Pedro e womba ti to a si m’zivi Jesu

Mbimo yi Jesu a nga gela vapostoli vakwe, ti to votshe va ndi na tutuma ve m’siya wusiku wule, Pedro a wombile ti to asi na kumaha eto. Kambe Jesu a gete Pedro a txi khene: ‘Wu si se emba m’kuku, awe u na womba makhambi mararu ti to khu ni zivi.’

Mbimo yi masotxhwa ma nga teka Jesu me m’yisa mtini ka Kayifasi, votshe vapostoli va to tutuma. Kambe, Pedro ni mpostoli mmwani va to londisela Jesu ngu kule. Pedro a to ya bela mtini ka Kayifasi, e tsula aha ku nga ti ni vathu ava va nga txi ora mndilo. Mbimo yi mndilo wu nga txi tura bhem, khohe ya Pedro yi to woneka. Txithumi tximwetxo txa wamsikati txi to wona Pedro txi njo khene: ‘Awe na kuziva! Nanawe u ti ni Jesu!’

Pedro a to khene: ‘Nadha, hi ngani wo ni fananisa!’ Pedro a to tekela kukhukha ahale e kongoma ditimbani. Kambe, dihorana dimwani di to m’wona di gela votshe ava va nga ti nado, di txi kha dona: ‘Dijaha diya di ti ni Jesu!’ Pedro a to xamula a txi khene: ‘Nem kha ni m’zivi Jesu wa kona!’ Se dijaha dimwani di to kha dona: ‘Awe u mmweyo wawe! Mawomba-wombelo ako ma pfala ti to u ta ngu Galileya, kufana ni Jesu.’ Ngu dikhambi da wuraru, Pedro a to khene: ‘Ani kha ni m’zivi Jesu!’

Ka yona mbimo yile, ku to emba m’kuku. Se Jesu a to tshembereka e wona Pedro. Koneho, Pedro a to khumbula ati Jesu a nga ti m’gete, se a to huma hahanze eya khata kudila ngutu.

Ka yona mbimo yile, mprista wa hombe ni majaha mamwani ma to sengeletana kasiku veya xuxisa Jesu mtini ka Kayifasi. Vona va ti mahile maplanu o lava kudaya Jesu, se va txi ngadi ve lavetela to maha kasiku ve m’ninga mnandu. Kambe kha va mana txilo txo m’ninga ngu txona mnandu, nguku Jesu a si khali kumaha timhaka to biha. Kayifasi a to wotisa Jesu a txi khene: ‘Awe u mwanana wa Txizimu kani?’ Jesu a to khene: ‘Ina.’ Se Kayifasi a to khene: ‘Kha hi nga ngadi hi txi lava timwani. Ene a ruketete Txizimu!’ Votshe vathu va to tumela, se ve womba ti to Jesu a ti fanete kudawa. Va to khata kupeketela Jesu ni ku m’thurela, ve m’vhala maso ni ku m’peketela ngu sibhakela, ve gwita va txi khona: ‘Aku awe u ku mprofeti, hi geli awu a nga kupeka!’

Mbimo yi di nga txa, Kayifasi ni mamwani majaha va to sengeletana, ve tshumela ve wotisa kambe Jesu ti to ene i ti mwanana wa Txizimu kani. Jesu a to va xamula atxi khene: ‘Anu nganu mi wombako ti to ni mwanana wa Txizimu.’ Se majaha yale ma to womba ti to Jesu a ti ni mnandu wo ruketela Txizimu. Va to m’teka ve tsula nayo nyumbani ka wukoma ka Ponsio Pilato, mkoma wa Roma. Se, ngu tihi ati ti nga gwita ti humelela?