Jesu e ñolwa

Jesu ni vapostoli vakwe va tsute ka Mmango wa Miolivha. I ti hagari ka wusiku ni ku mtxima se wu txi woneka wotshe. Mbimo yi va nga hoka jaradhi ka Getsemani, Jesu a gete vapostoli vakwe ti to va si oteli. Jesu a ti karatekile ngutu, se a to khukha ahale ku nga ti ni vapostoli vakwe e tshuketanyana didhawa eya khizama e maha mkombelo, atxi khene: “Tata, ti na maheke kwangu ati u ti lavako.” Se Jehovha a to rumela ngilozi yi ya tsanisa Jesu. Msana keto, Jesu a wile e ta mana Vapostoli vakwe va di otete. Jesu a to khene: ‘Wukani! Ayiya hi nga mbimo yo otela! Valala vangu va hafuhi ni kuhoka kasiku ve ta ni ñola.’

Ku di pindile mbimonyana, Judhasi a hokile jaradhi hale a di ni vathu vavangi ava va nga ti ni matxhari ni migomba. Aku Jesu a nga txi tolovela kutsula ka wukhalo wule ni vapostoli vakwe, Judhasi a txi tiziva ti to mikama yile Jesu a ti kona kheya. Judhasi a ti langanile ni masotxhwa yale ti to a ndina va komba awu i ku ene Jesu. Se mbimo yi va nga hoka hale, Judhasi a to tshuketela Jesu eya m’nyuta. Jesu a to khene: ‘Judhasi, awe u ningela mwanana wa Txizimu ngu ku m’nyuta?’

Se Jesu a to wotisa vathu vale ti to va txi lava mani. Vona va to khona: “Hi lava Jesu wa Nazareta.” Jesu a to khene: “Ngani wuwa.” Vathu vale va to xamatiswa ngu txibindi txa Jesu, se va to xexa ve wa ngu nyatxisane. Jesu a to tshumela e va wotisa kambe ti to va txi xola mani. Vona va to khona: “Hi lava Jesu wa Nazareta.” Jesu a to va xamula atxi khene: ‘Ani se ni mi gete ti to ngani wuwa. Lekani vapostoli vangu ve tsula.’

Mbimo yi Pedro a nga wona ati ti nga txi maheka, a to somola ditxhari dakwe e wila nzeve ya dijaha adi va nga txi khona i Malkusi. Kambe, Jesu a to hanyisa nzeve ya dijaha dile. E gwita e womba tiya: ‘Pedro, tshumeta ditxhari dako. Awu a thumisako ditxhari a na dawa ngu ditxhari.’ Masotxhwa yale ma to sunga Jesu, se vapostoli vakwe va to tutuma ve pfhuka. Jesu a to tekwa e yiswa ka Anasi, nduna ya vaprista. Anasi a to ya wotisela siwotiso sasingi Jesu e gwita e m’rumela mtini ka Kayifasi Mprista wa Hombe. Se kumahekile txani ngu vapostoli?