Hatön Meh

Kūö yòh nak nā Yôsěf nā Mariā nö höngngöh nö i Pētlihem nö öt havan nö chuh Nāsaret unôichrit finötnyö Yēsū?

Öt lööknyi ṙô an ngam Paipöl nö vë-eny inlahen e, ōt pöri minë minkahtölōn tökētu, öi mihôiṅ fēkö ngam inlahen cha nö kūö yòh lohten nö höngngöh nö i Pētlihem.

Hěngtak ök ma-ahānga vamë-eny nang Mariā tö ò min nö pirūkö nyīö ngaich fötnyen ò. Ik sā ò nö vë-eny nang Marīa, ngaich nëtre tak nā Mariā nā Yôsěf nö ip töhěng panam Nāsaret i Kelelī. (Lūk. 1:26-31; 2:4) Unôichrit cha ngaich nö ṙā-ang Aikup nö havan nö chuh Israel ngaich hēk cha-a nö iyöng Nāsaret. Löklö in e ang Yēsū nö kiröng ngaich kaheūkö ngaich anga-aṅ nö aṅ Nāsaret. (Mët. 2:19-23) Lökten yěn kakka ang Yēsū, Yôsěf hēk Mariā, ngaich fēkö öp panam ayī-ö Nāsaret.

Hěngtak ök hanöngkisānö Mariā, ang Ēlisöpet ök mi-iyöng Yūta. Pīhö ök tö hěngtak kūönṙô ang Sakariā. Yöng Yôhan ang Ēlisöpet ök vamôk. (Lūk. 1:5, 9, 13, 36) Chuh in Ēlisöpet ang Mariā nö i Yūta ngaich lūöi chumngëṅtö nö iyöng in ò. (Lūk. 1:39, 40, 56) In e mikahkūö ayī-ö tö Mariā nö akahakūö tö inlahen ngam kamngö i Yūta.

Unôchrit e hēk ngam chööngö hinôtö cha nö ‘kuichhöt minë-enyre ngaich ṙòkhöre nö kö chuh panamre nö kūichö tum taka.’ Lökten ang Yôsěf nö chuh Pētlihem nö ṙā-ang Nāsaret. ‘Panam Tāvit’ invëka ök Pētlihem ngaich in e ngam tö kilē-ěyö Mesayā nö fötnyu. (Lūk. 2:3, 4; 1 Sa. 17:15; 20:6; Mai. 5:2) In e ang Mariā nö fötnyen Yēsū. Hö-ö pöri ang Yôsěf nö ngö mufē tö Mariā nö kayônyen ngam kun nyīö ang Yēsū ngaich ilööṙen nö havan nö in ò nö chuh Nāsaret. Pön höng höngngöh cha-a nö i Pētlihem ngam tö machūötöre kilōmītör (6 mīl) rôvat tö Yerusalem. Lökten cha-a nö lööṙen nö kumten ngam kun nyī-ö ang Yēsū nö chuh elngam Töhët chūök hēk kētö tökētu sā ngam chööngö Môsös.—Lēv. 12:2, 6-8; Lūk. 2:22-24.

Urěh ök ma-ahānga ngam Tēv nö vë-eny nang Mariā tö ò min nö fötnyö kikōnyö nyīö ngaich kē-ěvkūö min anga-aṅ tö ngam ‘kantēra Tāvit’ ngaich ‘Hayöngken ngam Pūlngö min anga-aṅ.’ Ngaich i panam Tāvit ang Yēsū nö fötnyu. (Lūk. 1:32, 33; 2:11, 17) Angū-ö ngih lāinyngen cha lohten nö kē fësla re nö rahëichtakūö nö höngngöh nö i Pētlihem. Lohten cha-a nö ngölōn tö Yāvē min hēk nö kētö inlēnö cha töp tö hòṅ inlahen cha.

Hö-ö in akahakūö tö yik vamë-eny mu-unôich yěn chuh in cha, pön ngaich cha-a nö vai rò-òten nö i Pētlihem. Iyöng in öp töhěng patī pöri ngam mikūönö cha ngaich ṙömöng ‘nyīö’ ang Yēsū, hö-ö nö kun kun tēnö nyīö. (Mët. 2:11) In e mikahkūö ayī-ö tö cha nö öt chuh Nāsaret pön höng iyöng Pētlihem.

Ngaich kētö chööngö ang Heròt nö hōtö finëlngö ‘yik tönët höiny samyeūheu kikōnyö nyīö hēk yik ṙanëtcha inrē’ nö ṙòkhöre yik mi-i Pētlihem. (Mët. 2:16) Vë-eny nang nā Yosef na Mariā ök töhěngtak ma-ahānga ngam Tēv tö ngam chööngö, lökten cha-a nö ilööṙen nö chuh Aikup nö kumten Yēsū ngaich iyöng in e, hanöng sā Heròt nö öl nö kapah. Kūö yòh pöri cha-a unôichrit e nö öt havan nö i Pētlihem? Pön hayöng ök kūön Heròt ang Arkelās nö i Yūta, ngam töt aṙē-ělōn. Ngaich öt lōnu ang Yôsěf tö Yēsū nö hēngö kanihngen. Rö-ö nöng angū-ö pön tölṙô Yôsěf ngam Tēv nöng lēntöhechṙen, lökten anga-aṅ nö kumngen yip mikūönöre nö chuh Nāsaret. Öt hēngö kanihngen ang Yēsū nö in e ngaich vāyö inlahen inrē cha-a nö haruklen ò hēk haköpten ò tö inlahen ngam tökô-en Tēv.—Mët. 2:19-22; 13:55; Lūk. 2:39, 52.

In e mikahkūö ayī-ö tö Yôsěf nö ngaich nö kapah urěhěkūö inlahen Yēsū nö kēngö nômöre ngaich ṙòngnyö kūö talöökö yip tarik chamuh el halīöngö. Tö ngö manah angū-ö tö Yôsěf min nö ha-aṅlöng nö in öp tumfömngöre tövai panam. Ngaich pōyen min yip mameuk kūö ò hēk mikahtökūöre min tö inlahen nā Yôsěf nā nö Mariā nö kūö yòh nö höngngöh nö i Pētlihem unôichrit finötnyö Yēsū.