Yūs Ngam Paipöl Man Nö Sā Ṙēngen Tinmël

Sā ṙēngen tinmël ngam ṙô ngam Tēv vënyu tö Yāköp. Lökten in e mihôiṅ ayī-ö öi ngëichkö tinrīken öp lamā tuhēt tarikre. (Yāk. 1:22-25) Sitih inlahen pöri ayī-ö yěi hòṅ löngö tī öi yūs ngam Paipöl nö sā ṙēngen tinmël?

Chumkūöṙen yěm vë-ekūö e. Yēḵ hī min höng öt chumkūöṙen ngëichkö kūöre imat öp tinmël, ngaich lohten min ayī-ö höng öt meuk nup mum i kūöre. Ngatī ṙēngen yěi höng haveut ṙô re öi vë-ekūö ngam Paipöl, ngaich lohten min ayī-ö höng öt akahakūö töp tinrīkenre tö hòṅ halööktitvö tö hī. Lökten ön nö töt ṙanāngen ngam inlahen hī hòṅ chumkūöṙen yěi vë-ekūö ngam Paipöl hēk aṙū-uti mufē inrē öi fēkö nup ṙô e.

Un ngëichkö inlahen yip tahëng holre, ngëichköre pöri. Yěi kiṙapkö öp tinmël ṙung, ngaich meuk yip tahëng ṙung ayī-ö holre nö imat e, ngaich meukngöre mat inrē ayī-ö tö nup ötkumlē-en cha. Ngatī inlahen ṙēngen ngam inlahen hī yěi rònghöichṙen öi vë-ekūö ngam Paipöl ngaich mihôiṅ min ayī-ö öi afēkö inlahen yip tahëng holre hēk höng ngëichkö nup ötkumlē-en cha. Öt yanööluṙen pöri min ayī-ö yěi ngatī inlahen, pò hī min höng öt teungten öi halööktit nup tinrīken öp lamātuhēt tarikre.

Havai mufēre tö inlahenre. Yēḵ hī min öi höng ngamëichkö nup ötkumlē-enre imat öp tinmël, ngaich höng haṙivlōn min ayī-ö. Yěi vë-ekūö ngam Paipöl inrē ngaich ötkô ayī-ö höng afēkö nup ötkumlē-enre. Hòṅ köplōn pöri ayī-ö tö Yāvē nö öt kupītkuvö nö in hī ngaich hòṅ sā inlahen mufē Yāvē inrē ayī-ö.—Yāk. 3:17.