòṅ teūngen tö ngam töhet kumlēḵ ngam Tēv? (Ngëichköm nyat.)

¹⁴ Yěn kē-ěkūö hī ngam Tēv tö ngam töhet fanöinylö, ngaich hòṅ chumkūöṙen ayī-ö tö e nö un nyangngö. Kētö ngam töhet fanöinylöre an Yāvē nö in yip tarik ma-afēka nup tölöök ṙô hēk tövayö tinrīken inrē. Yēḵ hī pöri öi fēkö nup tötlöök ṙô ngaich la-evṙen tö u, ngaich öt kē-ěkūö hī min anga-aṅ tö ngam töhet kumlēḵre. (1 Tös. 4:7, 8) Yěi lōnu töre örheūheu kē-ěvkūö tö ngam töhet kumlēḵ, ngaich ötkô ayī-ö ‘minônngö minë tö-eūka kinlēḵngô.’ (1 Tös. 5:20) Ngam ṙô ‘tö-eūka kinlēḵngô’ tö ngö manah angū-ö tö inlahen ngam Tēv nö löktö im töhet kumlēḵre tī nö kūichhöt nup ṙô. Tö sā inlahen vinënyö ngam sakāmö hēk ranöhta yanīhi e inrē. Lökten ayī-ö ötkô ngölōn tö ngam Armakētòn min nö hāṅti yanīhi hēk höng öt yih inrē. Höng hòṅ afēken e pöri ayī-ö nö veuttī yanīhi nö römöng pōitöre yanīhi. Lökten yēḵ hī min vayö tinrīken ngaich mihôiṅ min ayī-ö ngatī inlahen, kaheuk sakāmö inrē min öi ha-öiny ngam Tēv inup la-enre.—2 Pīt. 3:11, 12.

“KALAH I TÖKEUHEŪTTÖRE”

15. Hòṅ asuh öp inlahen hī yěi sō öi hang nup ṙô yip tötlöök ma-ahānga? (1 Tösalònikē 5:21)

¹⁵ Röhta inlahen yip min tö kunyaha elmat tö ngam Tēv nö ahangken ngam ‘lanāmö hēk kumchikṙen’ inrē. (1 Tös. 5:3) Tööḵlö min ngih panam tö nup tötlöök ṙô yip ma-ahānga, ngaich pōyen min yip tarik tö halo-oikūö. (Inm. 16:13, 14) Yēḵ hī pöri min ṙāpöre i nup tökeuheūttöre, ngaich öthō min ayī-ö hang ṙô cha.” (Vë-evkūö 1 Tösalònikē 5:21.) Ngam ṙô “kalah” nö i ṙô krīk, yūsö angū-ö nö in minë kumlah humlung. Lökten yěn ōt nup ahang hī hēk haköp hī, ngaich hòṅ ngëichken u ayī-ö yěn löng hēk yěn hö-ö. Töt ṙanāngen angū-ö misī nö inlahen yik Kristīön aṅ Tösalònikē. Ngatī inrē angū-ö nö töt ṙanāngen nö in hī, asā ranöhta yanīhi ngam tökiröng kanihngen. Lökten ayī-ö ötkô höng meuchngö mat re öi ṙatö-ellōnre i ṙô yip tahëng. Hòṅ holtö mikah elmatre pöri öi la-evṙen öi ngëichken u yěn asā ṙô ngam Paipöl angū-ö hēk löktö in ngam söngkötön Yāvē inrē. Yēḵ hī min öi ngatī inlahen ngaich öthō min ayī-ö öi hang nup ṙô yip tötlöök ma-ahānga.—Inch. 14:15; 1 Tim. 4:1.

16. Asuh öp tökô-en maheūkkö hī ngaich hòṅ asuh öp inlahen hī?

¹⁶ Laklö yip tarik re an min ngam Tēv yip tö hēngö manūlö, ip tökiröng kanihngen. Öt hěng tak in hī tö akahakūö töp huṙöich. (Yāk. 4:14) Lohten öi urēhěkūö ngam tökiröng kanihngen öi kapah hēk mihôiṅ inrē öi laklöre. Mihôiṅ pöri öi ṙatö-ellōnre tö hī yěi chiplö min i linökölōn Yāvē, ngaich kē-ěkūö hī min anga-aṅ tö ngam nômö tö-örheūheu aṅ. Hol Kristū yip min tö hachāmö elkui nö hayöng nö el halīöngö, ngaich yip tahëng kiteūm min nö iyöng ikūö ngih panam yěn peretāis. Lökten öp töng yòh maheūkkö hī hòṅ chumkūöṙen ayī-ö tö e ngaich örheūheu öi höngöre tö ngam sakāmö Yāvē!