Kudawa ka Jesu

Tinduna ta vaprista ti to teka Jesu ti tsula nayo nyumbani ka wukoma ka mkoma Pilato. Mbimo yi Pilato a nga va wotisa ti to ngu tihi ati Jesu a nga ti mahile to biha, vaprista va to khata kuwombetela timhaka tatingi to biha ngu Jesu. Va vekile ni kuwomba ti to ene atxi lava ku ti maha mkoma. Se Pilato a to wotisa Jesu a txi khene: “Awe u mkoma wa Vajudha?” Kambe Jesu a to xamula a txi khene: “Mfumo wangu hi nga wa hamafuni hawa.”

Pilato a woni ti to Jesu a sa maha timhaka to biha. Se a to m’rumela ka Herodha mkoma wa Galileya. Kambe Herodha nene a woni ti to Jesu i singa m’bihi, se ato m’tshumeta ka Pilato. Pilato a to gela vathu ti to a ndi na leka Jesu e tsula nguku a singa ni mnandu. Kambe vathu vale kha va ti tsakela toneto, va to khata kukwangula va txi khona: ‘M’daye! M’daye!’ Se masotxhwa ma to peketela Jesu ngu txisepu, me m’thurela mkhoheni me gwita me m’peketela ngu sibhakela. Ona ma to teka tshimbu ya mipa me yi txhateka hamsungo ka Jesu, me khata ku m’seka. Pilato a tshumete e gela vathu vale ti to Jesu a singa ni mnandu. Kambe vathu vale va to sinzisa ti to Jesu eya gogotelalwa haphandeni. Se Pilato a leka Jesu ti to eya dawa.

Jesu a tekilwe e tsuliswa ka wukhalo awu wu nga txi dhanwa ku i Golgota. Se va tiya m’gogotela minenge ni mawoko akwe ka phande. Jesu a to maha mkombelo a txi khene: ‘Tata, va divalele vathu vava. Vona kha va tizivi ati va ti mahako.’ Vathu vale va to simama ve seka Jesu va txi khona: ‘Kasi awe khu nga mwanana wa Txizimu! Ti hulukise, u khukha ka phandiyo.’

Didhawani ka Jesu ku ti ni txigevenga tximwani atxi txi nga di gogotetwe ka phande. Txigevenga txile txi to kombela Jesu txi txi kha txona: “Ni kombela u ni khumbula mbimo yi u no bela ka mfumo wako.” Jesu a to thembisa tiya txigevenga txile: “Awe u nava ni nani Paradhise.” Ngu txikuluveta, ku to va ni txidema txa hombe kotshe ditikoni mule kudingana maora mararu. Mariya mame wa Jesu ni vamwani vagondiswa vakwe va tiho hafuhi ni phande ayi Jesu a nga ti gogotetwe ka yona. Se Jesu a to kombela Johani ti to e khatalela Mariya ku nga mwamwakwe.

Ngu magwito, Jesu a to khene: “Se ti hetisekile!” Jesu a to namisa msungo e fa. Ka yona mbimo yile, ku to va ni kuzinginikela ka hombe ka mafu. Dithempeleni khe, dikortina adi di nga txi abanisa wukhalo wo Sawuleka ni wukhalo wo Sawuleka Ngutu di to vharuka ngu hagari. Se disotxhwa dimwedo di to kha dona: ‘Awuwa i ti mwanana wa Txizimu ngu ditshuri.’