Jesu e dya Paxkwa ngu dikhambi do gwita

Dilembe ni dilembe, Vajudha va ti dya Paxkwa ngu ditshiku da wu 14 ka mtxima wa Nisani. Vona va txi maha toneto kasi kukhumbula ati Jehovha a nga hulukisisa tona Vaisrayeli ka wubotxhwa khe Egipta. Ka dilembe da 33, Jesu ni vapostoli vakwe va dyite Paxkwa. Mbimo yi va nga heta kudya Paxkwa, Jesu a gete tiya vapostoli vakwe: ‘Mmweyo kwanu hawa a na ni ningela ni dawa.’ Vapostoli va to karateka ngutu, se ve wotisa Jesu va txi khona: ‘I mani wa kona?’ Jesu a to khene: ‘Awu ni no m’ninga txikhwemu txiya txa dipawa ngeneyo.’ Se Jesu a to khwemula dipawa e ninga Judhasi Iskariyoti. Msana keto, Judhasi a to khukha e tsula.

Msana kova Judhasi adi tsute, Jesu a to maha mkombelo e khwemulela mapawa e ninga vapostoli, e gwita atxi khene: ‘Mbimo yi mi dyako dipawa diya khumbulani mmidi wangu awu ni no wu ningela ngu mhaka yanu.’ Se Jesu a to tshumela e maha wumwani mkombelo e teka kopo ya vhinya e ninga vapostoli vakwe. E gwita atxi khene: ‘Mbimo yi mi selako vhinya yiya khumbulani mnoha wangu awu ni no wu ningela kasiku Jehovha e divalela sionho sa votshe. Ani na mi thembisa ti to mi nava vakoma ni nani nzumani. Mahani tiya dilembe ni dilembe kasiku mi ni khumbula.’ Kala nyamsi, vagondiswa va Jesu va patana dilembe ni dilembe kasi kukhumbula ati Jesu a nga ti maha. Mtshangano wonewo wu dhanwa ku Txialakanyiso txa Lifo la Jesu.

Mbimo yi va nga heta kudya, vapostoli va to khata kulwa ngu kulava kuziva ti to i ti mani i nga ti wa lisima ngutu. Jesu a va gete tiya: ‘Awu i ku wa lisima ngutu, ngu wule asi ti woniko i di wa tshuku kupinda vamwani.’

Jesu a tshumete e womba tiya: ‘Anu mi vangana vangu. Ani ni mi gela totshe ati Tate wangu a lavako ti to ni mi gela. I singa kale, ani ni na tsula nzumani ni ya va ni Tate wangu, se anu mi na zumba hamafuni hawa. Kasiku vathu votshe ve tiziva ti to anu mi vagondiswa vangu, mi fanete kurandana nga ti ani ni nga mi randisa tona.’

Ngu magwito, Jesu a mahile wumwani mkombelo. Ene a kombete Jehovha ti to e vhikela votshe vagondiswa vakwe ni ku va vhuna ti to ve thuma kumweko ngu kurula. Jesu a tshumete e kombela ti to votshe vathu ve ziva ditina da Jehovha. Se Jesu ni vapostoli vakwe va to embelela tindando to dhumisa Jehovha, ve gwita ve tsula. Kambe se yi ti hafuhi ni kuhoka mbimo ayi Jesu a ndi no ñolwa ngu yona.